كيف نجعل عيالنا راعين بر ولا يتركون الدراسة ...؟؟

[سماوي]

بسم الله الرحمن الرحيم
السلام عليكم ورحمة الله وبركاته
أخواني ... في مكشات الرهيب ....

الصراحة موضوع يحز بنفسي بالحيل بالحيل ...
وهو موضوع أن بعض الشباب يطيح بالبر والمكاشيت والصيد و....
ولكنّه في مقتبل العمر .. يعني ما زال يدرس في المدارس النظامية أو الفنيّة أو ....

ثم يبدأ في تدني المستوى ... ويضعف ... ويهمل دروسه ... وفي الأخير إما يرسب أو يترك الدراسة ...
وأحياناً يضعف دينه ، ويخاوي ناس ( الله بالخير ) ويمكن يطيح ببلاوي ومشاكل و....

وهذا مثال حي :-
أحد أقاربي طاح بالصيد والكشتات و...وأهمل دراسته ، وأصبح راعي مشاكل .. فيوم بالسجن ويوم ماسكته الدورية ، ويوم ماسكينه البدو ورايح للإمارة ,و......... وهو الآن في الجامعة وأخوياه لهم سنين طويلة متخرّجين ...
والسبب خواته المدرسات وأخوانه اللي ما لقوا له بال .....
إلا إنهم يتوسطون له بالدراسة ، أو يعطونه فشق ( ذخيرة ) أو بنادق أو ......
ومعه جيب GX طبعاً من رواتب أخواته ......

حبيت نتناقش مع بعض في هذه القضية المهمّة ....
وأطرح فيها سؤال :-

كيف أعلم أولادي للبر والقنص والمكاشيت .. من دون ما يخرّب عليهم الدراسة أو العمل ..؟؟

والله يرعاكم

[المربد]

اخي الكريم سماوي
السلام عليكم
انا مشترك جديد وانت ممن لفت نظري بمواضيعك القيمة (ولا يهونون باقي الأعضاء). اخي الحبيب ان البر من مكملات شخصية الرجل. عندي ولدين ولله الحمد والمنة من الجيدين في الدراسة، ومن الحريصين على طلعات البر، بس ما يطلعون الا معي !!!!!
أهم شيء بالتربية انك ما تهمله وتـنشغل عنه سواء بالبر او في البيت، يعني تطلع للبر ثلاث اربع ايام وتتركه بالبيت هذا من اكبر الأخطاء في التربية. يا اخي لو احدنا اشترى له لعبه جديدة كان وده يقعد يلعب فيها دوم وكل ما كانت غالية زاد حرصه عليها، ومن فضل الله ان الولد يمر بمراحل يتجدد اسلوب اللعب معه ويزداد غلاه فهل عندنا اغلى من الولد في هالدنيا.
وهذه اهم واحدث ما توصل اليه التربويون في تربية الأبناء وهو ممارسة نفس الهواية بين الأب وابنه، فالنصيحة انك ما تطلع الا وتاخذه معك ورتب مع اخوياك بالطلعة يجيبون عيالهم ويصير لهم دور في الطلعة الى ان يتعرفون على بعضهم ويصيرون هم يطلعون لحالهم وانتم تزورونهم بالصمان. آسف الكلام طويل وانا بطيء بالطباعة لكن اترك المجال لبقية الإخوان.

[دله وفنجال]

السلام عليكم ...


احييك اخوي سماوي على مواضيعك الجميلة والي لها هدف واضح .


اخوي العزيز سماوي كلامك صحيح وماعلية أغبار وكلام اخوي المبرد كلام جميل ولأنة يعيش هذه الامر يعرف وشلون يتعامل معهة والمهم بلأمر هو انك تكون دائمن مع الابناء في كل وقت تقريبن وتحرص انك اتوضح لهم اهميت الدراسة والامور الاساسية من خدمة الاهل وامور المنزل وتبديت العائلة قبل تبدية النفس من يوم هو صغير لان هذا ينزرع معه لين الله ياخذ امانتة وكذلك ماراح تتعب معه اذا صار شباب ونطلق ارباطه واستقل مع ربعة لانه حاط اباله ان مستقبل الواحد ابدا علية من الروحات والجيات وصدقن اذا كان متعود على الطلعات مع الاهل والاقارب يبي يبتل وبلعكس تلقاه ماراح ينبصط الا اذا طلع مع اهلة .

ولاكن في الاخير هذا رأيي وربما اكون على غلط لاني ما عشت هذا الامر ...

اخوك الاستبنه ...

[حفرلوجيا]

ياجماعة ( بس ماهي على طريقة الاتجاه المعاكس ) .. أقول الموضوع هذا تراه مهم جدا لو بتلتوا تطرحونه .. وعندي راي في جانب محدد أوضحه بالتالي :
1- البر والطلعات هواية .. وفيه فرق بين الدشير اللي يضيعون الوقت ( لمين ) تجي الطلعة ..وبين اللي يهوى البر ..
ولو كان الولد يهوى ( البر أو غيره ) وانشغل عن الدراسة .. ضاع بـ( البر أو بغيره)
2- مسألة انك ترغب ولدك بالبر بالشكل المفيد .. يرجع لك ..كيف ؟
الولد أحيانا يقلد أبوه لو ماله رغبة ( هواية) .. وأنت إذا اكتشفت ان عنده رغبة شجعه بما يـ( خشنه ).. ويعلمه على الاعتماد على النفس .. واذا تقدم به السن أرخ المخبات .. اشتر له اللي يبي ..ولكن كيف تشجع وبـ(حرص ) ؟ أيضا أوضح بالتالي :
1- راقب ..
تابع ..
راقب ..
تابع .. ( ودي أبتل بهالكلمتين) ..من هم شلته .. ودقق عليه ..
2- في مراحل السن الأولى تكون روحاته وجياته معك ( وعلى بلاطة.. خاصة إذا كان أطخم..الله يحفظ ماعندكم ) .. نعم ( الدشير .. قشران ) .. لمين يكبر ويتخرج من هالمنعطف ..
3- اشتر له حاجات خاصة وهو بأول الطعش ( شنطة معاميل صغيره .. عدة طبخ وشوي على قده ..وغيرهن ) ولاتقول كل ذولي معي وشو له التبذير ( يامال الغناة ) .. خله ينبسط و( يتميلح ) بهن قدام اخوانه واللي بسنه من قرايبه ..
4- اذا بأول الطعش وجاك يوم الأربعاء وقال ودي أطلع مع عيال عمي .. وأنت مواعد الزقرت من عام الأول على بكرا الخميس ( تكشتون ) .. قل له ( سم ) وإعتذر من الزقرت ( ايه ماهم نافعينك ان ضاع ولدك .. واترك عنك عيارتهم ) .. صبح الخميس الله يسلمك خذه مع شلته من القرايب والجيران الطيبين .. وما يكون من الكبار الا انت ( على شان ماتنحرج بواحد علة يبعص كشتة العييل ) .. واذا وصلتو مكان الكشتة خل معك شي(ن) تنشغل به .. يعني الله لايهينك تشطر شوي واقعد نغبق(ز) بالقارمن أو شي (ن) ثاني .. وخل ولدك ( سنايدك) يصير أمير ويتعلم القيادة والمسئولية..
يعني لاحظ انك بهالحالة دورك ( سواق ) بس بدون ( اقامة)
عموما ودي أهذري بهالموضوع بس أبعطي المكرفون زميل آخر...

خاص لأخوي سماوي :
أفكارك كثير من الأحيان بـ( الثمانيات ) .. وفيها حرارة و( عمق) .. لكن بعض المرات الـ( عمق ) بشكل علني يوجع.. سلمت لأخوك..

[المربد]

ام العيال زعلانة تقول ما عندك غير هالشلة اللي طايح بهم هاليام (سماوي ، حفرلوجيا، باقي الأعضاء الكرام) لأنها كلما تدخل المكتب تلقاني فاتح مكشات واقرأ.

اخوي حفر لوجيا والله انك صادق وهذا اللي ينبغي ان ننتبه له واحسن ما عجبني:

(.. وأنت مواعد الزقرت من عام الأول على بكرا الخميس ( تكشتون ) .. قل له ( سم ) وإعتذر من الزقرت ( ايه ماهم نافعينك ان ضاع ولدك .. واترك عنك عيارتهم )

هذا اهم شيء انك تجعل اغلى ما عندك اول اهتماماتك وغيرها كله ملحوق.