يالربع اللي عنده خبره في مفخرة الارض

[كاشخ 24 ساعه]

امس وصلت سيارتي من البريمي GXR 2008 V6


تصفحت الكاتلوج ووجدت ان البنزين 91 و 95 او أعلى

وش المقصود نعبي 91 او 95

الرجاء الرد سريعا لاني ابي اروح اكشخ فيه قبل ما اطلع اللوحات.

[كاشخ 24 ساعه]

انا طبعا دخلت على موقع ارامكو الرسميhttp://www.9195.info/ (http://www.9195.info/)

ولكن الموقع يعاني من مشاكل تقنيه ولا هو راضي يفتح

[الفوزان]

حسب مافهمت انه يصلح للاثنين , والله يعطيك خيره ويكفيك شره

[لن أمل من العطاء]

شوف اذا كان مكتوب انك تعبي 91 او 95 فالمقصود انه لا ينزل عن 91 لان فيه 87 و86 ولا عليك ابوجميل يضع استيكر على باب التانكي مكتوب عليه 95 وهذا ايضا من نصب ابو جميل البريمي اظن بدون استيكر

[الأديب]

اول شي الف مبروك اخوي كاشخ 24 ساعة ..
الله يعطيك من خيره ويكفيك شره ..
آآآآآآآمييييين ..
بالنسبه للبنزين تمنيت لو اقدر افيدك لكن للأسف ..
تمنياتي لك بالتوفيق ,,

[.أبوعبدالرحمن]

يا ابن الحلال خل منك 91 والله انه من يوم نزل وانا ما وثقت فيه اذا انت تبي موترك يعيش معك خلك على 95 وخذ شوري

[dheem]

كان مع أخي كامري نظيف وكان يعبي 91 يقول : تغيرت علي تعشيقات القير ( وكان الموتر توماتيك ) ثم بديت أعبي 95 يوم إن الموتر غدا مضبوط .

عاد أخوي يقول : إني أشوف راعين التاكسي في المحطات يعبون 95 وكنت أتعجب ولما حصل لسيارتي هذه

المشكله عرفت السبب

[نمر 33]

أي ان الموتر يقبل 91 عب منه وتراه يخب عليه

وتوكل على الله

لا تدقق واجد

[مقلع الرمث]

ياخوي عبي من 95 لإن 91 يضعف عزم الموتر وتسمع لقلقه بالسياره انا عن نفسي سيارتي باترول فتك ويصلحله 91 على موقع ارمكوا لكن لقيت الموتر مهوب الي تبي يلقلق وصار فيه صوت اول مااامشي وسألت ميكانيكي قالي عبي 95 ويروح هذا كله مالك بالطويله عب 95 مهوب حرام عليه الدراهم والله يعطيك من خيره ويكفيك شررره عاد ودي انتك على باااب يمين لا تنسااانا يكبر راسك علينا اسف على الاطاله

[كاشخ 24 ساعه]

اليوم كلمت الوكاله وقالوا لي ان السته سرندل تاخذ 95 والثمانيه سرندل 91 !!!!

شي غريب صح؟

على كل انا عبيته 95 وتوكلت على الله

وشكرا لكم جميعا على الردود والمساعده

[الرجباني]

نصيحه عليك ب 95 انضف للسياره
وترا 91 باقي مخلفات البنزين
حسب ماقاله لي شخص بالمختبر الرئيسي بمصفاة الرياض بارامكو

[كاشخ 24 ساعه]

نصيحه عليك ب 95 انضف للسياره
وترا 91 باقي مخلفات البنزين
حسب ماقاله لي شخص بالمختبر الرئيسي بمصفاة الرياض بارامكو


ههههههههههههههههههههههههههههههههههههه



أخوي مهندس في نفس المصفاه وصدقني اللى قال لك الكلام هذا اكيد يضحك معاك.

[لن أمل من العطاء]

اخي كاشخ 24ساعة

ياخي تخيل ان من صنع السيارة بالكامل من الصدام الى الصدام بكل اجهزتها الميكانيكية والكهربائية وانظمة الحماية والتعليق وانظمة السلامة وكل شيء يخص السيارة وهو من نصح في الكاتلوج المرفق مع السيارة من المصنع انك تستطيع استخدام بنزين لا يقل الرقم الاوكتاني عن 91
بعد هذا كله تصدق سوداني والا مصري والا سوري وحتى ان كان سعوودي بالوكالة ينعق بما لا يعلم والا اللي في الكاتلوج


ارجو ان ردي هذا فيه من الحكمة والواقع الشيء الكثير؟؟؟


وتذكروا انني لن امل من العطاء

[كاشخ 24 ساعه]

لن أمل من العطاء

ياحبي لك وبس

شوف حبيبي انا اصلا الغلط مني لان الكاتلوج تبع السياره يشمل جميع انواع اللاندكروزر وموضوع من 91 او 95 وجنبه نجمه صغيره ويوم بحثت عن النجمه وجدت انها ملحوظه تقول اذا مكينتك V6 استخدم بنزين 95 واذا كانت المكينه V8 فاستخدم 91 وهذا هو الصحيح

وعلى فكره اللى في الوكاله كان سعودي بس شكله فاهم لانه يتكلم انجليزي.

تقبل تحياتي

[المكشات]

نصيحه عليك ب 95 انضف للسياره
وترا 91 باقي مخلفات البنزين
حسب ماقاله لي شخص بالمختبر الرئيسي بمصفاة الرياض بارامكو


هههههههههههههههههههههههه


حلوة مخلفات البنزين ، أخاف اللي قاله لك حارس أمن بالمصفاة :p

[سفاري نجد]

من بدء أنتاج 91 وأنا أستخدمه ولله الحمد لا مشاكل ،،، وعزم الموتر ما تغير وأقل صرفيه بعد بالخطوط الطويله ،،،
السفاري مكتوب في دليل السياره استخدم اوكتان من 88 فما فوق ،،،
ترى بعض الناس عندهم حساسيه أكثر من اللزوم ،،،

قال مخلفات قال ،،،