اخواني القروم راعين الباثفيندر جاي استشيركم وش رايكم

[الحنشولي]

اخواني الاعزاء السلام عليكم ورحمه الله وبركاته

سيارتي الباث فيندر لها ثلاث سنوات ولاغيرت الكفرات لي اسبوع وأنا ناوي

أغير كفرات الموتر شاورت زملائي بالعمل واعيال العم

وكل له راي ورأسي الحين متصدع من كثر الأراء

اللي يقول دنلوب ممتاز بس به عيب ان طبقته الداخليه ضعيفه على طول يبنشر

واللي يقول خذ برجستون نفس الوكاله

واللي يقول هنكوك يصلح بالبر والديرة .



وش رايكم أنتم اعرف واعلم واحكم

ولن اخرج عن رايكم ولكم جزيل الشكر والدعاء

[عبدالرحمن السالم]

هلا والله ومسهلا الحنشولي
انا مركب دنللوب 265/65/17 والحمد الله ماشفت منهن الا كل خير .. نفود شعيب حصى إلى تبيه والحمد الله مابهن الا العافيه ياربي لك الحمد ..
وخاصه انهن لينات وينفرشن بالنفود
شوري عليك بالدنللوب وبالتوفيق

[عجاج]

وعليكم السلام ورحمة الله
اسمع يالحنشولي الوكاد ان كل واحد يبي يمدح لك الكفرات الي هو مركب لسيارته
بمعنى ان كل واحد يركب الكفرات حسب حاجته مثل يكون راعي خطوط او راعي صيد دايم بالشعبان او راعي تطعيس بالنفود ... وانت شف حاجك واختر الكفر .
انا عن نفسي مركب برجستون لاني ابي كفر قوي للخطوط ويتحمل الحصى

وآآآسف على الاطالة

[SE.3500]

أنا مركب مشلان
ممتازة لكن غالية
قوية ولينة

[.أبوعبدالرحمن]

مشلان ممتازة لكن يعيبها سعرها الغالي بالحيل

والبرجستون صبورة لكن تكسر الظهر يابسه مرة

والهنكوك كوري ولا تدري عنه ولين مرة يعني اي حكة او ضربة حصاه يفقع الكفر بواقع تجربة

الممتاز هو الدنلوب لين في النفود مريح بالمدينة ماله صوت في الخطوط وسعره معقول

وان شاء الله الخبراء بهذا المنتدى الكبير بأعضائه يفيدونك

[نمر 33]

ما أنصحك بالدنلوب لانه مايجي نفس المقاس لازم يكون أكبر مميؤثر على السيارة يحك بالرفرف من الداخل و يوثر على القير .

أنصحك بالمشلان فيه نوع جديد يجي سعره(450 ريال) عند الوكيل الجفالي طبعا غير الي بي(620ريال) فرق بلد المنشئ و النقشه و ميزته ضمان مفتوح
أو هنكوك وإذا كنت تبي الرخيص خذ ماكساس
أهم شي لاتركب أكبر من مقاس الوكلة

[ابو سعد التميمي]

نصيحه ركب نفس مقاس الوكااااااااااااااااااااااااااااله لاتركب اكبر لانه بيصرف بنزين ويحك في الرفرف

وعلى حسب استعمالك كان راعي شعبان طق لك برجستون

وان كانك راعي نفود دنلوب والايوكوهاما والا هنكوك

[البهلواني]

انا جربت اربعه انواع وهي (برجستون + قودير + ميشلان + فيرستون)

صراحه افضلهن ميشلان لا يعلا عليها وتأتي بعدها قودير

وانت واختيارك

[مطاربروق]

اخوي جرب مكسس صناعه تيلانديه انا مركبها على موتري ميزاتها رخيصه رمل وسفلت لينه وهذا اهم شى وتجي نفس مقاس الوكاله وانا مجربها من 5 شهور زي الحلاوه

[راعي الرجم]

انا جربت كفرات كثيرة ودنلوب افضلهن من ناحية المشي بالصحراء
او النفود او الزفلت وخاصة للي يحافظ عليهن يعني ما يخلي الهوا في الاطارات
ضغط ضعيف يعنى اذا انتهيت من النفود على طول وقف وزد الهوى فوق ال 30 واذا حملة خلة فوق ال 40

[الحنشولي]

شكرا شكرا شكرا

لمن تواضع ورد على موضوعي

الله يعطيكم الصحة والعافية

ويسلمكم من كل شر


وكأني اميل للدنلوب لكن هل يحك ويؤثر على القير ويصرف بنزين

آفيدوني ياللي مركبينه , جعلكم تسلمون من السوء

[شروكي ربع]

اخوي جرب مكسس صناعه تيلانديه انا مركبها على موتري ميزاتها رخيصه رمل وسفلت لينه وهذا اهم شى وتجي نفس مقاس الوكاله وانا مجربها من 5 شهور زي الحلاوه



هذا الكلام السليم , مجربة وممتازة بالحيل



***


اما الدانلوب تراه بيحك بالرفرف وخصوصا اذا ما رفعت الموتر ..



ويطلع صوت تفحيط مع اللفات ..



هذي اسوء نقطتين بالدنلوب ..



صدقني ما ينفع ..



يكفيك لانويت تلف يحسبونك العالم تفحط !!!



والا الكفر حلو مرة ان كانك بتصبر على الصوت وعلى حكت الرفرف ..

[الساهر2003]

اخوي جرب الفايرستون ياباني اصلي ومواصفات عالية مثل مواصفات كفرات السيارات الصغيرة ونفس المقاس وشكلها ممتاز وهي بين الرملي والجبلي والطرق ولينة وممتازة جدا كمجرب على جنط 17

[هواي البر]

لا تغيير عن الدنلوب

انا مركبها في موتري ولاتفوتك

ماشاء الله ممتازه مره !!

والي يقولك انها تحك في الرفرف من كثر رقياتي للارصفه والتطعيس مااذكر انها حكت !!

[الحنشولي]

جزاكم الله ألف خير أحبابي الاعزاء

ويوفقكم لعمل كل صالح

[الحنشولي]

الله يعطيكم الصحة والعافية

ويوفقكم لكل خير

والله كلمه رجال شويه عليكم

[عبدالرحمن السالم]

يارجال انا مركب دنللوب واكبر من مقاس الوكاله .. سافرت .. شعيب .. نفود .. طرد .. مطامر إلى تبيه والحمد الله ماشفت منهن الا كل خير .. وصفه انها تصرف بنزين وتحك بالرفارف ماقد صارت على صرفتيه عاديه ولا قد حك معي
وعسى ربي يوفقك ويكتب لك مابل الخير استخر يارجال وفكر قبل لاتركب

[الحنشولي]

أخوي دحيم آخر لفة ماقصرت الله يغفر لك ويكتب اجرك

[القناص366]

الله الله بالدنللوب ولله أعلم

[salehhd]

السلام عليكم

كان على السيارة برجستون حق الوكالة
وركبت الميشلان قبل 6 اشهر ب540 للكفر

بصراحة ممتازة واريح شوي من البرجستون وهادية مثله وفي التطعيس اداء افضل
ولاتنسى ان السيارة تمشي على كفرات فلاتبخل عليها والامان بيد الله

[المنتفش]

سلام عليكم اخوي الحنشولي اعضاء مكشات الزوار الكرام اهلا وسهلا بكم وبعد....
بالنشبه للكفرات انا ما اركب إلا برجستون مثل الوكاله لان كل الشركات الموحوده لا تضاهي جمال البرجستون على الباث قد يقول واحد ان مثلا الميشلان ممتاز ولا تفرقه بس بالحقيقه اذا كان الموتر عليه غير البرجستون الصراحه تفرقه في شكله مع انه قاسي لكن بالامكان انك تحط فيه عشرين الهوا ويصير مماتز ..... في النهايه عذرا على الاطالهوشكرا

[بن محفوظ]

لو هي على الجمال ترى هنكوك نفس مقاس الوكالة .. اجمل

لكن كل من ركب معي قال يابسه ...

خلك ديموقراطي واشتر دنلوب

[فلان بن عفتان]

السلام عليكم

أخي العزيز الحنشولي ...



1- إذا كنت راعي بر من الدرجة الأولى استخدم برجستون

2- إذا كنت راعي كشتات خفافي استخدم يوكوهاما يأتي بنفس مقاس الوكالة

ومن يقول لك الدانلوب وهو يختلف عن مقاس الوكالة فأقول لك أنه يوجد مايسمى التحويل النهائي وهي معادلة حسابية يدخل فيها مقاس الكفرات وإذا غيرت المقاس إختلف التحويل النهائي والتأثير على أداء السيارة .