افزعولي...

[الاجودي]

السلام عليكم ورحمة الله

صبحكم الله بالخير

حياكم الله كل بأسمه

يا طويلين العمر والسلامه امس جالس في مجلس

ويسولف في مشاكل السيارات ودخلنا في مشاكل الدفرنس

وقال بعضهم لازم بغير زيت الدفرنس كل 30 الف

وقال بعضهم لا بس يزود

وانا ساكت لاني جاهل بهالامور

لكن المشكله اني من شريت سيارتي ماعمري سألت عن شىء اسمه زيت دفرنس لا غيرته ولا زوته

قلت مالي لا النشامى في مكشات يجيبون العلم السنع

علما ان سيارتي باترول مديل 2000 والحين ماشي حدود 150 الف

[قناص القرائن]

ياليت اقدر افيدك لاكن مافي راسي لاكن باسألك عنه وابشر بسعك يالغالي

[Bader-M]

زيت القير والدفرنس
يعاير فقط ولا يغير
يعني اذا كان ناقص تزيده
......
اما القير التماتيك
يغير كل 25 الف مع تغير فلتر
...........
والله اعلم

[القماري]

إذا جيت للوكالة أو المصنع فالجواب يقول لك لازم تغير (زيت الدفرنش زيت الجير وزيت المكينة تضيف علية في حال النقص وتغيره في حال عدم الصلاحية) الوكالات أكثرها تحب التغيير بحجة أفضل للسيارة (أكيد أصرف للوكالة بعد)
الواقع عندنا الكثير يغيير زيت المحرك (كل 1500 أو 2000 وأحيانا كل 5000 أو أكثر - كما هو حاصل معي) وقليل من الناس يغيرون أو حتى يفحصون زيت الدفرنش (خصوصا)
الأفضل أنك تشييك على زيت الدفرنش كل تقريبا 50000 كيلوا وإذا ناقص ضيف زيت وإذا كان منتهي فغيره وهذا يعتمد على عنايتك بالسيارة وإستخدامك لها.

[بـــدر]

الي هو اخبر مني ومنك يالي تقول ان زيت الدفرنس ما يغير ، لازم تغير زيت الدفرنس كل( 40000 ) كلم او ( 30000 ) اذ كان الاستخدام شاق هذا الكــلام انا قاريه في ثلاث كتب صيانه لثلاث شركات مختلفه
وهي (التويوتا والنسيان و أل جي أم) لان مع الاستخدام يبدى لزوجة الزيت تخف بعدين يبدى التاكل بس بنسب خفيف جدا لاذلك لما تفك الصره تلقى (الرايش) وهو عباره عن قطع حديد صغيره متجمعه في بداية الصره لانها تاحتوي على مغناطيس يجذب ذرات الحديد المتاكل.
زيت المكينه كل شركات تصنيع السيارات متفقين تقريبا على (5000) كلم و(3000) كلم للخدمه الشاقه

الا حنا في السعودية نغير كل (1500) كلم طبعا، لان اليماني حق البنشر مفهمنا ها المعلومه وصارت متوارثه .
وهو عشان يمشي بضاعته بسرعه واذكر ان مره قرات مقال في مجله السيارات عام 1996 يذكر ان المملكه اكثر دوله يتم فيها هدر زيوت التشحيم،
أتوقع ان 80% من الناس ما عمره فتح كتاب الصيانه:mad: ترى مجرد توقع والله اعلم

[desprado]

ماقصرت اخوي بدر

كلامك صحيح 100%

اخوي الاجودي انصحك تغير زيت الدفرنس بس لازم في الوكالة لانه حساس اكثر من زيت المكينة

[ابو ســــاره]

اخوي الاجودي انتبه تغير زيت الدفرنس عند اي بنشر ترا قد قد غيرته قبل كم سنة بجيب فكس ار 97 ولاحظة ثقل بالموتر غير طبيعي ً بعدين افادوني الاخوان انه من الزيت حق ابو يمن ثقيل مهوب زي شد البلد فانصحك تغيره بالوكاله علماً بانه فيه بالكتلوج حق الموتر حجم الزيوت الخاصة بسيارتك او قوة ظغطه .:redcar:

[عروان]

زيوت الدفرنشات تختلف.

فيه زيت عيار 90 و 120 وغيرها.


لازم تستشير الوكالة بنوعية الزيت اللي يوافق نوع الدفرنش.

أما تغييرة فهو سهل وأي بنشري يسويه لك. بس نصيحه لاتشتري زيت من عند البنشري.

أشتر الزيت من الوكالة أو أي موزع معتمد لان الغش كاثر هالايام.


وسلامتكم

تحياتي

[الشاقي]

الأجودي
الشباب ماقصرو وحسب خبرتي من 30 سنة هو انك لازم تغير زيت الدفرنس عند الوكالة وكل 40000 ك م

[رااعي الصفراا]

السلام عليكم



يا مرحبا بالجميع تراحيب المطر ومبارك عليكم الشهر الفضيل وعسى الله يقبل طاعت كل مسلم ..

الوكاد طال عمرك يا الاجودي الموتر ذا الحين ماشي 150 الف وانت يا خوي توك تدري بالزيت انا ابي ذا الحين موترك فيه شي ؟؟


ما فيه الا كل خير طال عمرك لا اتطبب فيه ثم تعميه خله ان كانه ناقص زده اما انك تغيره وهو ماشي ميه وخمسين لا يا خوك انتبه ..


ولا صار الموتر ما اشتكي من شي لا تعميها الله يرحم والديك وتخبزها

زد الموتر يا مال الشحم ولا اتطبب فيه وان ما القحت ما ضرها الجمل ..


في امان الله جميع وجعل شيبانكم في الجنه .

[الاجودي]

الف تحيه عطرة من الاعماق

للجميع بلا استثناء على ردودهم ونصايحهم

لعلي اخر الاسبوع اجدع الموتر عند الوكاله وابعلمكم وش صار معي