تنظيف خزان ومجاري البنزين والكلبليتر بدون فك!!!

[الحاتمي]

السلام عليكم............................................. ............ هذي ياشباب طريقه لتنظيف خزان البنزين ومواسير نقل البنزين والكلبليتر وما تكلفك الا نص علبة زيت مكينه..شل سوبر اواكسترا او اي نوع؟؟؟؟؟؟الطريقه مجربه انا على سياره هايلس موديل94 .......طلعت السياره من الوكاله قبل 10سنوات مشت معي اكثر معي 250000 كيلو وبعته ولا اذكر اني غيرت له لاصفاية بنزين ولا طرمبه ولا فكيت الخزان ولا الكلبليتر ماعليك الا انك تجيب علبة الزيت واذا جيت تعبي بنزين(فل) تحط نص علبه مع البنزين وتمسك به الخط...... واذا ودك تحط علبة الزيت كامله مايمنع لاني اذكر اني حطيت اكثر علبه كامله اكثر من مره ...............................هالطريقه تبي تنظف لك من قاع الخزان الى الكلبليتر من دون فك وتغيير اي شي بموترك والسبب ان الزيت يسهل الحركه ولزج يبي يكنس اي عوالق وتراب بعد مايختلط مع البنزين لانكم عارفين ان البنزين ناشف ولا يسهل الحركه مثل الزيت................... وترى الزيت مايخلط مع كل مره تعبي فل يعني سو الطريقه هذي بعد4 او 5 مرات تعبي بنزين او كل شهر هذي تجربه خاصه اناجربته ونجحت ومن فوايده بعد ان السياره يصير عزمه قوي شوي واشتغاله صافي وماتبلشك بالتقطيع اللي ناتج عن سد د بالطرمبه او الكلبليتر اوالصفايه او المواسير ........................... واللي عنده طرق جديده للعنايه بالسياره او اختراعات لايبخل علينا ياشباب................................اخوكم الحاتمي................................:light:

[Khalid AlGhamdi]

وعليكم السلام ورحمة الله وبركاته

مشكور اخوي بس التجربة تخوف :eek:

[قناص القرائن]

والله شي

[صقر]

طريقة رائعة وحلوة يالحاتمي

وانا اسمع انهم يحطون زيت عشرة (زيت الدركسون) في التانكي أثناء التعبئة ..

هذا بالنسبة لسيارات البنزين..

ما ذا عن سيارات الديزل ..... اسعفني يالحاتمي ..وتراك مشكور

بارك الله فيك.

[قناص القرائن]

لاكن اكيد مايخر فيها شي

[الاجودي]

انا الي سمعته زيت درقسون

وجربتها على كابرس

ولاشفت شىء واضح لاسلب ولا ايجاب

[نجمة سهيل]

طريقه سهله ومجربه ، وأذكر سويناها على جمس ولاندكروزر في أخر رحله لنا للصيد ،

والحمدلله التقطيع الي يصير لنا بالجمس زاال ،

[الحاتمي]

الأخوه الاعزاء..................الطريقه صحيح انه تخوف بس اناجربته بزيت مكينه شل سوبر..وزيت اكسترا........ وترى حتى زيت الدركسون مقارب لزيت المكينه واهم شي انه فيه لزوجه تسهل مرور البنزين بالاماكن الصغيره والظيقه............. لان البنزين مثل ماقلت نااااااااشف....والزيت عكسه .............تبي تقتنعون اكثر. جب شوي بنزين واسكبه على راحة يدك وافركه.. وجب ثلاث او اربع قطرات من زيت المكينه من عيار الزيت اسهل لك وافرك يدك الثانيه ........................................... شف اي ايديك تحس انه تتحرك براحه ونعومه اكثر؟؟؟؟؟؟؟؟؟؟؟؟؟؟؟؟؟اكيد اليد اللي فيها زيت؟لانه لزج ويسهل الحركه وبالنسبه لك يالغالي صقر اذا كانت سيارتك ديزل اخلط مع الديزل بنزين هاهاهاهاهاها........ وعلى فكره ترى لوتحط قارورة ماء صحه صغيره بنزين بسيارتك الديزل تبي تلعلع المكينه وتزود قوته شوي بس يأثر على المكينه مع مرور الوقت خصوصا اذا كانت من نوع سفاري ديزل؟؟؟؟؟؟؟؟؟؟؟؟؟؟ اماطريقة تنظيف الديزل فيه فلتر بالكبوت يفك كل مده وينظف من الشوائب والماء والاوساخ..................ولكم تحيات الحااااااااااااااااااااااااااااااااااااااااااااااا اااااااااتمي

[قناص القرائن]

كذا ريحتني

[شاص]

:confused: :confused: :light: العلم بحرررررررررررررررررر:confused: :eek: :eek:

[العنكبوت]

طيب والبخاخ ؟؟؟
ياليت احد يقول لنا

[Bader-M]

السلام عليكم
........
انا سمعت عنها
ولكن لم اجربها
.....
ولكن فيه علبة تباع عند المحطات البنزين
وهي مخصصه لتنظيف الكلبريتر و البخاخ
واعتقد انها مضمونه اكثر
لانها من شركة متخصصه في هذه المجالات
والله اعلم
..........
تقبل تحياتي

[ابو الريم]

اخوي الحاتمي .......... كلامك فيه نوع من الصحة ولكن طريقة العلاج فيها نظر , فالبنزين القديم الذي كان يأتي بالرصاص كان يهتم بهذه القضية فالرصاص المذاب توجد من مكوناته لزوجه مثل الزيت ترطب الربلات وجلد الكربريتر وغيرها , اما بعد ازالة الرصاص من البنزين وصار بنزين خالي من الرصاص فتحتاج السيارة بين فترة واخرى ترطيب وخاصة اذا كانت كربيرتر , من طرق الترطيب مثل ما ذكر الاخوة زيت باور لان هذا الزيت يحترق ( ولا يتبخر ) واحتراقه سريع ولا يبقى منه شيء وبنفس الوقت ترطيبه عالي اما زيت المكينة شل وغيره ففيه سلبيات كثيرة لانه ما يحترق وتبخيره صعب , فاول مشاكله انه يعدم البواجي , ويكون طبقة شحم فوق البساتم وهذا يضر السيارة على المدى البعيد


عموما افضل حل مثل ما ذكر اخونا طاير بالعجة يوجد في محلات الزينة او المحطات علب لتنظيف الكربيرتر او البخاخ , فهي في الحقيقة نفس فكرة الزيت ولكن بنسب مدروسة ومن افضل الشركات شكرة STP

اما عن فلتر البنزين اخوي الحاتمي فما اظن ان الزيت ينظفه , لان عبارة عن صفايه يصفي البنزين من الشوائب , ( تعرف بنزينا نظيييف مرة ) وليس للزيت علاقة بالتنظيف واذا نظفه ( يعني ذوبها ) فهذه مشكلة لان معنى هذا الكلام ان هذه الشوائب راحت للمكينة :(


تحياتي ابو الريم ’’’

[الحاتمي]

اخوي الغالي ابو الريم........اشكرك على ملاحظاتك اللتي ذكرت........ودائما يكون الإختلاف في وجهات النظر له فوائد فلربما يطول هذا النقاش وهذا هو مانرجوه.... فلعله يبحر بنا إلى مالا نعرف اوإلى اشياء نعرفها ونسيناها....او يتبدل النقاش إلى موظوع اّخر اكثرفائده. وتعليقا على كلامك بأن زيت شل اوغيره من زيوت الماكينه له سلبيات في حالة خلطه مع البنزين؟ اولا:قارن بين نسبة الزيت إلى نسبة البنزين(علبة زيت 1لتر)...(خزان بنزين 80 لتر)؟؟ ألا ترى ان فيها ظلم شديد للزيت 1%80.....................................خزان سعته 80 إفتراظي فسعة الخزانات تتفاوت. وهذه النسبه لاتظر بقدر ماتفيد(مثال إظافة الكلور شديد الخطوره والسميه إلى الماء اللذي نشربه) ثانيا: زيت الماكينه قد يصل إلى غرفة الإشتعال حتى لو لم تظيفه مع خزان البنزين ويحترق ؟؟؟؟؟ والدليل ماتفسيرك للون دخان العادم الأزرق؟؟؟؟وماتفسيرك لكون بعض السيارات اللتي تحتاج إلى شمبر تكون المنطقه الخلفيه بالسياره من جهة الشكمان لونها اصفر؟؟؟؟؟؟؟؟ ثالثا: انت ذكرت في كلامك ان الزيت يعدم شموع الإشعال(البوجي)اتفق معك في هذا ولكن يبدو لي انك استنتجت هذا من سياره بحاجة إلى جلد بلوف اوتغيير شمبر.. لأن الزيت يهرب إلى غرفة الإشتعال بكثره ويؤثر على البواجي. رابعا : الطبقه اللتى نراها فوق البساتم ليست شحم؟؟ بل هي كربون ويوجد على البلوف ايظاً. خامساً: زيت الماكينه لاينظف!! بل يسهل ويسلك ويفتح الإنسدادات. ولنفترض ان الشوائب تجاوزت الفلتر(الصفايه) وتجاوزت الكربريتر اين سيكون مصيرها؟؟ بالطبع سيتم حرقها وإخراجها مع العادم. لن تبقى في الماكينه..................عموماً الغالي ابوالريم اكررشكري لك لانك زودتني بما لم يكلفني عناء البحث..............الحاااااااااااااااااااااااااااا ااااااااااااااااااااااااااااااااتمي

[أبو ناصر]

السلام عليكم
في نقطة مهمة وهي :-
بالنسبة للزيت الذي نضعه مع البنزين هل يزيد استهلاك السيارة للبنزين أو يقل استهلاكها .

[ابو الريم]

اخوي الحاتمي اشكرك على اسلوبك الهادئ في النقاش , والذي ينم عن اطلاع وخبرة , وليس لدي ما اضيفه الا ان الرأي الذي كتبته بناء على معلومات ( دراسيه , وعملية ) , وليس مثل ما تفضلت وذكرت رأيك والذي كتبته عن تجارب عديده , وانا لم اختلف معك في هذا الفعل بل لو تلاحظ ايدت كلامك , ولكن اختلفت معك في المادة فبدل ما تضع زيت شل افضل انك تضيف زيت ( القير اذا كنت مصر على موضوع الزيت ) والافضل والاحسن انك تضع منظفات (الكربريتر , اوالبخاخات ) من الشركات المعروفة والتي لا تختلف اسعارها حسب علمي الا شيء بسيط عن علبة الزيت ........
اما عن التفسيرات التي طلبتها فكل واحده في ظني تحتاج الى موضوع ولكن لكي اسهل عليك التجربة , شب ضو وخل النار تقوى ثم كب زيت القير وشف وش يصير وبنفس الوقت كب زيت المكينة وهذا هو الحاصل بالمحرك , فستجد ان ( زيت القير ) قابل للاشتعال بسرعة ودون رواسب بعكس زيت المحرك والذي يتبخر جزء منه بعد ان يطفي جزء من النار وبالكاد يشتعل فالدخان الازرق عبارة عن ابخرة نقاط بسيطة من الزيت مختلطه مع احتراق البنزين , اما عن الكمية ونسبتها فانا كما ذكرت لك شخصيا افضَل شيء مجرب من شركات معروفة بكميات دقيقة افضل من تجارب شخصية


شكرا لك ........... تحياتي ابو الريم ,,,,

[الحاتمي]

الأخوه الأعزاء ابو الريم.ابوناصر إظافة الزيت ليس له تأثير واظح على إستهلاك الوقود......... اما الفرق بيين إشتعال زيت القير وزيت المحرك فوق نار في الهواء الطلق يختلف عن الإحتراق داخل غرفة الإحتراق في ماكينة السياره؟ فهناك عوامل اخرى لها تأثيروالدليل حول ان تحرق الديزل فوق نارومدى تفاعله.بينما داخل غرفة الإحتراق يحترق ويولد قدره عاليه. اما الزيت المصاحب للبنزين فيأتي على شكل قطرات صغيره جدا من السهل إحراقها والتخلص منها عن طريق العادم............وانا لاقول ان زيت المحرك افظل من الانواع السابق ذكرها مثلSTB وغيرها لكن احيانا تكون في مناطق نائيه اوفي البر فتبدا السياره بالتقطيع وتحتاج إلى حلول مؤقته منها تنظيف صفاية البنزين لسهولة فكها وتركيبها غالبا. فتلجا لهذه الطريقه لتوفر زيت الماكينه في اغلب المحطات النائيه وفي البر من مكينة السياره شي قليل يريحك كثير................ ولكم تحياتي الحااااااااااااااااااااااااااااااااااااااااااااااا ااااااااااااااااتمي

[أبو ناصر]

السلام عليكم ورحمة الله وبركاته
أخوي الحاتمي بارك الله فيك سؤال ثاني :
المشكلة عند الفحص هل يؤثر على الكربون الخارج من السيارة .

[abduaaa2]

السلام عليكم
كلام الحاتمي ممتاز جدا كما يقولون (اسأل مجرب ولا تسأل طبيب)
وكلامك يا ابو الريم تستند الي دراسات ممتاز كمان
تجاربهم كان في بلادهم غير البلاد الحارة
ودراساتهم مجرد توقعات وليست حقائق
زيما يقولون سيارة وقودها ديزل لوعبينا بنزين ما تمشي (مكائن الديزل ما فيها بواجي وتنفجر بفعل الظغط)
اما سيارة وقودها بنزين لوعبينا ديزل راح تمشي (مكائن البنزين فيها بواجي)يقولون، اعرف كثيرين عبو بالغلط ديزل عى البنزين وما تحركت من مكانها وجابو مكانيكيين وغسلوا التنكي
المهم التجارب خير برهان من استدلالات بدراسة
ونصيحتك يا ابو الريم في استخدام الزيت الموجود في المحطات وتنصح الى افضلها وهوstp
فهذا ارجوووووووووووووووووووك لا انت ولاغيرك يستخدموه لانه راح يخرب الكربريتر(نوع الي يحتاج الى تغيير الكبرريتر بالكل) وتكسر الشنابر وتنشف الليات(الموصلة من التنكي الى المكينة)
ونصيحة للكل ياخوني: كلام الشركات كلها في مصالحهم ما عندهم اهتمام الفرد المستهلك
مثلا: تغيير الزيت بعد 3000 كيلوا (وناس جو يهتموا بالمكينة صارو يغيروبعد2500)كيلوا -كلها كلام فاااااااااااااااااااااااااااااااااااااااااااااضي
ياخي تغيير الزيت لم تشوف ثقل في الزيت ووجود اشياء زي التراب لما تمسكها وتتغيير اللون الى السواد(في البنزين اما ديزل اللون مو مهم لانه راح يتغييير من اول تشغيلة)
وكلها بالعيار تخرج وتمسكها بيدك (ما هي سامة لا تخاف)
----نصيحة الثانية الموية الخضرة الموجود في البناشر (ابو خمسة ريال)لا تستخدموها لانه راح يأكل المكينة اكل من الداخل وتختلط الزيت بالبنزين والموية (خراب من نوع الى يحتاج تغيير مو تصليح اما سلندر او راس اوصدر المكينة)
--------نصيحة ثالثة انضر الى الشركات المبيع (التي بيع)على انها استغلالية ولا على انها مهتمه فيك مثلا: شركات الادوية (اللي مهتمين بصحتنا) لا تحسبهم خرجو داوا عشان سواد عيوننا اكبر دليل طلع الورقة اللى في الأدوية واقراء (الاعراض الجانبية)
يا اخي تعاجني ولا تزود مرض
انا اعرف ناس واغلبهم على هل حال لما يرتفع الظغط يروح المستشفى ويأخذ دواء وبعدين يجيله مرض السكر
واعرف ناس يرتفعوا الظغط وعندهم جهاز كمان يروح يتوضا ويغيير من حاله ويستعيذ بالله ما يقولون قدام الناس بالله شاي بدون سكر.....
المهم اسلوبك يا الحاتمي ممتاز تجرب وتطلع النتيجه واجربها في سيارة اخوية وعلى سيارتي اللي ابغى اشترية حاليا كابرس بوكس
ونسيت اسال هل في حركة عندك للمكائن البخاخات
ايوه عندي حركة تشتري حقت الفورد تاخذ عبوتين علبة بيضة عليها استكر احمر
وتحط العلبتين على التنكي حقت البنزين لما يكون على النهاية (وتحس ان المكينة صارت ثقيلة وتخرج دخان اسسسسسسسسسووووووووود لو ماصار زود علبة) المهم اتركه خمس الي عشر دقائق يعنى الين ماتحس انه الدخان الاسود خف وعبي فل البنزين ورح اقرب ميكانيكي وغيير البواجي وطرمبة بنزين وخلاص (هذي اللي يسوها الميكانيكيين)
والبواجي لاتغييرها الي عند البنشري روح اشتري من القطع غيار اصلي وغيير
انا ما اقصد الهجوم علي احد (بس ازعل لما اشوف واحد يُستغل)
وانا اشتغلت مساعد ميكانيكا سنتين والاشياء قلتها على حدود خبرتي

[راعي العشــه]

مساء الخير للجميع
اخي الحاتمي اشكرك على الموضوع الرائع وعلى اسلوبك الاروع في النقاش والاقناع والتجربه خير برهان

اخي ابو الريم لولا اختلاف الاذواق لابارت السلع وكل واحد له وجهة نظر تقنعه
فالكتب العلميه ماتأيدك انك تسوي تجارب
انا سبق معي لاندكروزر ورحت اغير زيت بعد مافضى الزيت العامل وربط الصره جبت جالونين ديزل وكبيتهم في الماكينه وشغلت السياره وبعدها فرغنا الديزل وعبيت الزيت
طبعا بتقول طريقه تخوف والكتب العلميه ماتذكر هذا ولاكن التجربه تجبرك على الاقناع
كلامك ابو الريم عين العقل ومقنع وايضا تجربة الحاتمي
اقدم اعجابي على نقاشكم في مثل هذه المعلومات وعلى الاسلوب الرائع والهادي
تقبلو تحياتي

[asdali]

مشكور اخوي على التجربة

التكالوجات كلها تذكر انك تعبي بنزين اول ما تشوف اللمبة الصفرا شغالة لان الشوايب تكون قليلة جدا وتحترق مع البنزين اما اللي يعبون والتانكي فيه النص او الثلثين هم اللي دايما يشكون من وسخ التانكي وتعطل الطرمبة

دايما ما عبي موتري الا لما تولع اللمبة الصفرا والحمدلله هذا قاطع فوق ال300 الف ولا شفت الا خير ولاتنظيف مواصير وفلاتر وزيوت واشياء احنا في غنى عنها

الله يعطيك العافية على الموضوع

[ولد وايل..]

والله تخوف الصدق...

[درب الصحراء]

انا اسمع انهم يحطون زيت فرامل

لكن زيت مكينه احس انه صعبة شوي لانه ثقيل وفيه بعض الليات تكون صغيرة واذا كان الزيت محمل بالوصخ من الفلتر والتانكي مع لزوجة الزيت اتوقع بيسد الليات والبخاخات

والله اعلم

[سوبر VTC]

العلم الاكيد ان راعي ورشة ديزل
يحط لموتره علبة دركسون بالشهر مرة و يفلل التانكي
و الفائدة
تنظيف بخاخات الموتر
الموتر ديزل

[سلطانوو]

مشكور على الفوايد

[قناص*07]

يبيلي اشتري سياره بـ 2000 واجرب
هههههههه
الله يعطيك العافيه وان شاء الله بأجربها بربع علبه في البدايه

[You Like Me]

بصراحه الموضوع قديم
لكن الى الآن ماعرفنا نحط زيت والا لا

[ربع النسيان]

والله اشوفها عند مستبيشي يقول تنظف البخاخ

جربتها ولا حسيت باي اعراض جانبيه

[ربع النسيان]

والله اشوفها عند مستبيشي يقول تنظف البخاخ

جربتها ولا حسيت باي اعراض جانبيه

[آخر العنقود]

هالطريقه ما هي مضمونه لأنه احتمال تخرب طرمبة البنزين وتسبب اجهاد لها والحل الوحيد انك تشتري علبة تنظيف من اي وكاله خاص بتنظيف البخاخات وسعره 30ريال تحطه بالتانكي وانت مرتاح ....

[سلطانوو]

لااله الا انت سبحانك اني كنت من الظالمين

[عوام 5]

فكره غريبه