هل سمعتم عن خلل في قير 2008 لاندكروزر ؟

[محب الوعول]

الأحبة أعضاء مكشات ،،

السلام عليكم ورحمة الله وبركاته ..



هل سمعتم عن خلل في قير الجيب اللاند كروز الجديد 2008


لأني سمعت أكثر من واحد يذمه ويقولون فيه خلل فني في قيرة ؟



وحيث أني بصدد شراء جديد ( بإذن الله )

أرجو الإفادة عاجلاً ولكم الشكر ..




محبكم : أبو علي ،،

[abo_abdalah]

مرحبا اخوي

انا واحد من ربعي معه 2008 توه شاريه ولا اشوف ان فيه اي شي

بس يمكن قصدهم التامين اللي في القير لانك اذا عطيت الموتر وعشقت من ثاني لثالث يخثر الموتر اول ماتعشقه بعدين يمشي

واتمنى اني اكون افدتك

[تنوم]

البازعي يقولون سحبنا ال8 سرندل من السوق لان فيه مشكله بين المكينه والقير ما فيه توافق

[الموووج]

نعم سمعنا انه في خلل في القير , واحد من ابناء عمي باع سيارته والسبب من القير , واليك النصيحة مني لاتشتري السيارة الا بعد سنة من نزوالها في الاسواق .

[aziz2727]

انا ما سمعت
انا نسيبي معه 2008 Gx 8 سلندر
نعم فيه المشكله في القير والحين شيل وحط مع الوكاله وما بعد طلع بشي والله يستر

[دخنآوي]

اللهـ يخلف على فلوسهم ان شاء اللهـ

[رقبة حاشي]

الله يخلف على الفلوس 166000 ريال وبعد فيه خراب .....
كيف مايستحي اللي يبيعه بعد ذلك .
ياناس لا احد يشريه لمدة شهرين فقط والله ان ينزل سعره غصب . بس الناس طايرة فيه تقل انه ما يوجد في هالبلد الا هالولد ..........

[gsb]

نصيحة أي موديل يتغير بالكامل لاتقربه ولا يقربك اول سنه من طرحه ثاني سنه للموديل الجديد ما فيه مشكله ابداً من اقتناءه معاد شركة مرسيدس بنز اشتر ونت مغمض اذا كنت بيسنس مان طبعاً لأن الموديل الجديد الي مطروح عندك بالسوق الأن (جديد بالكامل) تلقاه عند الشركة قبل 5 سنوات يجربون عليه اليل والنهار لاين يتفادون العيوب بالكامل قبل طرحه
وكثرلي من كلمة بالكامل بنسبة لبو جميل وتويوتا الشرق الأوسط لأن المكاين هي هي ال8 سيلندر 4.7

بينما الأمريكي عطي الله الـ8 سيليندر 5.7 بقوة 381 حصان

[.أبوعبدالرحمن]

انت اصبر الين ينزل 2009 وبتلقى اللي يسرك ان شاء الله

[فارس العمور]

انحش من ابوجميل

ولا تغرك الكشخه الكذابه بالفكسار

[الربذي]

2009 يبي يصير اقل نوع ب170الف ماهي غريبه على وكيلا ولقى ناس مخفه طايرتن بسياراته !!!!!

[مقلع الرمث]

انا اقول تاخذلك فتك ولا باجيروا والبدائل وااجد وهج عن المسخره

[المجمعه]

اى مشكله اللى تتكلمون عنها

واحد ولد عمه وواحد ولد خاله وواحد نسيبه وواحد

الموتر ما عليه كلام بس مشكلته الغلاء

[راس الرعيلة]

الموتر أشتراه أكثر من واحد من جماعتنا

من ضمنهم واحد جرب أنواع وأشكال وموديلات الجيوب السابقه (تنوخذ وصاته)

و كل من أعرفه (جرّب وركز على كلمة جرّب) هذا الموديل يمدحه

أما مسألة القير ما شفت أحد سبه وأنا بنفسي سقته ولا لاحظت شي بالعكس أحس بسلاسة في تغييرات القير

كل ما سبق من كلامي أقصد به الجي إكس آر ستة سرندل

أما المكينه الكبيره فما أعرف عنها شي

ولكن هي نفسها بالضبط حقت الفي إكس آر ونفس القير

فكيف تكون المشكله في الجي إكس آر ولا تكون في الفي إكس آر ؟؟؟؟

ـ ـ ـ ـ ـ ـ ـ ـ ـ ـ

في إعتقادي والله أعلى وأعلم أن المسألة لا تعدوا كونها حالات فرديه تجي في كل موديل

والله أعلم

ولو صبرت إلى 2009 حتما سيكون أضمن لك

و أسأل الله لك التوفيق يا أخي

[الدحبول]

انا سمعت لكن ابغى دليل
ممكن من الشباب يلي عندهم علوم يصورون لنا لاوراق وصور لمواتر دلائل
(احترم الجميع لكن اريد ديل لو سمحتكم )

الان قبل مانشتري سوبربان 2007 سمعنا كلا القيرفيه مشاكل مايعشق إلا ترس 1
والحمد الله الموتر ماشي 40 الاف كم ولا فيه اي مشاكل إلى الان ونشاء الله دوم
والموتر يمشي خطوط وداخل بلد

[امير الشمال]

اخر عهدنا باللاند اكروزر 97 والي بعدها شطب عليه

[svd-007]

اقول خير الكلام ما قل ودل الموتر زين لاكن السعر ماهو في محلة اجل الجي 135000 الف اجل وش بقا للسوبرمان قيمتة125000الف ريال

[Mohammad]

حقيقه انا متشكك فى هالموديل يبدو لى فيه قلة جوده! فى كل شىء! كذلك يبدو لى بيكون اخو الامريكى! من الان فصاعد

ولا يدوم الى الله ولا بد لتويوتا من تعثر وقد نكون نشاهد داية التعثر...

بخصوص المشكله اخى انا مجرب شارى موتر موديل اول ما طلع وكان هذا منذ زمن بعيد من تويوتا وكان هناك مشاكل ولكن تم اصلاحها فورا وبدون تردد...

بخصوص السعر اعتقد ان الدوله لن تترك الريال يتدهور مع الدولار اذا استمر...وكذلك ربما يرتفع الدولار فشاهدت على التلفاز خلال اليام الماضيه ارتفاع الدولار مقابل الين اليابانى!!! انتبه لهذا الكلام! لذلك اتوقع ان اليابانى سيرخص نتيجه لذلك..

كذلك ليس من صالح الوكيل هذا الارتفاع فهذا يضر كثيرا مبيعاته ولهذا اتوقع انه بيرخص خلال 2008 او 2009 مع ارتفاع الريال!

والله اعلم

[احب البرواهله]

مع أحترامي للجميع أقول ظهرت موضه جديده طايحين فيها هالأيام ما يطلع موتر متغير عن الموديل السابق إلا والإشاعات شغاله عن القير خلصنا من قير اليوكون والتاهو الجديد وقبلهم الباترول ودخلنا في اللاند ياناس تويوتا وجنرال موتورز شركات عملاقة ومن عشرات السنين وهي تعمل بذا المجال ماهي معقوله تنزل سيارات فيها عيوب بالقير لكن ممكن يكون هناك عيب مصنعي بجلده أو في خرطوش أقصد أشياء سهله لكن قير ومن تويوتا لا أعتقد .
وإذا كان هناك عيب في اللاند فهو سعر الذي يستحق فقط نصفه مقارنه بالبدائل المتاحة وعلى رأسهم اليوكون والتاهو

[Abo Fhad]

اخر عهدنا باللاند اكروزر 97 والي بعدها شطب عليه


صح لسانك ولاتنسا 2007 ترا ما شاء الله عليه

للمعلوميه الوالد شرى 1991 - 1999 - 2007

ويقول مامر على زي ها الموترين 1999 و 2007

ونصيحه اخويه انصحكم ب 2007 وبتشوفون كلامي بعد كم سنه لما يكون سعر 2007 ماسك في السوق ويمكن تلقى اسعاره قريب الجديد .

2007 وبس

[Mohammad]

صح لسانك ولاتنسا 2007 ترا ما شاء الله عليه

للمعلوميه الوالد شرى 1991 - 1999 - 2007

ويقول مامر على زي ها الموترين 1999 و 2007

ونصيحه اخويه انصحكم ب 2007 وبتشوفون كلامي بعد كم سنه لما يكون سعر 2007 ماسك في السوق ويمكن تلقى اسعاره قريب الجديد .

2007 وبس

الله يهديك يا طيب لا فرق! 1998 الى 2007 ما عدا اكسسوارات!
لا فرق ابدا الا ما ذكر!!!

[محب الوعول]

جزاكم الله خير وبيض الله وجيهكم واحد واحد ..


يا حبي لمكشات وأهله وبس ..


محبكم : أبو علي ..

[الهواوي]

يا اخوان كل يقول عن تجربته لا ولد عمك ولا رفيقك ... حنا ما ندافع عن ابو جميل لاكن ننقل الكلام الصحيح لمن يستفيد منه ... صراحة انا تقريبا جربت جميع موديلات التويوتا لانكروزر ولكزس والآن معي جي اكس 8 سلندر اتوماتيك والله ما فيه مشاكل ولا مقارنه بما سبقه من موديلات من حيث القوة والرساوة بالطريق ... لكن فيه الطقة اللي تحت عند القير وهذي عادية وجت بالموديلات السابقة وسبق مناقشتها بهالمنتدى ...لكن اذا كان المقصود السعر فأنا معكم انه غالي لاكن خلونا نشوف اللي حولنا كله زايد وش زود ابوجميل خلوه يزيد ما راده أحد هو وغيره .
يا اخوان لنرقى بالحوار الصادق ليكون المنتدى مرجع صادق لنا لما نحتاجه ... لكم تحياتي:no2: :no2: :no2:

[شطه]

موديل جديد وغالي وخراب قمة الغش التجاري

[جو مناخ]

الله يخلف...

[راعي الحميّة]

والله ما ادري عن القير بس الي شايفة بعيني كنت امس عند الوكالة ابغير سير التايمن حق الجيب واشوف راعي جيب جديد vx كان معة المهندس برى عند السيارة ويقول طلعتة من عندكم الاربعاء الصبح يوم جاء بيشغل النور في الليل ما أشتغل والاشارات ما تولع قال له المهندس فية خلل في الكهرب قلت في نفسي امحق من جيب

[Waleed1]

السلام عليكم

طبعاً ياأخوان كل شئ فى هلحياة لة نهاية، وبالنسبة للمواتر شفنا نهاية الفروت مع بداية السبعينات والدوج مثلة، اليوم قاعد نتكلم عن سيارة فارهة عشان تشترية يبيلك تحجز عند الوكيل، اللاندكروزر ماعادت السيارة القوية اللى تتحمل المناطق الصحراوية الجبلية الوعرة، أصبحت سيارة مدنية أكثر من برية. وحقيقة سيارة غالية ولاتستطيع شرائها الا بلحجز مثل المرسيدس أنا أقولك بداية النهاية. وشكراً

[وبل نجد]

انحش من ابوجميل

ولا تغرك الكشخه الكذابه بالفكسار


والله صدقت خصوصا أنه ماهوب ياباني بل تايواني

[وبل نجد]

السلام عليكم

طبعاً ياأخوان كل شئ فى هلحياة لة نهاية، وبالنسبة للمواتر شفنا نهاية الفروت مع بداية السبعينات والدوج مثلة، اليوم قاعد نتكلم عن سيارة فارهة عشان تشترية يبيلك تحجز عند الوكيل، اللاندكروزر ماعادت السيارة القوية اللى تتحمل المناطق الصحراوية الجبلية الوعرة، أصبحت سيارة مدنية أكثر من برية. وحقيقة سيارة غالية ولاتستطيع شرائها الا بلحجز مثل المرسيدس أنا أقولك بداية النهاية. وشكراً


عطايا الله الباترول

[Magellan]

بارك الله فيك ..
وأتوقع أن المشكلة إنحلت ولم يعد فيه خلل بالقير

[ملاحق السيول]

يأخوان اللاند كروزر 2008 ممتاز جدا ولاكن تخرج إشاعات زي كذى من الذين لايستطيعون إقتنائه لغلائه وإلي يقول فتك يأخوي لاتورط الرجال شف المنتدى كل مشاكل الفتك وإدخل قسم بيع السيارات كله باترل و هذا كلام ليس عنصريه لسياره ولاكن هذا الذي نراه بأعيوننا أرجوا أني أفدتك

[سوبر VTC]

نصيحة أي موديل يتغير بالكامل لاتقربه ولا يقربك اول سنه من طرحه ثاني سنه للموديل الجديد ما فيه مشكله ابداً من اقتناءه معاد شركة مرسيدس بنز اشتر ونت مغمض اذا كنت بيسنس مان طبعاً لأن الموديل الجديد الي مطروح عندك بالسوق الأن (جديد بالكامل) تلقاه عند الشركة قبل 5 سنوات يجربون عليه اليل والنهار لاين يتفادون العيوب بالكامل قبل طرحه
وكثرلي من كلمة بالكامل بنسبة لبو جميل وتويوتا الشرق الأوسط لأن المكاين هي هي ال8 سيلندر 4.7

بينما الأمريكي عطي الله الـ8 سيليندر 5.7 بقوة 381 حصان



لا تغلط و تنسى مكينة الجمس الفورتك 6000 و 8100
هههههههههه تراي امزح

[icebird101]

يا شباب انا حسب ما سمعت من شباب اصحابي ان الكروزر من الجي لل جي اكس آر فيهم طقه بالجير من موديل 2006 لل 2009 من يوم ما صار الكروزر دفع رباعي طول الوقت