عزمنا وعلى الله توكلنا (إستشارة)

[قرم العرض]

السلام عليكم أعضاء منتدانا الغالي ورحمة الله وبركاته



^^^
^^
^


نويت بإذن الله أشتري باترول 2008 سفاري (1) ودي تنصحوني أخذ تماتيك أو عايدي وش اللون الحلو في البيع والماشي في السوق
وهل فيه خرابات مصنعية معروفة وهل إختياري صحيح ولا لا
ولا أحد يقولي لاند لأنه ماهوب غالي أبد :d
والدراهم على قدي

[الدحبول]

إختيار موفق وبصراحة إحسنت الختيار
ولاند صار في العلالي
القير إعتبرها حرية شخصية
إنا إفضل العادي على سفاري وخصوص 1
الون أبيض لؤلؤي مشاء الله
مبروك مقدما

[ابوعقل]

توكل على الله

اذا فيه دوفليك

[المميـز]

السفاري 1 بدون دف لوك

واذا تبي موتر لك وللبيع خذ لؤلؤي قير عادي

ومبروووووووووك مقدما

ولا تنسى الاستخاره بعد الاستشاره

[الربذي]

خذ قير عادي اذا انك ــــــــــــــــــــــــــــــــ
راعي بر كثير
تحب جر المغرز ولا الناشب بالطين ويعورك قلبك لو ماتساعده لان التل يفرط القير التماتيك وحصل مع واحد
خذ تماتيك اذا ــــــــــــــــــــــــــــ
انك راعي مدينه 0
ماتحب مساعده احد اثنا الخروج وقت الامطار وغيرها 0
مبروك مقدما اللون طبعا ابيض ميتاليك البعض يسميه ثلجي او للولوي وكلهن المقصود واحد 0

[ابو عمر النوح]

مساك الله بالخير أخوي القرم ، توكل على الله و اشتر اللون اللؤلؤي و إن كانك من سكان الرياض أنصحك تاخذ اوتوماتك لأني جربت العادي سنين طويلة و جربت الأوتوماتيك و لاحظت الفرق شاسع بينهما ، و على فكرة ترى الأوتوماتيك تغير ما هوب مثل أول الآن صارت أغلب السيارات توماتيك .

[قرم العرض]

جزاكم الله عني كل خير ياغالين كل واحد باسمه والله يوفقنا لما فيه خير والله إني مستانس من ها الدردود الطيبة ومن ناس طيبين وشاكر لكم مقدما طمنتوني الله يجزاكم خير كنت متخوف من التوماتيك إحسب إنه غثا وإثر دوا

[راعي طويلات]

وعليكم السلام ورحمه الله وبركاته
اختيارك في محله بالنسبة للباترول وعن سؤالك عن القير العادي أو الاتوماتيك مثل ماقالوا الشباب هذا الشيء راجع لك وطبيعة استخدامك للموتر يعني اذا أنت راعي بر ونفود وراعي حلال وتبي تسحب بالموتر مثلا تجر لك قلص او سياره مغرزه او او او... فالعادي أفضل وعلى فكرة من تجربه للفتك العادي نفسه بالنمره قصير يعني تفته قريبه وضغط المكينة عالي مثلا اذا مشيت 140 بالعادي يكون ضغط المكينة على 3.5 بينما في التماتيك أو الاختياري يكون على 3 والتماتيك له ميزه أنه خمس تعشقيات تماتيك و5 عادي وهو من أفضل القيور في الدفع الرباعي والتماتيك أريح وأرغب في البيع واللون لاتتعدى الأبيض الؤلؤي
أتمنى أني أفدتك بالتوفيق
ومبروك مقدما والله يبارك لك في الموتر

[شاص1988]

كانك طعتني يابو الشباب انيسان ابعد بعد اسما من الارض عن التماتيك لانه قير فاشل على شركة نيسان اخذ قير عادي وعشق اراحه تبيه في اطعوس يمشي تبيه في ديره يمشي وبيني وبينك اشوانك اخترت نيسان لانه ابدع بمعنى الكلمه تبيه في اطعوس يطرب ويمشي وتبيه في ديره يمشي وسلامتك

[باترول للأبد]

وعليكم السلام ورحمة الله وبركاته

على البر كه مقدما واحسنت الأختيار والله

واللون اللي أشوفه حلو الفضي والقير خذ تماتيك لأنه أريح وخاصه أن التماتيك يجي معه عادي 5 نمر

[سطام vip]

الله يوفقك ويكتب لك الي فيه الخير

ومبروووووووك مقدماً

والله يعطيك خيره ويكفيك شره

[راعي طويلات]

كانك طعتني يابو الشباب انيسان ابعد بعد اسما من الارض عن التماتيك لانه قير فاشل على شركة نيسان اخذ قير عادي وعشق اراحه تبيه في اطعوس يمشي تبيه في ديره يمشي وبيني وبينك اشوانك اخترت نيسان لانه ابدع بمعنى الكلمه تبيه في اطعوس يطرب ويمشي وتبيه في ديره يمشي وسلامتك

أخوي كيف تقول أنه فاشل هل قد جربته ؟ لاتحكم على شيء مجرد أنك سمعته من وكاله يقولون وبعدين أول مره أدري أن الراحه في العادي ؟؟؟؟
كان معي فتك عادي وبعته وشريت تماتيك ومن 4 سنين الى يومك مافيه الا الزين ولله الحمد وماخليت محل مارحت فيه لابر ولاديره الدرب الي تبيه بيوديك وصاحب الموضوع حر في اختياره

[هويدي]

زين ما اخترت والله يطعمك من خيره ويكفيك شره مقدماً

بالنسبه للون اللؤلؤي حلو ولا يتوصخ زي الالوان الغامقه وحتى المخوش ما تبان فيه

ولو ما لقيت الفضي حلو


ولو ابشري اخذت قير عادي اكثر تحمل وانشط

[.أبوعبدالرحمن]

اخوي الغالي قرم العرض


بالنسبة انك اذا كنت ساكن في الرياض او في الدمام او في جدة فعليك بالتماتيك

ومعروف ان التماتيك في النيسان ما شاء الله عزمه جدا قوي ايضا يكون تماتيك

وعايدي من ناحية اللون اشوف ان عندك اللون اللؤلؤي والذهبي او الذهبي المحرووق( البني )

وعندك ايضا كحلي و الوان الفتك اغلبها حلوة والله يهنيك بالموتر ويعطيك خيره ويكفيك شره

[طلا11ل]

اختيار موفق اخوي

انا توني شاري سفاري وتماتيك والي يقولك عادي تراه متعب بالتعشيق والديره التماتيك حطه ب الدي وامش وانس التعشيق وفوق ذلك يجي قيرين ( اول سيارة اشريها تماتيك وتحسفت اني مااخذته من زمان لاني لقيت الراحه ) وماخليت مكان مارحت فيه نفود وحجرة ولا فيه اي مشاكل وعزمه ماعليه كلام وبالنسبة للون
1- لؤلؤي
2- فضي
والله يوفقك بشريتك ويعطيك خيره ويكفيك شره

[نفس السحاب]

خذ اوتو

عادي مع تماتيك

[alkongrs]

الون لؤلؤي ومبروك مقدماً والله يطعمك من خيره ويكفيك شره

[مناضل]

خذ قير عادي اذا انك طلاعتك للبر كثيره
خذ تماتيك اذا كنت راعي ديرة وطلاعتك للبر خفيفة

[ذهال]

وعليكم السلام ورحمه الله وبركاته

اختيارك في محله بالنسبة للباترول وعن سؤالك عن القير العادي أو الاتوماتيك مثل ماقالوا الشباب هذا الشيء راجع لك وطبيعة استخدامك

نعم نعم نعم

[ابرق نثيل]

مبروك مقدماً ونعم الاختيار والله يوفقك فيه

خذه من الموزعين ولاتاخذ من صالات الوكيل مباشره اللي في المعارض يشملها الخصومات

تاخذه بارخص و اللي بالمعارض او في الصالات تابعه للحمراني ومافي فرررق وهو يحدد لهم سعر البيع


سفاري واحد لدي الوكيل 131 الف
سفاري واحد لدى الموزع 127 او 129 الف

سفاري 2 في الصاله 141 الف
سفاري 2 لدى الموزع 138 الف


هذا بالنسبة للسفاري

وبالنسبه للمفخره 2008 فهناك لعبة تسويقيه من ابو جميل والموزعين للاسف ويكرتون الناس مثل السلام عليكم

انا كنت بخذ واحد لكن يوم شفت الكرتنه يعني صار بيني وبين اني اغدي كرتون خمسه سنتي :) لو اخذته بذاك السعر

وحركات المصخره والحجز بعد كم شهر ولي وصلت رفعو السعر عليك بزود 5000 ريال

او تحصل الموتر لدى الوكيل ب 154الف جي اكس 1 ولكن غير متوفر وبالحجز

وفي المعارض متوفرو يضربونك بالسعر مع انها تابعه للوكيل ب 162 الف
واذا رحت البازعي قالك الجنوط والمرايات والدعسات والاشارات ياباني اصلي وب 170 الف

لذلك خذلك سفاري ولا يكرتنونك الرجاجيل :)

[المحذوف]

اببيي لا تاخذ الا قير عادي كانك راعي مكدة فهو اقل خراب واقوى واصبر
اما اللون هذا راجع لك 0

[محمد عسكر]

ونعم الاختيار بس انا اشوف العادي احسن
والله يوفقك ومبروك مقدما

[أبو ياسر]

اخوي استخر اهم شي والله ييسرلك امرك

اخوي الباترول بالذات القير التتربونك الي هو تماتيك وعادي بنفس الوقت فهو متطور جداً وانصحك فيه

اللون اللؤلؤي رائع يليه الفضي

والله يكتب لي ولك ولجميع المسلمين كل خير

[ابن صقيه]

إذا تقدر تصبر 4 شهور وتاخذ لك الشكل الجديد ( حسب ماهو في موقع نيسان )
أفضلك من وحهة نظري

[شهوان]

انا من رأي ابن صقيه اذا انت تقدر تصبر حتر رمضان لانه على ما اعتقد هو موعد نزول الموديل الجديد في كل سنه تقريباً وأسمع انه يبي يتغير هذا من ناحية .
اما اذا كنت جازم على الشراء فنصيحه عليك بالتماتيك وأسأل اللي جربوه . وأسأل عن الاتماتيك عند البيع أو العادي وتقنع .
اما اللون ارى ان اللؤلؤي بعده النيكل ولك حريت الاختيار .

وتقبل مروري .
شهوان

[عصا الترحال]

الله يوفقك للشرية المباركة

[بن داود]

الف الف مبرووووووووووووووك