مشكلة مستعصية مع الحرارة في الباث ,, تعب زميلي الله يعينه في حلها ! من لها ؟؟

[علي عليوه]

السلام عليكم ورحمة الله وبركاته ...


إخواني الأعزاء أعضاء مكشات الرمز ,,


لي زميل معه باث فندر 2002 وعنده الحرارة ترتفع بشكل غريب


بداية المشكلة ارتفاع مفاجئ للحرارة وحتى مستويات عالية جدا وعلى ما أعتقد إنه غفل عنه حبتين


وهذي هي المشكلة ..


نجي للإجراءات اللي سواها :


- غير الأديتر كامل مع الغطاء


- كشف على جميع التمديدات والخراطيش والقفزان ولم يجد أي خلل أو تهريب


- كشف على الراس لا يكون منشعر وإلا متغير وعند أكثر من ورشة منها ورشة العضيب ولم يجد فيه أي خلل


- نصحته بفحص طرمبة الماء فذكر إنها ما فيها تهريب والأديتر ما ينقص ولا قطرة


المطلوب منكم يا أخوان النصح بأي حل مع العلم إن الحرارة الآن ثابت على النصف بس ما كانت كذا


ومن استخدم الباث يعرف ذلك ..


الله يجزاه كل خير من سعى في المساعدة ...


ـــــــــــــــــــــــ

[عاشق النداوي]

السلام عليكم اخوي هو غير البلف يمكن منه ولى اليات منسده والله يعينه ويكفيه من العيون امييييييييييييييييييييييييين

[Black VTC]

اذا كان سبق وان غير المروحة فخله يتأكد لا يصير الكهربائي قلبها ترا الباث تركب مروحته على الوجهين ... مجرد رأي ..

[وسيـع البـنايد]

دام المراوح الأتوماتيكية تشتغل .. يتأكد من بلف الحرارة ربما يكون السبب
ولو كمل عليه الفترة الجاية غلى ما يجي الشتاء القادم مافيه خلاف

[ناوي نيه]

انا اعرف ناس معهم باث اذا جو يركبون اديتر جديد قبل مايركبونه
يصيخونه اقولهم ليش يقول هو لازم ليش يصيخونه وهو جديد والله مدري

[نمر 33]

صيخ الأديتر وسأل مجرب

[A.B.A]

أخوي / على عليوه


أنا معي باث موديل 2003 وصار معي نفس الموقف وصراحة كرهت شي أسمة باث والسبب
أني بدلت كل شي مثل
1
غطاء الأديتر من الوكالة
2 موية الأديتر من الوكالة
3 بلف المكينة ( الترموستات ) من الوكالة
4 وصيخت الأديتر ليش في الوكالة
وكل هالتعب ولم أحصل على نتيجة وكانت الحرارة معي توصل النص
ولكن الحمد لله
تم التعرف على الخلل لكن الخلل طلع يكلف 1.500 D.K أي دينار ونص كويتي يعني 21 ريال فقط


أليك الخلل والحل الخلل كا في المروحة الميكانيكية الموخودة بين الأديتر والمكينة
يوجد بها قرص حديدي يسمى (( كلتش المروحة )) كان تعبان أي أنة ليش قوي
وطريقة فحصة كالأتي أذا كانت السيار شغالة وحرارتها زايدة شوي وقف دوران المحرك
وخل واحد من العيال داخل السيارة وأنت أمسك المروحة بس حط بالك لا تسحب يدك
وقلة يشغل السيارة أذا كانت قوية ميرة ترى الخلل مو فيها لكن أذا كانت نص ونص
عجل الخلل منها ويجب عليك أن تقوم بجولة عند محلات قطع الغيار والبحث عن زيت يسمى

OIL Silcon أويل سيلكون (( هو علبة شفافة طول الأصبع )) خذلك علبتين
وهو زيت يخص كلتش المروحة
ورح عند أقرب ميكانيكي وخلة يبدلك الزيت
وأن شاء الله بتدعيلي

ملاحظة / ترى ماكتبت تكلفة الميكانيكي

[turkiq]

اخوي A.b.a

طيب واللي غير كلتش المروحة بالكامل
ولا نفع ؟؟
حصلت لي ...

عجزت وعجزت الوكالة وعجز الميكانيكين

فعلا شي يحير

[علي عليوه]

عاشق النداوي / البلف مغير والليات كما ذكرت لم يجد فيها شئ وجزاك الله خير

Black VTC / جار التأكد وجزاك الله خير

وسيـع البـنايد / المراوح والله ماني متأكد منهن لكن سيتم الفحص ,, والبلف كما ذكرت مغيره

ناوي نيه / غريييييييبة جدا !!! أول مرة أسمع بهالكلام ,, لأن التسييخ لفتح المواسير المسدودة وتلحيم التهريبات

نمر 33 / الأديتر جديد وأعتقد ما يحتاج تسييخ إلا إذا كنت توافق أخونا ( ناوي نية ) في روايته عن أصحابه

A.B.A
/ بصراحة ردك يعجز اللسان والبنان عن شكرك عليه ( لكن الله يعوضك بما ضيعته من وقت في كتابته بأجر غزوة في سبيل الله )
كلامك جميل ويحكي تجربة كما هو واضح وسيتم تنفيذه خطوة خطوة وعسى الله يكتب التوفيق لنا ولك .

turkiq / الله يهديك ما أمدانا نفرح بالحلول إلا وعفستنا بهالخبرية اللي باين نهارها مش كويس
لكن الله يفرج عنك وتزول كربتك وتنحل جميع مشاكلك ..

[حاتم نجد]

يمكن فية حساس حرارة

[رجل كريم]

السلام عليكم ورحمة الله وبركاته:


اعتقد ان رأس المحرك بحاجة الى صنفرة .. وقد يحتاج تغيير البلوف الصمامات ..وليس شرطا ان يكون صوت البلوف ظاهرا خاصة انك استنفدت جميع السبل ماعدا ماذكرت لك ..

تحياتي ..

[لن أمل من العطاء]

السلام عليكم

علي عليوه ياللي ضرب الزميرا..........

الحل عندي وانا اخوك


حبيبي محركات نيسان الجديده خاصة في الماكسيما والالتيما وطبعا اكيد حتى في الباثفايندر انه يحتوي على عدد اثنين بلوف للحرارة يعني اثنين ثرموستات واحد في خرطوش الداخل والثاني في خرطوش الخارج جميع الميكانيكيين لا يعرف الا الخارج ولا عمرهم سمعوا بثرموستات الداخل هو السبب يمكن مكسور بالداخل يجعل الماء يمشي ببطء ويذلك تسخن السيارة
كيف تعرف انه في اثنين ثرموستات لازم تلاقي كوعين عند المكينه اللي تركب فيها الخراطيش يعني واحد على يمين المكينه والثاني على يسارها

وان شاء الله انا اللي جبتها لك وعرفتك بالحل

وايضا

تذكروا انني لن أمل من العطاء

[.أبوعبدالرحمن]

اخوي لن امل من العطاء واخوي A.b.a ارى ان حلوهم والله اعلم انها الصحيحة ولا يهونون باقي اخواني والله يعجل لكم اصلاحها

[ك و ح]

هذه المشكلة دائما تكون من الرديتر الداخلي اللي ورى الطبلون اي حق المكيف الحار قم بإلغائه وسوف تسلك معك الحراره

[متعب القويعي]

سيخ الاديتر حتى لو كان جديد ,,,,,خذ علمك من مجرب

[علي عليوه]

يا اخوان انا كل ما دخلت الموضوع وشفت الردود والحلول المميزة

والتي تحكي تجربة عميقة أكاد أسقط من الخجل لأنيلا أستطيع الرد على الردود عن ما نتج بعد الفحص

ولكن أعدكم بكل جديد بعد كل زيارة للميكانيكي

ولا أقدر أقول إلا الله لا يوريكم مكروه في من يعز عليكم ولا فيما يعز عليكم ,, ولا يحرمكم أجر سعيكم للخير ...

[الدريبي]

الحرارة اذا لم تتجاوز النصف فهي طبيعية

التوقع من البلف لان جميع التصميمات تتصمم لتتناسب مع اجوائهم الباردة انزع البلف وبالتوفيق

[السامر2]

اعتقد أنه من الإديتر والله اعلم عليك بتسييخه وستجدالفرق بإذن الله تعالى

[ندمان]

أنا أضم صوتي لـ ك و ح
تأكد من الأديتر الداخلي ................

[عاشق النداوي]

بشر اخوي وش صار ضبط موترك ولا لا انا ما أتوقع المصيبه بالأديتر شيك على اشياء ثانيه لها سبب في الحراره والله اعلم

[altheeeb79]

علي عليوه وين رحت لقيت الحل وإلا لا

[علي عليوه]

يا اخوان انا إلى الآن بانتظار التفسير الصحيح للمشكلة وسأوافيكم

بالاخبار أول بأول

وأعجز عن الشكر مهما قلت وأخص الأخ عشق النداوي الله يجزاه خير ....

[بواردي الدلم]

اجل ابعد انت وياه شوي


خذ الحل مني


انا شلت البلف اللي على اليمين ( الداخل )

والحمد لله الحراره على ال(c)


ترى البلف مقلب ياجماعه الخير مايصلح لنا الا في الشتاء القارص عشان يحتمي الموتر بسرعه
اما في الطعوس النيسان عموما يصخن بسرعه

طبعا الشباب اللي ردو عليك ماجابو شي من عندهم كل كلامهم من واقع تجربه

ولا تنسون شي بعد احيانا الخرطوش يكون زين مايهرب ولا شي وشكله جديد ولا كن مع الوقت يفقد قوته فإذا دعست بنزين ينصفط يعني ماعاد يسمح للمويه بالمرور وبالتالي يصخن الموتر

واذا تبي تعرف كان حساس الحراره يشتغل مضبوط ولا خربان فكه وحطه في كاس مويه تغلي وشف الحراره ترتفع ولا لا ( نستخدم هذه الحركه في فحص حساس حراره محرك الطائره )

تقبلو مروري بكل صدر رحب