أماكن الغدران وتجمع المياه بالقرب من الرياض ؟؟؟

[صالح الشايع]

بسم الله الرحمن الرحيم

الاخوة الاعضاء الكرام
السلام عليكم
مع نزول الامطار الاسبوع الماضي لدي وغيري من سكان الرياض سؤال

وهو أماكن الغدران وتجمع المياه بالقرب من الرياض ؟؟؟

اين هي وماهو اقربها هل بقي منها شئ للان ؟؟

هذا السؤال الاول

اما الثاني

وين اقرب مكان فيه رمال نظيفه وتصليح لكشته خفيفه بالقرب من الرياض ؟

أثقلت عليكم بالسؤال ولكن طمعآ في كرم تجاوب أعضاء هذا المنتدى الاخوي

طرحت هذا الاسئلة 0

لكشته خفيفة وسريعة بالقرب من الرياض للاستفادة من خبرة الاخوة 0

[راع الصمان]

هلا بك اخوي نخش بالموضوع على طول:
1-اقرب غدران مفرق بويب(الرمحيه) تخلي محطه خزام يسارك وتروح يمين وتستمر 10-20 كيلو
ممكن تحصل غدران صغيره يعني تلحق ولا ما تلحق لكن بعد الطلعه فيه غدران واكثرها يسار الخط عاد انت ورغبتك كل ما تروح قدام اكثر وازين فيه شعبان تقطع الخط حلوه وفيها ضلال وغدران الىتاصل الرمحيه
2- الرميلات عندك الثمامه من محطه خزام الى مفرق الطوقي بس ادخل ورى العرق وكل ما تبعد انظف وازين بس(جوا)
وسلامك وكشته سعيدة.

[دغيم1]

بسم الله الرحمن الرحيم
الاخوة الاعضاء الكرام
السلام عليكم
مع نزول الامطار الاسبوع الماضي لدي وغيري من سكان الرياض سؤال
وهو أماكن الغدران وتجمع المياه بالقرب من الرياض ؟؟؟
اين هي وماهو اقربها هل بقي منها شئ للان ؟؟
هذا السؤال الاول
اما الثاني
وين اقرب مكان فيه رمال نظيفه وتصليح لكشته خفيفه بالقرب من الرياض ؟
أثقلت عليكم بالسؤال ولكن طمعآ في كرم تجاوب أعضاء هذا المنتدى الاخوي
طرحت هذا الاسئلة 0
لكشته خفيفة وسريعة بالقرب من الرياض للاستفادة من خبرة الاخوة 0

عليكم السلام ورحمة الله وبركاته
حياك الله أخي الكريم
بالنسبة لسؤالك الأول فالإجابة عليه :
*طريق القصيم - هناك اماكن كثيرة على الطريق وقريبة تجد فيها غدران الماء
كذلك طريق صلبوخ .
* طريق الرمحية قبل طلعة بويب
وكذلك قبل طلعة الطوقي طريق الثمامة
اما بالنسبة لسؤالك الثاني فالإجابة عليه :
* طريق الخرج - مفرق الزويليات .
* طريق المزاحمية - الخرارة .
* طريق نساح - بالقرب من روضة المحلية .
* طريق الحائر - قبل نهاية الطريق - بالقرب من وادي نساج
*الثمامة - قبل ملف الطوقي - او بعده امتداد طريق المجمعة القديم .
* بالقرب من هجرة الأوسط - نساح -
تمنياتي لكم برحلة سعيدة وآمنه
تقبل تحياتي

[عاشق نجد]

حياك الله اخوي صالح

بالنسبة للغدران ، فأقرب شي اطلع للعيينة .

بعد ما تتعدى كبرى العمارية وانت تبدا تشوف المناقع يمين ويسار ، وكلما تقدمت جهة العيينة بتشوف المياه اكثر وخصوصاً اول العيينة وبعد العيينة جهة الحيسية .

يوم الجمعة الماضي كنت في الحيسية ، والمغرب ضربتنا سحابة قوية على الحيسية والعيينة واتوقع انا كثير من الغدران زادت كمية المياه فيها .

بالتوفيق وتقبل تحياتي .

[صقر ولد صقار]

بالنسبة عن الغدران والله مادري هل باقي شي ولا نشف
بالنسبة للرمال النظيفة عندك مكانين غرب الرياض واحد قريب وواحد بعيد القريب حفيرة نساح والبعيد الخرارة وكلها جميلة وهادية .

[صالح الشايع]

الاخوة الكرام

راعي الصمان

دغيم1

عاشق نجد

صقر ولد صقار

ماقصرتوا والله

ومشاركات وافيه وكافيه

وهذا العشم فيكم والنعم والله في راعين مكشات 0

والخيار وقع على الاقرب الحسيه او طريق القصيم

وعلى الله نلحق على شئ من مناقع السيل


http://www.arb-up.com/files/arb-up-2008-1/FOc19360.gifhttp://www.arb-up.com/files/arb-up-2008-1/FOc19360.gifhttp://www.arb-up.com/files/arb-up-2008-1/FOc19360.gifhttp://www.arb-up.com/files/arb-up-2008-1/FOc19360.gif

[abadee]

السلام عليكم ورحمة الله وبركاته
تبي غدراً على شكل الهاف مون والله كنك في الشرقيه و150 كم العكرشيه بعد القصب تقريباً 10 ك
تجيك بحيره كبيره على اليسار وعلى اليمين منظر خيالي

[ابوعبدالله 2]

غيلانه وشعيب الطيري على كيف كيفكم وبالنسبه لطريق القصيم لم تمير على يدك اليمين للمفرق تلقى الشعبان مليانه كل ما تتقدم شوي تلقاه ممتازه بس احرص على الطلعه بدري على شان تلقى مكان تحياتي للجميع

[@@معلم صف@@]

مشكوووووووووووووووووووووووووووووور

[ami1948]

الأخ صالح حياك الله :
بالنسبه للشعبان والأوديه عندك شمال الرياض ؛
-صلبوخ وحالته مزريه من بقايا الكشاته ولا أنصح به .
-دقله 80 كيلو .
- رويغب يمين طريق القصيم .
- ملهم .
-الطوقى .
- الخويش قبل روضة خريم .
-الغيلانه بعد روضة خريم على اليسار ولايزال فيه بعض المياه .
- جنوب الرياض نساح وفروعه ولكن شمال الرياض أوسع صدر .
بالنسبه للغدران ماعندك إلا الفياض اللى تجمع فيها الأوديه مثل خريم والتنهات وفياض تمير الخشم والنظيم والشوكى ؛ هى اللى تبطى فيها المياه .
المهم يجب أن تعرف إن الأوديه جفت أو بقي فيها القليل من المياه والنهار حار والحشرات انتشرت بسبب الحراره والمياه والعج يضرب فى أي وقت أما النوم فى البر هالأيام لا ينصح به وبالأخص للعوايل .
بالتوفيق إن شاء الله .