شيروا علي أحترت كثيراً

[altamimi98]

السلام عليكم
أريد أن اشتري سيارة تنفع للبر والديرة وركب مزاجي في البداية fg وبعدين هونت يوم شفت الهايلكس دفرنسين 2008 وقام رجال الله يهديه وحسفني وقال لي اشتر برادو 4 سرندل أو فورتشنر فل كامل احسن لك من الهايلكس، وانا براسي هايلكس ضخم ووسيع جداً من الداخل ودبل لكن مكينته صغيره الله يقلعه ( وهذا عيبه ) والفورشنر شكله ما اعجبني والبرادو 4 سرندل ما ينبغى بصراحه لأن المكينة ضعيفة والفل كامل ب 138 الف ريال. واحترت كثيراً بين هالسيارات وقلت ما لها الا اخواني المكشاتيه أرجوو أن تفيدوني.
ولا اقدر آخذ الا من عبداللطيف لأنه المقسط الوحيد بمنطقتي ولكم تحياتي.

[altamimi98]

السلام عليكم
احترت بين الهايلكس دفرنسين غمارتين والفورتشنر فل كامل وال اف جي فل كامل والبرادو ال 4 سلندر.

أنا خاطري بالهايلكس بصراحة لأن شكله رائع وضخم ووسيع من الداخل ودبل بس خايف من مكينته شكلها ضعيفه على حجمه الضخم ولا ادري وش حل الصندوق اذا حملت الاغراض اثناء السفر ( من السرقه مو مثل المصندق اللي حمل ولا تخاف ) وأخوياي يقولون انت مقصد مقصد قصد لك جيب احسن. وانا اروح وارجع على الهايلكس الجديد.

شيروا علي الله يفتح عليكم ترا مشورتكم والله في الحسبان وينأخذ بها.
ولكم تحياتي.

[عاشق السيل]

وعليكم السلام ورحمة الله وبركاته ،،

واضح من كلامك إنك مافيه أمل تاخذ غير التويوتا !!

لكن عموما السيارات اللي قلتها كلها ممتازة إلا الـ إف جي ( برأيي الشخصي ) لأنه ماأعجبني وأحس إنه غالي عالفاضي ،، عموما وعلشان أكون صريح معك تراي ماجربت ولا وحده من هذي السيارات بس خبرتي فيها من الشباب والمجربين : أنصحك تاخذ هايلكس وإن كانت مكينته صغيرة إلا إنها قوية جدا وأنت ماراح تسابق العالم !! أنت ناويه للبر والخطوط والمدينة والهايلكس عز الطلب ،، أما البرادو فما ينفع إلا 6 سلندر وعلى قولتك هذا غالي ،، أما الفورتشنر حلو وقوي بس إنه صغير وضيق ويطيح سعره عند البيع ،،

هذا رايي وانتظر غيري بيفيدك أكثر وتقبل مروري يالغالي .....

[أبوخالد2008]

السلام عليكم أخوي هو على حسب رغبتك يعني أنت الموتر تبيه للبر أو للعائلة أو سفر.. ونصيحتي ابعد عن البرادو 4 سلندر مع واحد من أخوياي وضعيف في البر وجزاك الله خير.. وأيضاً صلى إستخارة.

[ابوعبدالله678]

اخوي اشور عليك بالبرادو (صح غالي لكن جوده متانه شيك في الجيب ) الله ييسر امرك ويرزقك

[كاشخ 24 ساعه]

الهايلكس هي أفضل الخيارات واترك عنك الاقساط

[راعي المقانيص]

الله يرزقنا وياك

برايي يالغالي اذا كان عندك عائلة الاف جي اتوقع انه غير مناسب

والهايلكس ممتاز ولاتنظر ان مكينة ضعيفة لانه مثل ماتفضل اخوي عاشق السيل ( ماراح تدخل حلبات مسابقة )

والبرادو 6 سلندر اعتبره Vxr مصغر

اما الفورشنر اعتذر منك يالغالي ماعندي عنه معلومات اقدر افيدك

[راعي الركيات]

اعتقد ان البرادو سته سرندل هو مطلوبك ومهوب شرط يكون فل خذ نص فل مثبت سرعه وفتحه ومراتب مخمل ممتاز جدآ واترك الونيت بيقص ظهرك بالمطبات وقيمته مرتفعه بالنسبه للموديلات الجديده علي الفاضي
اما Fj سياره ممتازه بس شبابيه جدآ وبالتوفيق ان اشاء الله

[salehhd]

السلام عليكم

الفورتشر خيار ممتاز سعرة جيد وبأتساق وقوة البرادو 6 سرندل وتراه موتر ينحط علي يمناك
وغير كذا اخف مطب من الهايلوكس واقوى عزم
ولا تنسى الاستخارة
بالتوفيق

[salehhd]

السلام عليكم
الفورنتشر والهايلوكس نفس الشاصي والاتساع من الداخل بزيادة مقعد لصالح الفورتشر
وهذا الي انصحك فيه 6 سرندل وتراه عزم ممتاز وموتر جيد للبر خاصة ان فيه فقل دفرنش (هزاز ) خلفي

[.أبوعبدالرحمن]

1) البرادو سته سلندر جميل وحلو وفعلا هو Vxr مصغر

2) الفورنتشر جميل وقوي وهو اخو الهايلكس بس اقوى مكينة في السته السلندر واوسع

3) الهايلكس دفرنسين وهذا انا مجربه نشيط وقوي ويتحمل الحمل ويبيض الوجه

4) الاف جي وهو اضعه في الاخير


ولا تنسى الاستخارة

[القناص]

اجل توكل على الله وخذ الاختيار الاول ان كان ماحصل لك الباثفيندر

[alkongrs]

كم حدك ما عطيتنا ؟؟؟؟؟؟؟؟

انصحك بالفورتشنر موتر ينحط على الجرح :)

[alkongrs]

السلام عليكم
الفورنتشر والهايلوكس نفس الشاصي والاتساع من الداخل بزيادة مقعد لصالح الفورتشر
وهذا الي انصحك فيه 6 سرندل وتراه عزم ممتاز وموتر جيد للبر خاصة ان فيه فقل دفرنش (هزاز ) خلفي
اضم صوتي معي اخوي salehhd ;)

[altamimi98]

أقول
الله يبيض وجيهكم يالذيابة، ضاقت الدائرة بين الهايلكس والورتشنر، بعد احصاء آرائكم وهواي بصراحة يمّ الهايلكس شكله الجديد بخطوطه ذي معجبني بصراحه وسعره مهوب شين بالحيل.
شاورناكم واستفدنا وبقي نستخير رب العالمين والله يكتب باللي فيه خير.
أشكركم جميعاً يا اخواني الغالين.

[.أبوعبدالرحمن]

الله يوفقك ويكتب لك اللي فيه خير

[خالد030]

الفورنتشر 6 سرندل ممتاز وأذا هواااااك الهايلوكس خذه ولا تشاور ولو أختلاف الآراء لبارة السلع