صفاة عشر للنشمي .. اللي على ربعة أحلى من الوسمي

[حفرلوجيا]

سلام يالربع كل(ن) باسمه

كتبت موضوع ( صفاة عشر للعلة .. منكد البر على الشلة (http://www.mekshat.com/vb/showthread.php?s=&postid=78300#post78300)) .. وعقبوا الأخوان ومنهم الريس أخونا ( السمح ) وقال كملها بـ( الصفاة العشرللنشمي اللي على ربعة أحلى من الوسمي ) .. تبي الصحيح ياريس بهالعنوان أوجزت .. وأوضحت .. وأعطيت كل المعاني .. و مثل ماقالت العرب ( لاعطر بعد عروس ) .. لكن تأمر وحنا نطامر خذ :

عاد أنتم اعذروني الموضوع ذا جاء بأمر يعني ماهو نتيجة معاناة تنبع من حس الكاتب ( ليا .. المحروم ) ..

ماعلينا .. النشمي أو الشقردي أو القرم أو ( اللي تبي ).. عنده صفات بعضها مبين وبعضها مايبين إلا اذ تماست الحبال يعني مثل الذهب تزيد لمعته إذا حكيته ..

لكن خوذو بعض صفاته المعاكسة لـ(العلة ) :

1- سيارته لوهي جديدة سبيل لخوياه .. ولو جاه واحد حدود معرفته به ثلاث أيام دورة عمل بمعهد الإدارة قبل 13 سنة وقاله بغيت السيارة ابكشت كان يقول اصبر شوي ربع ساعة وأجيلك ( وينقز يغير الزيت ويفلل بنزين ويكمله بشنطة المعاميل اللي تسوى عنده حدى عياله ) .. خذ يأبو فلان عسى ماتأخرت عليك .. لا مشكور .. بس اصبر خل أوصلك بيتكم .. لا ماعليك واحد من الأخوان جاي اللحين .. ويتوزى ( ويدكه بليموزين ) .. وفوق هذا أول ماشرى السيارة نسخ درزن مفاتيح ووزعهن على شلته ( ليته رفيق(ن) لي )
2- الشلة عند التجهيز للطلعة مايشكون خيط بأبرة الا بمشورته .. ومايعرفون لستة طلبات الرحلة .. بلا والله لستتهم بـ( كور هالمطنوخ ) وفوق هذا ماينسى شي .
3- بكل شي أول من يكون جاهز .. وهو الدليلة .. ولو تشاوروا الربع على وين مكان الطلعة ماتكلم .. المهم عنده الشلة يستانسون بأي مكان ..
4- لو كانت رحلة صيد.. وهم مثلا اربعة ومعهم خمس شوازن .. والصيد فروق ( قميري وصفارى ) طول العشر أيام اللي جالسينه .. يرجع للديرة مارمى ولا فشقة .. مع انه بواردي وشفق(ن) على الصيد .. لكن وناسته يوم خوياه مبسوطين ..
5- لو جاء أمير الكشتة وحلته بقاع قليب وقاله .. ذا مكان مخيمنا كان يقول النشمي : يلله ابنزل الخيام ويردف وين طحت ياأميرنا بهالمكان ( الجخة ) مع انه ماناقصة عرف لكن ( يقدر ) لو الشغل مايصلح له.. ( توضيح : الجخة من الفعل الثلاثي ( سكبة) ماهو من أسم ( جراده ) ..
6- هو اللي يتولى الطبخ وخوياه يزهدون بغير طبخه .. ولو بدا يصلخ الخروف .. وتكلم شايب معكم ( حقنة ) وقال أطبخوا لنا قطيعات كرش ملفوفة(ن) بمصران ( يقصد تويكس حق الشواكيش ) .. كان بعد مايقطع اللحم .. يتشطر ومعه الكرش وتوابعه وسطيل ماء .. وثواني منظفهن ومخلي لك الكرشة تلق .. من نظافته وترتيبه لو بغيته ورق ( هاي كوالتي ) بدل (A4 ) للطابعة مايمنع ( قرم بكلش )..
7- لو أنتم بالمخيم بالصمان عصير بالربيع وتخاطمن حولكم فروق ( الحصد ) .. وتناتقتوا تلحقونهن بالسيارات هو الوحيد اللي يقعد وما ترجعون الا هو صاف(ن) لكم الدلال .. يبي يقهويكم ..
8- فروته .. يشيله معه بالطلعة ولا يلبسه حتى بزمهرير البرد ( الطلعات ماتخلى من اللي ماجود روحة بالملابس ونشمينا دايم متبرع بأغراضة الخاصة)
9- يطلع عقب ماينامون الشلة بعد السمرة من المخيم يتفقد السيارات والأشياء اللي برا . وهو آخر واحد ينام ( بجنب الباب ) وأول من يقوم الفجر .. وعقب الصلاة تكتشفون انه جهز القهوة وخبز المقرصة .. وإذا بدوا خوياه ياكلون خبز المقرصة تلقاه ماسك خبزة من خبز الديرة قاعد(ن) يعلفجه ولا طرى عليه يمد ايده على اللي خبز ( إيثار حتى بالأكل )..
10- قليل أكل ومايحب كثر النوم .. ويجلس حول الدخان .. وتبداء الكشتة وتنتهي ماتعدى حدود 100 متر ( مايهدي .. كل الوقت لاقي له شغله ) .. وايديه دايما خشنة مثل الصنفرة ..
...... بس وقفت عرفت وش يقصد السمح يبيني أوصف اللي بهالمنتدى ..
العفو ياريس ذولا كلهم أكبر من ذلك .. وسلامتكم

[القماري]

حفرلوجيا ، سلمت أيدينك وأنت تنقش هالحروف على الكيبورد :good:

[laith]

عيني عليك بارده يا "حفرلوجيا"

كنك قاعد توصفني .. :D

وين نحصل هالشقردي هاب الريح .. الله يكثر من امثاله !!

شكر وتحيه خاصه مني لك يالطيب :good:

[أيمن]

والله بغيت "أبتسي:(" من وصفك لهالأسطورة التي لم أقابلها بعد .. ومن معاناته مع ربعه اللي ما يقدرون قدره ولا يحطونه فوق روسهم !!
سلمت يمينك يا "حفرولوجيا" ، وشاكرين لك هذه الدرر التي تناثر عقدها ..
متمنين لك التوفيق والسداد في الدارين ..

تحيتي

[المسفهل]

حلقت نفسي وطارت إلى عالم الميتافيزيقيا وكدت أطير خفة وطربا

لهذا الوصف الرائع والصفات الجميلة وتخيلت أنني ذلك النشمي

ثم ثابت إلي نفسي وعادت روحي من تحليقها في عالم المثاليات

فوقعت على أم رأسي في أرض الواقع وقاع الحقيقة فألفيتني

اتحسس رأسي وأضمد جراح الواقع وآسو آلام الإفاقة ...

[المربد]

والله ثم والله دمعت عيني وانا اقرأ
يا خوي سوّيـتــنـا رخوم ، ارفق بنا الله يرحم والديك

[عبدالعزيز الدباسي]

اخجلت تواضعي يا حفرلوجيا ، ما كان ودي انك تكثر علي المديح :p :p :p



يا ليت نكون هاك الرجال اللي يقدم الآخرين على نفسه ، الرجال اللي يحب لاخية ما يحب لنفسه . الرجال اللي شمعته ما تنطفي بكل الرحلة ، الرجال اللي مثل الطير بكل مكان تلقاه

الرجال ، القرم ، الخدوم النشمي الشقردي هاب الريح ،، اذا عديت الرجال عديته اولهم ، واذا نخيت الرجال ما تعديته .

يفز اذا شاف ضيوف ، ويهلي ويرحب بكل من شاف ، دلته على النار جاهزه ، وما تخلص من القهوة الا بريق الشاهي على النار يفوح .

اذا اخذتكم السوالف قام وتشطر وبدا بتجهيز الغداء ، وبدون صوت مسموع ، وما يزعج احد بكثرة طلباته ولا تدري الا قالكم تفضلوا يا الرجاجيل .

الحقيقة يا شباب ان صفات الرجل النشمي او الشقردي عديدة وكثيرة وكلنا نتمنى ان نتمثل بها او نحقق احد معانيها . فهل ننفض غبار الكسل ونبدأ بانفسنا ونجعل من هذه الصفات ما يمثل شخصياتنا .

[((( الحر)))]

تحياتي للجميع...!!!

وابلغ شي في وصف الرجل الي على ربعه احلى من الوسمي

((( انه الذي يحب لاخيه مايحب لنفسه)))

تحياتي ((( الحر)))
17/8/1424

[العزام]

هذه صفات الرجل النشمي للطلعة .

آآآآآآآآآآآآآآه والله ياجماعة طلعت مع ناس يمرضون الصاحي ويخلون العاقل خبل ويخلون الدلوله مضيعه وكل علم ردي تلقاه معهم بإمور الرحله .

الأخ حفر لوجيا ماقصر وضح كل شيء عن صفات الجيد والردي .
ولكن ياجماعة ترى أذا صار معنا واحد شقردي مانصير أنانيه ونخلي عليه كل شيء حتى ولو كان يقول لاحد يسوي شيء ومن هالحكي لازم نخدم مثل مايخدم وألا الرحله كلها دمار ولا لها طعم .وآسف على هاالإطاله.

[دغيم]

أخي حفرلوجيا
هل تظن هذا الشخص موجود الان أظن انه انقرض. ياخوي ود الواحد يصير نشمي بس بعض الشباب الله يهديه يفقع المراره بالتنبله وقل الشغل والتسدح ولايقوم يمد يده على حاجه إلى بالامر لازم تأمره علشان يشتغل والى جا السماط تلقاه أول واحد يقعد عند الاكل وهذولا كثير والنشاما قله

[السمح]

تسلم لنا والله ياحفرلوجيا
وش ذا يا خوي هو فيه أحد تجتمع فيه كل الصفات العشر ؟
طيب ما يصلح ثلاث أو أربع منهن ؟
هالنشمي ما شاء الله عليه ما خلا شي من قبل لا يفكرون بالكشتة وهو يدهر :p

عسى الله يخليك ، ومشكور على تلبية الطلب
وهذي ما هيب غريبة عليك ، على أننا ننتظر المزيد والمزيد مما تختزله موهبتكم في الكتابة

أحلى تحية

[حفرلوجيا]

أخوي القماري :
شكرا .. (( وأدري بقلبك كلام ودك تقوله )) .. بس تدري ان بعض ردودك مثل البلسم .. وفيها مابين السطور..
أخوي Laith :
شكرا ..وعيني عليك أبرد .. والشقردي تحصله مرتز( ن) بالخيمة العامة هو ونظاراته اللي تقل قاعة بيالة يدقق علينا .. ويطور الخيمة.. الله يقويه ..
أخوي أيمن
شكرا .. العفو .. هذا بعض ماعندكم .. ويمكن يكون أسطورة .. بس فيه من فيه كثير من الصفات ..والحلو مايكمل ..
أخوي المسفهل
شكرا ..أشوى إنك طحت بالقاع .. أتوقع ( الله أعلم ) انك النشمي اللي جدعه الأمير بالقليب وقال هذا مكان التخييم .. يارجل مادمت كتبت بهذا الإحساس ( المثالي ) .. أقوله بيقين لملم جراحك .. ففي تقديري انك أنت ممن يتصف بصفات النشمي..
أخوي المربد :
شكرا .. ومادام هذا ردك فخوياك مبسوطين منك أظنك من اللي ناكرين الذات ..
أخوي شقردي :
شكرا .. وفيك أكثر من ذلك يـا( ريس ).. ردك ينبض بالمسؤلية.. بس كسن إحساس ( المسؤلية ) زاد عيارة معك وقلبتها علينا ( دراما ) بالسطر الأخير من ردك .. اللي تقول فيه (فهل ننفض غبار الكسل ونبدأ بانفسنا ونجعل من هذه الصفات ما يمثل شخصياتنا ).. أبشر ياريس ابي أبدأ بنفسي ...
أخوي الحر :
شكرا .. لاشك وهذا خلق المسلم لو وعيناه وتمثلناه ..
أخوي العزام :
شكرا .. عز الله صدقت وأصبت عين الحقيقة .. الانانية هي اللي ورى كل العلوم الردية ..
أخوي دغيم :
شكرا .. بس لاتصير متشائم يمكن ماتجتمع الصفات في آن واحد لكن .. أخ ..لاتذكرني باللي ينطبق عليه قول شاعرهم :
عاداتنا عند السماطات تنشاف********* لا طار ستر مغطيات البوادي
أخوي السمح :
شكرا .. وأنت سالم .. وأنت تامر يا(ريس) .. وترى يصلح وحدة فقط من الصفات إذا كان معها ..مشرف على المنتديات يـ( أفندم) ..

[العليمي]

الله يعطيك العافيه ، وفعلاّ مجهود واضح و جبار تشكر عليه ...

[ابومراكي]

الصراحه هذا موضوع جميل وقطعه ادبيه نادره
وانا بذلك ابدي اعجابي بهذا الاسلوب الجميل الممزوج بشىء من الدعابه
التي تضفي على الموضوع مزيدا من الجمال واللمعان .
ومما زاد الموضوع جمالا هذا التفاعل وهذه الردود الجميله
فعلا انه موضوع جميل
وانا اقترح على مشرفينا الآفاضل ان ينقلوا هذا الموضوع الى خيمه المواضيع المميزه..
وايضا لا ننسى الصفات العشره للعله فهو ايضا موضوع جميل ...
وشكرا لكم

[فرد حمزة]

يمين بالله ،، ضاع التعبير مني وصفصفت غذب الكلام وألطف المشاعر

وأختلط الحابل بالنابل ،،، وتزاحم التعبير والمشاعر ،، وأحتارت الأنامل بأيهن تكتب

ولا زلت شارد الذهن أهيم في تلك الصفات

حسبي أنه قد وصل ردي إليك ، وتقبلته بما فيه من عفويه وركاكه


تحية إجلال وإكبار لقلمك الجبار

محبك

أخوك

فرد حمزة

[حفرلوجيا]

أخوي العليمي :
شكرا.. هذا من لطفك..
أخوي ابو مراكي :
شكرا .. ياأخوي نفخت راسي الله يسلم راسك .. وكملتها يوم قلت (مميزة) .. بس .. اخ .. فاتت علي نسيت أحط بالموضوع صورة ( شوزن .. وشاص ) كان تشوفه يتندح بالمميزة ..
(عاد لايروح فكركم بعيد ياللي على بالي .. خلوه يركد ) ..
بس عاد تبي الصحيح يابو مراكي .. إذا نبي نصير منصفين وبحياد .. سياسة هالمنتدى من أهم الدعائم اللي مخليته متفوق على اللي يتشبهون به.. وللموضوع طرح مستقل بس يبي رواقه.. وحنا على قدوم رمضان آخاف نفسر الكلام على خلفية الجوع والعطش ..
أخوي فرد حمزه :
شكرا .. كتابتك ( هاللون ) ومشاعرك مختلطة .. وش لون لو كانت ( سك ) .. وش يصير؟! .. عاد تصدق اني مشتاق للربيع لأسباب .. منها .. اننا نبي نتمتع بصور ساحرة منك يالعزيز .

[فرد حمزة]

حفر لوجيا

الله يرج أبليسك :D

سك !

عليك مصطلحات قشرى :p :p :p


أبشر باللي يسعدك .. بس خلني أشتر كميرى ديجتل قبل الشتاء وأبشر بسعدك