شبك الطيور بداية الموسم ...

[مكشاتي جديد]

السلام عليكم ورحمه الله وبركاته


ان عارف ان الموضوع مبكرين عليه بس قلنا نحرك المتدى ونسولف مع الشباب
وانا ودي ولله اسال عن شبك الصقور هل هو سهل زي ما اتوقع او انه فيه شي اكثر من اللي ان اتوقعه يعني ان افكر اقول الدعوه كلها شبكه وحمام ودربيل ورزق من الله والا هي اصعب من كذا لاني والله ودي اني اروح في بدايه الموسم للشعيبه وتكون ان شاء لله فاتحة خير ......


الله الله بالردود
وخاصه الخبراء
:D
والعليميه مثلي

[peregrine]

وعليكم السلام والرحمة

والله ياغالي من وجهة نظري ماهو صعب ولا شي لكن يرادلك حظ لتلاقي هالطير فوقك بالسماء

فنظرا لقلة الطيور انا بعطيك طريقة النقل اطرحلك شبوط او بو حقب الي هو برقعه وافتح البرقع قليلا

من ناحية العين لكي يرى النقل الضوء البسيط واربط شبكة النقل برجلين النقل واطلع الصبح من خيمتك

وقول بسم الله وتوكلت على الله واطلق النقل وهذا الاخير سوف يعلي باتجاه الضوء يعني يصير مثل الرادار

واي طير في المنطقة انت مو شايفة لا بعينك ولا بالدربيل ماتحسه الا وهو مصورخ على النقل انشاءالله

فهنا يقسم الصقاقير لقسمين منهم عندما يشاهد الطير قرب يطلقله الحمامة ومنهم لا يخلونه على النقل وانت بكيفك

واذا بتطرح شواهين فهذه نصيحة من ذهب(لاتعطيها لاحد) استخدم القطا ثم القطا ثم القطا

الشواهين تموت فيه........

اما بخصوص الرحلة خذلك طردين من علب السردين وشاي واهم شي جم واحد من المعروفين بجذبهم

وكل سردين واسمع الجذب وروق ياعمي

[مكشاتي جديد]

مشكور اخوي لكن هل المساله رزق والا فهم وخبره يعني لو اطع وادربل وان شفت طير رميتله حمامه وبسس انتهت السالفه بعدين وش قصدك بالسردين والكذب ما فهمت <<<< احس اني دلخ والنقل بس كذا اطلقه واراقبه بس

[peregrine]

اول شي ياغالي تاخذ بالاسباب في التوكل على الله والباقي على رب العالمين

واطير النقل وتسنى الطير وبس شفت الطير ارمي الحمامة واشبكه هذه هي

اما بالنسبة لعلب السردين فعشان اكل ياغالي واتغذى

اما الجذابين فاخهم معاي لكي اتسلى اثناء اكلي للسردين انا هذه طريقتي في القنص

وكل واحد وراحته ههههههههههههههههههههههه

[مكشاتي جديد]

انا متحمس احسبه لازم سردين هههههههه طيب يا اخوي الشبك يصير باي مكان والا في اماكن يعني معروف للقبيله الفلانيه

[أبو ممدوح]

يا خوي المسئله ما هي سهله مثل ما تتوقع يبغالها فهم وخبره وطرق عديده تتعب تتذكرها وقت ما تشوف الطير واذا كان على الرزق فهو على الله في جميع الأحوال
وانتبه لا يشوفونك القناصه وانت فاك النقل تراى فيها عقوبات لأنها حرام يتأذى منها الشبوط اما بضربه قويه من الطير الي يجيه أو اذا غاب عن نظرك واتجه لمنطقه بعيده وشاف شجر ونزل يريح تعلق بالنقل الي في رجله ومات وأخذت ذنبه هذا كله ما يجوز
أخوي الطرق كثيره ولازم انك تخاوي لك ناس عندهم خبره في الطرح حتى ما تروح فيها لأنه في أماكن فيها رباضيات وفيه صبخ اذا ما تنتبه الله يستر عليك
والحين نكدو على قناصه الشعيبه حطوا شبك سياج حديد ما بين القطان وبين المنطقه الي فيها جبل أبو شدااد والسياج على امتداد طريق جدة جيزان يعني السنة هذي ما ندري وش الي بيصير الظاهر بيحضرون فيه قناصه كثيرين والا تلقى لك واحد يطرد في طير من صباح رب العالمين لين الساعه تقريبا 10 وفجئه قطع الطير الشبك السياج وانت تناظر فيه وهو أبعد عليك بالله ما تنقهر والله لأقطع ثيابي هاك الوقت
وارجع وأقول ترا المسأله يبغاله خبره وفيه مصطلحات كثيره لا زم تكون حافظها مثل عارض الطير , دير الطير , فك له طلق , مسي الطير , انسفه , أخدجه , ووووو مطلحات كثيره اذا رافقت ناس لهم خبره في الطرح راح تتعلم أكثر وتستفيد أكثر
ومعليش طولت عليك وان شاء الله اني افدتك

[مكشاتي جديد]

مشكور ابو ممدوح وما قصرت بس وش قصدك لا يشوفونك القناصه وفيها عقوبات
والشعيبه زي ما تقول انها ما تنفع والا كيف بعدين الحين لا رحت تشبك طيور ما يصير فيه زحمه قناصه والا لا

[Shadw]

اما بخصوص الرحلة خذلك طردين من علب السردين وشاي واهم شي جم واحد من المعروفين بجذبهم

وكل سردين واسمع الجذب وروق ياعمي

هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه ههههههههههههههههههههههههه

[الشاطر ماطر]

طيب لازم الشعيبه يعني مثلا ماتجي فالضلعان والمزارع والشعبان وخصوصا اللي قريبه من منطة الرياض

[Shadw]

انا عندي خريطة لهجرة الصقور بس ادورها لك في الارشيف مالي واحطها لك

[ذراع الذيب]

السلام عليكم ورحمته الله وبركاته
حياك الله يامكشاتي جديد الله يرزقك بالطير الطيب اول ماتسويه طبعا معك جيب نيسان وان كان معك غيره
روح المعارض وبيعه وخذ نيسان باتروله الابيض حبه وربع 97 هو المطلوب جيب الطير
وخذلك دربيل الصقر رخيص وزين وخذلك جهاز كنود ودوج في الشعيبه وغير الشعيبه على طول الساحل
بعد صلاه الفجر ان كان تبي الشواهين اقرب من البحر وان كان تبي الحرار اقرب من الجبال واذا حصلت
الطير ان شالله اول ماتسويه تشغل النور الامامي على طول لان النور دلاله ان الطير لك ولايسبقك احد عليه
ويكون الحمام المشبك والسمان والقطا جاهز وتنادي بالجهاز الفزعه الفزعه اوصيك بابو هاشم الحرازي والاشراف كلهم وشجاع الدوسري والمعتزل هم شروه من عندي ويفزعون لك ويكسرون سيارتهم علشان الفزعه بالتوفيق.............

[مكشاتي جديد]

مشكور اخوي ذراع الذيب واشهد انك الذيب كله ماهو بس ذراعه لكن يالطيب افرض انك تطرد الطير من جهة واحد جك قالك انا قاعد اطرد الطير من جهه ثانيه طبعا في حاله انه يكذب وش الحل

والسؤال الثاني وش قصدك اطلب الفزعه ؟؟

ومشكووووور مره ثانيه على الجواب الشافي ...