نبي منكم ياهل السيارات مواقف عن الاعطال اللي صادفتكم في البر..!! [الأرشيف]

الرسن

04/02/2008, 08:45 PM

نبي منكم ياهل السيارات مواقف عن الاعطال اللي صادفتكم في البر..!!

ياعضاء مكشات نبي منكم مواقف حول اعطال السيارات اللي واجهتكم وانتم في البر بس هاها مانبي العطل وبس نبي العطل وماترتب عليه من تأخير ومشاكل يعني نبي موقف متكامل من جميع النواحي انتم توحون والا لا.
طبعا البعض منا اذا واجهه موقف زي كذا يحتار ومايدري وش يسوي ويمكن العطل بسيط والبعض الاخر متمرس اما بسبب عمله والا دراسته ويتصرف على هالاساس والبعض الاخر يتخذ الاجراء المناسب لعطله في حينه وبعضنا يتفرج واذا صار فيه تغطية جوال اتصل على سطحه طبعا في البر وياما شفت سطحات تشيل سيارات البر خصوصا اللي جايين من الرملة حول محطة الحصان وطريق الخرخير.

بالنسبة لي انا تعرضت لموقف في الدهناء بنشر الكفر على الصفر وكانت سيارتي متسوبيشي 99 وكنت في نقرة بعيد عن الخط تقريبا 7كيلو يوم جيت ابااغير الاستبنة لقيتها مبنشرة ومفتاحها ضائع لأن السيارة كانت سيارة اخوي مستعيرها منه طبعا كنا ثلاثة اشخاص على سيارة وحدة وش الحل يالربع قالو مالك حل الا انك تمشي للزفلت ويفرجها الله المهم مشيت للزفلت بعد جهد جهيد لأن الموتر صار ثقيل في الطلعة من النقرة وطلعنا وعند وصولنا للزفلت لقيت الكفر التيوبليس طالع من الجنط وفيه شق كان صغير وكبر مع مشينا للزفلت وقفنا نؤشر للسيارات وكنا حول الظهر وقف لنا راعي دينا سوداني وتكفل واحد من الشباب يروح بالكفر لحفر العتش وكانت المسافة 50 كيلو المهم راحت الكشتة عشان ذا الكفر. بعد ذا الموقف اخذت درس اني اتفقد الموتر قبل ما اروح عليه حتى لو انه لي كيف عاد لو اني ماخذه من غيري.

يالله يا اعضاء مكشات عطونا مالديكم حتى نستفيد وحياكم الله ومعالسلامة

الرسن

05/02/2008, 08:05 PM

لازلنا ننتظر حتى تعم الفائدة

مساير الليل

05/02/2008, 09:30 PM

السلام عليكم

قبل كل شي

الله يسلمك مرهـ كنا رايحين لأبها ونازلين مع عقبة شينه الأول والدبل الثقيل

المهم نزلنا وعينا من الله خير يوم جاء قبل المغرب مشينا بنرقاء للأبها فوق

طبعا العقيه ترابيه وغير مسفلته طولها تقريبا 12 كيلو كاني ماني غلطان

وكان وقت مطر ونبي نرقاء قبل مايقواء المطر الأن السياره من الصعب

انها ترقاء وفيه مطر الأن الكفر بيباوش المهم رقينا طبعا طول الرقيه الدبل

الثقيل والأول والثاني تقريبا وجاء أشد مكان في العقبه وشادين العزم ألا

والله ألا الكفر الأمامي يمشي على الجنط ومن الصعب نوقف في الرقيه

وكملنا ومشينا على الجنط ولافيه مكان كلها منحدر يعين يمانقدر نغير الكفر

وقفنا وتفخنا الكفر بميكنه الهواء ومشينا شوي وقفنا مرهـ ثانيه وتفخنا الكفر

وعلى هالحال حتى وصلنا والحمد لله وكان السبب كفرات هانكوك لينه بزياده

ولا الكفرات مركبها قبل مامشي لأبها باربعه أيام

وطبعا الرحلات لاتخلو من المفاجائات وهذا ماعندي

والله يحفظنا

الرسن

06/02/2008, 02:52 AM

مساير الليل
شكرا على المشاركة وتسجيل الموقف
معالسلامة

قناص*07

06/02/2008, 05:29 AM

12 بنشر في ليله واحده 3 منها والسياره واقفه

الكونترولCONTROL

06/02/2008, 06:32 AM

تعطل السلف Self Starter و أن في البر
و أيام دراسة - يعني البر (( خااااااااااااااالي ))
و جلست أبحث عن مكان السلف
(( على شان أدقه بمفتاح العجل - مثل الدددسن - لعله يشتغل ..!! ))
و كان معي VXR توي شاريه - ما دريت ان السلف بوسط راس المكينة
========================

ابو حسان الجنوبي

06/02/2008, 08:04 AM

راعي الجكس

06/02/2008, 10:27 AM

السلام عليكم @
مره كنا بالعرمه ولا به:rolleyes: احد وبنشر الكفر ولا معنا عفريته :confused: :(
المهم حطينا حصاة كبيره تحت الدفرنس;) وحفرنا تحت الكفر وركبنا استبنتنا ومشينا

عاشق Vtc 4800

06/02/2008, 09:03 PM

مرقاب

06/02/2008, 09:52 PM

بالنسبه لي طلعت للمحمل وبنشر الكفر قبل حريملاء وبعده توجهت للمجمعه وبرضه بنشر الكفر واصلحته ونمت ذيك الليله في المجمعه وبعد صلاة الفجر توجهت للجندلية بعد الدهناء مااطول عليكم سنتر الموتر عند الارطاويه وقال هذا محلي منب متحرك -وكان الموتر محمل - وحاولت اصلحه هناك مااستطعت ورحلته للرياض ودخلته اربع ورش بالرياض ماعرفوله واحد يقول مخبطة المكينه الخ-تشالنجر والتقوى والجابري- والموتر جمس سنوما مامشى 50 الف كلم المهم واسئل واحد حضرمي اسمه محمد عند ورشة خارج الصناعية بالربوة وقالي هذا مشكلته السير منقطع-سيره يغير كل 40 الف كلم-وهو ماشاف بوصفي للمشكلة عرف وفعلا صارت المشكلة من السير منقطع واصلحته عنده.وبالمناسبه عندما رحلت الموتر للرياض طلعنا على باترول بنفس الليله للدهنا ونمنا بالطريق وبالصبح تعطل الموتر عند دوار حفر العتش وقال هذا محلي منب متحرك يعني رحلة اعطال باعطال والحمدالله على كل حال .واعتذر للاطاله.

ابوطاقية

07/02/2008, 02:33 PM

قبل تقريبا 7 سنوات كنت انا وواحد الزملاء بالدهنا ومعنا جمس ونيت انقطع علينا الخرطوش ولامعنا خرطوش
ويرزقنا الله بواحد من الاخوان البدو جزاه الله خير ومعه لصتك ويقوم ويقصه ونربط الخرطوش ونعبي مويه والحمدلله ويتسهل امرنا بمشيئة الله
وعلى فكره الخرطوش جلس مربوط على ها الحاله تقريبا شهر كامل

هوى الشرق

11/02/2008, 10:50 AM

اولا : الســــــــــلام عليكم ورحمة الله وبركاته ...
هذي صارت لأحد الزملاء يقول كنت رايح لسوريا من زمان طبعا هو سعودي وماخذ سورية (معلومه اضافية) المهم كان معه مرسيدس موديله بالثمانينات وهو ماسك الخط ارتفعت عليه الحراره (حرارة السيارة !) وهو يوقف بالمحطة ويفحص السيارة كلشي تمام !! ومازالت الحرارة مرتفعه ويجيك ويشيك على الزيت ويلقى طال عمركم الماء مختلط مع الزيت يعني السرندل مشطوب يعني المكينه يبغالها توضييب المهم تذكر انه معه( جملك ) هذا الظاهر يسد التهريبات الصغيره اللي في الرديتر وغيرها مؤقتا ، المهم ويفرغ كم واحد بالرديتر تعرفون الماء ياخذ دوره ويمر على المكينه والسرندل وكل اشوي يصب زيت بالكينه ويخليها تشتغل 15دقيقه ويطفي ويغير الزيت وساها كم مره إلين انظفة المكينه وانسدت الفتحه وكملوا الطريق على انهم اول ماياصلون للسوريا يوضبوا المكينه طبعا وصلوا بالسلامه وجلسوا يوم جت الرجعه والعوده قالوا ماهي لازم انوضب المكينه وارجعوا ووصلو للرياض والمكينه تمام وباعوها وهي على هالحال . آسفين على الاطالة والتعبير لكم عليه

اخوكم هوى الشرق

الرسن

15/02/2008, 09:15 PM

للجميع اقول شكرا على تفاعلكم مع الموضوع ونتمنى المزيد فالفائدة عادة ماتكمن في التجارب.

معالسلامة

الرسن

19/02/2008, 01:44 AM

12 بنشر في ليله واحده 3 منها والسياره واقفه

ابو فيصل حياك الله
الله يكفينا شر البناشر 12بنشر :eek: ياساااتر هاذي عين قطو فيها ليزر تحت الاشعة البنفسجية.
معالسلامة

تعطل السلف Self Starter و أن في البر

و أيام دراسة - يعني البر (( خااااااااااااااالي ))
و جلست أبحث عن مكان السلف
(( على شان أدقه بمفتاح العجل - مثل الدددسن - لعله يشتغل ..!! ))
و كان معي VXR توي شاريه - ما دريت ان السلف بوسط راس المكينة

========================

الكنترول حياك الله واضحه الخبرة مشاءالله الظاهر انك شايب ماظهر فيك شيب الله لايضرك طيب وش سويت بالمشكله يعني حليتها بالسطحه والا وشلون حليتها وانت في طعوس.

معالسلامة

للجميع اقول شكرا على تفاعلكم مع الموضوع ونتمنى المزيد فالفائدة عادة ماتكمن في التجارب.

معالسلامة

brhoom373

19/02/2008, 10:15 AM

انا حصل لي عطل غريب مره وان اقنص ضبان في منطقة حجرية دقة قطعة من الحجر ذراع الشاص وانكسر صار كفر يمين والثاني يسار من حسن حضي كان في السيارة سيم معلاق ملابس نزلت تحت السيارة وربطت ال>راع في الشاص وعبرني الى ان طلعت من البر ووصلني للرياض مشيت عليه مسافة 120 كم بسرعة 80 كم في الساعة
والحمد لله على السلامة

المدرعم 2

19/02/2008, 11:13 AM

السلام عليكم
كنا طالعين كشتة في الصمان علا اربع سيارات المهم أصلحت لانا الجلسة وطولنا أكثر مما توقعنا وكان المحل بعيد ونا راجعين انقطعت سيرتين من البنزيم وصرنا نسحبها بسيارات الى مانقطعت الين المحطة وبعد التعبية رجعنا الاالرياض وكان نمشي 140كم وينطلق عمود الكردان وربك ستر ولاكان قلبت السيارة ولاكن فية واحد من الشباب شرواكم ذيب مهندس ويفك العمود ونمشي علا الدبل الخفيف كنك علا كامري والحمد الله :D

الرسن

20/02/2008, 01:21 AM

موضوع مفيد وقيم صراحه

العطل الي صار معي الله يسلمك رحت اطعس مره انا وواحد من الشباب وقت مدارس وكان الطعس مابوه احد غيرنا
ومع كثرة الإستهبال طفا الموتر وتفاجئت انها مواصير المبرد حق القير طلعت من مكانها الي بالقير

طبعا الموتر شروكي 2000أوتو وجلست احاول فيها لين ماركبت

وعلى الوكاله اليوم الثاني وشريتها ب385ريال وتركيب بيدي عند البيت

شروكي الجنوب مشاءالله عليك صايرٍ(حرفي) سنعت عمرك مارحت تدور سطحه زي اللي من طفى نور سيارته راح يدور سطحه.

معالسلامة

السلام عليكم @
مره كنا بالعرمه ولا به:rolleyes: احد وبنشر الكفر ولا معنا عفريته :confused: :(
المهم حطينا حصاة كبيره تحت الدفرنس;) وحفرنا تحت الكفر وركبنا استبنتنا ومشينا

راعي الجكس وعليكم السلام ورحمة الله وبركاته مشاء الله عليك انت ومن معك والله فايده مهمة والتصرف السليم بالتفكير السليم.
معالسلامة

الرسن

23/02/2008, 08:38 PM

السلام عليكم ورحمة الله وبركاته

الموقف تقريبا قبل أربع سنين

كنت رايح مع واحد من الشباب معه هيونداي سانتا في

رحنا لروضة خريم المهم وحنا نتمشى حول الروضة

لقينا ناس مخيمين في الجادة الي نمشي فيها

المهم قلنا ماحنا فاضين نرجع خل ندخل يمين الجادة

طبعا كانت المنطقة كلها قشع والموتر نازل يوم تعدينا هالمنطقة

إلا ونسمع صوت كأنك مركب دبة للسيارة

وقفنا ونشوف تحت السيارة لقينا كرسي العمود الي طالع من الدفرنس << مايعرف اسمه :p

المهم لقينا الكرسي طايح من جهه وحده قمنا رفعنا الموتر على حصاة

وبعدين دخل واحد من الي معنا تحت الموتر وضبط الشغله بأسيام

والحمد لله سلكت الأمور ...

تقبلوا مروري

Vtc 4800
حياك الله والحمدلله انكم عديتو الموقف وعالجتو المشكلة بعض الناس اذا صار له ادنى عطل راح يدور سطحه لو ان العطل عنده بلف هواء منسم.

مع السلامه

بالنسبه لي طلعت للمحمل وبنشر الكفر قبل حريملاء وبعده توجهت للمجمعه وبرضه بنشر الكفر واصلحته ونمت ذيك الليله في المجمعه وبعد صلاة الفجر توجهت للجندلية بعد الدهناء مااطول عليكم سنتر الموتر عند الارطاويه وقال هذا محلي منب متحرك -وكان الموتر محمل - وحاولت اصلحه هناك مااستطعت ورحلته للرياض ودخلته اربع ورش بالرياض ماعرفوله واحد يقول مخبطة المكينه الخ-تشالنجر والتقوى والجابري- والموتر جمس سنوما مامشى 50 الف كلم المهم واسئل واحد حضرمي اسمه محمد عند ورشة خارج الصناعية بالربوة وقالي هذا مشكلته السير منقطع-سيره يغير كل 40 الف كلم-وهو ماشاف بوصفي للمشكلة عرف وفعلا صارت المشكلة من السير منقطع واصلحته عنده.وبالمناسبه عندما رحلت الموتر للرياض طلعنا على باترول بنفس الليله للدهنا ونمنا بالطريق وبالصبح تعطل الموتر عند دوار حفر العتش وقال هذا محلي منب متحرك يعني رحلة اعطال باعطال والحمدالله على كل حال .واعتذر للاطاله.

مرقاب
حياك الله الحمدلله على السلامة انت تذكرني بسيارة لي صغيرة كل ماجيت ورشة قالو لي لازم تغير الجنزير حق المكينة المهم ستة ورش واخيرا اكلم واحد من ربعي قال رح للورشة الفلانية فيها فلبيني شايب وتراه جيد يبي يعلمك وش المشكلة المهم رحت له قال لي الدينمو عندك يبي فحمات والصوت هذا من الدينمو وبالفعل صارت المشكلة من فحمات الدينمو مع العلم بان الورشات يقولون لي الجنزير يبي تغيير وهم خمس معلمين مابين مصري وهندي وتركي وحتى يمنيه وعالجت الموقف بخمسين ريال ريال.
وبعيدن يامرقاب السنوما ماينغزا به اذكر واحد من الشباب معه سنوما دائم ييشاركه موتره في راتبه حتى تخلص منه

ونستفيد من ردك بارك الله فيك انه لابد ان الواحد مايعتمد على ورشة وحده وانه يتحرى عن المعرفة وهذا اللي حاصل واغلب عمال الورش يتعلمون فينا.

مع السلامة

جيب الربع

31/05/2008, 01:20 PM

احرصو على قل الهواء في الصحراءلان الكفر مايبنشر الا اذا كان الهواء واجد لان الهواءاذاكان قليل يعطى ليونه وترتاح اليسارة من المطاب وترتاح انت يا السواق مقاس الهواء 20 اسئل مجرب الناس تاخذ فكره ان الهوا اذاكان واجد مايبنشر والحمدالله على سلامة الجميع وان شاءالله محد يشوف مكروه

سوبر VTC

05/06/2008, 12:34 AM

اهلا بك انا كان معي جمس 2001 و كنت مسافر للرياض انا و اهلي اخذنا اغراضنا يوم جينا نمشي جيت اشغل الموتر قال هذا محلي و يدق بس ما يشتغل و اقوم و اضرب التانكي بعصا من تحت و ستر الله و اشتغل الموتر و ناصل لمدينتنا سالمين
مره اخرى كنت في النفود امشي بالدبل الخفيف و جاء غراز شديد ثم شبكت الدبل الثقيل لما طلعت من النفود طفت لمبات الدبل اللي يسار الدركسون يعني ما اقدر افصل الدبل قمت فتحت غطاء الفيوزات اللي في الكبوت و ابدا افصل فيوز الدبل و الكتاوت حق الدبل و اشبك عدات مرات فاشتغلت اللمبات و فصلت الدبل و ستر الله
و مره اخرى كنت كاشت و معي كورولا 2002 و مبسوطين اخر كلام حنا سيارتين و يوم جيت امشي ادق سلف بس ما تشتغل قمت و جرينا الكورولا بالفورد انواع القلق الى البيت مسافه 6 كيلو و قمت و شيكت على الفيوز اللي عند دعسة الفرامل و القى فيوز منقطع و غيرته و اشتغلت الكورولا يبدو انه خاص بكهرب الكويلات و كان معي شيروكي 2001 و طفى و انا امشي و اشيك على الفيوزرات اللي عند الراكب و القى فيوز طرمبة البنزين منقطع و غيرته و اشتغل و احد زملائي كان معى باترول باب واحد كاشت بالدهناء م93 جاء يشغل عي يشتغل و قام ووزن الديلكو و اشتغل و على كلامه يقول احيانا اذا كان البلوف ثقيله او محمله ما يمكن يشتغل و دمتم بخير

SuLTaN.M

05/06/2008, 10:57 AM

مرحبا بكم جميع

الكل يعرف مشكلت الباترول الجديد مشكلة كتاوت الطرمبه

انا انقطع على في الدهنا حول ام رقيبه

وانا ما كان عندي الخبر الكامل لهالمشكله

واشوا كان فيه ارسال وما خليت احد إلا ودقيت عليه

واحد من ربعي صايره له المشكله
وادق انشده يقولي قدام مقعد الراكب << الله من الصدز (اثره عنده خبر عن المشكله لكن ما يدري وينه الله يخلي الكهربائي)

المهم اننا جريناه لين خط الكويت حول 9 كيلو وعقبها سطحه للمجمعه وفي الأخير يوم صلحه قدامي بغيت اجلده
فك الكتاوت ورفع قطعه (مقاومه) اللي كلها الوان وارجع الكتاوت مكانه واشتغل :s

الله من الققهر هذا اللي قاطعنا في البر (مقاومه)

لكن الحمد لله على السلامه الحين عرفت موتري صح ووشلون اتعامل معه :)

ضحية صمت

15/09/2008, 02:49 AM

انا المشكله والله صارت معي العام بالصياهد قبل التنهات كنت مسرع وجاي من جلعوده ورايح للتنهات
بالجمس الصحن وما ادري الا واسمع صوت التماس بس ماعبرته الين شفت الطبلون تلعب ساعاته وقفت على طول يوم فتحت الكبوت لقيت البطاريه مع المطامر لزقت بالحديد وسوت التماس مع الحديد واشوا اني لحقت عليها والا كان راح علي الكهرب والكمبيوتر بس الحمدلله وقفت وربطت البطاريه زين وحطيت بينها وبين
البدي خشبه عشان تعزل الكهرب عن البدي اليييييييييين اربطها صح لا رجعت والحمدلله رجعت وانا سالم ...

باترول03

27/09/2008, 03:28 AM

اسير الغضا

27/09/2008, 03:55 AM

ههههههههههههههههههههه ازين شي ان مابه احد ذكر المشكله
قبلي
كان يامكان (قبل قارمن وماجلان ) حقت دغيم ههههه
اهم شي
ذيك المره
جاء مطر مبطي ماجاء مثله بعنيزه
والشعبان والنقع يالله من فضلك
اهم شي طالع انا والعيال بموتري (الكسره)
ولا هاذيك الهيلكسات 2005والفين وربع ودداسن جددعلى وقتهن
تخميس وهبال وتجديع بالمنقع الصز انا تهيظت قلت طب ياولد وابداء بالعروض يمين ثمن يسار
وبعد برهه ولا وتطفاء بي السياره
اهم شي بوسط المنقع كنت ويالله وتمطر زياده واقعدبه انا واخويياي فوق التنده
لمان جاء شاص وسحب خيرنا بالونش حقه
ولا واثره مكنيكي
مادري وش سواء يقول بواجي ومدري وشو ايه صح يابن الحلال
غسلت السياره بستم وشالو المراتب ينظفون الطين اللي مادري معين دخل
اهم شي مرة على خير

الشقردي911

27/09/2008, 09:07 PM

القصة ذي قبل سنتين كنت في الثمامة
كان مع جمس 4x4
وكنت اتحدى لاندكروزر طبعا كسرة خشمه هههههه(مع احترامي لملاك الاندكروزر)
المهم احتر الموتر ووصلت الحرارة H
وقفت لقيت الخرطوش الي طالع من الثلاجة يطلع موية
جاني واحد الله يجزاه خير وفك الي كامل وشبك الي الثاني في الرديتر يعني استغنى عن الثلاجة والمكيف الحار
ملاحظة:الموتر الى الان ما صلحته وما شي تمام
الزبدة:الاندكروزر موتر ما شاء الله ما احتر ولا صار فيه شي وكملنا التطعيس على الاند

فاطر

27/09/2008, 09:16 PM

مساء الخير وكل عام ونتم بخير قبل الزحمه ومن العايدين وتقبل الله من ومنكم صالح الأعمال ... انا معي فتك باترول سفاري 2005 ادق سلف مايدق وش السالفه الي قال الفويوز والي قال كتاوت الطرنبه حق البنزين والي قال افصل البطاريه لمدة ربع ساعه وكل هذولي سويتنهن ولا اشتغل .. تدرون من وين العطل من الانبير حق البنزين السوبر دايم يتعطل الانبير واصل النص وهو فاضي تانكي البنزين ... وانتهو يارعين الفتك السوبر .. واسف على الاطاله اخوكم ابو ريناد

أبو أسامة

27/09/2008, 09:56 PM

أول شيء هذه فرصة أن أشكرك أخوي الرسن على مواضيعك في خيمة الرحلات ............. وقصصي كثيره ......... أبي أذكر ثنتين .........

الأولى كنت على ددسن سوبر جي إل 99 وطلعت من عرس واحد من ربعنا وتصك براسي تالي الليل أني أروح لجبل جبله بالقرب من نفي كلمة بعض عيال عمي يخاووني كلهم قالوا مجنون في الصيف وأيام المدارس وجبله وبتالي الليل ........ المهم تليت الموتر ووصلت لجبل جبله بعد الفجر بساعه وأجلس أتمشى وأنا مصحصح زين بسبة الدشير اللي لقتهم حول الجبل واجد وبعضهم ماشاء الله أشكالهم أجواد المهم جت الساعه ثمان والعالم اللي حول الجبل تروح جلست أكمل الفرره ما دريت إلا والموتر يطيح بهاك التغريزه وأنزل وأنسم بس أيامها غشيم تطعيس نسمت شوي وأدعس والموتر يحفر ..... قلت مافيها إلا إني أدور واحد يسحبني وأطلع على الجبل وأتلفت ما شفت غير الوايت اللي بعده حوالي 3 كيلو رحت يمه ( الجوال لا يوجد به أرسال عند جبله في حينها ) وطلع سوداني قلت أسحبني قال خل عمي يجي وأنا أسحبك منا منا بالأخير قال أروح معك لموتر على رجلي والوايت أنسى قلت أمري لله ويمكن تفيد وصلنا للموتر حاولنا ما نفع ....... راح السوداني من عندي الساعه 11.30 الصبح وقالي أبجيك مع عمي الساعه وحده قلت له لاتنساني اليوم جمعه والعالم بكره مدارس ........ المهم راح الرجال وأرقد بالموتر وكل شوي قايم أتلفت يمكنه جاء لكن ما حولك أحد جت الساعة أربع العصر إلا هاك الرجال الشايب ومعه عايلته وعياله حول السته الله يخليهم لبعض يوم مر من عندي وأنزل وأنادي عليه ...... الشايب خاف بالبدايه مني ظن أني من السكارى وأخذ له شوي ثم جاء وفتش الموتر هو وعياله يوم أطمنت نفس دفوا الموتر السته وأبوهم يسوق ألا والموتر طالع ....... وأسقاني ماء شاف البرطم متشققه من الضماء وكل ما أذكر السالفة أدعيله وعسى الله يفتحله أبواب السماء ويسكنه الفردوس الأعلى هو وأهله ........... الدروس المستفاده ....... نسم ونسم ونسم ولا تفكر بإذا طلعت كيف تعبي بل فكر كيف أطلع ....... الدرس الثاني خذ من الماء أكثر من حاجتك فلا تعلم ماقد تصادفه بالصحراء .......... والدرس الثالث ........ لا تعتمد على الراعة السودانية تراهم عجازين ........ وعسى الله يستر عليكم ويردكم لأهاليكم سالمين دائما ً ......... أدري أن القصه طويله لكن العذر والسموحه ...... والثاني بعدين هذا إذا ما مليتوا ............

سوبر VTC

28/09/2008, 05:46 AM

هذا الله يسلمكم كان معي باترول(الله يعيده او مثله)2003 Gl فيه مشكلة بنظام الحماية فبعض المرات لازم اشغله اكثر من مره الين تطلع علامة سيارة وفيها مفتاح وتطفى فيشتغل الا ذيك المره حول العلا ما طاع يشتغل وسحبناه حول 80 كم الى العلا ولقينا كهربائي سوري قعد يفحصه وسوى حركه حلوه انه وصل الكويل بالمساحات وصار الموتر اذا خرب نظام الحماية يشتغل بالمفتاح المنسوخ واذا اشتغلت الحماية ما يشتغل الا بالاصلي

وقعد الموتر كذا الين راح الله يستر عليه

هذا الله يسلمك نظام الحماية اللي هو لمبة السكيورتي
طبعا احد الربع معه باترول ربع م99 راح لكهربائي سعودي عندنا بالقصيم و الغى قطعة او حساس حماية بنفس كبيوتر الباترول و زان الموتر صار يشتغل بمفتاح عادي بدون شريحة او مغناطيس
التكلفة ====> 250 ريال

راعي السيل

28/09/2008, 08:16 AM

هذي القصة حقيقية ومفيده جدا :
مره كنت مسافر مع الاهل لاحد القرى
و وقفنا الجيب قدام بيت احد الجيران ، والله العالم انه زعل وقال لعياله نسموا كفرات الجيب.
وفعلا يوم قمنا الصبح شفنا السيارة طايحه من ورا والسبب ان الكفرات الخلفية كلها منسمه على الصفر .
رحنا لاقرب بنشر وجاب معه كفرين معباة هواء الى اخر شيء و "لي" مثل اللي حق الغاز .
ثمن قام وعبى الكفرات المنسمه باستخدام "اللي" والكفرين المعباة بالهواء ، يعني يفك البلف حق الكفر المنسم ثم يدخل احد اطراف "اللّي" فيه ويفك بلف الكفر الاخر المليان هواء ويدخل طرف اللّي فيه وعلى طول يتعبى.
طبعا ما تتعبى الكفرات الى اخر شيء لذلك مشينا بالسيارة لمحل البنشر وعبيناها زيادة .

الرسن

22/12/2008, 04:17 PM

اشكركم جميعا اخواني اعضاء مكشات الغالين على الاضافة
متمنيا لكم السلامة دائما.
راجيا اضافة المزيد من المواقف حتى نستفيد فالمواقف دروس نستخلص منها العبر ونتفاداها مستقبلا.

شفر 10

26/12/2008, 03:41 AM

مشكلتي هم أم المشاكل الا ابوها بعد قعدت 5 سنوات عى نفس الحال
سيارتي جمس ونيت بيج بتبوك الكل يعرفني ما فيه اشارة ولا شارع ولا دوار الا وقفت فيه ودف يا عم على جنب
المشكة انها ثقيلة بالحيل حديدxحديد موديل 81
ادق السلف ما يجق ولا يطع صوت ابد
ويله طلع الكهربائي من الورشة بخمسين غير شغل اليد ويصلحها ولا نادى الاخوان وانتعها وعالكهربائي غيرت السلف حوالي 5 مرات هذي غير فك السلف واصلاحه من الداخل
واحيان امشي حالي اني حاط عصا العفريتة قريب وادق السلف ويشتغل وعند ااشارات ادقدق
وآخر مرة انكسر مكان خابور السلف بالمكينة وابد نزل المكينة و صب مكان مكان الخابور واخرطه وبهذيك التكلفة

وكل ورشة تصلح ولا تعلمك السبب وهذا بلانا السعوديين حط سيارتك وامش
حتى اني كتبت موضوع عنها في مكشات

المهم المرة الاخيرة اللي انزلت فيها المكينة اخذت سلف اصلي ومشت حول سنة ورجعت (خلاص انجنيت)

"حتى والله صرت افكك السلف قطعة قطعة واغير قطعه بسهوله"
وديته كهربائي وقلته شوف عالسيارة قضت علي شوف لها صرفة

فك السلف ؟؟؟؟؟؟؟؟؟

لقاه جديد واصلي قال اركلك سلكين من السلف الى عندك مباشرة قلتله لا هذه حركات نص كم سويته ما نفعت
راح شيك على الاسلاك لقى واحد من الاسلاك منجرح ويلتمس مع الشكمان (الله أكبر ) وهذه المشكلة بس 5 سنين عذاب وحرمان من الراحة
شكلي طولت (لا تلومن 5 سنين)

المهم سوالها تسليك من جديد وحط الاسلاك وسط ليات وفالكم طيب

اخوي شفر

يوجد رابط رائع جدا :good2:
تفضل
يفضل تضع مشاركتك هناك

قائمة اعطال سيارات اعضاء مكشات لاهنتم فقط ===>((( اذكر العطل + الاصلاح + التكلفة))) (http://www.mekshat.com/vb/showthread.php?t=31171)

المشرف سوبر فتك

قلب الأسد7E

18/03/2010, 06:18 PM

مشكلتي كانت قبل 6سنوات كان معي 240أل بنشر علي الكفرين الأمامي الأيمن والخلفي من نفس الجهه المهم وكانت الأستبنه معي بس
فكرت وقلت لابد أركبها بالكفر الأمامي لين تعبرني وغير كذا عشان مايفصخ مع اللف والدوران والحمد لله وصلة للبنشري وشرية جديد

صديق كلم رفيق

18/03/2010, 09:37 PM

كنت رايح مع الوالد للصمان مبطى كانت أجهزة القارمن توها نازله ، وكان الصمان غرقان

،شي لايوصف الماء يتطارخ ، المهم معنا جيب شاص جديد على وقته، وماكنا نعرف التغريز في الطين ، نحسب مثله مثل الرمل عشق الدبل وامش، لكن هيهات هههههههه

ونطيح في هاك الطينه ،اللي يحبها قلبك ههههه ، عشق الثقيل الكفرات الاربع تدور بوش هههه ، والله

ونحفر مافيه فايده نجيب حصى مافيه فايده ، قعدنا حول اربع ساعات وحنا في التغريزه ،

والمهم يفزع لنا راعي جمس حوض بدون دبل ، ويجي يبي يسحبنا ويغرزهههه ،

ويروحون يحفرون عن موترهم هذا والله المشكله ، ويروح لهم الوالد قال اتركوا موتركم
خلونا نطلع الشاص لانه ان طلع بيطلع موتركم ، والله والمطر يضرب علينا والله الحاله المبروكه الثياب غرقت وامتلت طين والجو بارد ، المهم ويجونا يساعدونا ونجيب حصى ونسمنا الكفرات على الجنوط وبعد جهد جهيد طلع الشاص ، ونروح نجيب الواير ونسحب الجمس ويطلع .
ومن بعدها طلع لنا قلب من تغريز الطينه

لاتكب البيالة

18/03/2010, 10:58 PM

انا صار لي سالفة قبل 5 سنين الله لا يعيد هك الكشته واتمنى يقرى ردي ابوتركي (الله يذكره بالخير)المتسبب الاول بالمشكلة
مرت طالعين للدهناء معنا 3 سيارات والارض ممطوره وشاده
واحد معه ونيت دبل وقعد يجدع بالنفد وينطل لعله انفصخ عنده كفر وهنا مربط الفرس وزبدت الكلام والقشة اللي قصمت ظهر البعير :)والجدعه اللي حولت كشتتنا الى سعير اجاركم الله من السعير المهم بننزل الاستبنه نغيره لكن للاسف مقفله بسلسه ولا معه المفتاح بننفخ الكفر للاسف الماطور عيا يقوم الكفر قلنا مالنا حل الا نفك الكفر ولمحطة حفر العتش (يمكن 30 كيلو) الزبدة راح واحد بينفخ الكفر وطبعا بما اننا داخلين نفود كلنا منسمين ثم افصخ كفر خوينا بالسفلت بتقولن امره سهل يغير الاستبنه بقول لكم بكل اسف ما معه استبنه (الله يصلح الحال واحد ما معه مفتاح الاستبنه وواحد مامعه استبنه بكبره والسيارة الثالثه الله يستر منه) الزبدة اتصلو علي وقالو لي تعال (اشوى به ارسال) وانا اللي امتطي صهوة سيارتي واشق عباب النفود لانقاذ ربعي اللي واحد مامعه استبنه وواحد مقفلن عليه (ياحبيلهم:() واخذ كفرين واوديهن للمحطه وننفخهن وواحد بغى رقع ماادري منين (فيه هذه الاثنا اتصلت على ربعنا اللي بالبر قلت شبو على الغداء اغديه يمدينا نتغدى قبل المغرب لكن للاسف طلع القدر واللحم بسيارتي)المهم ركبنا الكفرات وها انا معكم سالما معافى
طبعا ربعنا اللي كاشتين معنا هك الايام تفرقت بهم السبل وشتتهم مشاغل الحياة وهاذي حال الدنيا
اعذرون على الاطاله واتمنى تستفيدون من القصه ان الاستبنه مهمة وصلى الله على محمد

الكونترولCONTROL

19/03/2010, 12:03 AM

الكنترول حياك الله واضحه الخبرة مشاءالله الظاهر انك شايب ماظهر فيك شيب الله لايضرك
طيب وش سويت بالمشكله يعني حليتها بالسطحه والا وشلون حليتها وانت في طعوس.معالسلامة
و راح سنتين بعد زود من العمر و أنا لم انتبه لكونك تريد أن تعرف
كيف حليت المشكلة ... بصراحة نسيييييت هههههههه
أذكر اننا سحبناه حوالي 45 كم لين وصل للسطحة !!
بعدين ما كنت في طعوس .... كنت في جلد بين خشوم الصمان و سحبني راعي غنم بالوايت

الرسن

26/01/2011, 01:08 AM

اشكر جميع الاخوان هنا واعذرونا للانقطاع خلال هذه الفترة الطويلة فلربما يستفيد اخرون من تجربة سابقة

الشهابة

26/01/2011, 04:05 AM

كانوا الربع مخيمين في روضة الخفس في وقت ربيع و امطار و انا لحقتهم في الليل .. و كان مكان التخييم على اتفاقنا في النفود يسار الروضه عشان المطر ..

كنت لحالي و الجو برد و مطر و ظلام .. و السياره لاندكروزر كفرات بالون و يوم وصلت النفود قلت ابنسم الكفرات شوي و امشي ادور ربعي .. و فكيت إبرة بلف الهواء اسرع للتنسيم بس مع السرعه طارت إبرة البلف و انسدح الكفر على الجنط ..

حاولت ادور البلف و اركبه مالقيته وسط الظلام و المطر .. جيت ابفك الكفر و اركب الاستبنه بس ماكان الجو يساعد و كانت السياره مليانه اغراض و على الرمل و شلون ابرفعها .. حاولت ادق على ربعي بس كان الجوال ارساله ضعيف ..

جلست في السياره تقريباً ساعه لين خف المطر و انزل و ارفع السيارة بالعفريته و جلست ساعه او اكثر لين ارتفعت و ركبت الاستبنه و مشت الأمور و بعدها حرمت افك إبرة البلف عشان انسم ..

فكرت افك إبرة بلف الاستبنه و اركبها في الكفر بس لأن الكفر بالون صار كنه طالع عن الجنط و ما ينفع فيه النفح بماطور ابو جمل ..

ملك الفكتوريا

28/01/2011, 06:39 AM

أنا قصتي بطريق الرياض مكة مو بالبر بس قصة تخوف وتضحك

يوم اني بطلعة الجدية شديت للفورد واسمع المكينه تعطي والقير الضغط تقريبا 5500 تقديريا

ويوم وصلنا للنقطة وتعدينها شوي الا واشم ريحة حرق

أنا طار عقلي احسبه القير لانه رايح فيها

واوقف واطفي وانزل وافتح الكبوت ما فيه ريحة ابدا

قعدت اشمشم الرديتر ولي مبرد القير وعند السيور ومن جنب المكينه

وبعدها رحت للكفرات كلها وما فيه الا قوة شم والريحة ما فيه

افتح باب السيارة الا ريحة حرق

انزل ما فيه شئ

انلحست وانواع الوساوس قلت هذا شكله سلك تحت السيارة والا الشكمان

بالاخير قلت ابشغل السيارة شغلتها الوضع تمام

وجلست ادور بالغمارة بالاخير لقيت كيس عصير وغطى بيبسي طايح في الولاعه وضرب الفيوز وجالس الكيس يحترق

طلعته وطلعت الغطاء مشيت شوي وقفت ونزلت برى ما فيه وبالغمارة خفت كثير

تنفست الصعداء وقسم بالله شتاء وبالليل ومعرق وبالاخير 150

sa-z71

28/01/2011, 07:10 AM

أول يوم من رمضان قبل الفايت أتصل علي أحد الشباب شرواكم وقال بنتسحر براس طعس وش رايك ؟ قلت تم .
أتصلت على خوي لنا ثاني قال أبلحقكم وياليته تعذر:(

المهم جانا الرجال و تسحرنا وعينا من الله خير بغينا نحرك خوينا مارجع مع طريقه الله يهديه مشى على وجهه بيختصر ويطيح له بهيار الكفرين اللي يسار غايصات والهايلوكس قعدت تدور بوش . ماهو وقته صايمين وحررر:mad:
وجيت أبسحبه باليوكون المكان صعب كله هيار وننسم الكفرات على الجنط وبالثقيل , وأول نتله وينقطع الواير
ونزرق للمحطه وماحصلنا الا واير ضعيف مالنا الا هو ,
وخوياك ماودهم يبرحون تعرف وراهم نهار طويل وصايمين . وارجع يالله اسحب أهه وينقطع الواير !.

الوكاد ونحصل تشادي نايم معه لوري متوجه للرياض . ونقومه الله يجزاه خير ويعطينا سلسله يسحبون فيها اللوريات .ونشبك وننتل وينكسر الشنكار اللي باليوكون
ويجينا التشادي يضحك علينا يقول السياره غايصه لابد تبرحون ,
ونبرح يمكن خمس دقايق ونشبك بالشنكار الثاني ونسحب بكل يسر وسهوله ...

ماودنا نبرح وتبهذلنا نهارنا كله وفي الأخير بعد التعب رجعنا نبرح .. (( الدنيا دروس )):rolleyes:
السالفه مختصره والا ماطلعنا الا الساعه 10
الريق ناااااشف والوجيه مكشره :D