يا جماعه وش رايكم يقوم عليه حق ؟

[راعي عنيزة]

السلام عليكم ورحمة الله

اخواني الاعزاء هل تذكرون موضوع خالي السمح حول الكشته وتحديد المكان
الم يلفت انتباهكم احد الاعضاء المشبوهين ومحاولته المستميته لابعاد الكشته عن ديرته وجعلها في قلائع وادرين فتارة يقترح الكشته بالربع الخالي وتارة يقترح الكشتة في الحفر وتارة في الدهنا معرضا حياة وارواح اعضاء مكشات البريئه للخطر والضياع في مجاهل تلك البران الموحشه
وكنا نحسب الامر بسلامة نية وانه يريد الربيع ولكن الحقيقه المره انه اراد ان يبعد الكشته عن الرس :eek: :eek: :eek:

والادهى والامر انني اكتشفت بمصادري المطلعه ان هذا العضو لديه في الرس مخيم متكامل وعلى احدث طراز وافخم تجهيزات وحتى انه يخيل لمن ينظر له انه امام مخيم لواحد من طويلين العمر فكل شيء بالكمبيوتر
حتى الحطب مبرمج فهو يولع من نفسه وبدل الدخان يخرج منه عطر فيرساتشي
وبيالات الشاهي مبرمجه بحيث انها تنقز الي فمك لترتشف منها رشفة ثم تعود الى الارض من تلقاء ذاتها (اليابان ما خلو شي)

بقي ان تعرفون ان صاحب هذاالمخيم العجيب هو راعي كيف :eek: :eek: :eek:

نعمممممممممممم راعي كيف لديه مخيم ولم يعزمنا ولم يقل اقلطو على العشا او اقلها بيالة شاهي ع الماشي ولا تخشى من الواشي

فما رأيكم يا شباب هل نقيم عليه حق ويعزمنا على العشا او نحط احداثيات المخيم ونحنشله انطلاقا من مبدأ كل من ايده اله ;)



وبالمناسبة جادت قريحتي بهذه االرائعة التي مثل خشتي :)






يا حيف يا راعي الكيف يا حيف = اثرك من خنشليله وتقول انا من مواليد جنيف
وتقول انا ابو زيد الهلالي بشيلة السيف = وحاتم الطائي بالكرم وذبح الخواريف
معصي يا خلفهم ما شفنا منك الا التصاريف = وكل هرجك خرط بخرط وماعندك الا التخاريف
ويا عل مخيم ما يطبه السمح وايمن وشقرديف(1) = يا عله العجاج الي يطيره ويحلته باقصى جريف
ويا علكم السيل الي يحوس قشكم ويغديه تناتيف = عقوبة ربي لبخيل ما اكرم ربع مكشات مماليح التواصيف
وكش عليك اي دونت لوف يو يا ال ثيف(2) = طس الله يحوم تسبدك انت ومخيمك ابو خراطيف(3)



معاني الكلمات
1- شقرديف = شقردي حسب نطق اهل اديس ابابا <<< صرفه
2- ثيف = حرامي بالانجليزي
خراطيف = المعنى ببطن الشاعر ومخباته

[عبدالعزيز الدباسي]

اسسسسسسسستلم يالغالي


أفا ياذا العلم ياراعي عنيزة=أنت تقول الصدق والا تهلس علينا
علمنا بالصدق وخل عنك الطنيزة=ترا ما نسمح لك تلعب علينا
وإن كان منقولك من ارجالن عزيزة=أبشرك بسعدك يالغالي وحقك علينا
والله لانسم كفراته ويروح في تغريزة= ما يطلع من الرمل الين يدق علينا

[أيمن]

خللللّوووووووووها

[راعي عنيزة]

شقردي صح لساااااااانك والعلم جد ووكاد ومهب مزوح
الرجال عنده مخيم جديد وواصلتنا علومه بالتفصيل ولو تبي احط موقعه حطيته ;)
مير باسكت اغديه يستحي ويعزمنا بطيب خاطر قبل ما نطب عليه غصب :D


ايمن ايه هين خلووووووووها
محنب مخلينها الا اذا سمعنا الحق يثغي ونقلط عليه ;)

[الشقردي]

الصراحة وتبون الحق

ماأدري بالضبط من اللي يقوم عليه الحق

راعي كيف

ولا


السمح

بتسألون وش دخل السمح
بجاوب وأقول أنه هو راعي اقتراح كشتة التعارف لكن هو قالها ولا ما قالها والا الشباب كلهم معزمين والله قدام
وذا يسأل
وذاك يقول متى والثاني يقول وين !!!!!!!!!!!!!!!!!!!!!!!1

واخر شئ قالها الاخ السمح (بما معناه) أشكركم على التجاوب والحماس
وبعدها ما صار شئ....... :o :o

















أفيدونا في كشتة التعارف مأجورين



واما اخونا راعي الكيف
فانا التمس له العذر !!!!!!!!
ليش؟؟؟؟

لان الاتفاق اللي كان بيننا لكشتة التعارف كان الموقع في بر مهوب مخيم
لانه لو صارت في مخيم والراي لكم بتد خل فيها الرسميات بشكل كبير والصراح انا ما أفضل هالشئ





في الاخير انا أقول الافضل نرجع لموضوعنا الاساسي ونحدد موقع ووقت








كشتة التعارف

[السمح]

شف ياراعي عنيزة يبدو لي والله أعلم إنك غاير من راعي كيف إن عنده مخيم بهالمواصفات وتبي تألب عليه بقية الأعضاء وفي نفس الوقت تبي تنتقم منه يوم إنه كسر راسك بموضوعه اللي تحت (تراه فتوة) .. هذي وحدة ... والثانية : هو ملزوم يجمع خلق الله في مخيمه الإلكتروني اللي عطيتنا مواصفاته ؟؟؟؟ .. وكان من الأولى إنك أنت تدعونا لمزرعتك خارج مدينة عنيزة فالمزرعة أحلى وأوسع صدر من المخيم ،، أو أنا غلطان .. وترانا ياربعك ما نبي شي كثير وغيرك المعلم .. كل اللي نبي الترحيب وسماحة البال وطلاقة الوجه مع ما يلزم هذه الأشياء حتى لا يقال عن أهل عنيزة إنهم بخلاء .. بس !!

أخوي شقردي : إصبر لا تستعجل الأمور ترى رفيقك يبي يحصل مكاسب شخصية على حسابنا .. أنا خابر إنك حكيم ومتأني ، خل نسمع راعي كيف وش يقول وبعدين يسهل الله .. وأذكّرك إن إخوة يوسف جاءوا إلى إبيهم يبكون .. وهم رامين أخوهم بالقليب .. إصبر .. بالمناسبة أشعاركم كلها حلوة وخفيفة بخفة أنفسكم .. الله يعطيكم العافية .. حاولت أصير مثلكم ولكن ماش ما قدرت طلع معي شي ما أدري وشو هو مهوب إنجليزي ولا فرنسي بس شكله هيروغليفي .. أو ما أدري ..

الأخ الشقردي : والله ما أدري وشلون دخلتني بالموضوع .. لكن خل أعطيك وجهة نظري برحلة التعارف ، ياعزيزي صح إني اقترحت الرحلة ووضعت لها مقدمة ولكن كوني اقترح لا يعني هذا أني ملزم سواء من نفسي أو من الأعضاء الكرام مثلك بأن أقوم بتنظيمها والإعداد لها .. وهذا لأسباب كثيرة يطول شرحها الآن .. وكنت أنتظر منكم أن يتم التنسيق من أجل توزيع المهام والأعباء لمثل هذه الرحلة .. وعندما لم يتم ذلك فتحت موضوعاً جديداً بطلب منظمين لهذه الرحلة ولكن مع الأسف لم يتجاوب مع هذا الطلب إلا راعي عنيزة والأخ الوراد وليس صحيحاً أنني أنهيت الموضوع بالشكر للمتجاوبين فقط .. انظر إلى هذا الرابط http://www.mekshat.com/vb/showthread.php?s=&threadid=1070

تقبل تحياتي ...

[العمدة]

وخروااااا


وشذا

وش هالحركاااااااااااااات


اثركم شعار وحنا ماندري


سيبووووووووووها :confused:






بس وش أخبار كشتتنا


لا تنملص



لاتنملص إت مينز بالحجازي لاتتفركش;)

[الجسار]

تسلم يا راعي العنيزه


وتسلم علي معناااااااااااااي الكلامااااات :):):):):):):)







وشكراااا

[راعي كيف]

تكفون ياهل المنتدى تكفون"="
شوفوا حبيبي و قولو له
قولوا مُحبك غدا مجنون"="
ومن الجفا ضاع مدلولة
خلوه يلطف علي بالهون"="
من ويلة النفس مقتولة
أعيش عمري وانا مطعون"="
بسيوف صده ومسلوله
لاغاب عني فانا محزون"="
وافرح إلى شفت أنا زو له

:D :D
راعي عنيزة وقلبي المفتون

راعي عنيزة ياربع هذا سقيم
مجنّب درب السراط المستقيم
تعوذوا من كل شيطان رجيم
يالله عسى جنسة من أرضك ينقطع


:D :D






شقردي الحبيب شكراً لك كثريش
.......................... وشـكــــلك تـحب بـطنك و تـملى الـكريش
لاكن تبغى نقول الصحيح مهناش
.......................... اسرار مايعرضلها خلق ولايحسبها دباش
:rolleyes:







يقول منهو كاتب ها لقصيده"="
باالحسن والله مالقا مثل السمح
هذا الولد يا ناس حاله فريده"="
ريح الخزامى والنفل منة تفوح
لاجيت ابو تركي ناوي البعيده"="
يركب ولاينشد على وين بنروح
ماتمل هرجة والحكي مايعيده"="
ماهو من اللي يزعجك تقل مجروح





اما بنسبه للمخيم في الحقيقه نعم هناك مخيم ولاكن خيمه عمودين به 32 شق الرواقات الله ياكافي عمود منكسر والعمودين الوسطيات واحد حديد والثاني خشب والعزبه امس جاء عجاج إمتلت تراب المجموع 3000 عيب بالخيمة تبون تجون الله مير يحييكم بالبيت أو بالبر أو بالإستراحه أو بلي تامرون فيه قولو بس وين .:cool:


الجاسر زين زين مع راعي عنيزة زين زين أوريك تجيك العازة:eek:



في الأخير أمر يارعي عنيزة بلي تبي


وياهلا مرحبا مرحبا بلجميع +++ عدي واب السقى عد نابت الربيع

http://mypage.ayna.com/waleeedn/YaHla.mp3

وأخيراً وليس أخراً تقبلو تحياتي وإعتذاري

دمتم للخير رجال

[السمح]

تسلم والله ياراعي كيف وما عليك زود .. وعز الله إنك طلعت أطيب من بعض ناس اللي مخلينا ..... وإلا خلها على الله .. :D :D

راعي عنيزة : يالله دورك ياخلفهم طلع الرجال مستعد بأكثر من ذبيحة ...:o :o

تقبل تحياتي ...

[راعي عنيزة]

الشقردي
الخطا راكب على راعي كيف 100% واصلا ما حاس طلعتنا وخربها الا هو واصلا هو سبب ازمة السكان وثقب الاوزون والعنوسة
لذلك يا يغدي رجال ونطلع في المخيم حقه ولا سنعناه ;)

السمح
شلون ادعوكم لمزرعتي وهي ما بعد خلصت ؟؟
توي ما بنيت غرف ولا زرعت شجر ولا حطيت بير واصلا مابعد شريت الارض وما عندي نيه اشتري :P

العمده
هلا جناب االعمده وكشتنا اخبارها عند راعي كيف طلعها من حلقه ;)

الجسار
تسلم لي يا غالي


راعي كيف
------في الحقيقه نعم هناك مخيم----------
واخيرااااا اعترفت يا مجرررررررم والاعتراف سيد الادله ;)
خلاص حجرناك حجرة بس ويا تعزم كل الربع ولا نقطع عنكم تمويل الحبحر همن تموتون وتنقرضون :P

على فكره الشطر الاخير من البيت الاخير
------------عدي واب السقى عد نيت الربيع ---------------
الظاهر الاخ يدرس بالحرس محو اميه ليلي ومن الشين مغرز بسادس متوسط سبع مرات ;)