يا خبراء الشيروكي شيروا علي لاهنتوا

[عاشق سمر]

السلام عليكم جمعيا

عندي شيروكي 98 له 8 شهور وانا استخدمه و معجبني انا وبزاريني و كنت بدخله ورشه عشان هالشغلات اللي بذكرها لكم و لكن قلت باشاوركم يا اخواني قبل ما ابدا باي شي و شوركم و هدايه الله.

الورشه ( اللي تنصحوني بها داخل الرياض )
الاديتر ( اللي عندي صفه وحده ولا لقيت صفتين )
مروحة التبريد ( اغيرها والا لا )
المساعدات ( شريت مورنو اماميه و خلفيه )
رفع السياره ( ابي ارفعها شي بسيط )
طقة القير ( الريوس و قدام )
هواء المكيف ( صار الغبار يدخل على السياره سواء شغلت المكيف او ما شغلته )
البواجي و اسلاكها ( ودي اركب رياضيه )
الكفرات ( مقاسها و نوعها )
سويتشات الدرايش ( مره تشتغل و عشر ما حولك احد والتحكم دايم من عند السواق !!!!! )
عوامة البنزين ( خربانه مدري اصلحها والا اغيرها )
تهريب الزيوت من الصدام للصدام
الركب
وزن الاذرعه و الدركسون ( اذا لفيت يمين او يسار بسرعه اسمعه كنه يصيح )
تربيط ( يمكن و ترى مو اكيد )
مثبت السرعه ( ما عاد يشتغل )

وفي النهايه ياخواني بمشي على راي الاغلبيه و الله يوفقني و اياكم

[جابر1]

وعليكم السلام اخوي عاشق سمر

بالنسبه لرفع الموتر انصحك بتركيب السسته الاخيره من سست الجمس يعني اصغر وحده وتركبه فوق السسته الاخيره لشروكي يعني تصير الثانيه
وبكذا انت ترفع الموتر انش ونص فقط وتحمله ايش ماتحمله ماينزل ابد والارتفاع بيكون مقبول جداً

اما بالنسبه للكفرات فأعتقد ان كل له رأي ورأيي ان تركب 235\70\16 domenitor
وسوف تلاحظ الفرق في النفود

[شروكي ربع]

الورشة : امورك اللي تسأل عنها لا تحتاج الى ورشة متخصصة بالشروكي , ولكن بالصناعية القديمة في اكثر من ورشة متخصصة وانحش عن المطيويع .


الرديتر : يوجد وبكثرة الرصتين ( المونيوم ) , واذا اردت تقدر تفصل 3 رصات نحاس , و السعر للواحد 350 ريال , وانصحك بالالمونيوم لسرعة تبريده .


المروحة : اذا الموتر تماتيك خلها على حالها , واذا عادي ركب سوباروا واحدة فقط , وفي كل الحالتين ركب بلف كابرس 160 .


المساعدات : ممتازة المونرو للعائلة .


رفع السيارة : من الخلف زيادة سسته ومن الامام كعكات 3 او 2 س .


طقة القير : اذا تقصد في حالة التعشيق السريع من الريوس للامام فهذه طبيعية .


هواء المكيف : عندك يالغالي الهواية الخارجية او البلاستيكات اللي تدخل الهواء الخارجي متكسرة والله اعلم .


البواجي الرياضية : خل موترك على حالة لانك بتحتاج منظم كهرب في حالة البواجي الرياضية , يعني خساير فلوس ولعب بالموتر دون مقابل يستاهل .


الكفرات : 235/70 مقاس جميل للعائلة , واذا للبر 255/70 وطبعا الكفرات دومنيتر .


الدرايش : مالي بها علم .


العوامة : مالي بها علم , ولكن سبق وان صلحة لموتر آخر عوامته وكانت الفلين اللي يعوم منطلق فثبته جيدا وصارت من افضل ما يكون .


تهريب الزيوت : دائما اذا الموضوع تندية بسيطة خلها على حالها , واذا زادت عليك بالمسارعة بالتغيير .


الركب ووزن الاذرعة : كلها عند الميزان , واحرص على واحد معروف وامين .


تربيط : اذا مافي قرقعة و انت ما تحس ان يحتاج خله على وضعه .


مثبت السرعة : عندك يالغالي خلف البوري في قاعدة تحتاج لتغيير وهي منظم ومشغل المثبت , ولكن تأكد أولا قد تكون من الفيوز .



والله يعينك ويكتب لي اجر هالرد , ولا تنساني من دعائك ..

[المكشات]

^
^


لله درك

أضافة بسيطة

بالنسبة للشيروكي تهريب الزيوت بالعادة تكون صوفة مكينة اذا التهريب بين المكينة و القير

و وجه القير اذا من القير

و صوفة الدفرنس اذا من الدفرنس

[علي101]

[quote= معجبني انا وبزاريني [/quote]
وكيف لو كان قراند شيروكي 2004
والله يعينك ويساعدك على الشغلات السابقة