تحويل باب الندكروزر الى شنطة (خلفية لكزس)

[ابو عبداللهG]

السلام عليكم ورحمة الله وبركاته
اشكر القائمين على هذا الصرح الكبير (مكشات )والله يجزاهم خير ويوسع اصدورهم كما وسعو اصدورنا
اول مشاركة لي في منتديات مكشات رغم انني مسجل من قديم ومن المتابعين له بشكل يومي
سؤالي عن كيفية تحويل الندكروزر 2001 Gxr من باب الى خلفية لكزس
1- هل هي مكلفة وكم سعرها واين احصلها
2-افضل ورشة تصلحها
3-اثارها من حيث الصوت ودخول الغبار
4-هل يصلح خلفية لكزس واسبيرين واحد علاق
والله يجزاكم خير ويرزقكم من اوسع ابوابة

[متصفح مكشات]

تبي النصيحة خلك على شغلك والبربسة ذي ابعد عنها ( وجهة نظريي)

[براري القصيم]

فيه ورشة الحربي بالسالمية ببريدة طريق عنيزة وأظنها تكلف من 2500-3000 ريال وشغلته بسيطة إن شاء الله
لكن ليش تحط خلفية لكزس إذا تبي تحط اسبيرعلاق؟!!

[SAUDI2005]

حلات الشي رقعته منه وفيه

[ناصح]

فيه ورشة الحربي بالسالمية ببريدة طريق عنيزة وأظنها تكلف من 2500-3000 ريال وشغلته بسيطة إن شاء الله
لكن ليش تحط خلفية لكزس إذا تبي تحط اسبيرعلاق؟!!

إذا أنت ملزم وراعي بر

خذ بنصيحة ( براري القصيم )

[ابو عبداللهG]

ما قصرتم والله يعطيكم الصحةوالعافية على مروركم

[ابو عبداللهG]

بالنسبة لطلعاتي للبر خفيفة يعني بالشهر ثلاث مرات أو أربع
علما بأنني في الرياض اسأل عن ورشة في الرياض

[رومل]

لاترهم شي يابو عبدالله خله وكاله

[سفاري فتك]

اذا تبي خلفيه بيع سيارتك
وزدها شوي وخذ خلفيه تكون شد بلد احسن
تحياتي

[aziz2727]

وينك يا بو عبدالله
انا عندي لندكروزر خلفيه لكزس
والله تحسفت اني خذيته كان ودي باب خلفي واستبنه على الباب لاكن قدر الله وما شاء فعل
ما تعرف قيمة الشي الا اذا جربته وشفت فوائد ومضاره
طبعاً الاستبنه الي تجي تحت مشاكلها تحك في الرمل وتاخذ حيز يمكن الاستفاده من في اشياء اخرى مثل وضع خزان مويه او اي شي ثاني
والله يدبرنا وياك وكل مسلم على الخير
:)

[z a n h o r]

يالغالي شغل الترهيم ما ينفع

وان كانك ملزم تبي تغيره فانا اقول غيره الى شنطه استبنه علاق

لان لو فكيت الاستبنه وقواعدها تظل اثارها مشوهه منظر الموتر

وانا رايي انك تخليه على بلاده وتبيعه و تاخذ لك شنطه خلفية لكزس او علاق

وتراه مطلوب بالسوق من قبل اخوننا اليمنين يقدرون خلفية الباب اكثر من الشنطه

[1400]

بدل الموتر ازين لك وانا اخوك

ترى شغل الترهيم يدمممممممممر السياره

وتبدى الاصوات والغبار وعادم الشكمان

والحمدلله اللاندكروزر مالي المعارض وتلقى اللي يدور البابين ولا زد شوي

وخذ لك شد بلد



اخوك 1400

[ابو عبداللهG]

ما قصرتم والله يعطيكم الصحةوالعافية أشكركم على مروركم

[M o b d a]

إسمع كلامي ..

رح إشتر يك إستبنه جي إكس

سخيف ..

مع كفر جديد

بتطلع عليك حوالي الت 500 ريال ..

وركبه تحت بدال ما تقعد تحوس نفسك

وتخرب موترك

ولا تدري وش النتيجه ..


قبل سنتين

لاقي لاندكروزر 2000 أو 2001 ناسسي

يسام بـ 40 ألف ..

إستغربت الصراحه ..

سألته ليه يسمونه كذا

قال لأني محول الخلفيه إلى خلفية لكزس وكان علاق ..


إن كأنك ما تقدر على شرا موتر علاق

ركب إستبنه جي إكس

:)

والله يسهل عليك

[علي عليوه]

أنا يا أبو عبدالله معي جي اكس ار 97 خلفيته أبواب والاستبنة علاق

بس كنت منزعج من الاصوات والازعاج وأنت أبخص ...

قررت مثل قرارك إني أبدل لخلفية شنطة وكان في عام 1424هـ تقريبا

المهم رحت لتشليح الحاير وحصلت الاسعار نار وسبحان الله طحت في واحد وقال أجيبها لك بس لي سعي 100

وما قصر جابها لي بـ 1200 وكان سعر خيالي وقتها حيث كانت تصل إلى 4000 ريال بس عيبها اللون زيتي وأنا أبي أبيض ,,,

رحت لورشة وقص لي فصالات الأبواب القديمة ورهم لي قواعد داخل البدي للفصالات الجديدة اللي تجي تحت

علشان الشنطة ,, وزبطها لي مع كهربها وبابها اللي فوق وفصالاته ومكان الفصالات القديمة جلخها ونعمها وصارت ما هي واضحة بالحيل ..

ومن ذاك اليوم إلي يومك هذا والله العظيم ما شفت منها إلا الخير لا أصوات ولا قرقعه ولا غبار

وبالنسبة للعلاق حق الاستبنه شال القديم لأنه ثابت وركب الجديد مكانه لأنه متحرك كما تعلم وجاي بالملي

وبالمناسبة بعد ما سويت هالحركة يشهد الله كل أخوياي قلبو مواترهم شنطة ومنهم أخوي معه جي اكس آر 2005

بس يكون بعلمك سياراتنا ما عرضناها للبيع ولا أعلم هل تؤثر بالبيع أم لا ,, وأعتقد لا و لا و لا

وأخيرا عندي واحد من العيال ما شاء الله وزنه 120 كيلو ينطح كيلو وأخليه يرجلس على باب الشنطة وأنا معه
ولا تغير أبد ولا اختلت ميزانيته ..
المشكلة إذا كانت الاستبنة تحت وتبغى تعلقها هنا تحتاج تخريم إلا إذا كان مكان السلم يناسب الله أعلم

وبالنسبة للاخوان اللي نصحوك بكنسلة الموضوع ترى معهم حق ,, والترهيم يخوف

بس حبيت أذكر لك تجربتي ولك الحكم في الأول وفي الآخر

[صقر نجد99]

انا كان معي جيب 2001 استبنة علاقي ومركب فيه تانكي ماء وكان مريحني بشكل ممتاز يعنى ناسي هم الماء ومع الاسف بعته وشريت 2004 خلفيه الكزس وتعذبت بشيل الماء

[F B I]

يا الربع هل تركب على جيب gx 94 لان الخلفية للموتر باب وابيها شنطة لان العالم كلها يمدحون الشنطة وين يركبونها با القصيم ولا الحفر ولا الزلفي

[ابو عبداللهG]

اشكر كل الاخوان على هذه الردود والله يجزاهم كل خير
ياخوان هونا عن خلفية الكزس (خوفا من تشويه السيارة من الجهة اليمنى مكان الاستبنة ومن الجهه اليسرى سلم مساكات) ودنا جناح والاستبنة مكانها علاقي هل يصلح للابواب جناح وهل الجناح المفصول يصلح ام لازم يحول الى شنطة بدل الابواب والاستبنة علاق
الله يعينكم على كثر الاسئلة

[ابو عبداللهG]

اشكر كل الاخوان على هذه الردود والله يجزاهم كل خير
ياخوان هونا عن خلفية الكزس (خوفا من تشويه السيارة من الجهة اليمنى مكان الاستبنة ومن الجهه اليسرى سلم مساكات) ودنا جناح والاستبنة مكانها علاقي هل يصلح للابواب جناح وهل الجناح المفصول يصلح ام لازم يحول الى شنطة بدل الابواب والاستبنة علاق
الله يعينكم على كثر الاسئلة