يا هل الباث لو سمحتوا

[نوض الحقوق]

السلام عليكم و رحمة الله و بركاته
سبق و ان قرأت في المنتدى الغالي عن مشكلة مسامير الثلاجة و اظن الموضوع للعضو الغالي بن محفوظ و الصراحة اهتمينا من هذه المسألة و عند من نعالجها ما نبغى كل واحد يروح لورشة و يفاجأ بعدم علمهم بهذه المشكلة و عدم علمهم في طريقة اصلاحها فالرجاء لمن مرت عليه المشكلة بذكر الورشة التي ذهب اليها سواء في القصيم اوالرياض او الشرقية او اي مكان و رقم تلفون الورشة و وصف مكانها لتعم الفائدة المرجوة و ليس معنى هذا الدعاية لأحد ولكن ان تذهب لشخص عندة خبرة في الموضوع تختصر الكثير من الوقت و المال و الجهد و تحصل على افضل النتائج بحول الله ......
و عندي زود سؤال لو سمحتوا عندي في الباث مع بداية التشغيل يطلع عندي صوت قرقعة لمدة ثانيتين إلى اربع ثواني و يروح قالو جنزير و قالو صبابات و هنا تكون المشكلة يعني ما تلقاء احد يجزم براية و انا اخاف انها بداية انحلال في مسامير الثلاجة مع ان الصوت له فترة طالع معي ...... و لكم جزيل الشكر .

[salehhd]

السلام عليكم

اشكرك على طرح الموضوع وبالفعل محتاجين الى تيقن تام في الموضوع

كلمت مدير الصيانة في الجبر وقالي ماعندنا علم عن هذي المشكلة

[نوض الحقوق]

اشكرك اخي الغالي على الرد و محتاجين تفاعل اكثر من باقي الاعضاء .

[أبوناصر]

وأنا والله من فترة كانت نيتي اكتب نفس ها الموضوع


لأني من أعداء الورش الي تجرب عليك


ودي أروح لواحد يعرف


ولا واحد يتعلم علي موتري


يا شباب لا تبخلون علينا


لو ترسلون على الخاص اذا كان المنتدى يمنع نشر ارقام الجوالات وخلافه

[القمم]

والله مالي علم بالمشكله
وكذلك لم تمر على أحد من أخوياي

أن شاء الله ما هنا إلا الخير

وأن شاء الله الأخوان بيفيدونكـ

[.أبوعبدالرحمن]

الله يستر والله بس اللي قاهرني رحت للوكالة الحمراني وقالوا لي اول مرة نسمع بها

ايضا رحت لورشة متخصصة للباث والماكسيما والالتيما وقالوا لي اول مرة نسمع بها

ايضا رحت لكذا واحد بالصناعية القديمة وقالوا لي اول مرة نسمع بها

ايضا سألت بعض الشباب اللي لهم باع طويل في الباثفندرات وقالوا اول مرة نسمع بها

[z a n h o r]

غريب ..!

ذاك اليوم مريت كان عندي مشكله ومريت الصناعيه القديمه وسالته الورشه الي صلحت سيارتي عنده عن ذي المشكله قال اعرفها واصلحها ..

عموما هذا رقمه للي يبيه

0504423159

رشيد

بالصناعيه القديمه حول ورش الهوندا والفولفو

[نوض الحقوق]

ابو ناصر سبقتك للموضوع:D الف شكر على مرورك
القمم الف شكر لك
ابو عبدالرحمن الوكالة اخر ما افكر فيه و شكل هالمشكلة قليل اللي يعرف اسبابها و طرق علاجها و هذه زبدة الموضوع .
z a n h o r الله يبيض وجهك و هذا اللي نبية و جاري الاتصال برشيد.
اورجو تفاعل اكبر وين بن محفوظ و الجماعة الباقية .

[gsb]

المشكلة هذي في الباث واحتمال كبيرتكون في الجيب الفتك.
لكن من توقعي أنا عاد انها ماهي في كل السيارات
ممكن ظروف معينة من الإستعمال هي الي تحل صواميل بلوف الثلاجة وبتالي وقوع المسامير والبلوف بالسليندر وتخبيط المكينة

مثل البطانيج والخطوط الصحراوية والتطعيس وتخبرون حرارة الموتر مع التتطعيس وتعشيق الدبالات ولربما المكيف والحمولة وشيل وحط باهالموتر
وبتالي تكون نسبة الإهتزاز والإرتجاج عالية خصوصاً مايعنينا المحرك طبعاً المحرك على كراسي ربل وقابل لإهتزاز مع الحرارة وظروف التشغيل في تلك البيئات الصعبة سهل تفكك المسامير.

[ابو؟؟؟]

انا سمعت انها بالقير التماتك بس
والعادي ما تجي فيه هذي المشكلة

مدري والله وياليت احد يصحح المعلومة او يأكدها

[salehhd]

اليوم ايضاً مريت وكالة الجبر وسألت احد الفنيين الفلبينين مع مشرف الصيانة عن المشكلة واخبرني انها لم تمر عليهم وليس لديهم خطوة احترازية لعدم حدوثها
والله يستر

[saudiman]

طيب شباب ايش الموديل الموجوده فيه ياريت تحددون علشان كلا يدلي بدلوه

[الساهر2003]

السلام عليكم
والله طفشنا من الزين الباث زين النيسان معاد تدري هي من الحرارة اللي ترتفع وتنزل وكل يوم ولها مزاج ولا من مسامير الثلاجة مثل المثل رمح تزرق به ولا رمح توعد به ولا من الشد على القير التماتيك وكل ما تدعس يعطيك تغييره شكل تقول جاب العيد اليوم ومره العله من السواق موسوس بزود
وهذه المشكلة سبق لشباب في مكشات انهم تطرقو لها وذكرو اسم الورشة في القصيم يصلحها وهي ورشة الخضير في التشليح وبحثت عن تليفون الشباب اللي شغالين فيها ولما حصلتهم وتكلمة معهم بالجوال بصراحة وهذا رايي فيهم انهم استغلاليين لانه ما اعطاني كلام بين وواضح لاني سالته عن بداية المشكلة ولم يعطيني اجابه وقال ان المشكلة في الباث من موديل 2001 الى الباث الجديد 2007 وللمعلومية ان الباث الجديد لا يوجد احد اشتكى منها ابد ابد ولما سالته عن وقت الاصلاح قال تاخذ 3 ساعات اذا الموتر تماتيك ؟؟؟؟ والسبب انهم يفكون الثلاجة ثم .....؟؟؟ كلام مع ان الثلاجة لا يوجد بداخلها مسامير صغيرة كلها انبيب فقط والمسامير موجودة في بداية الثلاجة فقط قبل الثلاجة اللهات وهذا المكان سهل الوصول له بدون فك الثلاجة وهذا بحسب كلام واحد من الاعضاء في المنتدى مكشات ويوجد موضوع قوى في موقع تحدي الرمال واثبتو وجود المشكلة على بعض السيارات وليست عيب مصنعي ويقولون بداية المشكلة ضعف في العزم وصوت خفيف قرقعة في التشغيل وبصراحة عندي السيارة ممتازة ولا ودي افك شى في المكينة حرام كل شيي شد بلد وقفلت معي وسويت تصويت مع بعض الشباب من القفلة وقلت لهم اصلحه ولا اخليه ولا معارض الرياض اقرب من ورش بريده فالشباب ما قصرو وقالولي ابد ما عليك ان شاء الله لا تفك وابعد عن المعارض
واسف على الاطالة من القهر اللي في
مع اطيب تحية للجميع

[saudiman]

اخي الساهر انت كم موديل سيارتك ؟؟؟؟؟؟؟؟؟

[الساهر2003]

اخي الساهر انت كم موديل سيارتك ؟؟؟؟؟؟؟؟؟


حياك الله اخوي
موديله 2005 م تماتيك

[أبونورة777]

نعم المشكلة موجودة .. وهي في الباثفندر و الباترول 2005 وطالع

يقول لي أحد الشباب يبيع ويشتري في السيارات وخاصة في الباترولات انه اطلع على أكثر من سيارة باترول 2005 و 2006 فيها مشكلة مسامير الثلاجة .. ويقول انه شاف أكثر من باترول من المعروضات للبيع مفكوكة مكينتها .. لهذا السبب

والباث كذلك لكنه مو بكثرة زي الباترول حسب ما يقول وحسب علمي ..

أما الورشة فيوجد ورشة في القصيم هي التي تحل هالمشكلة .. لأن فعلاً مو أي ورشة تصلحها

واذا تحبون أجيب اسم الورشة وعنوانها والرقم .. تآمرون أمر ..

ان شاء الله قدمت ما يفيد ..

[escape_man]

وش هالعلم الي مهوب زين

الي سمعته ان المشكلة الى الباث 2003 فقط

طيب عطونا البوادر الاولية الي تسبق هالمشكلة ( العوارض الي تصير للموتر )

وياليت من الاخ ابو نوره اذا مايمانع ينفعنا بالمعلومات الي عنده عسى ربي لايحرمه الاجر ويبارك له

برزقه..

[بن محفوظ]

الملفاع .. تحية طيبة

بالنسبة للمشكلة هذي ترى اغلب الورش مايدرون عنها ..

وبعضهم يقول مدري وهو يدري لانه عارف انك بتكاسره وهو بيتعب على فك الثلاجه ..

انا صلحها لي فلبيني ومثل ماذكرت لكم كانت البداية صوت طقطقه ..

ويوم فك راس الثلاجه حصل واحد من السدادت مهوب فيه والسبب ان مساميره 2 طايحه

تحت .. وعلى فكرة ترى حجمها مثل حجم مسامير الرادو الصغير ..

وانا قلت للأخوان تداركوا المشكلة وربطوها ازين لكم ...
وهي ماتكلف واجد ولايضر الشغل الي فيها ..

لان بعضهم متخوف من فك وربط ... خصوص انه موقع في المكينة..

وبالنسبة للورشه هي في حي السويدي الغربي ( الزهره ) الرياض طبعاً

اسمها ورشة العياف على تقاطع سدير مع بديع الزمان الهمزاني

فيه سوداني اسمه محمد هو المدير ... وفيه الميكانيكي ماكس الفلبيني (( تراه نفسيه )) مره يضحك ومره

يسحب عليك ..


أتمنى اني افدتك والجميع كذلك ..

[نوض الحقوق]

اشكركم جميعاً على الردود الطيبة و المفيدة و الله يستر علينا من المسامير و غيرها اشكركم كل الشكر ........
اخوي بن محفوظ قبل لا تصير عندك مشكلة هالثلاجة هل كان عندك صوت قرقعة مع تشغيل السيارة لأن صوت القرقعة عندي الحين مع تشغيل السيارة يطلع صوت قرقعة سريع و يروح ( و الله الساهر روعنا في رعدة و قال ان صوت القرقعة مع بداية التشغيل بداية انحلال مسامير الثلاجة و الله يستر ).
شكرا للجمع واللي عندة اي معلومات تفيد الموضوع لا يبخل علينا و جزاكم الله الف خير .

[بن محفوظ]

بالنسبة للصوت اخوي مايطلع الا اذا طاحت المسامير ..

واذا طلع الصوت خلاص يستمر مهوب على قولتك شوي ويروح

لانه انا استمر الصوت معي 3 أيام ..

والحمد لله المتر ما جاه شي ..

الي لاحظت ان الزيت بدأ ينقص بعد 1500

وشكراً

[الساهر2003]

الله يجزاكم خير جميعا وهذه الورشة بجنب بيتنا يابن محفوظ والصوت يطلع شوي ويروح بحسب كلام اعضاء في موقع تحدي الرمال
وان شاء الله باروح له يوم السبت وارد لكم لاني نشبة وباساله الف سوال الفلبيني نفسية ولا لاء فلوسي وسيارتي ماله منه ولازم يجاوب على كل سوال
والنقص موتري ينقص ولا هو ثابت مره ينقص بعد 2000 ومرة بعد 3500
الف شكر للجميع

[نوض الحقوق]

بن محفوظ الله يجزاك الف خير و عافاك الله ..
الساهر شاكر لك تفاعلك و في انتظار اخبارك بالتوفيق ان شاء الله .

[الساهر2003]

السلام عليكم
اسف على التاخير لظروف خارجة عن الايرادة
وبالامس مريت الورشة اللي ذكرها اخونا ابن محفوظ وسالت السوداني والفلبيني وافادوني انه لم يصلحون الا باث واحد وكيف يكون عيب مصنعي وافادوني انه اذا لم تسمع صوت في المكينة فالامور بخير واي صوت بالمكينة قرقشة وقف السيارة واشحنها على صطحة والمشكلة مصورها السوداني في جواله وهو انه يوجد اغطية في اخر انابيب الثلاجة من جهة راس المكينة والاغطية هذي بكبر الريال المعدني او اكبير شوي وكل غطي يمسكه مسمارين صغيرة جدا فتنحل المسامير وتطيح الاغطية والمسامير تدخل في غرفة الاحتراق
وبحسب كلامه انهم يشيلونها او يثبتون المسامير بغرى
وشغل يدهم ب 500 ريال والشباب اللي في القصيم ب 250 ريال وانا محتار هل اطنش او اطمر للقصيم واصلحها وارتاح منه
مع اطيب تحية للجميع

[salehhd]

السلام عليكم
اسف على التاخير لظروف خارجة عن الايرادة
وبالامس مريت الورشة اللي ذكرها اخونا ابن محفوظ وسالت السوداني والفلبيني وافادوني انه لم يصلحون الا باث واحد وكيف يكون عيب مصنعي وافادوني انه اذا لم تسمع صوت في المكينة فالامور بخير واي صوت بالمكينة قرقشة وقف السيارة واشحنها على صطحة والمشكلة مصورها السوداني في جواله وهو انه يوجد اغطية في اخر انابيب الثلاجة من جهة راس المكينة والاغطية هذي بكبر الريال المعدني او اكبير شوي وكل غطي يمسكه مسمارين صغيرة جدا فتنحل المسامير وتطيح الاغطية والمسامير تدخل في غرفة الاحتراق
وبحسب كلامه انهم يشيلونها او يثبتون المسامير بغرى
وشغل يدهم ب 500 ريال والشباب اللي في القصيم ب 250 ريال وانا محتار هل اطنش او اطمر للقصيم واصلحها وارتاح منه
مع اطيب تحية للجميع

بارك الله فيك اخي الساهر واشكرك على اهتمامك

وبصراحة طمنتني ان المشكلة على سيارات قليلة جداً

[بواردي الدلم]

بارك الله فيكم جميعا

[السرب]

السلام عليكم و رحمة الله و بركاته
سبق و ان قرأت في المنتدى الغالي عن مشكلة مسامير الثلاجة و اظن الموضوع للعضو الغالي بن محفوظ و الصراحة اهتمينا من هذه المسألة و عند من نعالجها ما نبغى كل واحد يروح لورشة و يفاجأ بعدم علمهم بهذه المشكلة و عدم علمهم في طريقة اصلاحها فالرجاء لمن مرت عليه المشكلة بذكر الورشة التي ذهب اليها سواء في القصيم اوالرياض او الشرقية او اي مكان و رقم تلفون الورشة و وصف مكانها لتعم الفائدة المرجوة و ليس معنى هذا الدعاية لأحد ولكن ان تذهب لشخص عندة خبرة في الموضوع تختصر الكثير من الوقت و المال و الجهد و تحصل على افضل النتائج بحول الله ......
و عندي زود سؤال لو سمحتوا عندي في الباث مع بداية التشغيل يطلع عندي صوت قرقعة لمدة ثانيتين إلى اربع ثواني و يروح قالو جنزير و قالو صبابات و هنا تكون المشكلة يعني ما تلقاء احد يجزم براية و انا اخاف انها بداية انحلال في مسامير الثلاجة مع ان الصوت له فترة طالع معي ...... و لكم جزيل الشكر .

تحياتي لكم جميعا القرقعه بالمكينه ولا تحتي السياره ارجو الافاده ؟؟؟