من يعرف القشد

[ابو ســــاره]

يا اخوان فيه حاجة اكلتها قبل كم سنة الي الحين استطعمبها اكلتها عند واحد من اهل القصيم يسمونها قشد علي ما عتقد مكوناتها الرئيسية تمر وزبده علي ما اعتقد
الي يعرف اي معلومة عن هالكله يعلمنا الله يجزاه خير وعن طريقة تحضيرها انا بصراحة استحيت اسئل الرجال وشلون تسوونها
وســــــــــــــــــــــلامتكم ،،،،،،،،،،

[سليم]

حياك الله يابوساره00
اولا : يتكون(القشد) من الاتي1- تمر ويفضل ان يكون من نوع(شقر)
2- سمنه اوزبده ويفضل ان تكون طبيعيه3- طحين بر0
ثانيا: طريقة العمل كاالاتي/ تاتي بصحن ويفضل(مقلات) ثم تضع فيه الزبده
ثم تضع الصحن او(المقلات) علي نار هادئه ثم تضع التمروتحركه بملعقه علي
هون ورفق حتي لا( يتفتت ) ثم بعد ماياخذ علي النار خمس دقائق تقريبا تاخذ برؤس
اصابعك قليلا من طحين البر ثم ( تذره ) عليه ثم تحركه قليلا حتي يتشبع جميع التمر باالطحين ثم تغلق عليه النار000 وبجميع ماسبق يتكون(القشد)

[desprado]

سبقتني يا اخوي سليم

[صقر]

مشكورين معلومات طيبة

والقشد على فكرة لازم يؤكل بالشتاء لأنه حار على الكبد.

[مفتش الريضان]

مشكوووووووووووور أخوي سليم دايما جاهز...!!

[سفاري]

لسلام عليكم ورحمة الله وبركاته

انا من المدمنين (للقشد) واعرف احكر والديه واليكم الوصفه بالتفصيل

اولا المقادير ( تمر خلاص - لبن - زبده - بر )

الطريقه :-
اولا تجيب لك مقلا وتحط فيها ربع اصبع زبده او اكثر على حسب الكمية الي تبي تسويها وتخليها تموع على نار هاديه جدا بعد ما تموع الزبده تحط التمر الخلاص على الزبده ويكون التمر مفرق كل تمره لحالها تحطهن على الزبده وتحركهن على نار هاديه ثم تضع اللبن فوقهن مقدار اللبن قريبا بيالتين او بياله ونص على مزاجك واول ما تحط اللبن فوقهن تحركهن بسرعه ثم ترش عليهن البر على شوي شوي ترش شوي ثم تحرك التمر طبعا يبي يلزق البر على التمر وكل شوي زد عليه من البر واذا رأيت ان القشد بدا يجمد شوي خلاص فط النار وبالهناء والعافيه . مع امكانية اضافة السمسم عليه بعد ما تنتهي الطبخه وايضا اذا بغيت تاكل لك تميرة جرب وحط عليها نقطة ليمون تبي تصير كأنها حنيني اذا انت تحب الحنيني تبي تحب طعم التمره مع الليمون .

ملاحظة ( لابد ان يكون التمر خلاص حتى تزبط معاك الطبخه )

[العنكبوت]

سبقن الاخ سفاري
واعتقد انه طريقه اهل حايل

تحياتي

[الجوني]

اخوي سفاري ترفق وانت تكتب شف من السرعه قلبت حرفين اللي هي (( طف كتبتها انت = فط )) هذي من العجلة وانا اخوك ترفق وشكرا لكم

[قناص القرائن]

العجله مافيها خير

[القاصي]

يووووووووووووووه ذكرتوني

والله من زمان ما اكلت القشد

والله كانت جدتي الله يغفر لها تضبطها

لان عندهم بقره واذا جاءت تصلح السمن لازم تصلح لنا القشد .

ابحاول اضبطها

وتراها سهله ...وتنفع في البر ....ايام البرد.

شكراً لكم

وكل عام وانتم بخير