من الأقوى في الصحراء والمدينه/ الشيروكي أم اللاندكروزر أم الباترول ؟

[أبا مجاهد]

طبعا الموضوع واضح من عنوانه،

الشيروكي كلاسيك 98-2002 (الموديلات الحديثه برأيي ماتصلح)

GX_R 98-2006

الباترول سلق 98-2006

طبعا الذي يرد لابد ان يكون عنده خبره او خلفيه أكيده، وليس تعصب:no2: ..رجائا لكي تصبح المعلومات اكيده ومفيده..
عموما الموضوع ماهو عبث بل اريد ان أشتري سياره..وأريد معرفة الأقوى فقط

تحياتي للجميع..

[gsb]

تبي الأقوى بما أن سؤالك عن الأقوى فهو الباترول سفاريبين السيارات الثلاث
من ناحية المكينة والعزم مكينة 280 حصان وعزم 48 كيلو جرام لكل متر
مكينة 4800 Vtc فتك.

[z a n h o r]

بسم الله نبدا ..

الشيروكي :

نشيط ويطرب لكن خرابته كثيره ويبيلك تاخذ واحد قمه في النظافه وعساك تسلم

الاندكروزر :

قوي ومعروف خاصه اذا جاك الهدد فل كامل م 2005 وانت طالع فهو عز الطلب

الباترول فتك 4800 :

فهذا انا افضله على البقيه لاسباب منها السعر انسب مواصفات حلوه


طبعا انا لو خيرون بين الهدد والباترول بجلس بحتار لكن كلهن مالهن مثيل كل واحد يقول انا احسن من الثاني


وبالنسبه للقوه بالنفود والقار فانا افضل الباترول من واقع مشاهده

[الدحبول]

شروكي

يليه


باترول


يليه


لاندكروزر



هذى في العزم + تسارع

[راعي طويلات]

طبعا الموضوع واضح من عنوانه،



الشيروكي كلاسيك 98-2002 (الموديلات الحديثه برأيي ماتصلح)


GX_R 98-2006


الباترول سلق 98-2006


طبعا الذي يرد لابد ان يكون عنده خبره او خلفيه أكيده، وليس تعصب:no2: ..رجائا لكي تصبح المعلومات اكيده ومفيده..
عموما الموضوع ماهو عبث بل اريد ان أشتري سياره..وأريد معرفة الأقوى فقط



تحياتي للجميع..


أنت تبي القوة من اي ناحيه (التحمل_السرعة_النشاط) كل موتر منهم له مزايا وله عيوب
من ناحية قوة العزم والنشاط في الطعوس والخفة والاقتصاد في صرفية البنزين فرقم واحد الشروكي وخصوصا السبورت والكلاسيك وطبعا هذي الميزه بحكم صغر حجمه ويعاب على الشروكي حرارته ولها حل أما عن قطع الغيار فكل اسعار قطع غيار الجيوب غاليه والعيب الثاني كثره عواكسيه يعني لازم تطيح لك في شيء نظيف والا بتحسف أنك خذت شروكي

يجي بعده الباترول وطبعا انت ذكرت السلق الي يجي بمكينة 4500 فمكينتة ضعيفه مقارنه بالفتك 4800 ولكنه يتميز بقوة محركاته ودبلاته ودفرنساته ويبي له بعض التعديلات ويكون نشيط وطبعا الباترول يتميز عن الشروكي أنه أقل خرابات

يجي الجي اكس ار رقم 3 واذا كنت بتاخذه وتبي نشاطه مقبول لاتاخذ التماتيك لان عزم سقيم بالحيل من واقع تجربه وطبعا الشروكي والباترول يتغلبون على الجي اكس ار بالنفود والموتر بشكل عام عملي وصبور


ولاحظ أن فيه فرق بين أسعار السيارات المذكوره

[ردن]

من واقع تجربه اخوي
4سنوات وانا اقنص على
الاندكروزر Gxr 2000
وكلفتني صيانته كل المده هذه
بس 4000 ريال
******
وهو شيك في يدك

وان ماجازلك تلقى الزبون على طول

**********

الله يوفق الجميع

[333]

اقولك شي غير الشاص لا تاخذ

[لن أمل من العطاء]

والله كلهم ما عليهم

باترول 4800

[أبا مجاهد]

أشكر جميع الأخوان الذين ردوا كلن باسمه

وعيني على الشيروكي والله العالم

[لكزس شاص]

بسم الله الرحمن الرحيم
أحيي جميع الإخوة أعضاء المنتدى وأخص منهم المشاركين في هذا الموضوع، الذي افتتح به مشاركاتي في هذا المنتدى المفيد والممتع، وأرجو أن أقدم لإخواني المشاركين الفائدة والمعلومة الصحيحة دائماً إن شاء الله.

بالنسبة للسؤال المطروح أي السيارات الثلاث أفضل أو أقوى في الصحراء وفي المدينة، فيبدوا أن المسألة تحتاج إلى نظر في مبدأ الاستخدام.

سأتكلم عن الصحراء فقط، فكلنا يعلم أن الصحراء، حيث لا مكان لورش الإصلاح أو الإسعاف أو نجدة العابرين، فأنت وحدك أمام سيارتك وسط الفراغ.

ومن هنا دأب المخططون لارتياد الصحراء بشكل احترافي على اختيار السيارات الأكثر اعتمادية، والأقل أعطالاً في المقام الأول. وفي المقام الثاني نظروا إلى القوة في الأداء، ثم المواصفات والمحتويات والإمكانات والمزايا والسعة في المقام الأخير.

وعلى هذا نستطيع أن نجمل القول أن سيارات تويوتا ذات الدفع الرباعي تتصدر قائمة السيارات العالمية من حيث جودتها وقدرتها على تحمل مصاعب الطريق، وليس الأداء ولا القوة.
أما الباترول موضوع المقارنة فهو في المرتبة الثانية من حيث الجودة والقدرة على التحمل وقلة الأعطال. وفي المرتبة الأولى من حيث القدرة على الاجتياز، والأداء العالي. وليس القوة والسرعة.
أمال الشيروكي وهو الثالث في السؤال، فنستطيع أن نقول أنه الأسرع في الرمال كميزة وحيدة له عن اللاندكروزر والباترول.
أما موضوع السيارة الأقوى في عالم الدفع الرباعي فالمجال مفتوح خارج إطار تويوتا ونيسان، ولكن هل الأداء والثبات والقدرة على الاجتياز وتكرار الاجتياز بمعنى جودة التحمل وقلة الأعطال، مفتوح أيضاً خارج هاتين الشركتين اليابانيتين؟
أشك حالياً في ذلك، في سوق السيارات المصنعة بشكل تجاري تقليدي.

[التمَاري]

أشكر جميع الأخوان الذين ردوا كلن باسمه

وعيني على الشيروكي والله العالم



من ناحيه القوه.... فهي من صالح الشروكي وبدون اي مقارنه

..وتوكل على الله وحط عينك على النظيف ..
..والله يوفقك..

,,
,,

[شاص1988]

مع اترامي لتيوتا واشروكي ان اقو النيسان لايعلى عليه قوه وعزع وممشا وخاصتن فتك4800 هذ رفيق دربي في المقناص من صقر عمري وانو صقار واقنص عليه ولا فل اح كنق الصحري لا وابشرك بعد مهوب مثل اشروكي والجيات عكس قدم هاذ دفرنش قدام

[ناصح]

مثل هذه المواضيع لا ينتهي الجدال فيها ابدا

وسوف تفتح الكثير من الصفحات والكل مقتنع برأيه ..!!

[راعي طويلات]

مع اترامي لتيوتا واشروكي ان اقو النيسان لايعلى عليه قوه وعزع وممشا وخاصتن فتك4800 هذ رفيق دربي في المقناص من صقر عمري وانو صقار واقنص عليه ولا فل اح كنق الصحري لا وابشرك بعد مهوب مثل اشروكي والجيات عكس قدم هاذ دفرنش قدام

أخوي الرجال مادخل الفتك 4800VTC من ضمن الخيارات قال سلق من 98 إلى 2006
والا الفتك ما يبي نشده شيخ عنه
ومن ناحيتي أفضل النيسان والتويوتا على الشروكي ولكن الرجال طلب مقارنه وانا عطيته رأيي

[مساير الليل]

النيسان وبس

[أبا مجاهد]

جميع من رد له الشكر الجزيل وكلن باسمه

[مخاوي الذيابه]

ابا مجاهد ...

لا تدور غير النيسان ...

[راعى الاخضر]

:) السلام عليكم ورحمة الله وبركاته .
1 إن كنت تنظر للقوه والاندفاع الاسرع فهو الشروكى بالقائمه الاولى .
2 النيسان لا يعلى عليه بعد الشروكى
3 اما اللاندكروزر فهو شخصيه فقط وبنفس الوقت شيك الزبون جاهز على طول

اما بالنسبه فالمتعه والخفه للشروكى فهو قوى وصبور وخفيف وسريع الاندفاع وتعطيه كل الثقه بعد الله فى أى مكان من الصحراء .
والسعر لا يقارن بين هذه السيارات الثلاث والله يوفق الجميع لما يحب ويرضاه.


وصلى الله على نبينا محمد

[راعي الطلعات]

اللاند كروزر و الباترول كلهم عندي وافين

ويكفي انها يابانيات

بالتوفيق

[Ahmed Mundi]

بصراحة مقارنة شوي صعبه ..

الشروكي - من ناحية العزم ممتاز و صرف البنزين زين وقطع الغيار رخيصة ومتوفرة بكل مكان لكن اتعب عالنظيف والا راح تتحسف انك فكرت فيه واذا عالحرارة ترى لها ألف حل سهالات واللي يقول لك خرابات قوله استريح انا عندي شروكي مديل 96 وجاااااالده جلد وسفرات وقنص - بالعربي ما يخرب فيه الا اللي انت خربته هذا اللي قاعد يصير معاي انا - لأن استعمالي للسيارة (تكسيييييير) - وان صحك بالمديلات القديمة من 96 وانت نازل هو اقوى واجمد من ال 97 وبعده - واذا معزم على ال97 وفوق لا تاخذ غير 2001 وهو اخر مديل قبل الليبرتي .. هذي المعلومات اللي عندي عن الشروكي - وان شاء الله اكون قدمت لك معلومه ..

السفاري : زين وعزمة ممتااااز لكن صرف البنزين مو طبيعي - واذا تبي تاخذ عليك بالفتك 4800 سي سي واهم شي يكون فيه دف لوك ( يعني اذا شغلت الدبل يشتغلون 4 تواير مع بعض مو تاير ورا وتاير جدام )

اللاند : طبعا لا يعلى عليه من كل النواحي للبر وللديره وللسفر وللقنص ولكل شي حتى بوقت البيع ما يزعلك وطبعا احلى مديل 2007 بلا منازع واهم شي يكون فيه دف لوك مثل ما قلت لك عالسفاري ..

الكلام :-

الشروكي : عن واقع تجربة واستعمله لكل شي وطبعا عندي سيارة غيره حق الصيف :)

السفاري : عن واقع مشاهدة وجمع معلومات وعند الربع ..

اللاند: هم عن واقع مشاهدة والعالم كله يرغبه وعند الربع بعد ..

[طحنون]

انت تكلمت عن القوه بدون تفاصيل
على طول الكلام راح يتوجهه للشروكي والسبب انه لا يوجد وجهه مقارنه من قوه المحركات يعني القوه الفعليه للسياره تعطيك اللي تبي
يعني لو نتكلم عن الشروكي راح تتعب لان عليه محرك هيمي 8 سلندر اكثر من 355 حصان بدون تزويد
ومعروف الدفرنشات والقيور في الشروكي
الشروكي ياكل الطعوس اكل وفي الخط لا الكروزر ولا الباترول ماياكل عيش معه حتى لو يسوقه واحد
غشيم فما بالك لو يسوقه واحد سواق وراعي طاره
انا ارشح الشروكي رقم واحد
فقط للقوه والنشاط
.................................................. .......................................
اجابتي صريحه وبدون تعصب
لاني من عشاق النيسان
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,
لاكن الشروكي معروف خرابات ووكيله التعبان وقطع غياره الغالي والغير متوفر
والسياره ماعليها كلام
.................................................. .................
فيه مقطع شايفه اظن انه في الامارات
جيب شروكي
يمشي مع بي ام دبليو اكثر من 200 وطلع على راعي البي ام
وفيه مقطع لنفس السياره يطلع طعس مقارب لتل مرعب كل السيارات تراجعت وهو الشروكي اللي طلع
كنه يمشي على الزفلت
طبعا السياره ستاندر بدون اي تزويد

[صعافيق 911]

الشيروكي ممتاز بس عيبه لو يعلمك قبل يخرب ...؟؟؟؟؟,,,’’’’
الباترول ممتاز وراكد يعني واحد وسيع صدر راعي مكشات وتمشي .....
هدد ممتاز حق ركاده وخبال كلهن ..؟؟,,

[مدمن فتك]

الشباب خلطوا بالباترول والمقصود الباترول 4500 مهو الفتك
بالنسبه للقوه :
الشروكي اولا
ثم اللاند كروزر
ثم الباترول
لكن لو كان الفتك موجود على قولتنا مايبيلها نشدة مطوع الفتك فتاك

[شاص2007]

الشروكي اقوى شي بلا منازع ويطربك طرب بالنفود ماهو صاحي لدرجة انه يخلي الغشيم سواق بس انه يخرب واجد وبس انتها كلامه رحمه الله

[الاندكروزر123]

الاندكروزر لانه اقوى واحسن وافضل في كل شي

[fj44]

الشروكي تمسي ولافيه شي وتصبح وتلقاه عطلان
البترول عيبه الهربده ولا يمسك سعره
الاندكروزر حلوب وركوب مايلحقه كلاااام

[الغنادير]

بالنسبة للسيارة المثالية فهي الفتك باترول4800 وبلا منازع من حيث الخدمة والقيمة والتكلفة عند الصيانة اضافة الى الجودة يعيب الباترول شي واحد وهذا العيب يشمل كل سيارات النيسان وهو قلة جودة البدي وهو تفكك السيارة وكثرة الاصوات فيها مع انه يتمتع بمحركات جودتها عالية

[برق الشمال AM]

بلا منازع الباترول اقوى

[ثاقب]

معقوله؟؟ ماحصل هوشه؟؟؟؟؟:p والله هاذي نقله نوعيه في الرقي الفكري لدى الشباب والحمدلله ,ادام الله الود
بينكم في ظل النقاش الحر الخالي من التعصب

[التعـ King ـديل]

من واقع تجربه مع النيسان والتويوتا اقولك الكفه ترجح للنيسان

اما الشروكي مع الاسف مالي علم فيه

[سوبر VTC]

الباترول اقوى
ايضا قيره حاصل على افضل قير رياضي على مستوى العالم

الجيكسار ثقيل نوعا ما 6سلندر خصوصا
اذا كان تماتيك

الشيروكي نشيط في حال كونه قير عادي :good:
لان وزنه خفيف و قيره يمد بالاول و الثاني :good:

لو خيرون بموتر
اختار الباترول ثم الشيروكي

موفق

[بدوي جنوبي]

انت تكلمت عن القوه بدون تفاصيل
على طول الكلام راح يتوجهه للشروكي د

ابا مجاهد انت سئلت عن الاقوى فقط

اكيد مع رد اخى طحنون
وهو الشروكى بلا منازع
والكلام هذا عن تجربه

تقبل ردى

بالتوفيق

[سعد الحدب]

والله ياخي انا حسب نظري المتواضع وحسب تجربة .

نيسان باترول لا يعلى عليــــــــــــه

بعد ذلك يجي التايوتا..

[باسم الرياض]

الافضل بالنفوود هو الشيروكي طبعا

موديل 2000 او 2001 طيب بالحيل
الشيروكي للبر واي مكان يتحمل

[مقلع الرمث]

والله اانا اقول تحمل الباترول لانه الحين مايخلاء شارع الا فيه كم جيب نيسان باترول

اما الاند فقليل وليس لعدم تحمله لكن لكثر دراهمه وعندك المجتمع اكثرهم من الفئه المتوسطه وانت امدحدر يعني

اللي فوق مايشوف لا لاند ولا باترول ولا شروكي

اما الشروكي فنادر لانه معروف بكثر الخراب وفيه مثل عندنا يقولك ( الشروكي شرن امكوكي )

والاي يبي الترزر يركب لا ند

واللي يبي الكد باترول

وسلامتكم

[خالد الهتيمي]

كل الكلام الي ذكروه الشباب صحيح اخوي...

وانا عن تجربه موتري 98 سبورت وتوماتيك عزمه ما شا ءالله واستعماله زين بس احرص على النظيف وبوريك موتري واذكرو الله..

تفضل... عشانك والموجودين يا بعدي..


http://www.tqatar.com/vb/uploaded/29_01258021236.jpg

[HAS5SAN]

شوف واحكم انت بنفسك
وماعليك من كثر الحكي
http://www.youtube.com/watch?v=2MHlQmJA6IY&feature=related

[باسم الرياض]

شوف واحكم انت بنفسك
وماعليك من كثر الحكي
http://www.youtube.com/watch?v=2MHlQmJA6IY&feature=related


انشهد اللاندكروزر ماله مثيل
لكن كل موتر له حقه