ماحدث لي في رحلتي وأنا متوجها إلى الرياض

[مرداس2006]

;)
;)
;)
;)
;)
;)
;)
;)

السلام عليكم أهل مكشات
أنا سيارتي سوبر سفاري 98 كنت ماشي لرياض اليوم وفجاه أرتفعت الحراره الثلث علما بأن المثلث( البلف) راكب وقفت جمب الطريق وفكيت الكبوت لقيت القربه فل ماء وتشرشر على السياره والرديتر فاضي رحت طلعت العده وفكيت المثلث( البلف ) وعبيت ماء صحه ومشيت بدون البلف وحصل معي نفس الشيء بعد 10 كيلو وأقرب هجره غيرت غطاء الاديتر وبعد حصل نفس الشيء وأقرب سطحه ورجعت معه للديره ( 200 ريال الله لايخسر ) دخلت الصناعيه اللي قال الراس مشعور واللي قال صيخ الرديتر وأنفخ رديتر المكيف اللي قدامه هواء واللي قال طرمبة الماء علما بأنها شغاله والمراوح شغاله كلهن والرديتر أصلي وكاله ولكن كان وصخ ونظفته ( كب الماء وتعبئة الجديد بدون تسييخ ) قبل دخول الشتاء
المهم أني أجلت كل شيء إلى غدا من أجل أن أسئل اهل مكشات لما يتمتعون به من الخبره في المجال
هذا والله يحفظكم ويديم هذا المنتدى شامخا بأهله
اخوكم مرداس

[شقران نجد]

حياك الله اخوي مرداس والحمد لله على السلامه ,,,,,

شف وانا اخوك ابداء بأ ابسط الحلول وزين ما سويت يعني غير غطاء الرديتر ماظبط رح للي بعده على طول واترك الراس اخر شي .....

صارت معاي الحركه هذي وانا مسافر وبدينا من غطاء الرديتر حتى وصلنا لطرمبة الماء وصار البلاء من الطرمبه اعبيالرديتروامشي لي ثلاثين كيلو الا الرديتر فاضي و الحراره قابه وبدلنا الطرمبه وسلكت الأمور ولله الحمد بدون من نلمس الراس ,,,,,

اخوك

السياري

[البدر900]

الله ييسر امرك

[السنع كله]

الاقرب طرنبة الماء

[عاشق الفكسار]

شف وانا اخوك ابداء بأ ابسط الحلول وزين ما سويت يعني غير غطاء الرديتر ماظبط رح للي بعده على طول واترك الراس اخر شي .....

8
8
8
اضم صوتي لاخوي السياري
والله يسهل عليك

[.أبوعبدالرحمن]

شيك على طرمبة الماء

[النجم الأول]

أخوي مرداس .خذها من أخوك الهوز الممتد من الأديتر للقربه مقلوب من جهة غطاء القربه.فالصحيح أن يكون من جهة الهوز الداخلي .يعني طلع غطاء القربة وفك الأهواز عنه وخل الهوز اللي يكون داخل القربه وسده بأصبعك وأنفخ بالروس اللي فوق اللي يعطيك مسدود وإذا رفعت أصبعك عن الهوز ونفخت يطلع الهواء من الهوز .هذا حطه من جهة الأديتر فورا وعب الأديتر والقربه على حد العلامه وجرب وإذا إستقرت الحراره تمام وتراها مايبين النجاح من عدمه إلا بعد ماتمشي الموتر شوي.
بإختصار مشكلتك الماء اللي يروح للقربه مايرجع بسبب الهوز المقلوب .جرب وعلمنا وإذا نجحت أدع لأخوك بالتوفيق.

[سطام vip]

بسم الله الرحمن الرحيم

هذي اول مشاركه لي معكم في هالمنتدى الرائع

اول شي ما اقول الا الله يساعدك اخوي ويسهل امرك

وانا اضم صوتي مع اخوي السياري ابدا بالصغير اول بأول الين توصل للراس

وان شاء الله ما توصله ابد وتكون المشكله بسيطه

والله مشكلتنا في هالمهندسين الي يتعلمون على سياراتنا

بالتووفيق لك والله يسهل دروووبك

[صحن قلابة]

تأكد من تمتيك المروحة قد يكون هو السبب

[الصيوان]

اخوي انصحك وقف السيارة ولا تستخدمها على هالحال ( لين تطيح على عوقها ) لان ارتفاع الحرارة المستمر يضر المكينة بشكل كبير

الله يوفقك

[راجي عفو ربه]

كذلك تأكد من سير المكينة اللي يلف طرمبة الماء قد يكون راخي.

[ami1948]

أخى العزيز المشكله حسبما ذكرت فى تسرب المويه وهذا خطر وحله بسيط ؛ امل اللديتر مويه وراقب الموضوع لمدة عشر دقايق بعدالتشغيل لاحظ الليات اللى تتم فيها دورة المويه ولاحظ اللديتر وتأكد من اوتوماتيك المرو حه {تلقاه فى وسط المروحه مواجه المكينه امسك المروحه والسياره طافيه وحرك الأوتوماتيك باليد الثانيه إذا تحرك ولف معك معناه إنه يشتغل } أما طرمبة المويه خلها آخر شي إذا ما شفت مصدر التسرب وإن شاء الله تنحل المشكله واحرص لاتمشى على السياره الين تنهى المشكله وبالتوفيق .

[اخو نورة]

انا صارت معي ولقيت الاديتر مشعور وغيرته جديد

[مقلع الرمث]

الله يستر عليك

[صبي مسرد]

شيك على الطبات ونا أخوك لان هذي المشكلة صارت معي

[المزروعي]

هذا الشي حصلي مع نيسان 2005 !!
بدلت المراوح وبعدين بدلت الراديتر ونفس المشكله . وفي الاخير طلعت المشكله من القازقيت . تأكد من القازقيت للمكينه لأنك إذا تأخرت بتروح عليك الكينه .

[مكشاتي الجزيرة]

وقف على حفرة تغيير الزيت وخل الميكانيكي ينزل تحت المحرك وعبي الراديتر مويه الى اخره
ثم شغل السيارة وقوم بدعسات متكررة وقويه على دواسة البنزين وخل الميكانيكي يراقب ويشاهد من أين تأتي تسربات الماء...
ان كان من الطرمبه او رأس المكينة او خراطيش المويه او الراديتر
وهذه الطريقة الأمثل لأكتشاف تسربات ماء الراديتر

[الصبحي]

السلام عليكم ورحمة الله وبركاته
أخوي مرداس شف وانا خوك انا حصلت لي قبل شهرين معي كامري موديل 2004
اول شي غيرت غطاء الاديتر ونفس المشكله وبعدها دخلتها الشركة طلعت المشكلة في راس المكينه
يبقالها مسح في الراس ( علما بأني اول ورشه وديتها له قالي المشكله في راس المكينه )

[shaheenshah]

- اتوقع المشكلة عندك في خراطيش الموية او يكون فيه تنسيم في دورة الموية في الاديتر وهذا اللي يسبب التفوير في الغالب
تأكد من الليات
- كلام اخوي المزروعي صحيح تأكد من الوجه حق راس المكينة لانه اذا كان تالف يسبب ارتفاع الحرارة
ولا تتساهل بالموضوع وانتبه تمشي على الموتر الا اذا صحلته لانه سبق وان انطعج عندي راس المكينة لهذا السبب.

[مرداس2006]

السلام عليكم
هذا أنتم كما عهدتكم أوفياء لبعض
جزاكم الله خيرا
الشكر كل الشكر لكل من شارك وأتحفني بمعلومته :p
أنا من بعد التعب اللي حصلي أمس نمت ما قعدت الا 11 صباحا لذا إن شاء الله سوف أبدا مهمتي في الصناعيه اليوم بتسييخ الرديتر لعل الله يجعل المشكله منه والسلام عليكم