عليك بالايجار قبل الشراء .... نصيحة مجرب !

[ابو ســــاره]

عقدت النية على شراء سيارة جديدة اما لاندكروزر GX ب132الف مكيفين ثلاجة او باترول سفاري 2 ب134 الف او اف جي2 120 الف . بعد تردد في الشراء قررت التجربة قبل الشراء استئجرت اف جي لكثرة تواجده عند محلات التائجير ب 480 ريال .
بصراحة ال اف جي خفيف ونشيط مع انه تماتيك الا ان صراخ تغييراته على الاسفلت لا يكاد ينفصل من قوت عزمة فخم من الداخل وواسع المراية علشان تعدلها يبيلك تنتهض شوي تحسها بعيده رغم اني شخص طويل !
اذا جاء يركب معك احد وراء لازم يظرب راسه السقف قبل يركب كود تنبهه ثلاثة جوو يركبون وضرب راسهم ويعيب عليه الضلماء سبحان الله كل ما بغيت شي تقعد لك شوي تتلمس ولا فيه الا لمبه سقف وحده وسطية والدروج ما يتففل بمفتاح كل هذي العيوب بسيطة عند الطامة الكبرى . دنقت راسي شوي وانا بالبر وتخبرون كل شي بعيد بهالموتر ويجيب الله ذيك القشعة الطيبة بوجه الموتر من يمين وتضرب زاوية الصدام الامامي صدمها ورقاها الموتر بس كني سمعت صوت قربعة وانزل والقى الموتر داخل زاوية الصدام وداف معه الرفرف والرفرف دخل على الباب الباب ماعاد ينفتح !!! الصراحة اني ما استوعبت الموقف وارجع واناضر القشعة ! والله ما تسوى كلى هالحادث الي يشوف الموتر يقول داخل بجدار
طبعاً حاولت اعالج الوضع شوي علشان ما يغثوني شركة الاجار واكتشفت ان الرفرف اساساً مثبت من المقدمة على الصدام الامامي البلاستيك ومن الطبيعي ان اي حركة بالصدام راح يدخل الرفرف . رجعت الموتر لم شركة الاجار ونقوني بالفين ريال بعد حب الخشوم طبعاً مع الاجار .
هذا هو الاف جي من واقع تجربة كرف متواصل على مدى 24 ساعة رغم هذة التجربة الا ان احد الشباب اعجب فيه لقوتة الهائلة في الطعوس وخفة حركته . بس من ناحيتي انصح الي يستأجرون بانشيات يستئجرنة ارخص لهم .


ترقبو كبش الفداء الاسبوع القادم مفخرة الارض !!!

[gsb]

خذلك إكستيرا بداله احسن منه

صح مافيه دف لوك بس تقدر تركبله وحميات تحت ما فيه تقدر تركبها مساعدات غاز صفر تقدر تركبله وكلها أصليه او من شركات عالية تصنع بجودة عالية جدا اشتر ال se التماتيك وركبله جنوط 16 حقات الأوف رود الأمريكي وكفرات بر ولا أف جي ولا غيره وهو أصلاً ما يحتاج بعد تركبله شيء.

[مقلع الرمث]

الاجار دمن فاسد لكن فكره ممتازه

[أبو الحارث 4]

فيه سيارات ما يحتاج تجربة اخي الحبيب اسمها عنوان جودتها تويوتا لا ندكروزر وبس.

[عاشق السيل]

باترول أو لاندكروزر وغيرها لاتدور وارقى ألف قشعة ماراح يتأثر الموتر بإذن الله تعالى ،،

ونصيحتك بالإيجار في محلها وخاصة للسيارات الغير معروفة ...

[بدوي جنوبي]

اذا فكرت اشتري سيارة جديده
لابد ان استئجرها قبل شرائها لكي لا اندم

بالتوفيق

[ابو عمر النوح]

السيارات المشهورة و المنتشرة في الشوارع ما يحتاج تستاجرها و لو اضطريت تسأل واحد أو 2 أو 3 تشوفهم عليها مثل اللاند كروزر و الباترول و اليوكن و غيرها أما السيارات غير المشهورة استأجارها أفضل و لكن استعمالها لمدة يوم واحد و هي يمكن تكون جديدة وكالة ممكن يبين لك عيوبها ؟؟؟

[Abu Saad]

ياليت تستاجر الاكستيرا وتمعره في البر وتعطينا رايك :)

[ابوعقل]

ترقبو كبش الفداء الاسبوع القادم مفخرة الارض !!!

ننتظر التجربه

اجل استأجرfg بدال البانشي

حلوه

[بواسامه]

بس من ناحيتي انصح الي يستأجرون بانشيات يستئجرنة ارخص لهم .حكمه تحسب لك


ترقبو كبش الفداء الاسبوع القادم مفخرة الارض !!!
بس حاسب وانت تجرب وانا اخوك لاتروح دراهمك للحونشيه
يعني امغله بس باحترام وعطنا رايك يابعدي

[.أبوعبدالرحمن]

الله يعطيك العافية والله يوفقك على المعلومات المفيدة

[بدوي جنوبي]

السيارات المشهورة و المنتشرة في الشوارع ما يحتاج تستاجرها و لو اضطريت تسأل واحد أو 2 أو 3 تشوفهم عليها مثل اللاند كروزر و الباترول و اليوكن و غيرها أما السيارات غير المشهورة استأجارها أفضل و لكن استعمالها لمدة يوم واحد و هي يمكن تكون جديدة وكالة ممكن يبين لك عيوبها ؟؟؟

لا يبو عمر تكفا لا تقول
انا سويت مثل ما قلت وشريت لي سيارة وطلعت مختلفه تماما عن ما توقعته
فالافضل الاستئجار او تجربة سيارة احد الزملاء

تحياتي

[سوبر152]

سوووووووووووووبر بربربربربربربربرسفاريييييييييي
بسسسسسسسسسسسسسسسسس

[بواسامه]

لا يبو عمر تكفا لا تقول
انا سويت مثل ما قلت وشريت لي سيارة وطلعت مختلفه تماما عن ما توقعته
فالافضل الاستئجار او تجربة سيارة احد الزملاء

تحياتي

وش شريت يامشرفنا العزيز واختلفت عن توقعاتك
وش سلبيات تجربتك
ليتك تدلي بها عشان ننحاش ونستفيد من تجربة الغير
وفقك الله

[ابرق نثيل]

تجربه ممتازه والله يعوض عليك اخوي

فالموديلات الجديده غدت معدهيب عمليه

مثل موديلات الـ 98 ونازل معاد فيها حديد كثرو فيها البلاستك

الا النادر القليل من المواتر

,,, الصناعه تغيرت,,,

مانعدم فخامه وديكورات وتميزات جذابه وقوه مكاين


لكن كل هذا على حساب الجوده والمتانه والتحممل ...

توابيت على عجلات ويالله سترك



http://i6.photobucket.com/albums/y206/red_point007/2592217_31_full.jpg

[الأسمري 2009]

اول سييارة جربتها كانت جيب شاص موديل 84 خليجي سيارة تاخذك الى ابعد مما تتوقع حتى كنا نطلع فيها مع اماكن وعرة وعالية وشديدة الانحدار في الجنوب والسيارة تطلعها بسهولة وقوة ولله الحمد


وكذلك جربت الاند كروزر 95 سيارة غنية عن التعريف واستهلاكها قليل في قطع الغيار


وجربت باترول 97 في البر سيارة تعتمد عليها بقوة يعيبها فقط استهلاك البنزين


هذا ولكم تحياتي جميعا

[يكشت بفورد]

قديمك نديمك .... لو جديدك أغراك

[Mohammad]

صح لسانك صح

الاف جى لعبه قويه

[بن عمار]

تجربه رائعه بس أطمر الشمع وانا اخوك

تحياتي

[مخاوي الذيابه]

يعطيك العافيه ..

ونترقب جديدك ..

[ابو ســــاره]

كما وعدناكم كبش الفداء الجديد مفخرة الارض .


فخامة وهيبة في الوقفة ولا يهون الذيب الي واقف وراه ولله ياهو يتصدد من شين شكله خخخ .

http://www.mekshat.com/pix/upload02/images68/mk5592_1234.jpg



الموتر ما عليه كلام من واقع تجربة اجــــــــار !

http://www.mekshat.com/pix/upload02/images68/mk5592_10.jpg


ولا تسئل عن الي جاه عساه ما يجيك بس من قناعة في نفسي تيوتا كل شي تلعب فيه الا الاندكروزر هو سمعتها !

http://www.mekshat.com/pix/upload02/images68/mk5592_11.jpg



الموتر جايه كرف مهوب طبيعي من الي مستأجرينه قبلي لكن من تركبه وتشغله تقول كنه توه طالع من الوكالة وهاذا عداده علماً بان لكل يوم 200 كيلو يعني قسمها واحسب عدد مرات الجلد الي جاه .
http://www.mekshat.com/pix/upload02/images68/mk5592_4.jpg


يعيب عليه بعض الاشياء بعد الاستخدام لاحضت انها مريحة وحلوة وهي حركة التشغيل بالزر من تقرب من السيارة تنفتح من حالها ومن تركب اضغط زر ستارت وادعس ,,,,,, ابوك يالبلايستيشن http://www.mekshat.com/pix/upload02/images68/mk5592_3.jpg


تلاحضون الدبل على الوسط حاطه ! الاجار فاصلينه لكن يكفيك الخفيف لانه دفع رباعي مستمر


اما بطن الموتر هو هو نفس القديم مع بعض التجويفات في بعض الاجزء وصيج حماية كذلك .
http://www.mekshat.com/pix/upload02/images68/mk5592_5.jpg


والله لا يعوق بشر نبي نشرية لاكن مهوب وارد ابو جميل وارد قطر عساها للسيل .

[Bader-M]

نصيحة من ذهب


تحياتي اليك

[شاص&نص]

عندي لك نصيحة ترى وارد قطر هو نفسه وارد البازعي
و فكر بوارد اليحيى
أخوك ابو عبدالكريم

[alkongrs]

ما شالله يعطيك العافيه وصدقت دخلت مزاجي فكرة الاجار ودخلت مزاجي اصاحاب البانشيات خخخخخخخخخخخخخخخ:)

[الوايلي100]

لاند كروزر جــــــــــــــــــــــــــــــــــــــــــــي اكس وبس

[ابو ســــاره]

حيالله المكشاتية كلن باسمه ..
شاص نص اليحيى تمردو علينا شوي ورفعو اسعارهم ومواصفاتهم اقل شي عندهم ب 160 الف مكلمهم من يومين بس البازعي ما مريت عليهم
انا كنت في قطر من شهر وسعرته وما كان لي نية في شرائه ادور الشكل القديم وما لقيت نظيف

[أبوالوليد2008]

ما شالله يعطيك العافيه وصدقت دخلت مزاجي فكرة الاجار

[turkey]

ههههههههههههههههههههههههه
اما الحادث حقك صراااااااااحه شي!!
اجل مدنق !!وتارك الطارة ههههههههههههههههههه
تحياتي يالغالي ..
والله ينور عليك محتار بين كم موتر وأشاور لي مدة بس مثل هالراي مافيه
احترااااااااامي

[غضنفر]

واكتشفت ان الرفرف اساساً مثبت من المقدمة على الصدام الامامي البلاستيك ومن الطبيعي ان اي حركة بالصدام راح يدخل الرفرف[/SIZE]



هذي زبدة الهرج
ملاحظة جد مهمة
وتراك منت أول واحد يصير لك مثل هالمشكلة على الموتر
قبلك واحد هنا بالمنتدى
اول من نزل الاف جي يحكي لنا مثل سالفتك
يقول
انهم راحو يجربونه بالنفود
اعجبهم الموتر بخفته
ساق الموتر واحد من ربعه
لعله مخروش شوي :D
جاك طاير يبي يرقى له طعس ويخبط الصدام الامامي بالنفود
الرجال يبي ينزل من الموتر ما قدر
اخر شي طب من الدريشة:D
واكتشف مثلك ان اي حركة بالصدام تأثر على الرفرف مما يؤدي الى صعوبة فتح الباب بسبب تحرك الرفرف

الاف جي مع احترامي لملاكه
ما هو موتر جلد

الموتر اخوه
الي هو الفورتشنر (عز الله انه موتر)
او ولد عمهم
الاكستيرا (على انه دميم الشكل ولا هو وسيم مثل اخوه الاكير الباترول لكن فعايله تغطي عيوبه)

على العموم معوض خير
والله يستر عليك

[MyName]

نزلت الصور للاند كروزر وجالس تمدح فيه وماادري إيش والـ FJ ماشفنا ولا صوره أو إثبات لكلامك وهنا أشك بأنك لو مره وحده جربت الـ FJ ويالغالي قيمة الإيجار للـ FJ تتعدى 700 ريال عند أغلب المحلات وأنا أتكلم عن النظيف اللي يستحق التجربه ؟!

صدقني اللي ذكرته كلام فاضي مع إحترامي لك ومبالغه ! ولا مره صادفت مشكله من مشاكلك بالـ FJ ...

حدث العاقل بما لا يعقل فإن صدق فلا عقل له !


أخوي الغالي غضنفر وين إنجازات الإكستيرا اللي تتكلم عنها وفعايله اللي تغطي عيوبه ؟ ماشفنا شي ...

أدخل اليوتوب وابحث عن FJ Cruiser وشف فعايله وبنفس الوقت أبحث عن الإكستيرا وقارن ...

الفورتشنر يالغالي تايلندي وفيه منه إندونيسي والـ FJ ياباني 100% وهنا جودة الصناعه اليابانيه تتفوق ...

تحياتي

[سفير الصمان]

أبغى اسأل عن قيمة الجكس التماتيك
بكم قيمته؟

[z a n h o r]

واحد من الشباب كان يبي يشري تاهو 2008

المهم انه اجر السياره لمدة يومين بعد الاجار صرف النظر عنها

ويحمد ربه انه اجرها

فهذي نقطه مهمه جدا جدا



نزلت الصور للاند كروزر وجالس تمدح فيه وماادري إيش والـ FJ ماشفنا ولا صوره أو إثبات لكلامك وهنا أشك بأنك لو مره وحده جربت الـ FJ ويالغالي قيمة الإيجار للـ FJ تتعدى 700 ريال عند أغلب المحلات وأنا أتكلم عن النظيف اللي يستحق التجربه ؟!

صدقني اللي ذكرته كلام فاضي مع إحترامي لك ومبالغه ! ولا مره صادفت مشكله من مشاكلك بالـ FJ ...

حدث العاقل بما لا يعقل فإن صدق فلا عقل له !


أخوي الغالي غضنفر وين إنجازات الإكستيرا اللي تتكلم عنها وفعايله اللي تغطي عيوبه ؟ ماشفنا شي ...

أدخل اليوتوب وابحث عن FJ Cruiser وشف فعايله وبنفس الوقت أبحث عن الإكستيرا وقارن ...

الفورتشنر يالغالي تايلندي وفيه منه إندونيسي والـ FJ ياباني 100% وهنا جودة الصناعه اليابانيه تتفوق ...

تحياتي


يالغالي وانا اتمنى منك انك تدخل يوتيوب وتكتب اكستيرا وتشوف الموجود ( طبعا اكتبها بالانقلنزي )

للمعلوميه الاكستيرا موجود من عام 2000 وليس حديث عهد

وفيه مقطع انتشر للاكستيرا لكن انا ما شفته ذكره لي واحد من العيال

انه يرقى مرقى ام حزم وهو بلد بدون اي تعديل

سياره جباره صراحه

مكينه + قير ما شاء الله تبارك الله

[khaled99]

انا استأجرت Fj وفيه صدمة في الرفرف الأيمن لا يكون انت بس..!اللون أبيض

بصراحة اكثر شيء مميز في السيارة العزل الصوتي...ويتفوق على اللاندكروزر(98-2007)

وعزم ممتاز وخفة نفس ومراتب مريحة نوعا ما...

العيب الوحيد في نظري مجال الرؤية غير واضح..

اما غيرها السيارة لا يعلى عليها..

تساؤل:ليش الاكستيرا غير متواجد في الشوارع على عكس الـfj ؟

ما شفت إلا سيارة وحدة اكستيرا...!!مع انه ارخص بواجد من الـfj

[z a n h o r]

تساؤل:ليش الاكستيرا غير متواجد في الشوارع على عكس الـfj ؟

ما شفت إلا سيارة وحدة اكستيرا...!!مع انه ارخص بواجد من الـfj


قوة الدعايه لها دور ..!

الاف جي اول مانزل ما احد يبيه لكن دعايته القوه رغبت الناس فيه وعقبها طاحوا فيه ..

وترى ماهو ذاك الزود رخص عن الاف جي هذا فله بـ 117

وهذا فله 107 وفل الاكستيرا يعادل الفئه الثانيه لانه ينقص عنها دفلك

[Magellan]

قوة الدعايه لها دور ..!

الاف جي اول مانزل ما احد يبيه لكن دعايته القوه رغبت الناس فيه وعقبها طاحوا فيه ..

وترى ماهو ذاك الزود رخص عن الاف جي هذا فله بـ 117

وهذا فله 107 وفل الاكستيرا يعادل الفئه الثانيه لانه ينقص عنها دفلك

أفا ياz a n h o r وش فيه التاهو
والله أنا حاط النظر على ولد عمه اليوكن أبغى أطقه ما أدري فيه مشاكل عويصة

[MyName]

واحد من الشباب كان يبي يشري تاهو 2008

المهم انه اجر السياره لمدة يومين بعد الاجار صرف النظر عنها

ويحمد ربه انه اجرها

فهذي نقطه مهمه جدا جدا





يالغالي وانا اتمنى منك انك تدخل يوتيوب وتكتب اكستيرا وتشوف الموجود ( طبعا اكتبها بالانقلنزي )

للمعلوميه الاكستيرا موجود من عام 2000 وليس حديث عهد

وفيه مقطع انتشر للاكستيرا لكن انا ما شفته ذكره لي واحد من العيال

انه يرقى مرقى ام حزم وهو بلد بدون اي تعديل

سياره جباره صراحه

مكينه + قير ما شاء الله تبارك الله

أنا قصدي باليوتوب جرب أبحث عن FJ Cruiser وأبحث عن الإكستيرا ومع العلم أن الـ FJ نزل بعام 2006 والإكستيرا نزل قبله بكثير صدقني راح تحصل مقاطع الـ FJ أكثر وبشكل واضح وهذا دليل إنتشار السياره الكبير ومو عندنا بس بأمريكا وبدول الخليج وأكثر من الإكستيرا , ممكن تقول لي السبب ؟

الجوده لايختلف عليها أحد وهي لصالح تويوتا ويكفي أن الـ FJ صناعته يابانيه والإكستيرا أمريكي !

الإكستيرا صنعتها نيسان لمنافسة السيارات بنفس الفئه ومن وجهة نظري أشوف إنها صفقه خاسره لنيسان ...

تحياتي لكم

[MyName]

قوة الدعايه لها دور ..!

الاف جي اول مانزل ما احد يبيه لكن دعايته القوه رغبت الناس فيه وعقبها طاحوا فيه ..

وترى ماهو ذاك الزود رخص عن الاف جي هذا فله بـ 117

وهذا فله 107 وفل الاكستيرا يعادل الفئه الثانيه لانه ينقص عنها دفلك

من قبل ماينزل عندنا وعيني على الـ FJ ولاهمتني لا دعايات ولا شي ! والحمدلله أشتريته بعد إنتظار طويل من الوكاله ...

لو الحمراني من اليوم إلى 6 شهور قدام يسوي دعايات بالصحف وقنوات التلفزيون للإكستيرا صدقني ماراح تلاقي نجاح مثل ماحققه الـ FJ ...


تحياتي لك

[Magellan]

هدوا اللعب ياجماعه ماصارت مقارنة
صارت هواشه ذكرتوني لما أجلس بين مشجعين الهلال والنصر:D
ثم يا أخوي MyName وش فيك على الأمريكي لايصير فيه جرب وأنا ماأدري:D
ترى سيارتي المفضلة أمريكية شفروليه تريل بليزروأفضلها على سيارتي الأخرى تويوتا كامري لسبب مهم وهو الأمان الذي لايتوفر بسيارة القراطيس اليابانية

[MyName]

هدوا اللعب ياجماعه ماصارت مقارنة
صارت هواشه ذكرتوني لما أجلس بين مشجعين الهلال والنصر:D
ثم يا أخوي MyName وش فيك على الأمريكي لايصير فيه جرب وأنا ماأدري:D
ترى سيارتي المفضلة أمريكية شفروليه تريل بليزروأفضلها على سيارتي الأخرى تويوتا كامري لسبب مهم وهو الأمان الذي لايتوفر بسيارة القراطيس اليابانية

لا هوشه ولا شي وإختلاف الرأي لايفسد للود قضيه ...

بما إن سيارتك تريل بليزر لو نزلت موضوع وجلست أعيب فيها وأذكر عيوب من راسي وأنت مالاحظت هالعيوب أو المشاكل حتى غيرك مالاحظها ؟ بالله عليك وشلون بترد علي ؟ :)

صحيح ان الدعوه سيارات وحديد بس كل شي له حدود ...

انا قصدت أخي الكريم جودة الصناعه لصالح الياباني والكل يعلم أنها الأفضل ولم أقلل من السيارات الأمريكيه بالعكس ...

القرطاسه اللي معك استراليه مو يابانيه :)

الله يعطيك خيرها ويكفيك شرها اخوي ...

تحياتي

[الرحال الحزين]

مشكور اخي ابو ساره
وحمد الله على سلامتك من الاف جي
عموما اخي
بالنسبة لصرفية البنزين للكلوزر الجديد شو رايك فيها وكم يوصلك

[the calm man]

كملو النقاش خلونا نستفيد:d صرحة أنا أأيد وبقوة الإف جي وأنتظره على أحر من الجمر الله ييسرلي الحصول عليه قريبا إن شالله

[z a n h o r]

أفا ياz a n h o r وش فيه التاهو
والله أنا حاط النظر على ولد عمه اليوكن أبغى أطقه ما أدري فيه مشاكل عويصة


لا ما به الا العافيه ..

لكن خوينا متعود على نمط معين و بالتاهو تغير عليه

هذا كل ما في الامر بس

[z a n h o r]

أنا قصدي باليوتوب جرب أبحث عن FJ Cruiser وأبحث عن الإكستيرا ومع العلم أن الـ FJ نزل بعام 2006 والإكستيرا نزل قبله بكثير صدقني راح تحصل مقاطع الـ FJ أكثر وبشكل واضح وهذا دليل إنتشار السياره الكبير ومو عندنا بس بأمريكا وبدول الخليج وأكثر من الإكستيرا , ممكن تقول لي السبب ؟

الجوده لايختلف عليها أحد وهي لصالح تويوتا ويكفي أن الـ FJ صناعته يابانيه والإكستيرا أمريكي !

الإكستيرا صنعتها نيسان لمنافسة السيارات بنفس الفئه ومن وجهة نظري أشوف إنها صفقه خاسره لنيسان ...

تحياتي لكم

اخوي MyName

انا ما قلت ان السياره ما هي منتشره بس ما انفي الجانب الاخر

و معيار الجوده يكفي ان مكينة النيسان اخذت افضل مكينه في فئتها السنه الماضيه او الي قبلها ناسي صراحه ( اقصد مكينة الباث واخوتها )

ومسالة الصناعه وش فيها الصناعه الامريكيه ..؟

والشي الثاني انت قلت انها صفقه خاسره سؤالي كيف حكمت ..؟

تذكر الافلون قبل 7 سنوات تقريبا ..! وش كانت وش هي الاحين

ما كانت مرغوبه والان منتشره وبقوه




من قبل ماينزل عندنا وعيني على الـ FJ ولاهمتني لا دعايات ولا شي ! والحمدلله أشتريته بعد إنتظار طويل من الوكاله ...

لو الحمراني من اليوم إلى 6 شهور قدام يسوي دعايات بالصحف وقنوات التلفزيون للإكستيرا صدقني ماراح تلاقي نجاح مثل ماحققه الـ FJ ...


تحياتي لك




اول شي الله يعطيك خيره ويكفيك شره

هل تستطيع تلغي جانب الدعايه وانا مالها اي دخل بانتشار الموتر

نشوف التاهو واليوكن

التاهو 2006 كان غير مرغوب نادر تشوفه

لكن 2007 سوو له دعايه اقوى من دعاية اليوكن شفه الحين كيف منتشر

صحيح شكله دعمه لكن بدون الدعايه كان سمعت اليوكن غطت عليه ولا احد فكر فيه

وللمعلوميه انا ما عرفت ان اسم الشفر تاهو الا بـ 200 من دعايته

وبالنسبه لنجاح الاكستيرا اكيد ما راح يكون مثل الاف جي

لان عندنا هنا ناس ما تشتري سياره تشتري اسم وهم كثير

فلو تبي تقوله اكستيرا ولا اف جي قالك وين التويوتا

ولو الاف جي عليه علامة نيسان وش يبي يكون وضعه ..؟


اخيرا

اتمنى ان ما يكون بخاطرك شي وسامحنا ان كان اخطينا عليك

[الخادم]

اخوي
كلامك زين لكن ما مثل الاندكرورز و بعدة البترول و خل عنك من واقع تجربة

[MyName]

اخوي MyName

انا ما قلت ان السياره ما هي منتشره بس ما انفي الجانب الاخر

و معيار الجوده يكفي ان مكينة النيسان اخذت افضل مكينه في فئتها السنه الماضيه او الي قبلها ناسي صراحه ( اقصد مكينة الباث واخوتها )

ومسالة الصناعه وش فيها الصناعه الامريكيه ..؟

والشي الثاني انت قلت انها صفقه خاسره سؤالي كيف حكمت ..؟

تذكر الافلون قبل 7 سنوات تقريبا ..! وش كانت وش هي الاحين

ما كانت مرغوبه والان منتشره وبقوه





اول شي الله يعطيك خيره ويكفيك شره

هل تستطيع تلغي جانب الدعايه وانا مالها اي دخل بانتشار الموتر

نشوف التاهو واليوكن

التاهو 2006 كان غير مرغوب نادر تشوفه

لكن 2007 سوو له دعايه اقوى من دعاية اليوكن شفه الحين كيف منتشر

صحيح شكله دعمه لكن بدون الدعايه كان سمعت اليوكن غطت عليه ولا احد فكر فيه

وللمعلوميه انا ما عرفت ان اسم الشفر تاهو الا بـ 200 من دعايته

وبالنسبه لنجاح الاكستيرا اكيد ما راح يكون مثل الاف جي

لان عندنا هنا ناس ما تشتري سياره تشتري اسم وهم كثير

فلو تبي تقوله اكستيرا ولا اف جي قالك وين التويوتا

ولو الاف جي عليه علامة نيسان وش يبي يكون وضعه ..؟


اخيرا

اتمنى ان ما يكون بخاطرك شي وسامحنا ان كان اخطينا عليك

أقصد بصفقه خاسره إنتشار السياره سواءً عندنا أو بدول الخليج او بأمريكا مقارنه بالـ FJ ...

يومياً ممكن تلاحظ هذا الشئ وانت تمشي بالشارع كم FJ تشوف وكم إكستيرا ؟ والله بدون مجامله من نزلت الإكستيرا عندنا شفتها مره وحده فقط تمشي بالشارع مع إني أشوفها يومياً واقفه لأن بيتنا بجانب وكالة نيسان :)

الأفالون كان شكلها ومواصفاتها الداخليه تجيب الهم أقصد موديلات قبل 2005 على مااظن أو الشكل الجديد ( وجهة نظر ) أما الشكل الجديد وأول مانزلت كان عليها حجوزات بالهبل وأرتفع سعرها ووصل 125 الف وماادري بكم اللحين والسبب الشكل الجميل والمواصفات الداخليه الفخمه والمنافسه للسيارات بفئتها وحقيقه تستاهل قيمتها ...

والدعايه يالغالي هي الأهم إذا ببغيت تبيع أي سلعه وأنا ماأنكر هالشي بس مو معقوله كل ملاك الـ FJ أشتروا السياره بسبب الدعايه ! وسالفة على شانها تويوتا يمكن فيه نسبه عندنا تشتري على شان علامة تويوتا بس بأمريكا ماأعتقد ...

لو أحصل FJ صناعه هنديه تاتا وبنفس الجوده والقوه صدقني راح أخذه وبدون أي تردد وماهمني تويوتا أو غيره ...

حاشاك عن الخطأ أخي الكريم وبالعكس أعجبني أسلوبك الراقي بالرد والله يوفقك دنيا وآخره ...

تحياتي

[ولد العويني]

والله لو تقول الي تقول عن Fj

مع ولد عمي واحد والله انه يقوم على Vxr و فتك 4800 قير عادي


وعلى تشارجر وعلى ................والخ





































باختصار ياجبل مايهزك ريح !!!!!!

والي ما يطول العنب حامض عنه يقول



بالنسبه لصاحب الموضوع


اتمنى تحدد مكان اجي انا وولد عمي بالاف جي وانت بالمسخره حقتك

وشف وشلون بندفنك ،،،،


وخل تفعك 160 الف هع هع

[أشيقراوي]

والله اسمحلي اخوي


اولا اجار الاف جي خابره ب600 وفوق ,

ثانيا انا موتري كمل معي 10 شهور , والله اني جالده , صمان ونفود وطعوس وفي كل محل , وكنت كل اسبوع في الطعوس , كارفه كرف , والحمدلله ماقد واجهتني مشاكل , اما عن العيوب البسيطه اللي تذكرها
مثل اللمبه الحمدلله ركبت لمبة وماتكلف الا اقل من 100 ريال , وبالنسبة للرؤية تتعود عليها ,

واللي بيركب ورا طبيعي السيارة بااب ونص , يعني هل تقدر تقول ان عيب الربع تويوتا ان اللي يبي يركب يصفط المرتبه !! مب معقول الكلام , لأنه هو مصمم باب واحد , كذلك الاف جي مصمم باب ونص , يعني لازم الواحد بيتضايق شوي بالركبه , وما تقارنه بالركوب من بابين , يعني سالفة منطق ,

وبعدين من ناحية انتشار الاف جي ماعليه كلام , وكذلك الاكستيرا مسوي دعايات كثيره ولكن شوف الانتشار كيف , واذا سالفة اجار , انا اعرف واحد مهووس بالاكستيرا وسافر لعمان , واستاجر واحد هناك , والله انه رجع من السفر متحطم من الاكستيرا ( قير عادي ) ماشي 10 الاف , يقول ما كنت متوقعه كذا

يعني ماتحكم على تجربة ووحده او حتى تجربتين , !!

وبعدين كلت قشع واجد ولا صار للموتر شي , غريبه انت تاكل قشعه صغيره ( على قولتك ) ويصقع الصدام , !! كيف ياصل الصدام للقشعه ( الصغيره ) !!

يليت كلامك كان منطقي وبدون تهجم , لانك راح توصل معلومات للمتسائلين خاطئة , ويمكن تحط شي في
ذمتك ,

االله يعطيك خير موترك ويكفيك شره


يعطيك العافيه

اخوك اشيقراوي

[الجندي2005]

ياليت زي ما قال احد الأخوان ( جرب اكستيرا ) لاني ما شوفها عند محلات التأجير اللي عندنا ـ كل المحلات .

[الطا مس]

اتمنى تفيدنا عن الاكستيرا

[سيف نجد FJ]

ال Fj صحيح انه جديد نسبيا مقارنتا بالاكستيرا لكن

للواقعيه ما اظن ان الاكستيرا قدر يوصل مبيعات مثل الfj ولا راح يقدر وحتى الوكيل للاسف منزله ارخص لكن الدعوه مهب سعر بس وش الفايده من هذا التخفيض وانت حارم الناس من المساعدات القويه و قفل الدفرنس وبعدين الباب الخلفي متى هو ناوي يركب عليه الاسبير ويغطي السنام الخلفي

انا مقر بأن النيسان محركات قويه وانا مجرب لكن للاسف ان الموضوع اكثر من كذا كثير

وكيل للاسف الشديد ثقافته محدوده جدا في السيارات ( الكلام على الحمراني نفسه ) شفت له مقابلات الرجال مهب حول المواتر ابد

ومعتمد على ناس ياقديمه جدا يا مصاريا يعني اغسل ايدك

وبعدين الfj انا من الناس الي شروه قبل الدعايه و الازعاج لاني كنت منتظره مثل كثير مننا

وحتى في امريكا الى اليوم الطلب اكثر من العرض

ويظل الfj علامه قويه وحلم للكثير و هو ما عجزت عنه Gm من يوم ما اخترعت قسم همر

واقتبس كلام اخوي الي مايطول العنب حامض عنه يقول

وسلامتكم

[خالد77]

مشكور أخي أبو سارة .........

[نص كم]

سبحانه

الحين الاف جي نازل بامريكا عام 2007 من سنه و8 شهور

واخذت تقارير عالميه عن قوته بجميع الطرقات الوعره

والمشكله اننا كلنا نشوفها باليوتوب يعني شئ مباشر مهوب دعايات !!

بالاضافه اننا جربنا الاف جي بالطعوس وبرظوا يوجد مقاطع كثيره وتجارب كثيره بدول الخليج

ادخل شفها باليوتوب

تجي تقول قراشيع

مع احترامي لك ما اقدر اقول الا ياشين التطبيل

ترا راس امها سياره وش تحس فيه يعني جلست تطلع عيوب ماهي فيها

لو انك مشجع فريق وجلست تطلع عيوب فريق ثاني بغرض الكره والحقد كان نقول تعصب وميول رياضيه

لكن هذي سياراة كلن وذوقه

بس ترا بقول كلمه يعني مهوب تطبيل الاف جي حاليا اقوي سياراة بر لاسباب مايحتاج اذكرها لك بالاضافه انها كلاسيكيه شبابيه

ضف الى ذلك انها مهيئه للتعديل سواء تجهيزات البر او زبرقه المدينه

سلاام

[أبو مسفر]

سبق ان قريت عن مواصفات الـ Fj كروزر انها نفس مواصفات البرادو ستة سلندر وايضاً نفس الهيكل ( الشاس ) والدفرنس والمكينة فقط الاختلاف في الشكل .
الزبدة : ان البرادو ستة سلندر ابرك منه ويمكن ارخص
ولو ما يجيك الا انه اربعة بيبان

[ولد العويني]

مع احترامي لك يا ابو مسفر


شكلك مانت فاهم شيء بالسيارات


البرادو 4 سلندر 104 الاف


فل كامل 6 سلندر 145الف



بالله تحط 145 الف على برادو ولا تحطها بسفاري ازين وابرك!!



ياشين الي يتكلم بدون علم

[أشيقراوي]

وبعدين الاف جي شبابي وخفيف مره

وياشباب اللي ماعنده علم

ترا وزن الاف جي 1850 والفورتشنور 1780

يعني الاف جي خفيييييييييييييييييييف

والبرادو ثقيل وغالي

[mmsmm]

خخخخخخخخخ
اللي ما يطول العنب حااااااااااااااامض عنه يقووول
هع هع هع هع
اعرف انصب صح ولا لا تنصب
وييين محل الاجار هذا ؟؟
انا ارووح يمه الحيين واستااجر منه اذا على السععر هذا
انا فريييييييت محلات التأجيير ما لقي يت الا السعر هذا ولا حوووله
اتمنى
انك
تصيير
اكبر من كذا
وتترك سواالف البزااريين سيارتي اقوى لا لا سياارتي
كلن معجب بسياارته ووش دخلللك منه
تحياتي

[عبدالرحمن السالم]

الله لايهينك يابوساره

موضوع شيق تشكر عليه وناطرين كل تجاربك

وانا بقول / ماعلى الباث موتر .. انشهد انه موتر

[قف وناظر]

الله يعطيك العافية على هالموضوع الجميل................

[أبو عقل 1403]

السلام عليكم"""""""""
اف جي صراحة فاشل السواق تقل راكب ورا من بعد القيزر والدركسون
يازين الباثفاندر ولا الاكستيرا

[mmsmm]

خخخخخخخخ
اجل البااث والاكستيرا
الله يرج بللليسك
وش جااب تويوتا للفشل تيسان او عفوا نيسان
تحياتي

[طواش]

لو يطلع عليك هذا اللون وأنته في جون خالي شوبتقول :D http://uaesm.maktoob.com/up/uploads/467b791119.bmp

[ابو هشام]

لو يطلع عليك هذا اللون وأنته في جون خالي شوبتقول

أقول لون شلحه

[ابو قفلة]

السيارة المشهورة مايبيلها تجربة

[mmsmm]

هههههههههههههههههههههههههههههههه
اف جي وبس

[sa-z71]

والله إنك صادق يابو ساره

أنا جربت الطريقه هذي ولكن عن غير قصد

يعني كنت أستاجر سيارات للحاجه

وكم من سياره كنت معجب فيها وبعد التجربه تغيرت النظره وكذلك العكس

ومن السيارات اللي كنت مستحقرها الأبيكا وبعد تجربه والله كبرت بعيني

مشكور على الموضوع

[الستانس]

لاتعليق!!!!

[H I T L E R]

و الله حركه حلوووووه

[خالد15]

ياشباب السلام عليكم والله وانا اقرأ الموضوع كنت متحمس شوي :( الا اقرأ بعض العبارت التي لاتليق بهذا الموقع القيم مثل (نصب/ياشين اللي؟؟؟/وغيرها من العبارت :mad:
نحن نريد الأستفاده يعني وصل رأيك بدون زله على أحد ولكن بالأقناع وذكر التجارب وأنا ادري ان ما أحد يقصد الزله ولكن يبقى في النفوس شي والشيطان حريص وترى كلها سيارات والمسألة مزاج ياخي اشتر اللي يعجبك وكل اللي تشتهي نفسك وسع صدرك وطلع البر وطعس ووووووووووووو
اووووه طولت عليكم واسف على الأزعاج

[ذيب المواجع]

فكره جهنميه بس أخاف يصير لنا مثل ما صار لك
وتنقص فلوس الموتر اللي مجمعينها على حساب الاجارات
شكرا لك
ذيب المواجع

[شمالات نجد]

أكبروا يا عيال

الرجال حاط الموضوع للإستفادة ويقول لكم بالعربي قبل لا تشتري السيارة استأجرها

والرجال صار له موقف مع الإف جي وعافه ويمكن أنها خيره له

وجاز له اللاندكروزر "مفخرة الأرض" الله يعطيه من خيره ويكفيه شره

بعدين وش دخل الباثفندر والاكستيرا والفورتشنر في الموضوع!!

شكراً أبو ساره

الله يوفقك والجميع

سلام

[.* المثنى *.]

ولا أنسى لايجوز أن تقارن الـ Fj بـ اللند أو الباترول

مع أنني حالياً لا أرى مقارنه بين مفخره الأرض اللند و مسخره الأرض الباترول

[أف جي كروزر20]

أكبروا يا عيال

الرجال حاط الموضوع للإستفادة ويقول لكم بالعربي قبل لا تشتري السيارة استأجرها

والرجال صار له موقف مع الإف جي وعافه ويمكن أنها خيره له

وجاز له اللاندكروزر "مفخرة الأرض" الله يعطيه من خيره ويكفيه شره

بعدين وش دخل الباثفندر والاكستيرا والفورتشنر في الموضوع!!

شكراً أبو ساره

الله يوفقك والجميع

سلام


ومنهو اللي مايعجبه اللاند !!!!!!

اللي اللاند مايعجبه يركب له سيكل اصرف له ولنا :D

[بوسعود 180]

فعلا الاجار يعطيك فكره عن السياره اللي بتشتريه

بالاضافه الى مميزاتها وعيوبها

[كن كن]

انصحك لا تتعدى الجكس وبس

[نسناس الغروب]

ال Gx ما مثله حتى لو يكون ديزل

لكن إذا لا بد من اللي في الصورة أول شئ أفكر فيه أقلب لونه لو كلف 7 آلاف حتى استانس إذا طلعت البر

[ابو ســــاره]

حيالله المكشاتية كلن باسمه وتراي شايف بعض الردود الي تضيق الصدر من زمان بس ما رديت ما ودي اضيق اصدوركم زود !
يا جماعة وش علاقة العنصرية بالسيارات وانا توي ما شريت سيارة !
يعني تبون ايصالات الاجار اصورها وانزلها لكم علشان تصدقون ! موجودة بس انا حاط الموضوع كتجربة قد يستفيد منها المسلمين وماني ملزوم الا اذا كل شخص رد برد مسي عنده استعداد يعتدر اعتذار رسمي راح انزل صور جميع ايصالات الاجار . بالاضافة الي مجموعة صور لكلبسات بلاستيكية تربط الاف جي على بعضه . ,وانا يوم اصور الاند صورته في نهاية الرحلة وانا مبسوط منه اما الاف جي نهاية الرحلة كانت حادث الله يكفيكم الشر وين انا ووين تصوير الموتر وهو بوسط النفود !
انا خسرت مبلغ اجار يومين عى الاف جي 900 ريال بالاضافة الي مبلغ التلفيات . لكن عرفت حجم السيارة وقوتها وادائها في نظري انها سيارة شبابية من الدرجة الاولى وتحتاج الي تغيير الصدامات الي حديد . وعيبها الكبير سعرها المبالغ فيه .
انا مثلكم معجبني شكله ومعجبني الاندكروزر واستئجرت السيارتين كلهن غاليات سعرهن وكلهن تيوتا لكن وجدت الصلابة والهيبة في الاند ووجد السرعة والخفة في الاف جي وقطعت الشك باليقين .
وراح ارجع واسئاجر اف جي انشالله موسم الامطار انشالله لمتعة قيادتة في النفود .
وابشركم تراي شريت هدد 2008 قطري

[شمالات نجد]

ألف مبروك يا أبو ساره

الله يعطيك من خيره ويكفيك شره

مشاء الله تبارك الرحمن

بالتوفيق لك وللجميع

سلام

[طواش]

مبروك يا بو ساره هذا الهدد من تظهر قطوع طار الخرب بس :cool: برز سبوق الطير:)
موفق ان شاء الله

[سيف الظفير]

الباترول والاندكروزر



متربعين على عرش سيارات الدفع الرباعي في العالم والخليج



ولاتبعد عن هالاثنين

[ابو الخير]

يا اخوان انا لي والله خمسة شهوررررر طالب لانكروزر من عبدالطيف جميل

بعد ثلاثه شهور قالو بنحولك على 2009 - كمية موديل 2008 انتهت قلت حولوني


واتصلو علي من يومين قالو وصلت السيارة --

ورحت وقدمت شيك لهم بكامل المبلغ بسعر 176.275 مع الوحه

المهم السيارة بتوصل بعد يومين من جدة للوكاله -- الي يبي يكسبني

يكلمني على الجوال 0554430110

[بـدر]

الموضوع حلو

ولكن عندي همسة لاصحاب الاف جي

لو يجي واحد يسب في الفكس آر او الشاص ماراح يقابلونه اصحاب هذي السيارات بكل هذي الردود

لان السيارات المذكورة ماتعيب بتجربه او بتعليق او وجهة نظر حتى ...

فلذلك شككتوني بالاف جي بعد كل هالدفاع الله يستر لا يكون كلام الرجال دايم يصير معكم

ومغير تربيط بهالسيارة

لاني مثلكم متوهق بوحده :)

[بدوي جنوبي]

تم اضافته مع
๑×۩۞۩المواضيع المميزة في الخيمة๑ ๑×۩۞۩๑ (http://www.mekshat.com/vb/showthread.php?t=10218)