صوت طقطقه في الكفر الخلفي للباترول,,, الرجاء الدخول وعطني تشخيصك

[NSS]

السلام عليكم ورحمتة الله وبركاتة,,, اخواني اعضاء مكشات عندي مشكلة في الكفر الخلفي للباترول, اول ما ابدي بالمشي اسمع صوت مثل حك الحديد ببعضه!!ويقل الصوت كل ما اسرعت الى ان يقل ويصير الصوت مثل اذا كان في مسمار بالكفر(تك تك تك تك تك تك....)
ويوم اني امسك بريك اسمع طقه من وره؟؟


ارجوا اني وضحت لكم المشكلة,, وارجوا من الجميع افادتي بنوع المشكلة لاهنتوا,,,,,

[بلاتين]

هلا بك اخوي Nss
الباترول ربع ولا طويل اذا كنت مركب يايات استراليه الي ترفع الموتر على الربع ترى هي الي تطلع صوت احتكاك وهو عمود الكردان يحتك لانه ارتفع عن المستوى . والله اعلم

[NSS]

اشكرك اخوي بلاتين ,, الباترول طويل و مو مركب عليه يايات,,

هل اليايات تاثر على الموتر لاني مفكر اركبهن.؟؟

[NSS]

وينكم يالنشامى؟؟

[بلاتين]

اليايات ياطويل العمر على الباترول الربع 2006 وطالع بواقع تجربه انها طلع صوت احتكاك عند سرعة 120الى 140 اول تترك الدعسه لانها ترفع الموتر 3 سانتي ولاكن لها حلول تحتاج شوي توليف .
بالنسبه للطويل له ثلاث مقاسات خذ مقاس نفس ارتفاع شد البلد وبكذا يصير الموتر ماينزل بسهوله لان اليايات قاسيه .
ترى ماعندي خلفيه عن الطويل بالنسبة لليايات ولاكن خلك بالمضمون .

[أبو أسامة]

السلام عليكم ورحمة الله وبركاته

أخي الكريم : تأكد من جلب المساعدات الخلفية ومن جلب مسامير التوازن الخلفية .

[abu hlal]

شيك على القماشات(البريك)

[سطام vip]

السلام عليكم ورحمة الله وبركاته

الاصوات الخلفيه كثيره

واسبابها وعلى حسب شرحك

القماشات مثل ماقال اخونا ابو هلال

وعندك الله يسلمك الصليب الخلفي وعمود الكردان

وشيك على زيت الدفرنس والكرونه والرمانات الخلفيه

وفي الختام الله يسهل امورك اخوي وتنحل مشكلتك

تقبل مروري والرد

ودمت بخير

[رجل كريم]

وعليكم السلام ورحمة الله وبركاته:


انصحك توديها ورشة وتخليهم يرفعونا من ورى وبعدها يبان مصدر الصوت وان شاء الله بسيطة ..

تحياتي ..,

[NSS]

اشكركم جميعا على التفاعل,, قمت رفعت الكفر الي منه الصوت لقيت في خلل بالدوران,, يعني الكفر مايدور مضبوط كنه في رجفه؟؟؟

[ناصر الدهمشي]

انا اتوقع انها الرمانه لانها صارت معي في سفاري 98 نفس وصف المشكلة
بس انت شيك على الرمانة وعلى الفحمات
وان شاء الله بسيطه

[مسايف الطعس]

هلا أخوي

أنا قد صارت معي وضيق صدري وبغيت أروح فيها

كان الكفر مايدور زين ويطلع صوت كنه من عامود الكردان المهم وأمشي ذاك اليوم حسيت الكفر يبي

ينطلق الي يسار ورى

يوم نزلت لقيت الكفر الي ورى مابقى فيه الى صامولتين والباقي طايح وأنا قبل أسبوع مغير البلوف

صار اليماني ماربط الكفرات زين

فتأكد من صواميل الكفرات يمكن منحلات

تحياتي

[عاشق الغضا]

اذا كان الصوت مثل الكفر الي به مسمار فأتوقع انك ماسك على الكفر وممسح جه من الدعسه ويبدى يطق

[راعي البرقا]

السلام عليكم ورحمة الله وبركاته

الاصوات الخلفيه كثيره

واسبابها وعلى حسب شرحك

القماشات مثل ماقال اخونا ابو هلال

وعندك الله يسلمك الصليب الخلفي وعمود الكردان

وشيك على زيت الدفرنس والكرونه والرمانات الخلفيه

وفي الختام الله يسهل امورك اخوي وتنحل مشكلتك

تقبل مروري والرد

ودمت بخير
أنا مع أخوي ولا أزيد في كلامه شي والله يوفقك .

[NSS]

أشكركم جميعا,, قدر الله و ما شاء فعل,, تحمدولي بالسلامة
اليوم طق عندي الكفر طلع من مكانه كله وبغيت اروح فيها ,, الحمد لله الي ستر علي وحفظني من القلبة,,

والله يعوض علي

[أبو أسامة]

الحمد لله على سلامتك والله يجيرك بمصيبتك ويخلف لك بخيراً منها

[متصفح مكشات]

هذ طول الله عمرك الاستبنه والله اعلم

[مسايف الطعس]

قايلك أخوي صواميل الكفر منحلة

بس قدالله ماشاء فعل

وتأكد من السبب أكيد من صواميل الكفر

[رجل كريم]

أشكركم جميعا,, قدر الله و ما شاء فعل,, تحمدولي بالسلامة
اليوم طق عندي الكفر طلع من مكانه كله وبغيت اروح فيها ,, الحمد لله الي ستر علي وحفظني من القلبة,,

والله يعوض علي



الحمد لله على السلامة .. الله يأجرك في مصيبتك ويخلف لك خير منها ..,.

ماقلت لنا اسباب خروج الكفر من مكانه من الرمان بلي البيرنغات ولا من صواميل العجل ..؟

تحياتي .,

[بلاتين]

الحمد لله على السلامه .,,,

[العقيد حويلان]

الحق نفسك صار معي نفس المشكله ماعرفت السبب
لين لين (اطلق الكفر وانا امشي)ستر ربك من الانقلاب
شيك علي الصواميل وخصوصا اذكانت الجنوط تجاريه

[NSS]

اشكركم جميعا,,, الحمد لله الي ستر

المشكلة اكتشفتها>>>> كان هناك اعوجاج في الاكس الخلفي مما سبب انحلال الصواميل وخروج الكفر