اين تصلح سيارتك ؟ ( ماهي أفضل الورش) ؟

[الأشهـــــب]

لاشك في أن الغالبية منا ، إن لم نكن جميعنا نملك سيارات تصول بنا وتجول ولله الحمد والفضل ، ولاشك أن سياراتنا هذه مع الزمن تحتاج إما إلى صيانة أو إصلاح خراب ما .
فينوي بعد ذلك الواحد منا أن يدخل سيارته إلى الورشة . فيهتم الواحد منا أين سيضع سيارته ، عند أي الورش ؟ وقد يوفق في ذلك بالورشة المثالية والممتازة من جميع النواحي وأحياناً أخرى ياكلها ( علقة محترمة)!.

فمن هذا المنطلق بودي أن نتعاون جميعاً وذلك بأن يقوم كل واحد منا بذكر الورش التي ينصحون بها وبالتعامل معها حيث سبق لهم أن تعاملوا معها ولمسوا فيها الكفاءة والأمانة جميعاً على حد سواء .
وأرجو عند القيام بذكر الورش أن يتحرى كل منّا الدقة والأمانة في ذلك ، مع ذكر المميزات والعيوب إن وجد ، ونوع العمالة وذكر المدينة والموقع .

وأستأذنكم أن أبدئكم أنا في ذلك .

بالنسبة لي أنا في منطقة الرياض فأنا أتعامل مع ورشة في بداية أول حي الشفا .
الموقع : إمتداد طريق الملك فهد بإتجاه الجنوب مع بداية حي الشفا ، تأخذ أول خط خدمة ، ثم سيأتيك محل خضروات ، بعد محل الخضروات ثاني ورشة على اليمين .
مع الأسف لاأعرف إسم الورشة لأن الوحة محطمة تماماً ؟!
على العموم هي ورشة متواضعة جداً ومساحتها صغيرة لكن يوجد فيها كهربائي سوداني ممتاز ماشاء الله عليه إسمه ( عبد الله ) .
جميع العمالة في هذه الورشة سودانيين عدا هندي واحد ، وقد أخبرني هذا الكهربائي عبد الله قبل فترة وجيزة أنه سيغير العمالة التي بالمحل وسيحضر عمالة فلبينية .
أما المجالات الأخرى كالميكانيكا وغيرها فهم لابأس ولكن لايصلون إلى درجة الإمتياز.
عموماً إذا أردت أن الذهاب للورشة فهذا رقم الكهربائي ( عبد الله) 052185749 إتصل عليه قبل أن تذهب للورشة لأنه كثيراُ مايكون خارجاً لمعاينة سيارات متعطلة خارج الورشة .
وبالنسبة للأسعار فهي مناسبة إلى حد ما ، لكن يبغى له تكسير راس لأنه دائماً يرفع السعر عالياً ثم يقوم بالتخفيض .

هذا مالدي الآن وبإنتظار مشاركة الإخوان .

مع تمنياتي للجميع بالتوفيق وبالسلامة لهم ولسياراتهم .

[الحاتمي]

اخوي الاشهب موظوع جميل بس انت ذكرت ان سياراتنا تصول وتجول بنا..............................ماذالو تعطلت سيارتك عليك وانت في احد صولاتك وجولاتك البريه؟؟؟؟؟؟؟؟؟هل تتصل بعبد الله السوداني وانت بالدهناء؟؟؟في نظري ان افظل ورشه ذراعك حتى لوكنت داخل المدينه!! لانك سوف تمر بمواقف تتمنى ان لديك خبره ومعرفه بالاعطال وجلد على الفك والربط....الاان يكون العطل جامد مثل التخبيط والمحركات فهي تحتاج امكانيات وتمرس فلا بأس من الورشه.......اما المشاكل البسيطه فانت اولى باصلاحها كي تخلص لنفسك وتزداد خبره ودرايه بالميكانيكا لانك حتما ستحتاجها يوما ما!!! اما لك اولمساعده شخص لايعرف اين محرك السياره؟؟؟ وهناك الكثير من هذه العينه!!!!!!!!!!!! فقد سبق لي ان رأيت شخص يتصفح كتلوج السياره؟؟؟؟؟؟؟؟؟؟؟؟وكل مشكلته ان سيارته مبنششششششششششششششششششره!!! وسيارته ليست من السيارات المعقده من نوع كامري!!!!!!!!!!!!!!!!!!!! لذا يجب المعرفه اولا والعده الجيده ثانيا..........ولاتنسى الاشياء المهمه ان تكون مع العده مثل الماء وطقم سيور وفيوز إلخ...............................وفوق كل هذا توفير المبلغ....هذا ماعندي .................اخوي الاشهب اسمك يدل على انك راعي مكنكه بالسيارات ؟؟؟؟؟؟؟؟؟؟؟؟؟؟؟؟؟؟؟؟؟؟والسلااااااااااااااااااااااا ااااااااااااام

[الأشهـــــب]

الأخ الغالي : الحاتمي
حياك الله يالغالي .
أخي الحاتمي كلامك جميل جداً ، وعين الصواب ( أنا أشهد إنك ماقلت إلا الصحيح) .
الحقيقة إنه شي مهم الواحد منا يكون عنده على الأقل إلمام بالأشياء الأساسية الهامة في السيارة .
وعلى طاري البنشر ذكرتني والله بواحد صحيّح مسكين. بنشر عليه الكفر ، ومن حسن حظه أن أحد الأخوان مر من عند الشارع الي مبنشر خوينا فيه . شافه وهو يشر للموزين ( تاكسي) ، ويوم شافه وقف ونزل لمه وقال له سلامات وش عندك بتوقف لموزين ؟
قال ابد الله يسلمك بس مبنشر ؟!
قال الأخ طيب ورى مازينت البنشر ؟
وش تتوقع رده ؟! قال ماأعرف أزينه وأنا كنت أأشر للموزين علشان اروح اجيب بنشري يزين لي الكفر !!!
وراح الأخ وزينه له .
ففعلاً يعني مثل ماذكرت يالحاتمي أن فيه بعض الناس والله ماحولك أحد أبد .

لكن ياعزيزي أنا كان قصدي من الموضوع هو التعاون فيما بيننا عندما يحصل لأحد منا عطل أو خراب في سيارته وهو داخل المدينة أن يذهب بها إلى إحدى الورش التي تكون مكمن للثقة ياعزيزي وذلك بما يشورون الإخوان بعضهم على بعض .
ومهما كان يالحاتمي ماللواحد منا غناة عن الورش .

أرجو أن تكون قد تفهمت الموضوع يالغالي .

وحلوة منك إن إسمي يدل على أني راعي مكنكة . يمكن العكس صحيح :D

تحياتي يالغالي ،،،،،،،،،،،،،،،،،،،،،،،،

[كايد]

مشكور اخواني الحاتمي والاشهب على الموضوع المهم

[الأشهـــــب]

الأخ الفاضل : كايد
حياك الله يالغالي ، وهذي الساعة المباركة . لكن وانا أخوك ماذكرت لنا أي الورش التي تنصحنا بها نحن والإخوان؟
ودنا الجميع يفيد ويستفيد يالغالي من هذا الموضوع .

تحياتي لك .......................

[ابومدين]

مشكور اخوي الاشهب

بالنسبة لي تعاملت مع كذا ورشه لكن للالسف كلها ماتنسفط

ومادخلت الموضوع الا معجب بطرحه والشكر للاخ الاشهب

ونتمى من الاخوة يدلونا حسب معرفتهم بالورش الزينة

[الأشهـــــب]

الأخ الفاضل : ياسر
حياك الله يالغالي ، وتسلم يابعدي على إطرائك وهذي الساعة المباركة .
مشكور يالغالي على مشاركتك وإدلائك بلودك في الموضوع ، ولو إنك إلى الآن ماوجدت الورشة الي تسفطها لنا.
الحقيقة وانا أخوك الورش هذي شغلتها شغلة فعلاً ، ويتعب الواحد وهو يبحث عن الورشة المناسبة وفي الآخر قد يوفق وأحياناً أخرى ( ياكثرها ) ياكلها علقة .
من هذا المنطلق ياغالي جائتني فكرة هذا الموضوع والي ودي إن الجميع مثل ماذكرت يشاركنا ويفيد ويستفيد على حد سواء .

أخوي ياسر تسلم مرة ثانية على مداخلتك الجميلة .

وتقبل تحياتي ........................

[شاص]

موضووووووووع رائع جداً وفكرته كانت في ذهني منذ فترة طويلة فلك جزيل الشكر ..
من ناحية الورش فيما يتعلق بالدبل والقير والدفرنس للسيارات الرباعية طبعاً عنك ورشة النيلين على شارع الجمعية بالصناعية القديمة ت/ 4461851

الكهرباء فيه ورشة في محطة الجزيرة على طريق المدينة قبل شارع عائشة بنت أبي بكر-الأبراج سابقاً- على اليمين فلبيني مسلم أسمه نور شغله جيد

[الأشهـــــب]

الأخ الفاضل : شاص
حياك الله يالغالي ، وتسلم بارك الله فيك على مداخلتك الجميلة .

بالنسبة للورشة الثانية الي ذكرتها هي في حي البديعة ، وعلى ماأعتقد إن الفلبيني الي فيها قصيرالقامة وأقرع ؟.

مرة أخرى تسلم يالغالي وماقصرت الله يعطيك العافية .

[أبوسعد]

ياشباب نصيحه اللي بالدمام
عندهم ورشة شركة ارامكوا
زي الوكالة وسعرها
مهب نار زي الوكالة
وفيها مراقبين من الشركة :good:

[مهراس]

واللي في جده أحد يعرف ورش زينه؟؟؟

[الأشهـــــب]

الأخ الغالي : ابو سعد .
تسلم يالحبيب على مشاركتك وذكرك للورشة التي تمدحها ، لكن أخوي ابو سعد الشركة هذي ممكن لأي شخص يصلح سيارته فيها أو لاوم يكون من منسوبي الشركة ؟
أخوي ابو سعد مرة ثانية ماقصرت ويعطيك العافية يالغالي .

تحياتي لك ......................

[الأشهـــــب]

أخوي مهراس .
حياك الله يالغالي ، وتشكر على زيارتك للموضوع .
الغالي مهراس الحقيقة وانا أخوك هذا الموضوع عندما طرحته كنت اتمنى في الواقع من الجميع المشاركة فيه لما فيه من التعاون والنصح بين الأعضاء ، فيذكر كل عضو الورش التي ينصح بها في كل مدينة من مدن الأعضاء جميعاً .
لكن الحقيقة وانا أخوك لاأخفيك أمراً أنني أرى التفاعل ضعيف من قبل الأعضاء ، وحتى من المشرفين ولاأعلم مالسبب في ذلك ؟!!؟
هل الموضوع ليس بتلك الأهمية أم ماذا ؟!
على أمل يالغالي أن تجد من يدلك على الورش المتميزة في جدة وينصحك بها .

تحياتي يالغالي ................................

[القناص]

اوصي ولا ازكي على الله احدا
بورشة عبدالرحمن في صناعية الامير متعب
ورشة للمرسيدس
مديرها اسمه م. علي الدميني
اتعامل معه منذ 18 سنه وما شفت منه الا الخير
فقط مرسيدس وبي ام دبليو
للوصف كلم جواله: 055194538
شكراً

[شاص]

الفلبيني اللي بورشة الجزيرة هو اللي على قولك أخوي الأشهب أقرع أفطس دبيب قصير - طلع المسيح الدجال الله يكفينا الشر-:D
بالنسبة للسمكرة وماالسمكرة الله يحفظنا وإياكم ومن نحب ولا يحوجنا له عندكم ورشة وفا بعد ماتنزل من كبري الصناعية وأنت رايح شمال وتتعدى إشارة القزاز بيجيك وكيل تويوتا على اليمين ادخل بعده تلقى الورشة على يسارك مديرها فلسطيني اسمه رياض والمارية ترى عندها مواتر:eek: من هالغاليات

[الأشهـــــب]

الأخ الفاضل : القناص
ألف شكر لك يالغالي على تواصلك ومشاركتك معنا في هذا الموضوع .

أخوي القناص ماشاء الله عليك مرسيدسات وبي إم دبليو !!! ( مدري وشلون تنزلت وشاركتنا بهذي المشاركة الطيبة يالغالي ؟) خبرك أهل البران جيوب ودداسن :D .

أخوي مرة ثانية تسلم يالغالي وبيّض الله وجهك .

تحياتي لك .........................

[الأشهـــــب]

الأخ الغالي : شاص
حياك الله أخوي ، وتسلم الله لايهينك على تواصلك الطيب .
أخوي بالنسبة لورشة الوفاء هي فعلاً ورشة راقية جداً ، لامن حيث الشكل والتصميم الخارجي للورشة ولامن حيث الشغل . ماعليها كلام ماشاء الله .
لا ويعطي ضمان بعد على الشغل .( والضامن الله سبحانه ) .
لكن وانا أخوك ألأسعار ناااااااااااااااااااار بالحيل :hot: :alarm: فيه مبالغة بالأسعار كبيرة جداً ؟!

أطيب تحية لك أخوي الشاص ، وتسلم بارك الله فيك يالغالي .

[الأشهـــــب]

أين بقية الشــــــــــــــــــــــباب ؟!
وينكم يابقية أعضاء مكشات ؟!!؟

****للرفع****

[ابوحماد]

موضوع مميز جدا والله يعطيكم العافيه ومشاركتي في هاذا الموضوع تكون لها فائده للجميع يارب

بحكم تواجدي في الصناعيه القديمه في الرياض يومين ادارة عقارات بمكتب خاض عرفة الصناعيه ورشه

ورشه واعرف الشغل المظبوط و الحمد الله

1- ورش السمكره يوجد مركز وفاء شغل عالي الجوده العنوان شارع المنتزه (بلقيس) قريب من طريق الخرج.

مركز عالم السيارات شارع الجمعيه بعد تقاطع 24 شرقي من جهة الغرب.

مركز القريني عجائب السيارات درم كار شارع 36 الشرقي مقابل شارنجر

2- ورش المكانيكا . ورشة التاج شارع 24 الشرقي بجوار النهدي تويوتا مركز العضيب لكزس صناعية متعب

مركز و ميزان المجد متخصصون في الوزن افضل مركز وزن الاذرعه باشراف المهندس محمود خبره وصاحب

خبره وبال طويل العنوان شارع المنتزه (بلقيس) قريب من طريق الخرج وقريب من مركز وفاء ت/4486635

والله الموفق

اخوكم/ ابو حماد
totd1973@hotMAIL.COM

[الأشهـــــب]

الأخ الفاضل : ابو حماد
ألف شكر لك يالغالي على هذي المعلومات الطيبة ، وعلى هذاالتفاعل الأطيب .
الحقيقة معلومات تشكر عليها يالغالي .

بالنسبة للميزان وأنا أخوك فيه أيضاً ميزان اليرموك بالصناعية القديمة شغلهم مضبوط ، وكل شغلهم على الركادة ولايحبون شغل البربسة والعجلة .

الله يعافيك أخوي ، وماقصرت بارك الله فيك .


تحياتي لك أخوي أبو حماد .

[ابومدين]

عز الله انك ماقصرت يابو حماد الله يكتب اجرك

كلام عن خبرة ....وهذه الفائدة المرجوة

مشكور اخوي والشكر موصول للاخ الحبيب الأشهب

[Bader-M]

بنسبه
لي
انا انزين سيارتي
صح اني لو جيت ازين شي خربان
خربت شغله ثانيه :D
بس وسع صدك ;)
على فكره
شباب الي وده اخرب سيارته قصدي اصلحها له
يقول لي
تراني في الخدمه :cool:

[Bo Rashed]

كل عام وانتم بخير

شكرا اخي الاشهب على طرح هذا الموضوع

اللي في الدمام

انا انصح بورشة يشتغل فيها واحد يمني يقاله راشد وهو معروف اكثر من نار على علم في تصليح سيارات الدفع الرباعي في صناعية الدمام (الخضريه) وهذا وصف لمكان الورشه: وانت جاي من شارع الملك عبد العزيز تبي الصناعيه طبعا تاخذ يسار عند الاشاره اللي توديك سيهات ثم تاخذ يمين مع اول ملف وبعدين ثاني ملف على يدك اليسار والورشه تكون خامس او رابع ورشه على اليمين

ولكن اكثر شغلي اسويه عند ميكانيكي فلبيني مسلم له 15 سنه بالسعوديه ميكانيكي يشتغل لحسابه عند بيته وسعره رخيص مره واحيانا بلاش وقد وضبت عنده مكاين جمسين وغيرت قير ودفرنشات...

تحياتي

[الأشهـــــب]

الأخ الفاضل : طاير بالعجة
حياك الله أخوي و( كل عام وانت بخير ) .

أخوي طاير بالعجة مستحيل يالغالي واحد مثلك ماشاء الله عليك مايعرف ورش مضبوطة ؟!!!
أيضاً مستحيل يالغالي إنك ماقد رحت لورشة؟! ، لأنك مهما كنت فنان في تصليح السيارات فمالك غناة عن الورش .
فكان بودي وانا أخوك لو شاركت معنا في ذكر ورش تنصح بها .

وسلامتك يالغالي ...................

[الأشهـــــب]

الأخ العزيز : Bo Rashed
حياك الله ياالغالي و( كل عام وانت بخير ) .

العفو وانا أخوك ، والموضوع هو منكم ولكم .

أخوي Bo Rashed تسلم يالغالي على هذه المشاركة القيمة وعلى تفاعلك الطيب معنا .

أخوي Bo Rashed بالنسبة للأخ الفلبيني الي تصلح سيارتك عنده هل هو متقن للعمل الذي يقوم به كما ينبغي ؟ وياليت سلمك الله تعطينا وصف دقيق للورشة .

مرة ثانية مشكور يالغالي على مشاركتك القيمة .

وتقبل تحياتي .......................

[ريح الخزامى]

السلام عليكم

حبيت اشاركم بهالموضوع وهو ان فيه ورشه القليل يعرفها في الرياض وهي خاصه بس بالامريكي وشغلهم عليه الكلام بس كسر روسهم موقعها بين وكاله الجميح اللي على طريق خريص وبين الحوش حق سيارات المستعمل حقهم في الشارع اللي بالنص وفي وانت متجه جنوب يجيك طريق ردميه على اليسار السور حق الجميح حق حوش السيارات واليمين حوش ثاني بعد تابع للجميح
وتمشي لحد مايجيك بوابه علىا ليسار في نفس السور اللي على اليسار طبعا الورشه اللي بيشوفها يحقرها بس شغلهم مايبي له كلام العمال اللي موجودين فيها كانوا ا تبع ورشه الوكاله وشغلهم عليه الكلام وشغلهم كانه وكاله مايفحصون الا بالكمبيوتر وشوف عيني لما وصلتهم الكمبيوترات للسيارات الجديده جالسين يجربونها وراعيها طبعا من الجميح اسمه ابو عدنان مطوع :) بس ماشالله خبره في المواتر
وانا مرتن خرب علي مكيف الجمس وعجزت في الورشات شوي وبيفكون المكينه من كثر ماحاسوا فيه وهم يدورون العله ووديته لهم وما امداني اقول للباكستاني وش في الموتر اللا قال لي جب القطعه الفلانيه وعجل خلنا نصلحه لك قبل الصلاة :) والحمدلله خلصنا وارتحنا

[nooh79]

السلام عليكم
ولاكن يالربع بعض العاملين في الورش يطلبون من الواحد ترك السيارة مع المفتاح ، ويقول تعال بكره، وشغلتك بسيطه عنده، فهو يقضي بها المشاووير رايح جاي ، واذا بها بنزين شفط منه وعبى الجوالين، ويركب لاك قطع غيار تقليد( يشلح )، وأحيانا تطلب منه تغيير الزيت والسيفون مايغير، بس يقولك انه غير ، احيانا يعمل متعمد مشاكل بالسيارة( يغير وزنية الهواء،يحط لك عازل بين اسلاك البواجي...........) عشان تكون عنده زبون على طول.
......على المرء قدر الأمكان عدم ترك السيارة عند اهل الورش للصيانة.....
الورش اللي بينبع :
سمكرة وميكانيكا ورشة بني كبير
ورشة الحارثي.
ورشة الفاو

[الأشهـــــب]

الأخ الفاضل : ريح الخزامى

حياك الله يالغالي ، وألف شكر على تفاعلك مع الموضوع ياغالي .

أخوي بالفعل الورشة الي ذكرتها يثني عليها كثير من الإخوان ، ويمدحون صاحبها وأنه ثقة ومنصح .

أخوي ريح الخزامى ، ياليت يالغالي لو تكرمت و ذكرت رقم الورشة أو رقم صاحبها .

مع شكري لك مرة أخرى وتقبل أطيب تحياتي ...................

[الأشهـــــب]

الأخ الفاضل : nooh79

حياك الله يالغالي ، ومشكور على مشاركتك الجميلة .

أخي إن ماذكرته بالفعل هي مشكلة . ولذلك لو تلاحظ في أول هذا الموضوع الذي طرحته طلبت من الإخوة أن يذكروا الورش التي تكون مكمن للثقة من خلال تعاملهم ومعرفتهم بالورش .

أخي الحقيقة أن ترك السيارات في الورش إذا لم تتركها في المرة الأولى فستتركها في الثانية . فهو أمر لابد منه .
والله يجعل لنا في كل أمر خيراً ، ويطرحنا في الصالح من خلقه .

بارك الله فيك أخي الكريم ، وماقصرت يالغالي .

تحياتي لك ........................