المساعد الشخصي الرقمي

مشاهدة النسخة كاملة : من الرياض للكويت من يدلني الله لا يهينه


MrDolphin
09/02/2008, 04:05 AM
بسم الله الرحمن الرحيم

اعزائي أعضاء مكشات السلام عليكم ورحمة الله وبركاته
ومساكم الله بالنور والسرور

انا جاي على بالي أخذ العيال واطلع بهم رحلة كم يوم وراح تكون من الرياض بمشيئة الله الى الكويت على السيارة بس المشكلة اني اول مره اروح للكويت فلو تكرمتوا الله لا يهينكم يالاجاويد ..

ودي اعرف وش احسن خط امسكه من الرياض للكويت يكون أمن
واذا دخلت الكويت ابي اعرف وين محلات الرحلات ولوازم البر ولوازم الصيد ودي امر عليهم

شاكر لكم مروركم ولا تبخلون علينا يالاجاويد
بالعلوم الزينة

دمتم بود
الهواوي
09/02/2008, 08:34 PM
هلا بك أخوي :
بالنسبة للطريق فيه طريقين وانت شف اللي يناسبك :
1: طريق المجمعة الحفر ثم منفذ الرقعي .
2: طريق الخفجي من المنطقة الشرقية .
بالنسبة لغراض البر والصيد فاضن انها عندنا بالسعودية احسن بواجد . تحياتي
ذرب سدير
09/02/2008, 11:54 PM
أنا أشوف أن طريق الرياض / سدير / الحفر / الكويت أفضل وأقرب
KABAYAN
10/02/2008, 01:24 AM
طريق الرياض الدمام - الدمام الخفجي هذا افضل طريق

وفيه طريق بس ما ينفع لك و خصوصا انك اول مرة لانه مع القرية العليا و انت جاي من رماح مروراً بشوية و الرفيعة وهذا يختصر عليك 140 كلم


بالنسبة لمحلات الرحلات و التجهيز من خبرتي بالبلد ارى ان الغرابي اللي مافيه شي افضل من اسواقهم حق التجهيزات البرية و انت ابخص ،،، انصحك بالرياض
MrDolphin
10/02/2008, 04:20 AM
أخوي الهواوي ,,
أخوي ذرب سدير ,,
أخوي كابايان ,,

الله لا يهينكم ويعطيكم العافيه على المرور وعلى الشور ومشكورين من كل قلبي
الله يعطيكم العافيه


دمتم بود
أبو_خالد
10/02/2008, 04:44 AM
الرياض
المجمعة
حفر الباطن
الرقعي
السالمي
الجهراء
الأحمدي
النويصيب
الخفجي
الدمام
الرياض

ههههههههههه
سلايل كحيلان
10/02/2008, 06:13 AM
أقول اسمع العلم



اطلع طال عمرك على طريق الرياض القصيم السريع لين تجيك المجمعة ثم اطلع مع المجمعة يمين متجه إلى الارطاوية ثم تجيك بعد الارطاوية أم الجماجم ابتل على طول ثم تجيك مدينة الملك خالد العسكرية ثم حفر الباطن من الحفر خذ يمين نتجه للكويت وقدامك 90 كيلو للمنفذ الرقعي وعلى فكرة الطريق مزدوج من خروجك للرياض إلى الحفر بس الـ 90 كيلو هذي خط واحد الله يعينك عليها ...


وفقك الله في حلك وترحالك
ابوفهيدان
10/02/2008, 06:23 AM
حبيبي انا طريقي كل شهر من الكويت للرياض
اطلع من الرياض وانت رايح للدمام بعد ماتمشي 280 كيلو قبل الدمام
خذ الكبري حق جودة ومن جودة للنعيرية ومن النعيرية للخفجي اسهل وفي محطات كثير ولا انت بمقطعة والحين ربيع خير وتستانس علي الخط كله مخيمات
وبالنسبة لمحلات الرحلات انا من الكويت وماأشتري الا من عندكم وماعندنا شي
خذ محلات سلاح وبس عندك محلات المزين مقابل سوق شرق
وعندك البوري مقابل الكوت وفي غسرها بس صعبة تدلها
وانشالله ترافقك السلامة
abdu3abd
30/10/2008, 08:42 PM
ياجماعه محتاج افادتكم ...
انا من جده و عندي شغله بمنفذ الرقعي ...
وش اقرب مطار للمنفذ ...
هل هو مطار حفر الباطن ؟؟؟
ولا حفر الباطن مافيها مطار ؟؟؟
المهم ابيكم تعطوني افضل طريقه اروح بيها من جده الى الرقعي ...
و سلامتكم ...
الشاقي
30/10/2008, 08:49 PM
اذا وافقت روحتك امطار على هالجو الحلو اطلع سلمك الله الرياض- رماح -شوية -الرفيعة -قرية- الخفجي
بس اكثرة خط مشترك
واذا تبي خطين وسيعة و راحة الرياض -المجمعة- الحفر -الرقعي -الكويت
انا اروح للكويت عن طريق المجمعة
اما محلات الرحلات ما ادري وينها لكن يبدو انك بتلقى شي بالجهراء
abu naif
30/10/2008, 09:01 PM
مرحبا ابو سعيد حفر الباطن فيه مطار بجوار القيصومة يبعد عن حفر الباطن 17 كيلوا والرحلات عن طريق الخطوط السعودية على ماضن يوم الاربعاء والخميس والله يحيك والمنفذ يبعد عن الحفر تسعين كيلوا
abdu3abd
30/10/2008, 09:41 PM
مرحبا ابو سعيد حفر الباطن فيه مطار بجوار القيصومة يبعد عن حفر الباطن 17 كيلوا والرحلات عن طريق الخطوط السعودية على ماضن يوم الاربعاء والخميس والله يحيك والمنفذ يبعد عن الحفر تسعين كيلوا
شكرا حبيبي على سرعة التفاعل ...
بس ممكن تقولي هو المطار اسمه مطار حفر الباطن ولا ايش بالضبط ؟؟؟؟
shamlan
31/10/2008, 10:31 AM
مرحبا اخوي abdu3abd

اسمه مطار القيصومه

وبالتوفيق انشالله
صقر العثمور
31/10/2008, 10:53 AM
هلابك اخوي وحياك الله انا اشوف ان خط الدمام الخفجي احسن بالتوفيق وتوصل بالسلامه اما بالنسبه للمحلات بالرياض والقصيم احسن بكثير من الكويت بالتوفيق
أبو_خالد
31/10/2008, 05:55 PM
المطار اسمه
مطار القيصومة
وبلدية حفر الباطن مسميته على اللوحات الإرشادية
"مطار حفر الباطن بالقيصومة"
من أجل ينسب للمحافظة ولا ينسب لمدينة القيصومة
(عاصمة حفر الباطن في السابق)
ولو تطلب مطار حفر الباطن ما يردك إلا المدينة العسكرية

وهو يبعد عن طريق الكويت تقريبا 15كم
و يبعد المنفذ بعد ذلك 90 كم تقريبا

ويوجد رحلات مباشرة من القيصومة إلى جدة
أعتقد مرتين أسبوعيا
abdu3abd
31/10/2008, 10:53 PM
شكرا اخي shamlan
و شكرا اخي
ابو خالد
بالفعل بحثت في موقع الخطوط السعوديه عن رحله لحفر الباطن فلم اجد ...
و لكني وجدت رحله للقيصومه ...
شكرا للافادة المهمه جدا ...
و جعلها في ميزان حسناتكم ...
الحايلي
06/12/2009, 01:05 PM
حبيبي انا طريقي كل شهر من الكويت للرياض
اطلع من الرياض وانت رايح للدمام بعد ماتمشي 280 كيلو قبل الدمام
خذ الكبري حق جودة ومن جودة للنعيرية ومن النعيرية للخفجي اسهل وفي محطات كثير ولا انت بمقطعة والحين ربيع خير وتستانس علي الخط كله مخيمات
وبالنسبة لمحلات الرحلات انا من الكويت وماأشتري الا من عندكم وماعندنا شي
خذ محلات سلاح وبس عندك محلات المزين مقابل سوق شرق
وعندك البوري مقابل الكوت وفي غسرها بس صعبة تدلها
وانشالله ترافقك السلامة




السلام عليكم ورحمة الله

الاخ العزيز ابو فهيدان كم تظهر مجموع المسافة من الرياض إلى الكويت بواسطة الطريق المذكور آعلاه. مع الشكر الجزيل مقدماً.
امبارك
06/12/2009, 02:46 PM
ياجماعه محتاج افادتكم ...
انا من جده و عندي شغله بمنفذ الرقعي ...
وش اقرب مطار للمنفذ ...
هل هو مطار حفر الباطن ؟؟؟
ولا حفر الباطن مافيها مطار ؟؟؟
المهم ابيكم تعطوني افضل طريقه اروح بيها من جده الى الرقعي ...
و سلامتكم ...


في رأيي المتواضع.. تسافر على طيران الجزيرة من جدة للكويت.. وبعدين تطلع بتكسي كويتي للمنفذ.. تخلص شغلك وترد للكويت.. يمكن تقول "وين إذنك يا حبشي؟".. بس صدقني هذا يمكن تكون أسرع وأرخص طريقة تروح فيها للرقعي.. نظرا لرخص تذاكر طيران الجزيرة.. وكثافة رحلاتها الجوية.. تحياتي
امبارك
06/12/2009, 02:58 PM
أقرب طريق..
(1) الرياض (المصيف) - رماح - شوية - قرية العليا - تقاطع خط القوات (محطة المنديل) - أبرق الكبريت - الخفجي - الكويت (الشويخ) = 610كم.. لكن لا ينصح به للعوايل والسيارات بدون دفع رباعي.. نظرا لوجود وصلة رملية من محطة المنديل إلى خط ابرق الكبريت.. إضافة إلى بعض الخطورة.. مثل المواشي والأبل.. ضيق بعض أجزاء الخط.
(2) نفس الخط السابق ولكن عن طريق السفانية بدلا من أبرق الكبريت.. يزود عليك بحدود 60 كم.
(3) طريق الرياض - جودة - الصرار - النعيرية - السفانية - الخفجي - الكويت = بحدود 700كم.. مشكلته نصف الخط غير مزدوج ويمر على بلدات وقرى كثيرة.
(4) طريق الرياض - المجمعة - حفر الباطن - الرقعي - الكويت = 750كم الأفضل للعوائل
(5) طريق الرياض - مطار الملك فهد - أبوحدرية - السفانية - الخفجي - الكويت = بحدود 800كم أيضا جيد ولكن بعيد.

تحياتي
الحايلي
06/12/2009, 09:21 PM
(3) طريق الرياض - جودة - الصرار - النعيرية - السفانية - الخفجي - الكويت = بحدود 700كم.. مشكلته نصف الخط غير مزدوج ويمر على بلدات وقرى كثيرة.
(4) طريق الرياض - المجمعة - حفر الباطن - الرقعي - الكويت = 750كم الأفضل للعوائل
(5) طريق الرياض - مطار الملك فهد - أبوحدرية - السفانية - الخفجي - الكويت = بحدود 800كم أيضا جيد ولكن بعيد.

تحياتي




السلام عليكم ورحمة الله


يلاحظ فرق المسافات بين الطرق، وأخص الأخيرة تقارب بعضها البعض أي الفرق بينها لا يتجاوز 100 ك . م، الطريق رقم ( 3 ) رجعت معه خلال زيارتي الأخيرة لدولة الكويت، أما الذهاب كان عن طريق رقم ( 4 ) من وجهة نظري أجد رقم ( 4 ) الأفضل خاصة لسكان منطقة الرياض. مع الشكر الجزيل لمداخلة الأخ امبارك حيث استفدنا من كافة ما ذكره. ولا تنسون اخوتي وأذكر نفسي أولاً بـ ( دعاء السفر ). والله يحفظ جميع المسلمين.
humaidi
06/12/2009, 09:44 PM
أقول اسمع العلم



اطلع طال عمرك على طريق الرياض القصيم السريع لين تجيك المجمعة ثم اطلع مع المجمعة يمين متجه إلى الارطاوية ثم تجيك بعد الارطاوية أم الجماجم ابتل على طول ثم تجيك مدينة الملك خالد العسكرية ثم حفر الباطن من الحفر خذ يمين نتجه للكويت وقدامك 90 كيلو للمنفذ الرقعي وعلى فكرة الطريق مزدوج من خروجك للرياض إلى الحفر بس الـ 90 كيلو هذي خط واحد الله يعينك عليها ...


وفقك الله في حلك وترحالك

انا رحت مع الطريق هذا واشوف انه ممتاز