مشكله ....وتبي حل

[راعي النحل]

السلام عليكم ورحمة الله
يجماعه واجهت مشكله طريفه وتبي حل ...قبل ما تورطون في عزيمه...واليكم القصه...

أكرمتني الوالده بزياره في الاستراحه ....المهم من الفرحه حبيت أكرمها وخاصه بالشهر الفضيل
مرييت على السماك وطلبت منه بالول للشوى ( نبيها تاكل سمك على الفطور ) ...
المهم قال السماك تبيني انظفه من القشر ام لا ؟ قلته ماله داعي ..لاني بشويه مباشره على الجمر
وعلى طول سوينا عمليات تنظيف وتبهير وربطنا بطنه ....الساعه الرابعه عصرا كل شئ جاهز..
قمت ولفيت المذكور بالقصدير ثلاث لفات ...والنار جاهزه ولكنها لم تكن حاميه ( ما تبرد قلبك )
وحطيناه في الفرن مثل المندي ....وبعد ساعه اذن المغرب ... وتفطرنا وصلينا وجبنا الحبيب وبسم الله
كشفنا عليه والا هو علي حاله ما ضرته النار................
يوم تقلب وجهي ودارت بي الدنيا ...والنار قدها بارده ما منها فائده ...والوالده تنتظر عشاءها ....
والله انها ورطه ما بعدها ورطه ...استعنت بالله ودبرت حالي بفطور احتياطي من افطار جماعي
لأحد اللجان الخيريه ...الله يجزاهم خير...واخبرتها وانا منحرج من الموقف ان تفطر علي الموجود
حتي يستوي المذكور....
عدلنا الوضع ...وتفطرنا وحطينا الحره في المذكور وما نضج الا عقب صلاة التراويح وعقب تعال
وذوق الطعم شئ خيالي ..
طبعا وقعت في خطأيين عدم استواء الشوي في الوقت المحدد الاول ان النار ماهي حاميه ...والثاني بتركه للاعضاء...وين الغلطه الثانيه ؟؟؟

[أيمن]

هلا أخوي راعي النحل والحمد لله على سلامتك، مبطين عنك :) ..
الله يخلي لك أميمتك ويجعلك بها من البارين ..

بالنسبة للخلل الآخر أتوقع أنه في القصدير! ربما لففته أكثر من اللازم، لأنه عازل حراري أيضا ..

تحيتي

[راعي النحل]

السلام عليكم
ماشاء الله عليك ....فعلا المشكله تكمن في وجود قشور السمكه لأنها تعمل
كعازل ...ونضيف على العازل ورق قصدير ...يعني ما راح تنضج الا بعد طلعت الروح
والا حصل اني زدت النار وتخلصت من القصدير.....تعال وذوق الطعم .
على العموم لشرفت علينا ذبحنالك حوت .....تراه شئ يعجبك .

[مفتش الريضان]

هلا والله اخوي راعي النحل........... الله يخلي لك الوالدة بس بصراحة تراك فشلتنا معاها الله يهديك .......... أخوي لا يكون السمك ماكل لحم بعارين ترى ممكن يصير هالشي :D
أنا اعتقد ان المشكلة مثل ما قال اخوي أيمن في القصدير... فهناك انواع قاسية لا تنفذ منها الحرارة بسهولة

[راعي النحل]

والله انها مشكله واحراج خاصه وان العجوز في شهر الصيام...
ولكن الحمد لله دبرنا حالنا ....

المشكله ان قشر السمك يعمل كعازل طبيعي...يعني ما نحتاج لقصدير معاه...
وعلى العموم تجربه مفيده ونحن بداية الموسم ....

[ابو مساعد]

الاخ راعي النحل الحمدلله على كل حال .
السمك داخل القصدير الازم ينظف من القشور والشوي المباشر على الفحم يكون بالقشور حتى تحمي اللحم من النار .
وهذه للعلم .
تحياتي .