( رفيقي السكران ) مع الأمير بالصمان

[حفرلوجيا]

سلام يالربع كل(ن) باسمه
دخلت البارح مجلس أحدالأصحاب جامع الشلة على عشاء .. جيت متأخر ولقيت واحد من الربع من ثلاث سنين ماشفته .. نسميه .. البشه .. ( واللقب يتحدث عن نفسه مايحتاج أشرح لكم ) .. ضحك لي وفز يسلم البشه ( هالنسخة المطورة من الدلخ ) .. ويقول لي : هلا ياأبو فلان يارفيق السكران ها .. ها.. ها ( ويضحك هالبشه ) .
بيني وبينكم انا مثل اللي انصفق على وجهه .. وأتلفت .. أشوى اللي بالمجلس كلهم يعرفوني .. وقطع السالفه عند دخلة الشايب ( أبو معزبنا ) وهو يقلطنا على العشاء .. وويني ووين العشاء .. وش هالسكران اللي يقصده .. أخبر ربعي كلهم مالهم بهالعلوم الشينة .. تعشوا الربع .. زادكم الله .. أكرمكم الله .. وأنا بيني وبين نفسي أقول حسبي الله عليك .. أويلاه لو يطلع الشايب وأنفرد بها( الدلخ ) وأوكله هواء .. جلسنا بعد العشاء .. وجاء الفرج .. تنهض الشايب يبي يسري .. ويتلقف البشة يقول للشايب : اصبر ياأبو فلان خل (.... يقصدني > حفرلوجيا ) يعلمك بسالفة رفيقه السكران ..
أنا خربت معي وأنطلقت مثل أم خمس ( ماتستحي يالبشة .. متى خبرتني وربعي سكارى .. وتكذب علنا وقدام هالشايب .. وقلة احترام للمجلس .. ) وعند الفشقة الخامسة ( انا حتى الآن أم خمس ) وتوي أبلقطه طيار .. وإلا يوم تغيرت ملامح وجهه .. وقال : اصبر .. اصبر .. أنا أقصد السكران اللي جانا ( بحاصبيات الصمان قبل ثلاث سنين ) ..
هو بس قال الكلمات الاخيرة ومثل اللي ضربني بمرزبة(ن) على راسي .. صح رفيقي السكران اللي بالصمان .. إيه ذكرت ..
عاد أنا وقتها تفشلت من ( البشه ) وأعتذر له .. واشوى قام الشايب وتفرقنا .. وما قلت السالفة لهم من الفشلة عقب هالزعل والنكد ..
عاد ابقول لكم السالفة اللي تضيق صدورنا ياراعين الكشتات.. بس ترى الاتصال ضعيف الأن .. ارجع لكم ( إضافة رد ) .. وألصق لكم باقي الموضوع ..

[حفرلوجيا]

أسف لإنقطاع الإتصال .. لكن خوذوا

السالفة قبل ثلاث سنين أو أكثر خيمنا شلة بالحاصبيات بالصمان ( أكيد تعرفونه ) .. وكنا مختارين فيضة صادة يقولون له ( أم الحصن ) وأول ماجيناها الضحى .. وإلى تقول ماوطاها بشر من عشر سنين .. مافيها أثر لمخلفات البشر .. وتونا بالعقرب الثانية كل شي يفتح النفس.. ولا حولنا أحد .. صار بطرف الفيضة مخيمنا ..

ويوم جاء مسيان وتطب علينا شلقة سيارات ويخيمون بالطرف الأخر .. ماعلينا .. الوضع عادي إلى الأن ..
بعد العشاء وقبل النوم .. ويطب علينا وحنا جالسين بالخيمة رجال معه مقرصة خبز وبدون سلام أو أحم أو دستور : يرفع المقرصة ويقول لنا : ( خوذوا ترى خويياي مضيعين هالمقرصة لاتقولون ماقلت لكم ) .. عمى قربت لـ(هالرجال) والا الريحة تعطعط خمر .. ( أهبوا ياخوياه اللي مضيعين المقرصة!!!)

( لحول ) وش جابه ذا.. عاد ترى أميرنا بهالكشتة حار .. ( اذا تكفرنت معه بهالحالة لو قلت له مسيك بالخير صكك مخمس .. ولو طيرت عيونك من هول الصدمة شاتك برجله وان تهورت وقلت : ليش .. توطاك بالسيارة ) .. على هالخلفيه ( الأكشن ).. قام الأمير ناصي السكران .. تلقفت أنا ومسكت السكران بيده ( اللي به المقرصة الضايعة ) .. وقلت خله هذا رفيقي .. مادري وشلون طلعت مني .. يمكن على شان هيئته ومظهره اللي يوحي إنه ماهو راعي هالحاجات ( المشكى لله ) ....

وجريت السكران برا الخيمة ( ترى الضعيف يمكن اللي جابه ريحة النار يبي الدفى وإلا أكيد ماهو دال(ن) شي ) .. لكنه يوم طلع ويلفحه الهواء مرة(ن) ثانية و( يتدحوس ) .. وصار لك سكران ثلاثي الأبعاد .. وأخذته اقديه هو ( والمقرصه ) لمخيمهم وبالطريق ( يهذري بثقة ) يقول تراني سكران أعجبك وأسمع الكلام !! ( كوبان عرف روحه ) ..

قربته مخيمهم وحذرته ان خوياي ماراح يخلون به ( مبط ابرة ) سالم ان تهور ورجع .. طمنت خوياي .. وشوي وهالسكران داخل(ن) علينا وأيضا لا سلام ويغز المقرصة ويقول : ترى خوياي مامعهم طحين خوذوا المقرصة انتم اقرصوا به .. ( أجعل ام جنيب اللي تقرصك ) .. عاد المرة ذي قام الأمير .. وطاخ .. طراق ( صفرت آذاني اللحين يوم تذكرت ) ..
أشوى تقل بغى يصحي وأجره برا الخيمة وهو يلجلج يقول لي : قال دوك خير قال مامعي مخبات ماتبون المقرصة .. ( سكران كريم ) .. وأشوى طس ..
لكن أقل من نص ساعة يوم اشتعلت السماء .. شروخ وطراطيع شمس على صواريخ ( كل بضاعة أم سعد من الطراطيع اللي بسوق الحمام بالرياض نشوفه بأم الحصن) ..
انالله وإنا اليه راجعون .. عاد اللحين وقت النوم .. وعلى هالحالة ساعة او أزود ( بس كانت فرجه لبعضنا ) .. وهجدت الحرب ..

وشوي ويبدا لك هالشعالي بلبة السماء .. عاد رح حلها اللحين سكارى ورشاشات ( ان مافطست صويب) .. وعلى أعصابنا .. وأشوى بنص الليل ارتحنا يوم جاهم فترة استرخاء كانت عبارة عن فاصل يدهرون به بالسامري ( شر أهون من شر) ..

ونقعد إلى قريب الفجر على هالسامري .. وإذا شالوا : لاتحسب اني داله عنك ناسيك .. ( قلت أنا بس يجيك رفيقي السكران هو ومقرصته )

وإذا شالوا : حيا الله اللي يغيب ويسرع الرده ( قلت بس اللحين يستنزل سكران بالرشاش مرة(ن) ثانية ..

ويشيلون : البارحة يوم العباد رقود والنوم مايطري على بالي ( طيب خلونا عيال اليلة ذي نبي ننام )...

ماطول عليكم .. صارت ليلة غثاء بالبر ماشفت مثلها .. وبعض خويانا كرهوا البر بعدها ..
جاء الصبح وقالو العقال منا شدينا .. واللي يقهرني نشد .. ومخيم هالسكارى حول الظهر تقل مقبرة مافيه حي ينغش ..
عاد ذي تعقل ياناس .. هالسوات تحصل بالبر وأنت رايح تدور الراحة ؟؟!!!!..
وسلامتكم ..

[صقر]

بارك الله فيك اخوي حفرولوجيا

والله اني قاعد انتظر الرد على احرمن الجمر ابقرا قصة رفيقك السكران

مشكور اخوي وما قـرّصت اقصد ما قصرت.

[عبدالعزيز الدباسي]

هههههههههههههههههه

اجل خويك يوم لفحه الهواء تدوحس ههههههههههههه اجل وش يسوي اذا نفخته هواء

وصار ثلاثي الابعاد وبديت ( اتقديه ) ههههههه اتخيل شكلك وهو ( متعنقط ) بثوبك

وبعدين والله انكم قشران الحين الواحد يقولكم دوكم المقرصة وتطردونه ، هذا يا بعد حيي هو اللي لازم تقهويه ، لكن المشكلة ماعندكم القهوة اللي هو يبي :p :p ، صدق معه حق يومنه يلجلج يقولكم : قال دوك خير قال مامعي مخبات ماتبون .

-------------
تسلم يالغالي على هالمشاركة اللي كلها ملح ، ،

[فرد حمزة]

هههه

أنا داخلن الموضوع وأنا متلطم

قلت أفى . . . حفرلوجيا له خويا دشير وسكارى :(

أشوى أثر السالفة صداقه توصيل من مخيمكم لمخيم الخبل

الجنط هالسكير ماسكة معه على المقررصه :D

[المتهادي]

بارك الله فيك ..........................

ســــــــــــالفه طريفه ...بس يبي لها طلعت بر ......عشــــان تحلى الجلســــه ....ولا وش رايك ؟؟

[ميراج]

الاخ حفرولوجيا الله يعطيك العافيه

والله ماعند اميركم وقت ذا الحين سكران ومعه رشاش ويقاشره اميركم والله اقشر

زين ما راح للمخيم وحط المقرصه عند اخوياه وجاب الكلاش وشرب له زود طاسة خمر وجاكم فى الخيمه

يتفاهم مع اميركم

قصه رائعه خوش طلعه

تقبل تحيات اخوك ابو طارق

[نقا هشال]

يعطيك العافيه

سالفه تفطس من الضحك

الله يعافيهم ولايبلانا

[al-nashmi]

الرسالة الأصلية كتبت بواسطة ميراج

الاخ حفرولوجيا الله يعطيك العافيه

والله ماعند اميركم وقت ذا الحين سكران ومعه رشاش ويقاشره اميركم والله اقشر

زين ما راح للمخيم وحط المقرصه عند اخوياه وجاب الكلاش وشرب له زود طاسة خمر وجاكم فى الخيمه

يتفاهم مع اميركم

قصه رائعه خوش طلعه

تقبل تحيات اخوك ابو طارق




مشكور اخونا حفر لوجيا على هالقصه المضحكه........



اخونا ميراج..... اعجبني واضحكني ردك







:D :D :D :D :D :D

[مريقب العيفار]

أخوي حفرلوجيا شكرا على هالقصة الطريفة

بس الصراحة اني ما قدرت اربط بين العنوان والسالفة

أقصد ما قدرت افهم من القصة ان رفيقك امير

ما عليش سامحني على هالبلادة

أخوك مريقب العيفار

[((( الحر)))]

اخوي حفرلوجيا....هالسلفه مهيب غريبه علي قد سمعتها قبل مده.
لذلك هي حاجتين مالهن ثالثه..>
1- اني اعرفك وسبق انك قصيت هالسالفه علي بمجلس او استراحه.
2- اني اعرف احد اخوياك بهالكشته وقص علينا هالسلفه بمجلس او استراحه.
تحياتي
اخوك ((( الحر)))

[حفرلوجيا]

الاخوان صقر .. شقردي .. المتهادي .. ميراج .. نقا هشال .. al-nashmi .. شكرا على تمليحكم للموضوع.

والله يردك سالم ياأخوي فرد حمزة..

أخوي مريقب العيفار .. شكرا بس ( الأمير ) اللي نتقصده أمير الكشته ( أكبرنا) اللي ماهو يعطي شرهة .. بس ( ينفخ )..

أخوي الحر .. شكرا .. ويشرفني والله ويشرف ربعي يوم يلتقون بك .. لكن أظن هالسالفة تمر على بعضنا من كثر( الحونش ) اللي مفسدين على غيرهم بالبر ويحسبون انهم لاطلعوا ( أحرار ) يسوون مابدى لهم من العلوم الردية..

[desprado]

قصة حلوه

الله يستر لا تصير لنا

[حفرلوجيا]

أخوي desperado :
الله يحلي أيامك .. ولايصيرلك مثل هالقصة

[المري]

خوش قصه ياحفرلوجيا


والله عاجبنى هالجملة((((( وتطب علينا شلقة سيارات ))))

شلقة من وين جبتها هالكلمه النادرة..!!!!!!!!!!!!!!!!!!!!


اخوك / المري

[حفرلوجيا]

أخوي المري :
شكرا .. اظنك تقص أثر أشياء كثيرة ماشلء الله عليك... كان المفروض استخدم كلمة تدل اني ( جذع ) .. ونخليها :
وتبطب علينا لهلمة سيارات ..... بدل شلقة سيارات

[الجوني]

هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههه
والله يأنا فطست من الضحك اقول ماتبون طحين كاااااااااااك الا والله هو كريم وانتم ماتستاهلون هالاشياء الا قال خويك قال ايش قال رفيقك السكرا(ن) الا على فكرة المقرصة اميركم هذا اشهد انه امير ليش ماقام وسحب ام خمس من السيارة وولعبهم هم وخيمتهم وشلقة (( قال ايش قال شلقة خخخ اقول ياولد عط(ن) شلقة جحه))سيارتهم وسلامتك

[حفرلوجيا]

أخوي الجوني ..شكرا .. وراك تجرجر من المواضيع القديمة .. ترى ياخوي هالأيام ماتحصل النت معي إلا شفاقة وبوقت محدود .. وإذا رديت صفت هالمواضيع تقل سرا عند خباز .. ماودنا نزعل شقردي .. همن يعاقبنا نقعد عند باب الخيمة العامة .. بس تدري إفرش حوش بيتكم اللي كاشت له قبل يومين وخله يصير خيمتنا ونجرجر المواضيع .. ومعها الأعضاء .. ووقتها نقدر نستقدم شقردي محترف أجنبي يشرف على الخيمة ( الحوش ) وقتها سو اللي تبي ..:p

[بــرق الشمال]

تشنكرااااات أخ حفرلوجيا على هيك سولافه.....:D :D

[عاشق الصحراء]

يا مني شفت موضوعك قبلي تسفت ( دخلت) و يا مني انصفت بالموضوع
يا مار افمي ناشف - اثرينن فاغرن افمي من الاهتماش ( الانفعال).:D

يا بعد حي ليتك تجي يم شبتنا -الي انا اصغرهم( يعدونن من الجذعان و انا
نصف لحيتي شيب :mad:, شيبان متهلصين ما يثورون الا على
جموعهم( قبضة اليد), ذابحتهم النميمة و التقصي عن عيوب خلق الله
و ما يقولون يالله حسن الخاتمة.
و يا ويلك لو ما تجي لم شبتهم يعدونك ما بك خير و عفن.و انا حدتني الظروف
على هكالوجيه . و لو ان جياتي لهم مخليها سطحية ( مهي ثري دايمنشن).

اقول يبو سليمان الله يونسك بالعافية. ايييه يا بعد حي , خلك على هالموال.

تحياتي لك يبو سليمان. :good:
و بالنسبة للكتابة في صفحة النترنت : انا افصل الاتصال بالانترنت و اكتب على
الوورد W , و اذا انتهيت من الموضوع فتحت صفحة الانترنت و نسخت من الوورد
الى صفحة الموضوع في المنتدى حتى اوفر ساعات الانترنت.

او طريقة اخرى: افتح الموضوع في صفحة المنتدى و عندما تصبح الصفحة
جاهزه للبدأ بالكتابة اقوم بفصل الاتصال بالانترنت و ذلك بالرعص بالماوس اليمين
على صورت شاشة التلفزيون الي تحت في tool bar و بعدين اختار
فصل( disconnect) و بعد ذلك اكتب ما اشاء حتى لو طولت في الكتابة , و
بمجرد الانتهاء ارعص على مشاهدة الموضوع او اعتماد الموضوع , و بالتالي
يظهر مربع الاتصال بالانترنت و ارعص connect و بعد قليل ينتقل الموضوع
للمنتدى .

حبيت افيد من يخسر ساعات اشتراك ما له داعي .
و تمسووو على خير .

[عروان]

الله ستر عليكم أجل من انواع الشّـباب"الناري"


ولا عقب الراشدي زين انهم ما وجهو الرشاش صوبكم. :D


ما شاء الله عليك اخوي على الاسلوب الحلو


تحياتي لك

[حفرلوجيا]

الأخوان برق الشمال وعروان : تشكرات على هيك ردود
أخوي عاشق الصحراء : شكرا ... إما الإهتماش :D :D :D حلوة .. وتدري ان أحلى مابردك اللهجة اللي انا أغلي أهلها ..
ومايحتاج تعلمنا انك شايب واضح من نصيحتك لنا في طريقتك بتحرير وتصفح الانترنت والكهرب طافي .. اجل شيبانك أكيد انهم مثل اللي قالوا عنه انه يعبي البنزين بعشر تريل وبس .. بزعمة ماله داعي التبذير.. ويشرفني أجي شبتكم .. ولو اني أخشى بعدها أوقف السيارة ولا أعبي ولا بعشرة تريل ;) .. وعاد وقتها ماني لاقي من أقوله تعال مرني نروح للشبة ..;) :p

[صقر]

وتصفح الانترنت والكهرب طافي

هههههههه

حلوة أوي

[abos3d]

الله يرجك يا حفر لوجيا رجا مبرحا نافعا غير ضار قسم باله العظيم قعدت اضحك ضحك موووووووب عادي لكن الي معجبني صدق السامري احمدوا ربكم ان ما احد منهم استنزل والا كان علوم ههههههههههههههههه الله يخليك ويحفظك ضحكتني مررررررررره

[الشبح2000]

السلام عليكم ورحمة الله وبركاته
اسم السكران ما يزعل .....
هذا اسم حمولة معروفة من وهبة تميم
كذلك اسم قرية مشهورة من قرى السر.....
وهناك حمولة في الزلفي تسمى السكران
محافظ القطيف يقاله السكران من الزلفي
وسلامتكم

[تواق]

موضوع رائع اخوي حفرلوجيا
الله يهديهم بس

يالمري شلقه كلمه نادره؟؟؟
تعال وانا اسمعك لين تمل


اخوكم / تواق

[حد السيف]

الغالي والعزيز ابو سليمان
محبوب الجميع
حفرلوجيا
الله يسعدك بالعافيهويديم عليك السعادة والصحة
وهذي اختها مادري ليش وان اقرا موضوعك تذكر البشة الصدقي اللي سافرمع قناصةبرا الديرة وبعض القناصة يحبون القهوة مثل قهوة راعي المقرصة و برا الديرة ياكثر قهاويهم مالك بطوالة الحكي دخل بعضهم القهوة بعد ماوصلو الديرة وزبنو مكان نومتهم طلب بعضهم القهوة وهات ياشرب المهم جوسارين لقو الله يكرمك ويكرم القراء نعولهم مبدلة قال وحد منهم عندنا تدورها بالمساجد يوم الجمعة وهنا يبلك تدور على القهاوي طول ليلك تدور عليها وكل ماسئلهم البشة وش تشربون قالو مايصلحلك قال طيب ابي اعرف اسمة المهم بعد حقانة واصرارة قالو لة سيدر طلعو من القهوة وقام البشة يحك قفاة من تحت قال واحد من اللي متقهوين زين نفزع قال البشة وش يقول رد رفيقة يقول امش زين قال البشة انا احسنك مشي وصلو مزبنهم وناموالا اثنين مابعد تكيفة روسهم وجلسو يتقهون وتنبة البشة من النوم قالهم احتريتوني انام حتى تشترون من القطة سيدر وتشربونة عني قال اللي جايبة تسكت والا نادينا اللي يبي يفزع تشوف فزعتة
وسلامتك


محبك اخيك
حد السيف

[سواق الشاص]

قصة ساخرة ومضحكة اخوي حفرلوجيا ، وخيالك واسع

ههههههههههههههههههههه ههههههههههههههههه ههههههههههههههه

ولكن وش تسوي بهالناص اذا ضايقوك بالبر ، والله المشكلة

يمال العافية

[بركان]

.. وأخذته اقديه هو ( والمقرصه ) لمخيمهم وبالطريق ( يهذري بثقة ) يقول تراني سكران أعجبك وأسمع الكلام !! ( كوبان عرف روحه ) ..

قربته مخيمهم وحذرته ان خوياي ماراح يخلون به ( مبط ابرة )

وسلامتكم ..

حيا الله اللي يغيب ويسرع الرده
اجل مسوي هيئة حقوق انسان في الحصبيات.

ليش ما سلمت الرجال لاميركم ينفذ فيه حكم الله.؟

خيال واسع امتعتنا بهذه السالفة اللي اول ما قريت اول سطر توقفت وطلبت من ام العيال الطيب والقهوه يوم بديت اتقهوى كملت السالفه.

[خياله]

اقول اخوي وش عرفك بطريق الصفران والبيرههههههههههههههه

[فهاد]

يالربع الرجال له اكثر من سنتين كاتب الموضوع

[مدالنظر]

كخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ خخخخخخخخخخخخخخخخخخخخخخخخخخخخخخخخخخخ

[الضاري]

الا ياحبيبي

قلب الطاسه ومسكت على المقرصه

زين اللي طلعتوا من الفيضة سليمين

["عطايا الله"]

لتصحيح المعلومه::
إسم الفيضه((أم الصحن))وليس((أم الحصن))