والله ياعيااال تبهذلت خسرت مايقارب 2000 ريال

[العين بحر]

والله عن جد بهذلتني السيااارة هذي
أنا معاي جمس موديل 98 حجم كبير مكينة 454 يعني ثمان صواميل
هذي السيااارة علتها جاتني قبل شهر أنا أقولكم علتها
السيارة يوم تمشي تطفا علي على حدود 70_60_ ويم افرمل أبي ألف ولا عند إشااارة تطفى
والله أحرجتني وخاصة وقت الدوام يوم أداوم رحت وديتها الورشة وحطيتها على الكمبيوتر
قالي السوري إلي جالس على الجهاز الكمبيوتر طلعلك خراب من الحساس روح غيره
غيرته غيرت القطعة وكالة 720 ريال وركبتها قالولي لا زم تبرمجها ووديتها للبمجة عند السوري هذا كله 150
ريال اقصد الكشف والبرمجة وبعدين مشيت فيها مايقارب يوم ونص واليوم الثالث وقفت عند الإشارة قالي ولد أبوووك حركني طلبناه طلبت رجال ولهو مفكر فيني المهم وديته عند الورشة من جديد والي عند السوري قال والله ماقدر أفيدك بشئ بس طلعه على الكمبيوتر منجديد وعليك تخفيظ 50 ريال ويوم كشف قالي الخراب من الطرمبة غيرها وكالة ورحت غيرتها وكالة بي 1050 ريال مع التخفيظ وركبتها مع شغل اليد 200 ريال
ويوم ركبتها بدون ماأبرمجه لئنهم يقولولي مله داعي:no2: المهم وتوي وصلت البيت وطفت لوحدها والله بغيت أولع فيها
(الله يخليكم شوفولي حل ويش السبب)
العين بحر لجلك ياجمس

[المنتهي2000]

تأكد ونا أخوك من اأسلاك الظفيره لأن صار معي نفس المشكله في جمس 2004 وخسرت الله لايورك آخر شي وديتها عندواحد تركي بدون كمبيوتر ولا خرابيط لقى سلك في الظفيره منجرح وصلحه
وأنت يمكن نفس المشكله. هذا الي أقدر أفيدك فيه

[العين بحر]

منتهي الله يخليك
والله واحد قالي نفس كلامك بس قلتله ماتجي
قالي شوف الأسلاك أو البواجي
مشكور
طيب ممكن تدلني وينه ذا التركي
أنا في الرياض
الله يخليك
شوي واطق من الجمس

[hightech]

دور ميكانيكي سعودي له سمعتة ودخل السيارة عندة وتنحل مشكلتك بأذن اللة

واترك عنك العمالة ومن زين الطبايع بعد معطيك تخفيظ 50 ريال ....

هذا حلي لمشكتك واللة يعينك

[جوافه]

الله يعوض عليك


يكفي خسااااااااره الاسهم

[حترش]

ان شاء الله ما عليك وربنا يعطيك خيرها ويكفيك شرها ، المهم هذي العملية صارت معي لمن شريت كابريس موديل 86 استخدام من امريكا ، ونفس مشكلتك لمن اخذ ملف تطفي علي أحرجتني كثير ، المهم واحد من أهل الخير دلني على هندي في ورشة في كراج بيته وكان شغال ميكانيكي في السفارة الامركية يعني من اهل هالسيارات ,,,,

الحاصل طولت عليك وما قلت الحل ،،،،،، طلع يا ابو شباب على طول قلي غير راس الديلكو وأسلاك البواجي والكورة البللاستيكية على ما أضن حقت الهواء ، وبعدها الله يسلمك ما شفت مشااااااااااااااااااااااكل الحمدلله ...

لو أنت ساكن بجدة كان دليتك عليه ومادري امكن يكون حي الله اعلم الكلام من فترة 14 سنة .....

وان شاء الله يكون هذا الحل والله يسهلك طريقك

* ولو انحلت مشكلتك أطلبك طلب تروح للسوري وتكفخه والدوس عليه ابن الحرام ولا تقول خلاص الله يسامحه لانه ما خسرك قليل وراح يلعب مع غيرك من الناس الطيبين وقفه عند حده ،،،
واذا مانت حق مشاكل ما عليك الا تجيه وفي زحمة زباين عندة وافضحه قدامهم على شان تكسر شوكته ....... وتحياتي

[مسافر وحدي]

فيه كهربائي خطير ويعطيك ضمان على الطرنبه ونا من رائيي لاتعداه
انت ماراح يضرك شي إذا رحت عنده وشاورته بس تراه يعجبك وإذا إنك قريب من معارض السيارات اللي في الشفا

شفه الله يسلمك جنوب الساحه واسمه (( مشتاق )) وصدقني تنحل مشكلتك على طول
(( دعايه ببلاش ))

المهم علمنا وش يصير عليك عنده ولا عند غيره علشان غيرك يستفيد

[طحنون]

الاخ العزيز تراني زعلت ولو عصبت عليك لا تزعل لاني احبك
طيب انت الحين وشفيك مافهمتنا صح وشلون تطفى هل تطفى من الكهرباء يعني فصله كهرب
من الديلكو مثلا او انقطاع وسببه البنزين هل (طيب هو بخاخ او كلبليتر) ياخوي حدد الله يرحم والديك
علشان نعرف نشخص الحاله
وبعدين فحص بالكمبيوتر لا تقربه ابدا والسوري والمصري والبنقالي واليماني لا تقربه
دور على السعودي النصوح والفلبيني الافطس وابو هنود الخبره
نرجع لموضوعنا مانبي تخمينات علشان ما ينتفخ راسنا وراسك
افلح الله يحفظك وعطنا وش في موتر بسرعه الله يرحم والديك بسرعه تسبق البرق ترى الفرقا تهدد حياتي

[ظنى مرزوق]

انت مركب شيئ على السيارة مثل توصيلات كهرب او بطارية، على العموم راجع الخاص بتاعك

[ابو فرح1]

الاخ العزيز تراني زعلت ولو عصبت عليك لا تزعل لاني احبك
طيب انت الحين وشفيك مافهمتنا صح وشلون تطفى هل تطفى من الكهرباء يعني فصله كهرب
من الديلكو مثلا او انقطاع وسببه البنزين هل (طيب هو بخاخ او كلبليتر) ياخوي حدد الله يرحم والديك
علشان نعرف نشخص الحاله
وبعدين فحص بالكمبيوتر لا تقربه ابدا والسوري والمصري والبنقالي واليماني لا تقربه
دور على السعودي النصوح والفلبيني الافطس وابو هنود الخبره
نرجع لموضوعنا مانبي تخمينات علشان ما ينتفخ راسنا وراسك
افلح الله يحفظك وعطنا وش في موتر بسرعه الله يرحم والديك بسرعه


الله يعطيك العافيه

ياليت توضح مثل ما ذكر اخونا الغالي طحنون

وللعم لك ولغيرك
فيه واحد اذا مشى موتره ( 80 او 100 ) يكتم الموتر الين يطفي ماخل شي الا سواه الين الله هداه على واحد خبره ومشكلته بدون ورشه قاله غير ( .............. ) رفض صاحب السياره قال على حسابي غيرها وغيرها وان حلت مشكلته .

لو ان صاحب السياره عرض مشكلته وين راح يكون الحل ؟

ما ودي اتعبكم غير الدبه اللى تجي الشكمان وان حلت مشكلته


طولت لكن ارجع واقول وضح مشكلتك لعل وعسى تلاقي حل .

[ابو جلامبو]

بالنسبة إلى جميع ألاخوة من مستخدمي الجمس سواءً كان حوص و إلا سوبر من موديل 90 إلى 98 والذين يعانون من مشكله التعطل غي طرمبة البنزين ابشركم لقد وجدت الحل وهو:
انك تقوم بأخذ الطرمبة المتعطله و تقوم بفكها وإزالة الدينمو الداخلي وشراء طرمبة فورد قراند ماركيز حيث تركب عليه واقل سعر من حقت الجمس واقوا وتركبها على طرمبه الجمس السابقة . وادعيلي

[يزيد_1977]

السلام عليكم

صارت لي نفس المشكله وتمرمطت مرمطه بنت سته وستين كلب

والحل كان اسهل من شرب كاس الماء بس للاسف ماعرفته الا بالصدفه يوم نصحني اخوي اغير البطاريه
كل الميكانيكيين والكهربائيين قالوا مالها دخل لكن قلت وش انا خسران

وانا اروح اغير بطاريته ويالله لك الحمد من فضلك يارب مشى من يومه وذلفت المشكله

اذا مشكلتك انه يطفي لارفعت رجلك من دواسة البنزين يطفي فرح غير البطاريه وان شاء الله الحل فيها وبالله رد لي

[(مواصل)]

ابو فرح اذكر واحد صار له مشكله بالجمس وفصل سلك الحساس وارتاح
انا ابصم لك 100% ان السوري مااشتغل زي الناس وينصب
لكن الله يعوضك خير ويكشف ضر سيارتك

[.أبوعبدالرحمن]

فكرت اخوي الايدعشري طيبة لكن بيتغير عليك صوت الموتر وبيكون مزعج شوي واتوقع المشكلة من حساس الهواء افصله وجرب وان شاء الله تنحل مشكلتك واذا فصلت الحساس وضبط الحمدلله غير الحساس وتنحل المشكلة واذا نفس المشكلة موجودة رجع سلك الحساس ودور الخراب في غير الحساس وهو اسلاك الظفيرة شيك عليه قد تكون مجرووحة ايضا راجع اصابع البطارية وقوة البطارية يمكن تكون ضعيفة وأبدأ في السهل قبل الصعب وأسأل ان ييسر لك حل مشكلتك لكن طالبك اذا حليت المشكلة ودي تنزل الموضوع عن المشكلة وحلها عشان نستفيد