الفزعه يالربع السياره لنكون خلطت الماء مع الزيت....

[الطير الازرق]

السياره لنكون 95 امريكي كنت مسافر عليها ونسيت إن الاديتر ينسم ( منشق) بعض الشيئ وارتفعت حرارتها فجأة ولا إنتبهت إلا بعد ماسمعت صوت جرس التنبيه ولقيت الحراره واصلة على الآخر وطفت السياره ووقفتها وبعد التشييك وجدت أن الزيت مخلوط مع موية الاديتر( الخضراء ) وزاد التاكيد بعد كلما زودت المويه لقيت أن المويه تنزل من أسفل الشكمان .
رأيكم أوضبها أوأغير لها مكينه،؟
وعطونى رأيكم بالمكاين اللى تجي من امريكا من التشليح زينه او !!!!!!!!!!!!!
ومن يعرف لى ورشة زينه موجود فيها ميكانيكى متخصص؟
شكراً لكم ،،،
ابوحمد،،،
مدينة الرياض

[وحيد الدرب]

الأخ لينكون صباح الخير ..الله يعوض عليك بخير
أول شئ لازم تتأكد أن المكينة (مخبطة) لأن الفورد يجي بالمكينة (طبات) بالصدر وإذا تلفت تخلط السيارة الماء والزيت وكأنها مخبطة وهذا صار معي في كراون فكتوريا وغيرت الطبات وسويت غسيل للمكينة وضبط ولله الحمد...ثاني شئ اذا افترضنا ان الوضع ماهو من الطبات فانا (من وجهة نظري أن المكينة إذا جتها حرارة ماعاد تنفع) ليش؟ لأن الحرارة تؤثر على كل شئ سواء شعر أو أنحناء بالرأس والسرندل أو ضيق بمجاري الماء والزيت وبالتالي حتو لو وظبتها تبقى الحرارة غير طبيعية , والشئ الثاني تشري مكينة من التشليح أرخص من التوضيب بس المهم أن تكون المكينة جيدة ولو تأخذ معك ميكانيكي للتشليح يكون أفضل...ومن ناحية الورش والله ياخوك اني ما أعرف ورشة أضمنها لك ولكن سيارتي الفورد وديتها لورشة بأم الحمام (صناعية علي بن علي)ولكن ما أتذكر أسمها...

[الطير الازرق]

وحيد الدرب
كثر خيرك على ها المعلومات الطيبه.
السياره طفت من الحرارة العالية جداًً
شكرا على المرور ولك الف10000000000000000 تحيه،،
ابوحمد،

[أنجشة]

بوحمد
سيارات فرد و لنكن و ماركز
هذي السيارات مشاء الله عليه
بحكم إمتالكي لواحد 94 ماركز
فيها وسائل حماية عجيبة
1) في حال سيارة تعرضت لحادث متوسط القوة المكينة السيارة تنطفي إوتومتيك وتشتغل في حال دقيت السلف مرة ثانية
2) في حال إرتفاع درجة الحرارة سوى ماء رديتر ناقص أو بلف مجيم أو مروح عطلانها
السيارة إذا وصلت حرارة على H أوتومتيك يطلع جرس ثانيتين إلا وسيارة تنطفي ولا تشتغل إلا إذا نزلت حرارتها .
الحل
رح ولحم الرديتر أو غيرها وعبها ماء أحمر لانه موديل 95 أصلي Ac ديلكو
ونشاء الله نها مافيها شيء

[الطير الازرق]

شكرا لك ياخوي أنجشة على مرورك وتنبيهاتك التى ذكرتها لى وللجميع
ولكن الموضوع شكل المكينه الله يعوض علينا الراس تاثر تاثير كبير من الحراره العالية جداً وجرس التنبيه اللى ذكرت لى فعلاً طلع ولا انتبهت الا من صوته ،،
لك تحياتى مره اخرى ،
ابوحمد،،

[سطام vip]

الله يعوضك خير اخوي

وفي الحديد ولا فيك والحمد لله انها جت على كذا

اخوي والله مكاين التشليح مشاكلهاكثيره والتوضيب قلق وغالي وفوق هذا وين المهندس الي يوضب زين

طبعاص مالك الا التشليح بس اخوي انتبه منهم وحاول يعطونك ضمان لمده طويله

طبعاً بعضهم بيقولك اسبوع والي يقولك شهر حاول تاخذ منهم اكثر

اهم شي ابتعد عن السياره الي فيها صدمات اماميه

واللنكولن والماركيز والفكتوريا مكاينهم وحده

يعني لو تقول مكينه فكتوريا احسن لك علشان كلمه لنكولن بيخليهم يرفعون عليك السعر

الله يسهل امووورك اخوي ويعوضك خير

واذا لقيت شي يفيدك ابرجع للموضوع

[لن أمل من العطاء]

بشرنا

اش صار معاك

[الطير الازرق]

اخوي سطام vip
اشكرك جزيل الشكر على مرورك وآرائك الجميله والمفيده
تحياتي لك،،:heart:
يامرحبا الف ترحيبه بالزميل لن امل من العطاء
بصراحة كلك عطاء واشكرك على السؤال :heart:

*************************
والحمدلله ابشركم انا اخذت براي الجميع الذين ارشدوني الى الطريق الصحيح لأن الواحد احيانا يقف محتار في هذه الامور والبركه في الزملاء ووقفتهم الرائعة وارائهم السديده
في الحقيقه بعد الكشف على المكينه اتضح انها لا تصلح والراس متاثر جدا من الحراره واشياء كثيره والتوضيب يمكن مايعطى نتائج ايجابيه جيده
رحت اخيرا الى تشليح الحاير والصناعيه القديمه واطلعت على المكاين وسعرتها واحد يقول 2800 مع التركيب وضمان 20يوم والثاني يقول 15 يوم مع التركيب واخيرا وليس اخراً رحت للتشليح في الحاير وسالت عدة محلات ولقيت اسعار مختلفه وضمان شهر مع التركيب وبـ3500 اخيراً نصحني واحد وقال رح للبيان احسن لك
وفعلاً رحت لمهم وحصلت موتر كامل لوتبي ومكاين جداً نظيفه ومافيها زيوت وقال لى السعر 4000 ريال مع التركيب وضمان شهر على الحراره و15 يوم على التهريبات والضمان حق المكينه 6 شهور وتاخذ السياره كاملة مكمله من كل شيء مفحوصه من جميع الجهات .
والحمدلله توكلت على الله وشريت مكينه من عندهم ودخلت السياره اليوم في الورشه في صناعيه ( العويضه ) مركز البيان.
وفي الختام اشكر منتدي مكشات والعاملين والاداريين والمشاركين ولكم منى كل تقدير واحترام :heart:
ابوحمد،،

[ممتر البران]

مبروك والله يطرح لك فيها البركه
وبشرنا الا طلعت وان شاء الله ما تواجه مكروه
تحيتي لكم
ابو سعد

[الطير الازرق]

ابشركم خلصت السياره والحمدلله كل الامور تبشر بخير،،
ابوحمد،،