ابي شوركم ياجماعة الخير ....

[walyd991]

بسم الله الرحمن الرحيم

قدر الله وطلعت للثمامه يوم السبت الماضي انا وصاحب السياره الجيب نيسان بايثفايندر وغرزنا في بداية الطعوس ولا دخلنا في العمق ...

حاولنا بالطلوع ماقدرنا حتى بالدبل .. وفي الاخير تعلقت السياره علينا ..

القهر ان سيارات صغيره داخل الطعوس .. وحنا مغرزين ..

بدأ المسعفون بالتوافد والله ماقصروا الله يعطيهم العافيه وخففنا الهواء الى 20 ومع ذلك ماطلع ..

وجانا جيب( شنب) قديم موديل 80 ماشاء الله تبارك الله وسحبنا وطلعنا من الغراز بدون اي جهد يذكر من هذا الشنب ...

الزبده ... كل اللي فزعوا وحاولوا يطلعونا يقولون وش تبي في هذه السياره رغم انها موديل 2007 توماتيك .. خوينا من وقتها كره السياره وقرر يبيعها ...

ولكن قلت اخذ شوركم هل تنصحون اخونا ببيعها ... والا التغريز شي طبيعي ... والا ماكان عنده الخبره الكافيه في الطعوس رغم اعترافه بذلك ... ومع ذلك مصر صاحبنا على عرضه في المعارض من اجل هذا الموقف ...

اقبل ارائكم واقتراحاتكم وتوجيهاتكم والله يحفظكم ...

[راعي 2700]

هلابك اخوي وحياك الله

السالفه تصير لاي واحد ما يعرف يسوق بالنفود

والموتر يا بعدي على السواق

اذكر مره طالع مع الشيبان واحد منهم معه ددسن 82 ما به شي سليم وكان واحد منهم معه جيب لاند كروزر توه شاريه وبالنفود الددسن تمشي احسن من ممشى الجيب ..

اللي ابي اوصله لك ولخويك انه يخلي موتره معه لين يتعود عليه ويصير معه عسل
وصدقني انه راح يمدح الموتر ويعتبره افضل موتر

[ابوصنهل]

قله يذكر ربه ولا يبيعه وهذي المواقف تصير لكل انسان حتى الي يسوق صح في النفود لا تهقا انه ماقد غرز
موفق اخوي....

[علي101]

قدام عيني بايثفايندر طلع طعس ما قدر يطلعه جكسآر ولكزس والسبب من السواق

[عبدالرحمن السالم]

وخففنا الهواء الى 20 ومع ذلك ماطلع

تقول وخففنا الهواء إلى 20:eek: يعني يوم تدخل للنفود كان بالكفرات 30:confused:

ياخي نسم إلى 15 وشوف كيف الابداع وحتى لو تشبك الدبل الخفيف عادي .. لكن تدخل للنفود وكفراتك مليانه غلط وانا اخوك .. وحتى لو النفود ممطر وجايه مطر
الموتر ماعليه كلام وانا واحد من الزملاء معاه 2007 يمشي معي الصدام بالصدام وسيارتي باث2005

لايبيعه وخليه ينسم إلى 15 ويشوف كيف الابداع وعسى الله يوفقه ويوفقك يارب

[شقران نجد]

اخوي وليد هذي تصير وانا اخوك مع الكل ولكن عليك بتنسيم الكفرات قبل تدخل والمشي بالركاده واذا غرز الموتر يطلعه الواحد بالمسايس والموتر بالعكس الباث فاندر اشوفه مع الشباب من اروع ما يكون ,,,,,

تحياتي لك ولخويك

اخوك
ابونمر

[صليب الراي]

يا راجل قله يقول لا اله الا الله

مثل ما قالوا الااخوان قله ينسم الكفرات ويشوف النتيجه

[.أبوعبدالرحمن]

قله يقول لك ابو عبدالرحمن اذكر الله وانا اخوك ولا تتسرع

هذا الشيء عايدي حتى اطلق الجيوب غرزت باترولات ولاندات

حتى الشياول تغرز والدركترات المجنزرة


هذا شيء


الشيء الثاني انا استغربت انك تقول يوم عرزنا نسمنا الكفر الى 20


يعني انتوا يوم دخلتوا للنفود مانسمتوا وهذا اكبر خطأ والله لو معك سفينة برمائية

اول شيء لاشفت النفود نسم اقل شيء 10 لان الكفرات اللي في الباث فندر الـ 2007 حجرية

وليست رملية وبعدين اقعد تمخطر في هالطعوس ولازم يكون خويك عارف لوزنية الدعسة لموتره

وكأني اشوفكم الحين انكم يوم دخلتوا للطعوس وانتوا تتمشون يعني يكمن تمشون صفر

وبعدين الباث اللي معه مجنون في عزمه وراسي بالخط ومريح وشكله جميل

واعذرني على الاطالة

[سعد777]

تقول وخففنا الهواء إلى 20:eek: يعني يوم تدخل للنفود كان بالكفرات 30:confused:

ياخي نسم إلى 15 وشوف كيف الابداع وحتى لو تشبك الدبل الخفيف عادي .. لكن تدخل للنفود وكفراتك مليانه غلط وانا اخوك .. وحتى لو النفود ممطر وجايه مطر
الموتر ماعليه كلام وانا واحد من الزملاء معاه 2007 يمشي معي الصدام بالصدام وسيارتي باث2005

لايبيعه وخليه ينسم إلى 15 ويشوف كيف الابداع وعسى الله يوفقه ويوفقك يارب

مثل ماقال اخوي دحيم شرط ان يكون ذلك قبل دخوله الطعوس

[walyd991]

بيض الله وجيهكم والله يعطيكم العافيه على هذه النصائح والتوجيهات القيمه ..

وانا بدوري راح انقل آراء اخواني المكشاتيه لأخونا صاحب الجيب ... وانا ان شاء الله راح اقنعه بكلامكم واخليه يعدل عن قراره ... فهذه التوجيهات كافيه ووافيه بان يتمسك بسيارته ...

اكرر شكري لكم والله يعطيكم العافيه ...

[الكلاسك]

ههههههههه يا حليلك يؤيؤ نسمت الى 20؟؟؟؟؟ لا لا خوش تنسيمه اسمع قصدي اقراْ : لو تجيب قرندايزر ولا تنسم له ما قدر يطلع الطعوس نسم الكفر الى 10 وشوف النتيجه واذا انت تطعيسك بخط مستقيم يعني بدون لفات نسم الى 8

[الساهر2003]

اخوي كان معنا باث وكفرات الوكالة برجستون ونسمنا 20 واكيد ماراح يمشي الا بالقوه ومشينا عليها في الطريق 80 كيلو نمشي سرعة 80 والحمد لله تمام التمام وخويك لو كان معه جيب شاص او ربع راح يغرز اكيد لكن لو ولو ماتشب ضو لو نسم الى 10 على البرجستون ماراح يضرها شيي وراح يتندح في الطعوس كانه يمشي على زفت باذ الله واذا نسمة 10 بالبرجستون ماعليك سيف وطامر ماراح تقرص ولا يجيها الا العافية وراح تمشي والموتر مرتاح وتمشي احسن من اي جيب وراح تتعجب من ممشاه والايام جاية جربه واحكم ورد لنا وش صار معه ولا يبيع لان السيارة اللي معه ممتازه لن يجد مثيل لها في اغلب الميزات

[بارود برنو]

الهايلكس وهو.............. هايلكس غرز ...... حلوهههههههه:D

نسم الكفرات لين 8 وذا تبي تطعس خلها 14 لعشان لا يطلع الكفر من الجنط
والتماتيك يبيله مداراه ومحافظه

[عاشق النداوي]

السلام عليكم اخوي: ارى ان هناك كثير من الي يهوون الطعوس والتطعيس خاصه انهم يخافون يغرزون عشان مايقال انه غشيم بطعوس وارى ان هذه الضاهره انتشرت ,ثم يضع صاحب السياره اللوم على السياره انه مافيها عزم وبايخه:confused:
ولاكن اقول واكرر ان الأنسان لم يولد متعلم ولاكن ولد ليتعلم وكبر دليل عندما ولدت لاتعرف شي ابد ولاكن مع الأيام والسنين بديت تتعلم هذه الدنياء لازم تتعلم على اي شي والله الله بتنسم اهم شي انا معي جيب وخلي هواء الكفرات 10 حتى لو هو جيب لازم تنسم بعض الناس يقولون وين دبل وتنسم التنسيم اهم شي .
((وبالله التوفيق))

[احمد العوني]

الخطا عليك75% وعلى السيارة 25%(متاثر بالمرور)
واعتقد انها على السوق اكثر لان اكثر الغشمان يسئون الى السيارات اللي هم راكبينة حتى لونها طيارة ومع غشيم بتغرز والي يبغى يتاكد يروح لاقرب طعس ويشوف مع الاعتذاران كان زعل احد فانا لالاقصد احد بعينة لكن هذه هي
(الحقيقة المرة)====طلع مسلسل خليجي خخخخ وعفاكم

[shababi]

نسم الكفرات الى 15 واشبك الدبل الخفيف وبأذن الله ما راح تغرز

[عاشق الغضا]

ياخوي يالحبيب تقول نسمنا الى 20 وهذا يعتبر ماسويت شي لكن لاتدخل النفود الا بهن 10 أو اقل واذا غرزت تعال على مسئوليتي ,,,,,,,,,ومع العلم ان سيارتي بالديره وبالسفر لا تزود عن 20 هواء :eek:

[asak333]

القياده في الأراضي الرمليه الصعبة يحكمها ثلاثة أشياء(مهارة السائق50% ،ضغط الأطارات30% ، عزم السيارة وخاصة السيارات الحديثة 20%) هذا قبل التغريز أما بعد التغريز فهناك أمور أخرى تدخل كوزن السيارة والتجهيزات الفنية المساعدة

[Mohammad]

عد الى نفس المكان ولكن نسم الكفر قبل الدخول وجرب وبعدها احكم

[مقلع الرمث]

حط بالكفرات هواء 15 او 10 ومايرده شي سواء غشيم ولا مهوب غشيم وتغريز تغريزتين عشر عشرين بعدين يبدأ يعرف يسوق ويدخل النفود زي السلام عليكم بس تراء الدنيا تجااارب

[القصبي]

اهم شي السواق قائد المركبة بعض الناس لو تعطية دردعة ما شاء الله طلع بها النفوذ وبعضهم زيي انا اولهم لو تعطيهم همر كان غرزت بة في الزفت