منتدى جديد للرحلات يعطي الأعضاء حطب ارطى

[حفرلوجيا]

سلام يالربع
كشت ثلاثة أيام بالنفود مع أصحاب شرواكم أنبسط معهم بـ( كل الأحوال ) وتحت أي ظرف
======== بكل الأحوال .. أسمحوا لي آخذ راحتي .
آخر يوم بكشتتنا كنت أتمشى مسيان ومريت بجيران مخيمين سلمت من بعيد ولحقني واحد منهم يلزم على .. فنجال .. ولا يفوتك حنا أعضاء ومشرفين بعد شوي يبدا عبر الأقمار الصناعية حلقة من برناج ( الدروب المتخالفة ) وهي أشبه بـ( مصارحة حرة ) بين الأعضاء والمشرفين – حسبما ذكر هذا الملزم – في منتداهم ( تمشيات ) للرحلات .;)
جلسنا وبدأ البرنامج على الهواء .. حاطين الكمبيوترات بكل زاوية ( إيه هذا المنتدى اللي يوسع الصدر ويحقق الأحلام بخيمة ( كشاتة اونلاين) .:)
بدأ البرنامج بمقدمة موسيقية ( انا ناقل وقائع ) وهي لسالم الحويل :
الف أولف من كلام ( نظيف )
بعدها طلع المذيع يقول : هذا فيصل عاقد الشوش يحييكم .. وبدا يهل الأسئلة
ماهي طبيعة علاقة المشرفين بالأعضاء بمنتدى ( تمشيات ) ؟ هل عرف المشرفون تفكير الأعضاء وما يدور بأذهانهم ؟ أم ان العملية حط مشاركات وبس ؟ .. وبالمقابل هل أدرك الأعضاء حجم الجهد الذي يبذله المشرفون ؟ أم ان المسألة خل مشاركتنا تمشي لو هي ( بايخة ) والباقي ماعلي منه ؟ ... وقبل أن نقدم ضيفينا اليكم سؤال الاستفتاء :
من الذي يقدم الجهد الأبرز في منتدى ( تمشيات ) المشرفون أم الأعضاء ؟
.. نستقبل اجاباتكم على القناةالعامة ( 145 ) وإذا انت من الشمال ( 146 ) ..
إلى ضيفينا معنا في في الأستديو بالعوشزيات ( خباري غرب الصمان ) السيد ( عضوجي ) .. وعبر الأقمار الصناعية المشرف ( ذباح ) من روضة حسناء ( وسط الصمان ) .. ( لاحظوا المشرف بحسناء يتنعم والعضو بالعوشزيات يمخش .. من أولها )..;) :p
وبدأ المذيع يسأل : ذباح يتهمكم البعض بأنكم لاتتفاعلون مع الأعضاء كما ينبغي .. وأحيانا تطنشون .. وجيدين بس لو تدبس مشرف مع عضو فزعتوا له ؟
واسمح لنا نستمع الإجابة بعد الفاصل
فاصل ( ياعلي خل الرواخي يهرجني ) لعبد الله الصريخ
------------ يتبع

[هواوي]

هلاوالله وغلا حياالله حفرلوجيا

ممكن اللقاء هذا برعايه اي شركه ؟؟؟؟؟؟؟؟؟؟؟؟؟

حفرلوجيا حنا ننتظر بقيه الموضوع

[حفرلوجيا]

الجزء الثاني وقبل الأخير
المذيع : تفضل بالإجابة يامشرف ذباح..
ذباح : أود التأكيد ان المشرفين مدركون تماما لأهمية الأعضاء لأن المنتدى قائم على مشاركاتهم .. ولكننا نتعامل مع خليط متنوع الأعمار والثقافات و( الأهداف ) .. إضافة إلى اننا أكثر من يستنزف الوقت في متابعة ( كلش ) وتطير علينا الساعات بدلا من قضاء مستلزماتنا الخاصة .. لكن كله على شان المنتدى والأعضاء يهون .. والفزعة اللي تقول عليه ( هناك أمور في الخفاء لانود ان نزعج الأعضاء بها ) .. وعلى ذلك لا يعقل ان اتعامل مع مئات أو ألاف الأعضاء بالتوجيه وتبادل الرأي ..
المذيع : ليس من الممكن التعامل مع الأعضاء جميعهم أو تبادل الرأي .. ماذا ترى يا( عضوجي ) ؟
عضوجي : كون الأعضاء خليط من الأعمار والثقافات و( الخبرات ) فهذا أدعى لتبادل الرأي المستمر خاصة إذا برز من يستعد لذلك حتى في نطاق الردود على المشاركات .. نعم لدى المشرف سياسة عامة .. ومسؤلية فكرية وإدارية وصلاحيات .. ولكن ذلك لايعني الغاء ( مجال الحركة ) أوالمبالغة في الإعتداد بالرأي .. ورغم انني أعذر المشرفين إذا اعياهم الرأي مع زحمة وضغط الوقت الا ان ذلك لايستمر طويلا مع زوال ( الزحمة ) .. فالحكمة في مجال معين قد تأتي من أقل الأعضاء ثقافة وإدراك ..
المذيع : نستقبل اتصالاتكم ولكن بعد الفاصل
حجاب بن نحيت : كلامك صح ولا تشرح ولا تضرب ولا تطرح
----------- يتبع

[حفرلوجيا]

الجزء الثالث والأخير
المذيع : معنا اتصال من ( مسويها ) من الثمامة ( ولا تسألون وش اللي مسويها ذا );) :confused: .. تفضل :
مسويها : ياخوي أنا عضو قديم عطوني وجه .. انا ماهي معجبتني فواصل البرنامج .. وينكم عن أبو حمد ( بشير شنان ) .. وبعدين فيه مشرف مستقصدني اذا ماتسنع ابفضحه .. اجل مشاركاتي يحذفها او يلزقها على غيرها .. ترى انا تخصصي ( تهاني ) ولا أعرف غيرها .. عاد انتم احترموا التخصص .. وإلا ترى انزل عليكم مشاركات توديكم بداهية مثل .... طوط .. طوط ..
المذيع : أخونا ( طفران ) على الكنترول يقول انقطع الخط ( ايه هين ):good: معنا كبير المشرفين ( الموافق ) .. تفضل :
الموافق: استغرب وجود مثل ( مسويها ) بيننا .. وأتمنى ان يرتقي الأعضاء جميعا إلى مستوى ( علومنا ) الطيبة بـ( تمشيات ) .. ثم انني أجد بعض العذر للمشرفين ان لم يحسنوا التصرف مع هؤلاء .. أحلى تحية;) ( كبير المشرفين ذابحة مبدأ خير الكلام ماقل ودل ومن إدمان هالمبدأ يمكن تنسحب الأمور على كل شي .. الله يعين ربعه اذ المخبات يلحقها خير الصرف ماقل وهلل..)
المذيع : نشكر ( الموافق ) .. معنا اتصال من ( رافع الليت ) تفضل :
رافع الليت : أنا عندي اقتراح .. وهو بما ان علومكم بعيدة عن ( الدنفسة ) وما فيها غير العلم الغانم ليش بعض الأمور تدور بالخفاء .. علموا الأعضاء وش يصير بتقرير حتى لو اختلفت الثقافات أو تدنت .. يعني تقرير مختصر أسبوعي أو شهري ( لو هو فالصو ) ياصل العضو عبر بريده ( يعني خلوه يتميلح ويحس انه ( يعنني) حتى لو ماعنده إلا الدجة ) بهالحالة ينضبط إذا براسه ( حارش وارش )..
المذيع : شكرا معنا اتصال من المشرف ( نشمي السنافي ) تفضل :
نشمي السنافي : ابختصر لكم القضية وأقول ان العلاقة بين من يدير وغيره .. هي علاقة تبادلية .. يعني مشرف جيد مع أعضاء غير متفاعلين ولا مرتقين بمستواهم يصير عندك مشرف غير ناجح .. كما أن أعضاء جيدين مع مشرف ( مصكك القزاز ) راح يصير عندك أعضاء متبالدين .. والعكس بالعكس ..( انا اشهد مايجيبها الا ملح ( تمشيات ) نشمي السنافي;) :good:
المذيع : ( وش خانتي انا .. شكلهم يبي يتفقون .. ولا تنعقد الشوش .. انسحب .. ولا أعلمهم نتيجة الاستفتاء ) .. انتهى وقت البرنامج ..
======= وقبل امشي من هاللي لزموا علي تفاجأت ان اللي بالخيمة خليط من أعضاء ومشرفين في منتدى ( تمشيات ) كاشتين .. وتفاجأت انهم اعطوني كسرتين ارطى قالوا لأيدك اليمين واليسار ( وانا ماأدري وش السالفة ) .. لكنهم طلبوا مني أصف معهم مثل ( قبائل افريقيا ) .. يقولون هذا شعارنا بعد كل نقاش أو حتى جدل نمسك كسرة بكل يد ونحلتهن بشكل جماعي .. على شان اذ طاحن نقول ( طاح الحطب ) بصوت واحد من كل ( عضو ومشرف);) :good: :good:
وسلامتكم

[حفرلوجيا]

تنويه تعذرني بعده ياغالي:
مشرف أغليه ومع الغلا لديه حس وإستشعار ( غير شكل ) نبهني سابقا( في حديث جانبي ) إلى أن كثرة الحديث عن علاقة الأعضاء بالمشرفين قد يعطي مؤشرا على شيء ما .. لايرغبه بعضنا .. أو يجر إلى اشياء لايرغبها المشرفون أو الأعضاء .. وأقول :
إن الشفافية التي على أصولها مع الود بين الجميع سوف لن تفضي إلا إلى الارتقاء والجودة .. أما إذا وجد بعض الناعقون صدقني لايستمر بقاؤهم طويلا بيننا .. فضلا عن أنني نزلت عند رغبتك وتنبيهك ولم أكتب عن المشرفين والأعضاء إلا في منتدى جديد أسمه ( تمشيات) ;) :D

[صقر]

انشهد انه طاح الحطب...

كل عام وانت بخير يا بو سليمان.. حمدا لله على رجوعك بالسلامة ... وعيديتنا بمكشات عودتك...

بارك الله فيك.....

[المربد]

الحمد لله على السلامة
وعساك من العايدين المقبولين
من منطلق ما كتبت، آمل انك ما توافق على الإنضمام الى قائمة المشرفين حتى لا تتغير علينا يا بو سليمان
لأنه فيه اشاعة يقولون انهم بيضمونك للإشراف.
فما ادري ايش رايك؟



بس ليتك معطينا الرابط حق منتدى جماعتك (تمشيات) علشان اللي يزعل يروح لمهم يطيبون خاطره بطيحة الحطب !!!

[عروان]

مرحبا يا حفرلوجيا

عيدك مبارك ومبروك عليك ألامطار.


تحياتي

[القماري]

بمنتدى (تمشيات) فاق على الجزيرة بالراي والراي الآخر :D بس الرابط حقه مايشتغل
www.tamshyat.com

[عبدالعزيز الدباسي]

ما يصير اخوي ( فيصل عاقد الشوش ) جالس انتظر على الهاتف اكثر من نصف ساعة ، وكل اشوي يقولون الحين تصير على الهواء .

الو ،،، الو ،،، تسمعني يا اخ فيصل ......... ايه اسمعك من معنا طال عمرك ،،،،

المتصل : معك فاعل خير

فيصل : تراك فاهم غلط يا اخوي ماحنا قاعدين نجمع تبرعات

المتصل : داري انكم ما تجمعون تبرعات ، لكن تجمعون اقتراحات ، وانا عندي اقتراحات وملاحظات

فيصل : عادي وانا اخوك عطنا اللي عندك .

المتصل : عندي سلمك الله بعض الاقترحات اللي اتوقع انها تشيل اقصد ترفع من مستوى تمشيات وهي الله يعافيك ( ولا يبلانا )

فيصل : وش دعوى الله لا يبلاك قالوا لك مريض

المتصل : اقصد الله لايبلاك باللي بلاهم

فيصل : ايه اقول كمل لا يجي اكثر

المتصل : اسف ان كانك زعلت ، لكن خل روحك رياضية وخلك بملابس داخلية

فيصل : لحظة وشلون وش تقصد بملابس داخلية ،،،

المتصل : اقصد تصير شفاف يعني بكل شفافية ، يعني خلك واضح وصريح

فيصل : والله من زين الثقافة ، الحين صارت الشفافية ( ملابس داخلية ) ، لكن صدق من قال خذوا الحكمة من افواه النص لفه ، لأنك حطيت براسي شغله وهي انك اذا صرت كلك شفافية و صريح واضح مع كل اللي عندك ، صرت مثل المتعري ، او على قولة عادل امام لابسه من غير هدوم ، وبها الطريقة تبي تفقد شيئين رئيسيين ، الاوله تصير مثل بيوت منول اذا انتفح باب الشارع تقدر تشوف غرفة النوم ، والثانية بما ان الباب متفوح تبي تلقى كل من هب ودب جالس بالمقلط وما يدرى منهو الضيف ولا صاحب الدار ، واكيد ان بعض الضيوف سنعين ويستاهلون يصيرون اهل دار ، وكلامهم رزين وافعالهم تشهد لهم ، وبعضهم يالله السلامة ، مستلج ، ويلعلع ، ولا اهنا احترام لكبير ولا احترام للمجلس .

واذا بدأ يكثر الغلط ويزود الخطأ ، وتضايقوا اهل الدار ، وبدأو يكثرون ( التنحنح ) تلقى هالامر ما يعجب بعض الضيوف لانه يحسب الدار مثل دار جيرانهم ما غير ( قهقه ) وبسطة وسعة صدر وما غير يتمشى من غرفة الى غرفة وكل وحده منهن يا متزاعل مع احد والا جادعن له كم كلمة ما تعجب السامعين

واكيد ان اهل الدار مهوب ساكتين على هالوضع ، ان كان مهوب لحساب الدار فهو لحساب الضيوف السنعين ، وما تلقى هم الا يغمزون بعيونهم ، يبونه يفهم ، لكن فضيخ قلب ، لا يسمع ولا يفقه ، واذا احترت قلوبهم عليه امسكوه على جنب وقالو له يا ابن الناس تراك مصختها وفشلتنا عند الضيوف ، قام يتلفت يمين ويسار وقال ( انا ) ايه انت والله من الدلاخة ، عاد يرجع ويقول ليه انتم حاطين دوبكم ودوبي يا اخي شوفوا اللي قاعدين ( يحفرون ) بالجدران ويكتبون ذكريات ما قلتولهم شى ،،،

يا ابن الناس اللي انت قاعد تتكلم عنهم شغلهم النحت وهوايتهم الرسم ، وهم ما قعدوا يشخبطون على الجدران على كلامك ، قاعدين ذولا الله يسلمك ينحتون اجمل الالفاظ ، واعمق المعاني ، واحلى الدرر ، وتقول يشخبطون ، يا اخي اذا كانك ما تفهم اللي قاعدين ينحتونه ، علمنا نشرح لك ، واذا كانك ما تعقل اللي يرسمونه علمهم على شان يغيرون الرسمة وتجى على مقاس فهمك

الو ، الو، الو ، الو

المتصل : وين يا اخ فيصل ، انت مذيع تستقبل الاتصالات والا مهرج ما تنعطى مكرفون ، الظاهر معدينك بعض هالمذيعين اللي في الفضائيات يستضيفون واحد ويتكلمون اكثر منه .

فيصل : لا لا اخوي حنا لكم والبرنامج من شانكم وحنا تحت امركم ، ولا ينجح البرنامج الا بطلتكم

المتصل : احلى يا اللبناني، يا صاحب احلى طله ، الا على قولة طلة ، ما ودكم تطلون علينا ببرامج جديدة ومسلسلات مفيدة

فيصل : ولووو ، تكرم عينك ، شوف إزا بدك ( تإترح ) اي شى او بتزيف اي شى او بتحكي اي شى ، لا يردك الا اللي ( بتماك )

المتصل : اشوف صدقت عمرك على انك لبناني انت وجهك ، عدل السانك لا الحين اجي اعدل وجهك ، لا ابوك ، لا اللي حطك بهالبرنامج ، والله اذا ما تزبط كلامك وتربط ( حنتسك ) لا اقفل برنامجك .

فيصل: آسف ، آسف اخوي وراك قلبت علينا ، و صرت تهدد و توعد ، ، يا اخي تصدق انك ذركتني ببعض ضيوف الدار اللي ( مهوب سنعين ) اذا زعلو عليك قاموا يهددون ويتوعدون ، على ادناة الدون .

المتصل : اقول لا يكثر الكلام ، لا ، الحين انزل المشعاب واخليك تعد اضروسك بالارض

فيصل : يا اخي عسى ما شر تعوذ من الشيطان ، لا تصير مثل قبائل الهنود الحمر اذا تخالفوا مع بعض كل واحد جاب معه مشعاب وبدا يضرب خويه على الراس الين يطيح واحد منه بالضربه القاضية ، والثاني ياخذونه للسجن ، يعني ما احد استفاد .

المتصل : لا ، لا ، انا مانيب من قبائل الهنود الحمر ، انا .......... انا الذي نظر الاعمى الى ادبي ، واسمعت كلماتي ،،،، اسف احسبي في برنامج مساجلات شعرية .
انا يااخوي ما يمشي معي اللف والدوران انا سيده واحب كل شى سيده .

فيصل : سيده وسيدي وسيد الكل يا ابعدي انت امر وحنا نطامر ، تدلل وحنا نغامر ،،، ابتسم نضحك لك ، أشر نذبح لك ،،، اطلب نصرف لك ،،،، تطق ، نفتح لك ،،،،، تدخل ، نفرش لك

المتصل : يا اخوي تراك احرجتن وبكلامك سيحتن وعز الله انك هبلتن ،،، الا على فكرة هالبرنامج ما فيه اهدائات .

فيصل : اقول اقطع الخط لا يبدا يشخبط علينا من جديد ،، اسف مشاهدينا الافاضل انقطع الخط وقاعدين ننتظر اتصالات ، والى ذاك الحين نترككم مع الاعلانات .

[المترو]

كيف الحال واحد داخل وهو مستحي يدخل بالموضوع اللي ماله دخل فيه
مع العلم اني ذهين الا اني مافهمت الزبده من التخطيمات بالردود
وش صاير عسى حبيب مكشات حفرلوجيا له طلبات ما نفذت والا له منافسين
داخلين عليه عرض

تحياتي