المساعد الشخصي الرقمي

مشاهدة النسخة كاملة : نبي شيء قريب من الرياض


Ibrahim.O
04/02/2008, 04:13 PM
السلام عليكم الله يحيكم

نحن 3 شباب ودنا نطلع طلعه خفافيه من بعد الفجر الى المغرب بس

فيه عندكم مكان زين وقريب لم الرياض ؟ خصوصا الشعبان
عرق جهام1
04/02/2008, 04:46 PM
اخوي مساء الخير:
ودي انك موضح اتجاهكم علشان يسهل توضيح المكان ,,,
إعصار
04/02/2008, 05:26 PM
شعيب صلبوخ .. ولا شعيب حريملاء


حلوة وقريبة .. وبالتوفيق يالغالي..
ناجز
04/02/2008, 05:45 PM
روضة الخفس والانوره مافيها ربيع وفيها شجر
دغيم1
04/02/2008, 06:31 PM
السلام عليكم ورحمة الله وبركاته

حياك الله أخي الكريم

لاشك أن هذه الأيام بارده وهبوب الرياح متوقعة

لذا يتوجب عليك إختيار المكان الذاري عن الهواء

وليس هناك أفضل من الشعبان والجبال الشاهقة

فعليك بوادي نساح تجاه الحائر

فهناك اماكن جميلة جدا

وتجمع بين الأشجار والرمال والجبال

تمنياتي لك برحلة سعيدة

تقبل تحياتي
ابوعبدالله 2
04/02/2008, 10:10 PM
شف شعيب الطوقي او شعيب الرمحيه او الطيري كله ذرا عن الهوا ولا هيب بعيده بس ترا اتجاهها من جهة الشرق بالنسبه عن الرياض ورحله سعيده
Ibrahim.O
04/02/2008, 11:41 PM
ماقصرتوابس لو كانت مع الوصف افضل
همس الغدير
05/02/2008, 12:01 AM
مثل ما قال اخوي مابه مثل وقرب شعيب حريملاء
الشدوخي
05/02/2008, 01:02 AM
السلام عليكم جميعا ..
يأخي الكريم .. أنا أقترح أنك تروح لشعيب دقله من جهة نفود الثمامة بصراحة شي جميل وطلاح كبيرة وظلالها قوي .. والشعيب مو بعيد عن الخط يعني ما يضيع بس لازم دفرنسين لانه غراز بقوه ..
أما الوصف ..
تمشي مع طريق الثمامة وكأنك رايح لمفرق الطوقي وإذا جاك المفرق يمين تخليه وتتجه شمال تقريبا كأنك تبي تروح لروضة الخفس أو طريق القصيم ونفود الثمامة يباريك على يدك اليسار // بس انتبه لا يفوز عليك في المباراة // وإذا انتهى النفود أنت واصل على نفس المزفلت تقريبا خمسة كيلو أو حولها ويجيك الشعيب واااااااااضح جدا على يدك اليسار .. وأنت عاد طيب وتخير بين الطلاح العظيمة / والعظيم الله / ولاتنس شي مهم أنك تعزمني وتراني احب المشوي وأثنين ببسي وكثر الكتشب ..
والله يوفقك الجميع لما يحبه الله ويرضاه .. ويعجل في فك أزمة أخواننا في فلسطين وينصر المسلمين المستضعفين في كل مكان .. ويحرم وجيهنا عن النار ووالدينا والمسلمين أجمعين .. اللهم آمين .
Ibrahim.O
05/02/2008, 09:41 AM
الشدخوي مرحبا بك والله ونعم فيك

بس يا أخوي المشكلة مامعنا موتر دبل !!!! وهذا اللي خلانا ندور شعبان ولاكان رحنا للنفود

المهم ياشباب عطونا وصف شعيب حريملاء وكم كيلو عن الرياض ؟
ابوراشد99
05/02/2008, 09:55 AM
ياطويل العمر رح لمنتزهـ (( . . بنبان . . )) الوطنــــي


زين وشرح ويوسع الصدر ...
يوكن
05/02/2008, 09:58 AM
انا اقول شوفولكم حديقه من هل الحدايق وخلو البر لأهل اذا ماعندكم ادوات البر كاملة ترى تتعبون والجو بارد وهوا يعني تكسير يبيلها شبة نار ويبلها خيمه ويبيلها موتر دبل .... الخ . نصيحه وانتم احارار .
إعصار
05/02/2008, 10:12 AM
انا اقول شوفولكم حديقه من هل الحدايق وخلو البر لأهل اذا ماعندكم ادوات البر كاملة ترى تتعبون والجو بارد وهوا يعني تكسير يبيلها شبة نار ويبلها خيمه ويبيلها موتر دبل .... الخ . نصيحه وانتم احارار .

الله يسامحك اما دلهم على شعيب ولا لاتجلس تحطم ..

لازم موتر دبل .. ياخي انا قبل ما أشتري دفرنسين كان معي كابرس .. ودايم مكاشيت ورحات وجيات

ويعني اداري الموتر ما احول في البحص ويمين ويسار يروح معك الموتر ..

ـــــــــ

نرجع لصاحب الموضوع ..


وصف شعيب حريملاء ..
أمسك طريق صلبوخ .. تخلي جامعة الملك سعود على يسارك ..

وسيده لين تطب في حريملاء لاتلف لا يمين ولا يسار .. اذا دخلت حريملاء بتجيك أشارة فيها صورة الملك عبدالله واضحه كبيرة خذ يسار وابتل لين يجيك الشعيب على يسارك والسد ..وانتبه من الغراز في الشعيب ...

اذا الوصف مهو واضح قلي ..


والله يهنيكم يالغالي ..
Ibrahim.O
05/02/2008, 12:17 PM
انا اقول شوفولكم حديقه من هل الحدايق وخلو البر لأهل اذا ماعندكم ادوات البر كاملة ترى تتعبون والجو بارد وهوا يعني تكسير يبيلها شبة نار ويبلها خيمه ويبيلها موتر دبل .... الخ . نصيحه وانتم احارار .

ما أبي ارد عليك لأني محترم المنتدى ومحترم الرجاجيل اللي فيه
لكن ماله داعي اضيع وقتي وأرد على واحد طفل زيك

من قال انه ماعندنا ( اداوت البر ) على قولتك ؟
والظاهر ما بقى الا انت تعلمنا علوم البر وشبة الضو

الشرهه على ..... ()
أبو مها
05/02/2008, 02:45 PM
ما أبي ارد عليك لأني محترم المنتدى ومحترم الرجاجيل اللي فيه
لكن ماله داعي اضيع وقتي وأرد على واحد طفل زيك

من قال انه ماعندنا ( اداوت البر ) على قولتك ؟
والظاهر ما بقى الا انت تعلمنا علوم البر وشبة الضو

الشرهه على ..... ()
وش فيك على الرجال

عطاك النصيحة اقبل فيها أو لاتاخذ فيها، واحسن الضن بأخيك حتى وإن اخطأ

بخصوص المكان
ان اقترح عليك بداية الشوكي القريب من المزفت قريب وعندك المفرق قريب اذا تبي تشري شي
او نقصكم شي فية بقالات
ابوعبدالله 2
07/02/2008, 12:04 AM
عندك شعيب الطيري مايحتاج له سياره دبل ولا يحزنون او قبله الطوقي بس يبيلك تجي بدري مره علشان تلقى لك محل زين ورحله موفقه
بقباق
07/02/2008, 12:08 AM
شعيب الطوقي
الفهد99
10/02/2008, 05:01 AM
شف شعيب الجفير حلو مره على طريق حفيرة نساح
عبدالرحمن السالم
10/02/2008, 09:18 AM
شف وانا اخوك انتجه للثمامه وانت جاي من عند الجنادريه اذا جتك محطه الثمامه (( الخزام )) شف قبالها بتجيك لوحه مكتوب (( بويبات )) لف من عندها طبعاً الطريق سيد واحد وابتل على طول ياطول العمر بيجيك شعيب على يدك اليسار وعلى يدك اليمين ممتاز جداً ولا فيه كشاته واجد وتاخذ راحتك سواء مع اخوياك او مع اهلك وبالتوفيق يارب .. وترا شعيب حريملاء زين جداً