من واقع تجربتي مع الكفرات العريضة

[جاروود]

بسم الله الرحمن الرحيم

ابدش في الموضوع واقولكم قصتي على طول في شهر 9 من العام الماضي شريت هايلكس 2003 دفرنسين
واول ماشريته وزي منتوعرفين ان كفراته صغارر مرة 205 وعلى طول من باتسر شريت كفرات عراض خذيت مقاس 265 / 75 دنلوب المعروف عن كفرات دنلوب انهن ثقال المهم اني ركبت الكفرات
وخلال قيادتي من اول اسبوع حسيت بشي غريب وهو ان الموتر اذا بغيت تقومه لازم تحنه ولا مايقوم كنك ساحب شي طبع مهوب ساحب شي ثقيل بس انه لازم تصير حاط رجلك على الدعسه قبل ماترف رجلك من اكلتش ولا تبي ترج او تطقط خفيف كنك ماقومت الموتر زين ( شي غير ملاحض مره لاكن انا لاحضته ) المهم قلت في نفس يمكن عشات الموتر اربع سرندل ودبل يبيله حنه زود المهم والنمره الثانيه مافي امل تقوم الموتر بليالله تقومه
اما في النفود فهي كويسه لاكن إذا إذ بغيت تراقي او اي شي في النفود الموتر يبي له حنه بلحاله فما بالك في الرمل والنمرة الثانية مهيب شي في الرمل يطيح عزمة على طول المهم وانا دايم اروح لنفود بعد مامشى الموتر 10.000 كيلو احترق الكلتش رحت الوكالة وشبيت في مندوبهم والصيانة وقالو الكلتش مايغطيه الضمان المهم بعد الطقاق صلحوه لي على حسابهم وبعدها جتني ضرووف ولا طلعت لنفود واجد المهم في هاذي السنه في موسم الضبان رحت لصمان ومع المطارد انشق واحد من الكفرات ويوم بغي اشيله عرفت السبب لقيته ثقيل مره يعجز الي مهوب نشيط انه يرفعه في الصندوق المهم من يوم رحت لرياض رحت للغرابي ومريت ولقيت هايلكس مثلي عليه جنوط vxr94 المهم وقفته وسمت الجنوط وشريتها ورحت للغرابي وشريت كفرت وكنت حريص على الخف فشريت تويو 235/75 /15 مع العلم انه كان جنطي الأأول 16 المهم ومن يوم ركبته وان ملاحض الفرق الموتر من يوم ارفع رجلي على الكلتش يمشي مايحتاج تحنه ويقوم بالثاني وهو اول مايقوم بالثاني المهم ان الموتر صار أحسن وصار يرقا نفود مايرقاها من أول ولهذا ارجو من الجميع الأستفاده من هاذه القصة وعدم تركيب كفرات اعرض بكثر من مقاس الوكالة هاذه قصتي مع العلم ان الموتر ماشي الحين 46.000 ولبه ازين منه







ولاكن في سؤال احتمال لروح لربع الخالي في العيد او بعده ودي اركب كفرات رمليه شاهين بس مالقيت المقاس الجيد اصغر شي لقيته 275/65 /15 واخاف ارجع لنفس المشكلة ودي وش افضل مقاس لنوع سيارتي مع مراعات القصة السابقة

وفي الختام احلى سلام لجميع اعضاء مكشات
وكل عام وانتم بخير

[الأشهـــــب]

الأخ الفاضل : جارود .
مشكور يالغالي على هذا التنبيه الهام ، وماقصرت بارك الله فيك .

أخي الكريم بالنسبة لسؤاالك وإستفسارك عن الكفرات ، فإن هذا الموضوع قد أشبع طرحاً ونقاشاً وتعليقاً .

فكل الي عليك وانا أخوك إنك تعمل لك بحث عن كلمة( كفرات ) وأبشر بالمواضيع الي تسرك وتفيدك إن شاء الله .

تحياتي لك يالغالي ..................

[برنو]

السلام عليكم و عيدكم مبارك

عندي هايلكس دفرنسين و على قولتك كفراته صغار و صخرية و حست في الغرابي و غيره على كفرات بالون
جنوط 16 ما لقيت الا كبار مره حول المقاس اللي قلت، ترفعه أكثر و تثقل عليه و 4 سلندر ما يتحملها
أصغر ما لقيت من بالون دنلوب 235/85/16 رملي قيمته 340 ريال أو سيموتومو SC705 اقل سعر و
اصغر شئ بسيط. لكن تراها ترفع الموتور حوالي 10 سم.
فيه كفرات يمدحونها واجد و مها مقاسات مناسبة و احسن ما فيها ان جنوبها 3 غاط من غودرتش
BF Goodrich All Terrain TA KO
http://www.bfgoodrichtires.com/images/catalog/tires/all_terrain_large.jpg

أو

Baja T/A وهذا لسباقات البر
http://www.bfgoodrichtires.com/images/catalog/tires/baja_large.jpg

ان شاء الله بعد العيد ادور على الوكيل و اشوف اذا جاب هالكفرات

تحياتي

[جاروود]

بسم الله الرحمن الرحيم

كل عام وانتم بخير جميعا
اود ان اشكرك أخوي يالأشهب وانت ياخوي البرنو على اهتمامك بالموضوع
البرنو
ودي اقولك اني غيرت مقاس جنوطي من 16 إلى 15 جنوط vxr94
ولا لقيت مقاس اصغر من 275\65

[arabdrh]

ياجماعه انا عندي لاندكروزر 2003 جي اكس آر3 خليجي والجنط 17 والسياره ماهي مريحتني بالبر لأن الأستبنه (السبير) نازل واجد وأي رفاعه يحك السبير لانه نازل تحت الدفرنش بشوي وهالوضع اتعبني بحيث اني اطلع البر كأني بتكسي ماهو بجيب ............ تكفون انصحوني ....

[برنو]

الاخ جاروود

شكيت على على الشاهين مقاس 275/65/15 و لقيته ما يفرق في الطول عن مقاس كفراتك الحين لكنه اعرض وصراحة شكلي بأركبها مع جنوط 15 على الهيلكس اللي عندي

و حسب علمي ان طول الكفر اذا زاد هو المشكلة لانه على قولتك يثقل السيارة مو لانه أثقل لكن لان قطر
الكفر أكبر و الكفر فيزيائيا جزء من عدة تروس توصل دورة المكينة للأرض، لو زاد قطر أي ترس منهم
مثلا الكفرات او بنيون، يزيد الحمل على المكينة عشان تعوض الزيادة في قطر الترس، عشان كذا في حالة
تركيب كفرات زايدة مرة في الطول لا زم تغير البنيون لمقاس أصغر عشان تكون نتيجة التروس نقل الحركة
بما فيها الكفرات مقاربة للاول و لا يكون فيه حمل على المكينة

أما زيادة العرض، اذا ركب الكفر بدون ما يحك في الرفرف او الصدام، فأعتقد انه يأثر على الطارة و يثقلها اذا
كانت عايدي و يأثر على طرمبة الدركسون اذا كانت هواء، لكن ما أظن انه يعدمها لكن ممكن يقصر من
عمرها شوي.

الاخ arabdrh

ممكن تركب الاستبنة على الباب الخلفي، لكن اذا ما كنت غلطان الاصطبات الخلفية الزايدة اللي على الباب
لازم تنشال

تحياتي

[فـ(الجـوف)ـتى]

مشكور على المعلومات الطيبه

جزاكم الله خير 0

[مسري الشاص]

السلام عليكم

ذكرت ان الموتر ما يقوم بسرعه من الكفر

هذا دلع يسمونه هذا من الافين وفوق لا ثقل الموتر

مثل ما قلت مسه بالثاني خله لين ما يستحق الثالث الا كد

ضهر بستمه مع جنبه لين تقطع المكينه

بعدين يستوي :good:

:D