إلى أصحاب الددسن الدفرنشين ((أرجوا الدخول للأهميه))

[بومعطش]

السلام عليكم ورحمة الله
أحيي الأعضاء كلن بإسمه
يالربع بغيت بعض الإجابات منكم حول الددسن الدفرنشين
أول شي ددسن دفرنشين موديل2006 فل كامل ماشي 50 ألف كم يسوى؟؟؟
بعدين شرايكم في إستعماله زين ولا؟؟
وهل هو دفرنش أمامي ولاعكوس؟؟
وهل هو بخاخ ولاكربريتر؟؟
وكيفه بالنفوذ ؟؟
وهل تركب عليه جنوط هلل ولا؟؟وهل تعطيه شكل لاركبت عليه مع البواليين؟؟
وشكرا

[القميري هواي]

يسوى ابوي من الخمس واربعين وانت جاي
استعماله زين اللي مايقدر على جيب يشتري ددسن

[القميري هواي]

اخوي لا دفرنس ولا عكس مقص

وبخاخ

زين بالنفود نسم وانسى الغراز

[الصمان 2]

هلابك بو معطش

معي 98 كلبليتر ، لكن 2006 بخاخ

والدفرنس عكوس ، زي الكامري ، فيها ربلات

وفي النفود دقه بالخفيف واطرح الكفرات ، وخذ موتر يتندح

الجنوط والكفرات مالي بهن علم .

بس الموتر مريح ... لا مطب ولا قرقعه


لكن في الخطوط ما يمشي .... بالكثير 150

ولا تنسى تركب عليه فرارات .


سلام .

[ford]

بالنسبه لعموم الوانتيات اليابانيه الاربعه سلندر زي ماقال اخوي القميري هواي نسم وانسي الغراز لكن ان كانك بتقارن بالجيوب مافيه مقارنه مهما كان تراه اربع سلندر المفروض يجيبونه 6 سلندر لكن حسبي الله علي الوكلاء اللي عندك هذا للبر وللديره ممشاه اثقل من الددسن الدفرنس

وبالنسبه لشكله مع الجنوط تقدر تبحث في النت ان شاء الله تلقي الصور اللي بالك

ارجو اني اكون قد افدتك .

[ابو صقر 111]

الددسن الدفرنسين قليل الاعطال رفيق طيب ولكن المطبات قوية خاصة اقل من الفين واستهلاكه للوقود كثير خاصة ماقبل الفين ويصلح لواسع الصدرلانه ثقيل نوعا ما وهذه تجربتي مع ثمان وتسعين

[ford]

اضافه الي ماذكروه الاخوان بارك الله فيهم هذي روابط لنفس الموضوع

http://www.mekshat.com/vb/showthread.php?t=36054

وهذا موضوع عن الهايلكس لكن ناقشو فيه الددسن الدفرنسين

http://www.mekshat.com/vb/showthread.php?t=126017

[الربذي]

ثقيل مع السفر
نادر تمشي فيه بالخفيف اذا وقفت بالنفود لانه مايحركه الخفيف وسال مجرب وخصوصا اذا محمل عفش
استعماله زين للي هادي وماهو حار ويبي عزم وفزة

[بومعطش]

الله لايهينكم وبيض الله وجيهكم كلن بإسمه جميع من نور الصفحه والموضوع برده وسلمت أيديكم
ولازالت بإنتظار المزيد

[مساير الليل]

أنا بكلمك عن تجربه معي 2005 سنيتن كامله ماشي 80 ألف

وللمعلوميه من 2000 وفوق وهو بخاخ

السيارهـ في البر ماعليها كلام خذها خوي

نسم وأنسىء الغراز


بنسبه للصرفية البنزين أعبيه 30 ويمشيني 470 إلى 500 ورجلي حارهـ عليه

من ناحية الراحه أفضل من الونيتات الدفرنسين مثل الهايلكس

أنصحك خذهـ وأنت مرتاح سياره ماتعرف الخراب ماشاء الله تبارك الله


وأنا من ناحيتي مركب عليه جنوط باترول 16 وشكل أفضل من الهلل وأخف

في الخط يجيب 160 إلى 170 وعليه شد

إذا بغيت شي أسأل وحنا تحت أوامرك

[عبدالله هدد]

بسم الله الرحمن الرحيم
السلام عليكم
اخوي انا معي ددسن موديل 2007 اخذته ماشيه 35000كيلومتر بسعر 58000الف ريال
استعماله شي رهيبه بالبر وبالديره بس مثل ما ذكرو الاخوان ما تتعدا 160 وبعض الاحيان بالعله تجيب 170
وهي عكوس مو دفرنس وبخاخ مو كبريتر
بالنفود خذ سياره بس عليك بالتنسيم حط هواء الكفرات 20 ولا 15 ودق الدبل الخفيه تمشي زي الحلوه
من ناحيت الجنوط مدري بس اتوقع تركب عليها بس البالون مو كويس عليها يثقله

وبه شغله مروحه شوي الردح والله يهي تردح ردح يعني تناقز مناقز مروح
و المراتب الخلفيه ضيقه بالحيل
وعلى فكره سعر 2008 بالوكاله 70000الف ريال
وشكرا

[محتري السيل]

شف الرابط هذا يمكن يفيدك بالنسبة للجنوط والكفرات والأسعار طبعا تغيرت

http://www.mekshat.com/vb/showthread.php?t=42233

والله انه موتر بر وماعليه كلام --- وقيمته فيه

موتري الآن مخزنة وماشي 17000كم --- وخاص لطلعات البر فقط

وعندك ونيت راعي الونيت ------------

http://www.mekshat.com/vb/showthread.php?t=39391

وبالتوفيق للجميع

[بومعطش]

شكرا لكل من رد على موضوعي وبيض الله وجيهكم ومايامر عليكم عدو
ولازلت بإنتظار بقية الأراء ولاهوب قصور في جاوبوني لكن للفائده
وينكم يارواعي الددسن

[#الفارس#]

هلابك اخوي
الاخوان ما قصرو معك

انا عندي ددسن 2006
الحين ما شية 66 الف والحمد لله زي الحلاوة
من ناحية البر خذ موتر نسم ودق الخفيف وتوكل على الله
انا مركب على الددسن جنوط بترول مقاس 16
الصراحة الجنوط ثقال بلحيل لاكن الموتر يطلع شكلة شي وبلنفود يريحك لانة اعرض من جنط الوكالة

وبلنسبة للبالون نعم يركب لاكن على جنوك الوكالة

واي سوال حاضرين
اخوك الفارس

[بومعطش]

طيب أخوي الفارس هل تنصح بتغير المساعدات ولا مساعدته تقوم بالواجب؟؟
والله لايهينك
ومازلت أطمح بالمزيد من الأراء من أخواني الأعضاء
واللي رد ماقصر وبيض الله وجهه

[sami200]

اخوي اهنيك على الددسن والله سيارة وتتحمل الي مايتحمله الجيب وانا معي 2004 فاكها من الوكاله والحمدلله جدا ممتازة ويمكنك تركب عليها جنوط عريضه وكفرات وحبذا لو كانت هانكون الين شوي والله انا في البداية يوم اشتريتها تعبتني بالرمل لاني ماعرفلها بس الحين طقيت لها كفرات هانكوك وركبت جنوط هايلكس وطلعت مره شكلها يجنن وصارت ترقى الدخان ماشاء الله عليها بس لاتنسى تخفف الهواء واما سعر الي تقول عليها انا اعرف واحد مشتري نفس الموديل بـ 58000 الف ريال ويمدحها بالحيل خفيفه بالديرة وتزبنك بالبر ولا قرقعه ولاهم يحزنون والله يكتب الي فيه الخيرواذا حبيت تشتري الي عندي عشان انا ناوي اشتري جمس حوض وعلى فكره الي عندي تسام 45000 الف ريال بس مركب عليها فرارات ومرايا كهرباء ومحول كهرباء وماطور هوا وتوانك وشنطه وكشاف 70 امبير للطلعات البرية واذا لك نظر راسلني على الخاص ونتفاهم على السعر مو مشكله وبارك الله فيه

[بومعطش]

لاهنت أخوي سامي
والله يبارك لك في موترك أشهد أنه متعوب عليه
بيض الله وجهك
ومازلت أطمح بمزيد من الأراء

[ابومحمد vtc]

اخوي اقرب من الياباني والدفرنسين
(خوي وكاش)
وخاصة الدارج مع الناس
الله يوفق الجميع

[بومعطش]

شاكر لك النصيحه أخوي بومحمد وأنا أشهد أنك صادق
لازلت أطمع بالمزيد من الأراء
وينكم يالذيابه