ياخواني قدرالله على وشريت سيارة ابي رائيكم فيها .

[عبد الرحمن بن]

ياخوان تكفون الفزعه انا قدر الله علي وشريت دوج درانجو مواصفات كامله مديل 2007 والى الأن ماشفت منه اي خلل اوشي مهوب طيب صحيح اني مابعد جربته بالرمل والبر لكن لقيت من مدحه وخاصة اهل القصيم ولقيت من ذمه على ذمة وكالة يقولون الدوج ماهوب طيب ويردد ن لهم بيت شعر قديم ( الدوج دجو هل الدوج .....

[الكتاب]

ما شاء الله
الله يبارك لك فيه .. لا الموتر ما يحتاج من ناحية العزم والمركب ما شاء الله مريح جدا وميزته سعره مناسب
لكن في البر اتوقع انه يمشي حاله اذا تراعيه ..
اخيرا حاول انك تحافظ عليه ..

[القناص-sniper]

اهم شي انه يكون جازلك ومرتاح معاه وعاجبك ولا عليك من احد

اما اذا شفته قام يطلب طلب وراى الثاني لا يخوي ريح عمرك وصرفه

والله يبارك لك فيه

[سعد777]

ممكن صور نتفرج على الزين الله يبارك لك فيه

[ابو العطاء]

المشكله ان مثل ها السيارات قطع غيارها غير متوفر الا بطلبيه وغالي السعر :no2:

[.أبوعبدالرحمن]

يا ابن الحلال الموتر في شكله ما يحتاج رائع


ومكينته ماهيب سهلة فيها نشاط ومركبه مريح


والحمدلله اشوفه بادي ينتشر والله يبارك لك فيه والله يعطيك خيره ويكفيك شره

[القيعه]

الله يبارك لك فيه مثل ما قالو الشباب ازيد عليهم لا تجهده في البر لانه مهما صار راح يطلب لا تحسبه لاند ولا باترول ممكن يمين يسار تروح وطي هههههههههههههه معليك تراني امزح الله يبارك للك فيه تقبل مروري اخوك القيعه

[االديحاني]

الله يبارك لك فيه

[أبو LAMeS]

ما شاء الله تبارك الله ... الله يطعمك خيره ويكفيك شره

لا يضييق صدرك أبد ترى الدنيا ما تسوى ومشكلتنا مع وكالة يقولون ... ويقولون ... ويقولون وصدقني كل اللي يقولون ما جربوا

والموتر ما شاء الله اشوفه رزه ووسيع وبما أنه أمريكي أكيد مريح في الخطوط

أهم شيء إذا جيت تجربه في النفود تخفف هواء الكفرات يعني خلها على العشرين هذه نقطة والنقطة الثانية شف حرارته لا ترتفع مع التطعيس

وبالنسبة لقطع الغيار مثله مثل أي سيارة القطع اللي عليها طلب راح تحصلها مثل الفحمات

وبيت الشعر اللي ذكرته على ما أعتقد أنه لبندر بن سرور قاله لأنه كانت فيه منافسة أيام زمان بين الفورد والجمس والدوج



الدوج دجوا أهله بأسبوع >>>>>>>>>>>>عجزوا عن التتن يشرونه

[لبرتي]

الموتر جبار وعزمه قوي في النفود
يكفي أن مكينته 8 سلندر من أفضل المكائن نوع هيمي

الله يبارك لك فيه

[خلاوي3]

الله يباركلك فيه ويطعمك من خيره ويكفيك شره وقول الشاعر
الدوج على مسندي خربان والفرد بازه مساميره

[نبع الدموع]

اخوي الله يباركلك بموترك و يعطية خيرة و يكفيك شرة ان شاء الله
من وجهة نظري مافي اي احد راضي عن وكيل سيارتة و مشكلة
قطع الغيار نسمعها في كل السيارات
الدودج عن تجربة مكاين ما شاء الله تبارك الله خرافية و موتر تكانة
ولا يطلب قطع و اغلب قطع الدودج شفرولية يعني متوفرة و اذا بغيت
امش عند محلات قطع الغيار و شف كم محل علية علامة دودج.

[مهل]

عظم الله اجرك عليك بالصبرالدنيا ماحد سالم من بلاويها واحد ميت قريب له واحد مرقد في المستشفى واحد شاري دوج هههههه

[B E R A T T A]

الله يعطيك خيره ويكفيك شره

ما عليك من اللي يقولون

أنا معي هايلوكس 2007 وكنت خايف من الكلام اللي يقولون

لكن الحمد لله موتر ولا كل المواتر

يعني جربه وتئكد بنفسك

[شروكي ربع]

في مثل يقال دائما في مواقف كهذه :


" اللي ما يعرف الصقر يشويه "



الموتر قوي جدا ومتين وعملي ..



الكثير يتكلم على الدوج والشروكي وهم لم يجربوها و لم يركبوها ..



ولو جربوا جربوا موتر مجلود ومكروف كرف او موتر شركة ودمران ..



واكيد بيسبه لانه ماراح يلقى من وراه خير ..



صحيح يعيبه وكالته , ولكن لمن يستخدمه استخدام جيد لن يطلب منك سوى البانزين :D



الله يبارك لك فيه ..



وان شاء الله ما تغير الا عام 2027 ومو عيب فيه ولكن للتجديد :)



موفق يالغالي ..

[البيروقراطي]

اول شي ما شاء الله وتبارك الله
ويعطيك من خيره ويكفيك شره
الموتر ما عليه كلاااااااااام وصدقني اخوي اللي يخوف الناس من السيارات هذي انها غير دارجه بين الناس ...
وممكن سعره غااااااالي

إحترامي للجميع ..... وتقبلوا مروري...

[جنوبية سدير]

ممكن صور له

[الربذي]

بصراحه اولامبارك عليك وشكله حلو وتحس فيه عنفوان ووحشيه يعني مرعب وجهيه هجوميه وليس وديعه كلالكزس وغيرها اما القطع فالله يعينك عليه غير متوفره جميعها لقله الملاك وتكون بطلبيه بدل ماتركن بالمستودع عندهم