استفسار بخصوص السّلال

[VX-R 2007]

السلام عليكم

الله لا يهينكم عندي استفسار

انا بسافر ان شاء الله بعد كم يوم بس معي اغراض والسياره ما تكفي
فكرت اني اركب السله الي ورا السياره وتنصفط بس مادري هل هي عمليه او ممكن انه تطيح بالطريق ؟
وهل فيه طريقه ثانيه افضل من هذي السّله ؟ ووين القاه ؟

للعلم سيارتي لاند كروزر في اكس ار 2007 وما فيه الحدايد حقة السله الي فوق ولا ودي اركب بيخرب شكله :rolleyes:

ومشكورين مقدما...

[.أبوعبدالرحمن]

اخوي الغالي


شوري عليك لا تركب السلة الخلفية

فصل لك سله علوية شبك لكنه ماهو واضح جدا مع الاجناب وتقريبا تكلفك مع بوية نفس لون الموتر

من 500 ريال الى 1000 ريال على حسب الجودة اللي انت تطلبها واذا رجعت من السفر تقدر تفكها

بسهولة اما اذا ركبت السله اللي ورا وكانت عامود واحد صارت تتمايل واذا عامودين ما تقدر تفتح الباب

الخلفي وحتى اذا هي عامود واحد ما تقدر تفتح الباب الخلفي وان شاء الله الشباب يفيدونك اكثر مني

[PAJERO]

السلة الخلفية زينة شينة من عيوبهااا انهاا مع الوقت تسبب رجة في عمود الكردان وتحجب نور الشمعات الخلفية

انا ارشح السلة اللى تركب فوق اظمن واريح للسيارة

[سفاري فتك]

والله السله الخلفيه احلا من السله فوق السقف
للاسباب التالية :ـ
1 ــ السله اللي فوق مشوهه
2 ــ عند تحميل العفش معرض العفش للسقوط نتيجة الهواء
3 ــ صعوبة التحميل والتنزيل
4 ــ تثقيل ممشى السيارة وينتج عنه صرفيه
5 ــ عند تركيب السله فوق السقف صدقني يحصل مشوخ في البويه من نتيجة تركيب السله وهذا حاصل لي
6 ــ اذا صار فيه شئ ثقيل تضظر تجيب احد يشيل معك وترفعها الى السقف
7 ــ لابد من رش السله بويه مارايح تطبق البويه مع بوية البدي مثل الوكاله
ــــــــــــــــــــــــــــــــــــــــــــــــــ ــــــــــــــــــــــ
السله الخلفيه بعكس هذا كله لكن لزوم تركب نوع قاعدة قويه لانه
يوجد نوعين سلة خلفية للندكروز
1 ــ قاعدة قوية في الغرابي بسعر 600 ريال (الافضل )
2 ــ قاعدة اقل قوه في الغرابي بسعر 500 ريال( اقتصادي)
ــــــــــــــــــــــــــــــــــــــــــــــــ
وانشاء الله تروح وتجي بالسلامه

[ماجد الشمال 1]

ولله لو تشوف الي على طريق الشمال الاردن سوريا
واحد فارط الرمان البلي حق العكس الخلفي واحد
تلقاة جنب الخط طاقة معة الكرونة الخلفية
وكل هذا (بسبب السلة الخلفية) عرف لية
لان الحمل كلة يصير على الفرنس الخلفي والعكوس الخلفية
ولكن (لاحض ان الاندكروزر بل جميع السيارت تأتي معها سلة علوية )
السلة العلوية اذا حملة عليها اغراضك يكون الحمل موزع على جميع السيارة والكفرات
اما السلة الخلفية فقط على الدفرنس الخلفي والعكوس الخلفية
وهذا الموضوع كنت ناوي طرحة من زمان
وانا ناصح لكم

[* ابو باسل *]

ولله لو تشوف الي على طريق الشمال الاردن سوريا
واحد فارط الرمان البلي حق العكس الخلفي واحد
تلقاة جنب الخط طاقة معة الكرونة الخلفية
وكل هذا (بسبب السلة الخلفية) عرف لية
لان الحمل كلة يصير على الفرنس الخلفي والعكوس الخلفية
ولكن (لاحض ان الاندكروزر بل جميع السيارت تأتي معها سلة علوية )
السلة العلوية اذا حملة عليها اغراضك يكون الحمل موزع على جميع السيارة والكفرات
اما السلة الخلفية فقط على الدفرنس الخلفي والعكوس الخلفية
وهذا الموضوع كنت ناوي طرحة من زمان
وانا ناصح لكم




سلامات ياماجد الحين الموضوع له سنتين مطروح وينك جايبه الله يعافيك راعيه يمكن قد سافر ورجع عشرين مره بعد سؤاله ويمكن شراء عشر سلال وخمسه شبوك علويه ههههههههههههه