السوبر سفاري خبط

[محمد النيساني]

مساكم الله بالخير والرضا والعافيه :)
اخواني بغيت استشيركم :confused:
عندي موتري السفاري خبط علي قبل امس :mad: والموتر طبعا ماشي 355000 كلم :cool: وموديله 2000
يعني ماشاءالله عليه كفا ووفا:)
وش رايكم اوضب المكينه ولا اشتري مكينه مستعمله :confused:
وكم تكلفة التوضيب وكم تكلفة المكينه المستعمله مع اني صراحه ماهضمت فكرة المكائن المستعمله :mad:
وافضل ورشه في الرياض :D
ولا ابيعه واشتري جديد :good: مع العلم الي عندي مافيه شي ابد الموتر ورده مافيه الا المكينه

ارجو الرد لمن لديه الخبره والي ماعنده سالفه يستريح :p

شكرا لكم

[صاحب الجيب]

وعليكم السلام ورحمة الله وبركاته
مساك الله بالخير أخوي محمد

بس لو كنت ما أقتنعت بالمكينة المستعملة فهي أفضل من التوضيب حتى لو كان أطلق واحد بالتوضيب ولو كنت قادر على شراء سيارة ثانية أو تبي تستعملها فأنصحك أنك تدور لك مكينة نظيفة وتبطقها عليه وبالنسبة للقيمة ما عندي خلفية عن مكاين الجيوب وبالنسبة للتوضيب راح تلاقي قيمة التغيير أرخص من التوضيب وبالنسبة للورشة فيه عندك ورشة المميز في صناعية الدائري وورشة ما أعرف أسمها خلف ميزان العضيب وورشة المهندس في وسط الصناعية

وبالتوفيق وأن شاء الله ما يقصرون معك الشباب

[محمد النيساني]

يامال العافيه اخوي صاحب الجيب كفيت ووفيت شاكر ومقدر لك
في انتظار الشباب الباقين مانستغني عنكم

[محمد النيساني]

للرفع
^
^
^

[ابوصنهل]

انصحك تركب مكينة فتك 4800 اعرف واحد مركبها في القصيم 18الف على سفاري 2001 يمدحها مدح مسرف ارجوا اني افدتك
تقبل مروري....

[عاشق السيل]

مساك الله بالرضا والسعادة ،،

مرة رحت للتشليح مع واحد من الشباب بس نسيت وش كان يبي !! الحاصل إني سألت راعي التشليح قلت أنا معي سوبر سفاري 98 ومكينته زي الساعة بس ودي أركب مكينة فتك 4800 قال تكلفك 11 ألف مع الرجيع ( يعني المكينة الأولى ) ،،

وهل تتوقع إن التوضيب يبي يوصل للسعر هذا ؟؟!!

علشان كذا أنصحك توضب المكينة لأنها تبي تصير جديدة من الزيرو بس أهم شي حطها عند واحد فنااااان وفاهم !!

أما المستعملة يصير عليها ضمان شهر وإلاّ شهرين وبعدين ممكن تتوفق فيها وإلاّ الله يعينك على المشاكل !!

أما تغيير السيارة لاتفكر فيه إلا بعد توضيب المكينة علشان تبيعها بأفضل قيمة والله يوفقك لكل خير ،،

وتقبل مروري يالغالي .....

[سفير الصمان]

السلام عليكم ورحمة الله
انصحك يامحمد أنك توظب المكينة تراه أفضل من أنك تشري مكينة مستعملة
هذا رأيي لأنه أفضل حل وأرخص وأنصحك تشتري قطع أصلية من وكالة الحمراني

[NissaN 1990]

أخوي محمد النيساني بالنسبه لممشى الموتر يعتبر قليل وبدري أنه يخبط لأن النيسان يمشي أكثر من كذا ولا تفك مكينته فلاكن الله يعوض عليك وأما بالنسبه لسؤالك أنا أقول إذا موترك نظيف ولا عندك نيه تبيعه متحسف عليه ما لك إلا إنك توضبه توضيب كامل والقطع من الوكاله أحسن لك وكلها مع القطع والمخرطه والميكانيكي ما راح تكلفك أكثر من 8000 ريال ،،، وإنتبه تشتري مستعمل لأنها إذا تجملت معك راح تمشيك بالكثير سنه وعلى كذا ما أستفدت شي ولا تدري عن المكينه اللي تبي تشتريها وبعدين أهل التشليح ما يعطونك مكينه نظيفه و بعضهم يا خذا الرجيع ويوضبه قطع تجاري ويرجعها على نفس السياره ويبيعها على أساس إنها في السياره نفسها ويحلف إنه ما فكها لأحد أبداً ،،، ومثل ما سواها مع غيرك يمكن يكون مسويها معك فلذلك ما لك إلا التوضيب وعليك بالورشه اللي شغلهم زين ولا تحرص على الورشه دور ميكانيكي صح وخله يضبطها لك

وكل هذا الكلام من واقع تجربه مع النيسان ،،،


وآتمنى إني قدمت معلومه مفيده وأتمنى لك التوفيق

[محمد النيساني]

انصحك تركب مكينة فتك 4800 اعرف واحد مركبها في القصيم 18الف على سفاري 2001 يمدحها مدح مسرف ارجوا اني افدتك
تقبل مروري....

ابو صنهل
شاكر ومقدر على مرورك الكريم بالنسبه لمكينة الفتك قالي واحد لازم تغير معاها القير والعمود
ناهيك عن الأمور الأخرى. وشكرا لك

[محمد النيساني]

مساك الله بالرضا والسعادة ،،

مرة رحت للتشليح مع واحد من الشباب بس نسيت وش كان يبي !! الحاصل إني سألت راعي التشليح قلت أنا معي سوبر سفاري 98 ومكينته زي الساعة بس ودي أركب مكينة فتك 4800 قال تكلفك 11 ألف مع الرجيع ( يعني المكينة الأولى ) ،،

وهل تتوقع إن التوضيب يبي يوصل للسعر هذا ؟؟!!

علشان كذا أنصحك توضب المكينة لأنها تبي تصير جديدة من الزيرو بس أهم شي حطها عند واحد فنااااان وفاهم !!

أما المستعملة يصير عليها ضمان شهر وإلاّ شهرين وبعدين ممكن تتوفق فيها وإلاّ الله يعينك على المشاكل !!

أما تغيير السيارة لاتفكر فيه إلا بعد توضيب المكينة علشان تبيعها بأفضل قيمة والله يوفقك لكل خير ،،

وتقبل مروري يالغالي .....

عاشق السيل
كفيت ووفيت اخوي عاشق السيل والله يجزاك خير الجزاء ويبارك لك بموترك

[محمد النيساني]

السلام عليكم ورحمة الله
انصحك يامحمد أنك توظب المكينة تراه أفضل من أنك تشري مكينة مستعملة
هذا رأيي لأنه أفضل حل وأرخص وأنصحك تشتري قطع أصلية من وكالة الحمراني


مهاوش
وهذا الي بسويه بوضب المكينه والله يعين شاكر ومقدر لك اخي العزيز مهاوش

[محمد النيساني]

أخوي محمد النيساني بالنسبه لممشى الموتر يعتبر قليل وبدري أنه يخبط لأن النيسان يمشي أكثر من كذا ولا تفك مكينته فلاكن الله يعوض عليك وأما بالنسبه لسؤالك أنا أقول إذا موترك نظيف ولا عندك نيه تبيعه متحسف عليه ما لك إلا إنك توضبه توضيب كامل والقطع من الوكاله أحسن لك وكلها مع القطع والمخرطه والميكانيكي ما راح تكلفك أكثر من 8000 ريال ،،، وإنتبه تشتري مستعمل لأنها إذا تجملت معك راح تمشيك بالكثير سنه وعلى كذا ما أستفدت شي ولا تدري عن المكينه اللي تبي تشتريها وبعدين أهل التشليح ما يعطونك مكينه نظيفه و بعضهم يا خذا الرجيع ويوضبه قطع تجاري ويرجعها على نفس السياره ويبيعها على أساس إنها في السياره نفسها ويحلف إنه ما فكها لأحد أبداً ،،، ومثل ما سواها مع غيرك يمكن يكون مسويها معك فلذلك ما لك إلا التوضيب وعليك بالورشه اللي شغلهم زين ولا تحرص على الورشه دور ميكانيكي صح وخله يضبطها لك

وكل هذا الكلام من واقع تجربه مع النيسان ،،،


وآتمنى إني قدمت معلومه مفيده وأتمنى لك التوفيق

nissan 1990
وجهك ابيض اخوي نيسان انشهد انك ماقصرت ومعلومات قيمه وبالنسبه للتوضيب فكلامك 100% لأني سألت
واحد معه نفس موتري ويقول كلفه حول السبعة اّلاف شاكر ومقدر لك .

في النهايه مااقول الا جزاكم الله خير الجزاء وهذا الي سمعناه عن اعضاء منتديات مكشات
ناس تحب الخير وتعين وتعاون
شكرا لكم

[ممتر البران]

السلاام عليكم
نصيحه من واحد لكعته الورش
والمواتر الخربانه
لا ثم لا ثم لا توضب
منتب لاقي احد يظبطها لك ولو لقيت تراه بيسرق منها قطع نصيحه بالمستعمل خذ لك واحد خبره بمكاين المستعمل وركب لك مكينة موتر مثل موترك مستعمله وتكون نضيفه
كيف تعرف انها نضيفه؟
الجواب
شف ممشا الموتر
شف الصدمه مع وين في الموتر المشلح
تاكد انها ما وصلت المكينه
شيك على الوجيه (القازقت) تاكذ انهن حقات الوكاله وحقات الوكاله تجي لون رمادي او رمادي تخاضره
شيك على عيار الزيت وشف زيتها
شيك على كراسيها انها مركبه صح لا تكون مفكوكه ومصلحه
احرص على طول فترة الضمان
احرص على اخذ شخص فاهم في هالشغله
نقطه مهمه استخر فهنالك فائده عظيمه غافل عنها البعض

وتحيتي لكم
ابو سعد

[مقلع الرمث]

اخوي درولك باترول فتك ولا نفس مكينتك تحصله صادم وقالب والمكينه نظيفه والموتر مامشى الا قليل وماعليلك وتوكل على الله ولا ركب ال اس وان عند الصمعاني ببريده قويه ومزبوووطه على الباترول

[Abu Saad]

الممشى قليل اخي العزيز بالنسبة للسيارة ...
المكينه مهملة تماما والموتر ماله والي فيما يبدو لي ...
وهذا سبب التخبيط والله اعلم .
وضب قطع وكالة وخل عنك التشاليح .

[محمد النيساني]

ماقصرتم اخواني الأعزاء
ولي عودة للتعليق

[sami2003]

اخي العزيز
من وجهة نظري ان تدور بالتشليح على سيارة مقلوبة او مصدومة وتاخذ مكينتة اذا كانت نظيفة
والحل الثاني ان توظب المكينة وتحط قطع غيار اصلية ليييششش!!!!
لان المكائن المستعملة كلها غشش لانهم هم يوظبونها بانفسم يقطع غيار غير اصلية و من ثم يبعونها بربح كبير علينا يالسعوديين !!!!؟؟؟؟؟؟
ولذلك هم لازم ياخذزن منك المكينة القديمة عشان يبعونها على واحد !!!؟؟؟ غيرك
وبعدين اخوي قبل كل شي لازم تكون حريص على صيانة المكينة من زيت وماء ...الخ لان الممشى قليل وحتى لو وظبيت المكينة وماغيرت من طبعك!!!! تكون في حلقه مفرغة يعني بعد سنتين اوسنة رايح توظب من جديد
وشكرا

[شقران نجد]

اخوي محمد ركز من اللحين انك تبحث عن الميكانيكي اللي عليه الكلام في التوظيب وان طعت شوري ورشة عرب ولابنقاليه عض ثوبك ......

[بدوي جنوبي]

ارجو الرد لمن لديه الخبره والي ماعنده سالفه يستريح :p

شكرا لكم



ان شاء الله الجميع عندهم سالفه

عموما
انصحك بالتوضيب والاحتفاظ بمحرك سيارتك
يكفيك ان كل شي فيها شد بلد وما تغيراي قطعه فيها

من ثلاجه وسلندر وراس السلندر
واذرعة البساتم وبلوف وخلافه
واعمدة تيمن وبعض التروس الداخليه وحتي عمود الكرنك
هذي تكفي انك تحتفظ بالمحرك القديم

ابتعد عن التشليح نهائيا

بالتوفيق ان شاء الله

[الوايلي100]

ركب مكينة فتك وشف العزم والقوه ..........

[ناوي نيه]

طيب مافكرت بمكينت تويوتا والله انا اشوف جيوب واجد نيسان عليها
مكاين لاند كروزر اول شي ارخص بوااااااااااااااااااااااااااجد سعرها 7000 اخر مره سئلة
وفيه مين يولفه ويركبه زين
بس اذا انت واحد تحب شغل الوكاله لاتركبها

[ابومدين]

اخوي احذر من المكائن الجاهزه
الا مكينة توقف انت على فكها من سياره مصومه والا مكينة مافكت قبل كذا
وانصحك بتشليح العجلان بالقصيم 063294000 والله يعوضك خير

[شمالات نجد]

ضامن التوضيب وضب ولا تستعجل على السيارة خل الورشة يشتغلون فيها على راحتهم

الله يوفقك والجميع

سلام

[الساهر2003]

اخوي وضب افضل لك لان الغش وارد والمكاين المستعملة في الغالب موضبة والاستعمال الياباني قليل يظبط ويمشي اكثر من سنة
وممشى موترك قليل واتوقع السبب انك تغير الزيت بزيت خفيف مثل موبل 1 اوتيوتا او غيره من الزيوت الخفيفة
وممكن تروح لورشة السعيد على طريق الملك عبد الله بعد اشارة طريق الملك عبدالعزيز ووجهك لشرق وهي على اليمين ويوجد فيها فنيين فلبينيين ممتازين لكن اسعارهم غالية شوي ومجربهم على مكسيما ورجعوها مثل شد البلد
مع اطيب تحية للجميع

[فهاااد]

والله انا اقول بعه وشتر جديد وريح راسك

[محمد النيساني]

يامال العافيه والغناه ياقروم مكشات جزاكم الله خير الجزاء
ممتر البران
مقلع الرمث
abu saad
sami2003
al-sayara77
بدوي جنوبي
الوايلي100
ناوي نيه ابو مدين
abu azaam
الساهر2003
دحلوب
انشهد انكم ماقصرتم ونصائحكم اخذتها بعين الأعتبار
بالنسبه للمكينه انا حكمت عليها انها خبطة بعد الكشف على المكينه بالكمبيوتر من قبل فني فلبيني
وكانت المشكله اهتزاز في المكينه مع صوت تكتكه في ودخا ن ابيض من الشكمان المهم فحص الفلبيني يمين يسار وجاب
خويه الثاني يفحص معاه المهم جا عندي قال المكينه يبغا توضيب قلت ليه وش المشكله قال البساتم ضعيفه مره
ومماتتحرك بالوجه المطلوب وتطلع صوت التكتكه وترج المكينه قلنا خلاص الشكوى لله نوضب وعطاني ورقة الفحص
وكاتب فيها بالأنجليزي المكينه مخبطه رحت البيت وعطيت اخوي الصغير السياره وقلت ودها الورشه الفلانيه علشان يبدون
يشتغلون في المكينه راح الرجال ووداها عند ميكانيكي يعرفه من فتره سوداني الجنسيه وخلاها عنده جا الرجال وقالي وديتها عند خويك الفلبيني
بعد يومين جاني اخوي وقالي ترى سيارتك جاهزه كيييييييف قال جاهزه قلت طيب قطع التوضيب لسا ماشريناها قال مااااااافيه لاتوضيب ولاشي
الفلبيني الي وديتها عنده ماااعنده سالفه وديتها عند خويي السوداني وطلع عندك رووس العصافير تبع البلوف وحده منها مكسوره وغيرها بوحده
من عنده وموترك الحين لافيه لارجه ولاتكته رجع جديد مثل اول قلت بيض الله وجهك ياالنشمي
رحنا للسوداني واستلمنا السياره وماكلفت الا 250 ريال وزده فوقها (والله يستاهل) طبعا ركب القطعه بدون اخراج راس المكينه تشكرنا من السوداني ومشينا للفلبيني السباك
توجهة لمدير الورشه سوداني الجنسيه وعلمته السالفه وقال مايصير خاطرك الا طيب ورجعلي فلوس الكشف وقالي الفلبيني هذا مارح يقعد اكثر من اسبوع.
زبدة الموضوع
عند عطل السياره لا قدر الله لاتكتتفون بتقييم المشكله من قبل فني واحد لكي لا تقعوا في الخطاء الذي وقعت فيه
وتم تداركه ولله الحمد والمنه
نتمنى منكم الأستفاده من هذا الموضوع
والسلام عليكم ورحمة الله
اخوكم المكشاتي الجديد محمد النيساني

[Abu Saad]

اي يرجال ... هذا العلم المضبوط ... قايل لك 200 الف وحتى 400 الف كيلو مستحيل تخبط المكينه الا اذا صارت بدون والي ومسبله ..
طبعا لاتكتفي بالتشخيص من ميكانيكي واحد هذي لابد منها ..حتى في الامراض لاتاخذ العلم من اول دختور :)
والحمد لله على السلامة ..
وبالتوفيق

[عاشق السيل]

لو أنا داري إنك مارحت إلاّ لميكانيكي واحد كان صار لي معك كلام ثاني !!!!

لكن الحمد لله على السلامة وبردها الله بالعافية وعقبال عشرين سنة بدون مشاكل ،،،،



برضو لازم أنصحك :

انتبه تاخذ قرار ميكانيكي واحد أو حتى اثنين مهما كانت الشغلة بسيطة ،، واللي يقهر أكثر إنك مقرر توضب أو تغير المكينة من أول مهندس !!!!!! الله يهديك بس ....

[NissaN 1990]

هذا الكلام اللي ما عليه غبار لأن ممشى الموتر قليل جداً والسفاري يمشي فوق 500 ألف ما عنده مشكله وبعدين أول شي يصلحله شنمبر وبعدين راس مكينه وبعدين توضيب ما هو على توضيب ،،،،،، وأما فحص الكمبيوتر خرطي ما عندك أحد الكمبيوتر براس السوداني ما شاء الله عليه ،،، وإنبته تروح للكمبيوتر مره ثانيه لأنه ما يفيدك بشي خرطي مغير ياخذون فلوس الناس على الفاضي ،،،،

[مسايف الطعس]

أنا قايل في نفسي وش لون تخبط على 355000 ألف والله لو أنه أكسنت موهب باترول

لأني خابر ماتخبط الى فوق 500000 وأكثر بعد بواجد

تحياتي

[مخاوي الذيابه]

وضب المكينه ولا تشاور ...

[الوايلي100]

بيض.....! الله وجه السوداني