نبي فزعتكم يالكشاته ابي اروح لروضة خريم وابي مكانه

[مكشات عنيزه]

السلام عليكم ورحمة الله وبركاته


يالله حي الكشاته كلهم قديمهم وجديدهم


الي ابيه واضح من العنوان لكن لا مانع من اعادته
الصراحه ودي اروح لروضة خريم خصوصا بعد كثرة رحلات الشباب له بالوقت هذا
ونشوف منهم الصور الي تشرح الصدر فقررت انا وواحد من العيال
اننا نروح يومين ونرجع والصراحه لا انا ولا هو ماعمرنا طبيناه والسؤال
ياليت احد يفيدنا بطريقه من القصيم وبالتحديد عنيزة
وهل هي تحتاج قارمن
ووش نوع الارض هناك غراز والا صبخه يعني يحتاج اركب عمود الدبل
خبركم شروكي ولا يصلح عمود الدبل بالخطوط
ووين الاماكن الطيبه هناك وياليت يكون وصفه بالتفصيل

[راشد الخلاوي]

أخوي مرحبا فيك

على طريق ارماح القادم من الرياض طريق الدمام

تكون على نفس الطريق قبل رماح بشئ فليل بتشوف الحدود المحطوطة على الروضه مع العلم أني ما رحت لها لاكن يجب التأكد أكثر

أخوك الخلاوي

[جراند شروكي]

السلام عليكم ورحمة الله وبركاته



يالله حي الكشاته كلهم قديمهم وجديدهم


الي ابيه واضح من العنوان لكن لا مانع من اعادته
الصراحه ودي اروح لروضة خريم خصوصا بعد كثرة رحلات الشباب له بالوقت هذا
ونشوف منهم الصور الي تشرح الصدر فقررت انا وواحد من العيال
اننا نروح يومين ونرجع والصراحه لا انا ولا هو ماعمرنا طبيناه والسؤال
ياليت احد يفيدنا بطريقه من القصيم وبالتحديد عنيزة
وهل هي تحتاج قارمن
ووش نوع الارض هناك غراز والا صبخه يعني يحتاج اركب عمود الدبل
خبركم شروكي ولا يصلح عمود الدبل بالخطوط

ووين الاماكن الطيبه هناك وياليت يكون وصفه بالتفصيل


هلاا مكشات عنيزه الطريق سهل وما يضيع اطلع على طريق الدمام يعني كأنك رايح للدمام تبي تجيك لوحه مكتوب عليها رماح اطلع مع المخرج يمين وياخذك الطريق يسار امش مسافة تقريبا 50 كلم طبعا راح تجيك محطة على يمينك اذا ودك بشي منها قبل لا توهق لانه ما بعدها محطة الا بعد الروضه طبعا بس مو بعيد منها بس على شان تاخذ احطياطاتك ... راح يجيك كبري وهذا هو مفرق خريم لا تطلع من فوق ادخل المخرج يمين ومكتوب الظاهر لوحه روضة خريم يمين .......... طبعا راح تمشي سيد واحد راح تجي الروضة بوجهك اذا ودك بمكان زين قبل البوابه ادخل يمين وباري حواجز الروضة الين يجيك شعيب خارج الروضة وراح يعجبك المكان ....
اتمنى اني وصقتلك زين ... واذا عندك استفسار راسلني على الخاص واعطيني رقمك وابشر بعزك اخوي ..

[بواسامه]

ياراعي عنيزة
ياحبيلكم ياهل عنيزه بعد
اطلع ووجهتك للرياض لين يجيك مفرق دقله والثمامه
تروح يسار قبل الرياض ب90 كيلو لانه مالك سنع بدخلتك للرياض وتتجه شرقا تجاه الثمامه ويجيك تقاطع خله وبتل لين يلف الخط بك جنوب وتخلي روضه الخفس على اليسار ووجهك يصيرجنوب لان الخط يلف على الطعوس والطعوس على اليمين وبتل لين يجيك محطة خزام بعد40 كيلو ممشي والطعوس على اليمين عقبها مباشره بيجيك المحطه خزام المعروفه ومقابلها مفرق البويب رح معه يسار ووجهتك للشرق تجاه العرمه وتطلع العرمه وابتل حول 40 كيلو لين تجيك الرمحيه ولف يمين تجاه رماح الفرق بينهن حول 15 كيلو وواطلع من رماح وقبله ماتطلع اذا تبي غداء فانص مطعم الامراء في رماح:D اطلق الموجود هناك وبعدين خل وجهتك للرياض وطريق الدمام وامش 25 كيلو فقط تجيك غيلانه ديرة صغيره على اليسار وقبلها ب2 كيلو خش يسار ووجهك شرق تطيح بالربيع المذكوروباطراف الروضه جهة الطعوس وشعيب غيلانه والماء الربيع وهو شمال الروضه ويستاهل العنوه

[عاشق الخلاء]

كان ودي افيدك بس ماقصر شروكي كفى ووفى . وصف دقيق ومايبغالك وراه شيء تمنياتي لك برحلة سعيده

[جراند شروكي]

شف اخوي شغلة قارمن ما اتوقع تحتاج ابد ... وبالنسبة للارض تمشي فيها السياره الصغيره ابد هذا اذا كان ودك توقف وتنزل على رجليك وسط الروضه ... يعني طلعة تمشيه مو مقناص
لكن اذا مشيت على المكان الي وصقتلك هو لا والله المنطقة يبيلها دبل تعرف ارض الشعيب صعبه بدون دبل ....
وبالنسبه لوصفها من عنيزه لا وصلت الرياض امسك طريق الدمام واذا طلعت من الديره اتبع وصفي السابق وانشاء الله راح توصل ...........

[جراند شروكي]

يا مكشات عنيزه هذي بعض الصور للروضه لكن ترى امحق من تصوير ترى بالجوال ..... بس حبيت اونسك شوي وتتحمس ... مع ان الصور الظاهر ما تحمس . هههههههههههههه



http://www.filaty.com/ithumb/805/1d11af8.02052008795.jpg (http://www.filaty.com/i/805/1d11af8.02052008795.jpg)
http://www.filaty.com/ithumb/805/1d11af8.02052008794.jpg (http://www.filaty.com/i/805/1d11af8.02052008794.jpg)
http://www.filaty.com/ithumb/805/1d11af8.02052008793.jpg (http://www.filaty.com/i/805/1d11af8.02052008793.jpg)
http://www.filaty.com/ithumb/805/1d11af8.20080502214.jpg (http://www.filaty.com/i/805/1d11af8.20080502214.jpg)
اخوك / ابو فهد

[خوي القروم]

السلام عليكم اخوي كشات عنيزه واسف علي التأخير في الرد علي طلبك في موضوعي لكن بعد وصف اخوي جراندشروكي اللي مابعده تعدي ازيد عليه ان الدبل ماله داعي المكشات جنب القار والربيع قريب اذا وصلت الروضه وبوابتها اللي عند برج الجوال اسفط يمين او يسار ووقف سيارتك جنب الصبات وشل اغراضك وادخل داخل شوي وتحصل مايسرك وينقض تعبك والطلح والضلال متوفر والحر بسيط مع نسمه هواء

[مكشات عنيزه]

السلام عليكم ورحمة الله وبركاته
ياناس والله ما ادري وش اقول ووش اخلي
ويلومونن اذا صرت عضو بهذا المنتدى
والله انكم تدورون الفزعه حتى لو عليك كلافه
والله انكم ما قصرتوا وكفيتوا و وفيتوا
يمن العافيه اشهد اني طلبت الفزعه من رجال


اخوي راشد الخلاوي
والله انك ماقصرت ووصفك واضح
لكن يمكن الطريق مع الرياض القصيم السريع افضل وشاكرا لك من كل اعماق قلبي.


اخوي قراند شروكي
بيض الله وجهك وصفك واضح وما يحتاج لكن مثل ما رديت على اخونا راشد الخلاوي
اتوقع لو ادخل قبل الرياض يمكن احسن وشاكرا لك من كل اعماق قلبي يعطيك العافيه .
واذا حتجت شي ادري انك ماراح تقصر يعطيك العافيه


اخوي بو اسامه
والله انا الي احبك وحتى الشباب ما يهونون
يمن العافيه على الوصف الدقيق والمفصل والله اني احاول القا شي ما افهمه بس عجزت كله فهمته
وما قلت الكلام هذا قصور بالشباب لا بس لان طريقك من الرياض القصيم السريع
بيض الله وجهك وعطاك على قد نيك ابسلك ان شاء الله طريقك والله يسهل
واكيد ان الروضه تحتاج العنوه بعد الصور الي شفناه وشاكرا لك من كل اعماق قلبي.


اخوي عاشق الخلا
مرورك بموضوعي هذي اكبر افاده يعطيك العافيه وادري انك ودك لو تعطين تلميحات
لكن مثل ماقلت الشباب ما قصروا
يعطيك العافيه وشاكرا لك من كل اعماق قلبي


اخوي قراند شروكي
اشكرك مره اخرى والله يسهل عليك والله انك افدتني من ناحية القارمن
لان الصراحه ما عندي قارمن واعرف واحد عنده لكن تعرف
اخاف يصير به احراج وحتى انا ما احب استعمل شي ما املكه
اشكرك من كل اعماق قلبي.


اخوي قراند شروكي
والله ان فشلت منك احس اني ثقلت عليك يعطيك الف الف الف عافيه
والله انك راعي فزعات ولا يهونون الشباب يعطيك العافيه على هذي الصور حمستن زود اشكرك من كل اعماق قلبي.


اخوي خوي القروم
يعطيك العافيه على مرورك على الموضوع وانا ما خلان اكتب موضوع جديد
لان موعد الكشته احتمال انه يكون الثلاثاء واخاف انك يصير عندك ضروف
وتتاخر على المنتدى
وانا ادري انك ما راح تقصر والدليل اني اول ما طلبت الفزعه منك بموضوعك
يمن العافيه واشكرك من كل اعماق قلبي.

[دغيم1]

السلام عليكم ورحمة الله وبركاته
حياك الله أخي الكريم
مكشات عنيزة
لعل الأخوة كفوا ووفوا ولم يقصروا وهذا ماعهدناه من أحبابنا في بيت الجميع مكشات
ولكن لعلي أدلي بدلوي وابين لك طريق يختصر عليك المسافة قليلا وهو مشابه لما ذكره أخي العزيز أبو أسامه
من طريق القصيم - مفرق دقلة الثمامه - أطلع سيده وتعد التقاطع - (30كم ) - حتى مفرق الطوقي التنهات - ينحني الطريق يمين وسوف تشاهد عروق الدهنا - وقبل مفرق الطوقي التنهاة - سوف تشاهد على يسارك روظتي الخفس - خذ يسار مع مفرق الطوقي التنهاة - ( 34 كم ) - بعد الطلعة خذ يسار - سوف تستمتع بمشاهدة شعيب الطوقي - ودكة الملك سعود -أستمر بالسير ويأتيك دوار الحفنة - الرمحية - خذ يمين إلى الرمحية - ( 38 كم ) بعد وصول الرمحية خذ يمين ثم يسار واطلع الجسر ( الكوبري ) واتجه سيده إلى رماح ( 15 كم ) - بعد الوصول إلى رماح - استمر سيده - ( 20 كم ) - إلى هجرة غيلانه - وقبل الهجرة بـ 2 كم خذ يسار إلى أطراف روضة خريم
اللون الأزرق على الخريطة هو مسارك
تمنياتي لكم برحلة سعيدة وأمنه
حفظكم الله وسهل أمركم
ملاحظة : ( هذا المسار يختصر أكثر من - 30 كم )

http://www.mekshat.com/pix/upload02/images69/mk46848_dscf2375 (small).jpg


طبيعة الأرض : الجهة الشمالية والجنوبية والغربية جيدة ولايوجد بها غراز .
الجهة : الشرقية وجزء من الشمالية بها نفود .
يمكنك مواصلة المسير من الجهة الجنوبية - هناك شعيب واودية جميلة تتجه بك شرقا إلى روضة أم القطا - إلا أن الروضة لم يصل عنها أخبار جيدة .

[مكشات عنيزه]

السلام عليكم


اخوي دغيم1
يعطيك العافيه وماقصرت ووصفك ماشاء الله واضح مثل سطوع الشمس
لكن حبيت اسألك عند نقطه اشكلت علي :
(اذا جت الرمحيه خذ يمين بعدين يسار واطلع الجسر سيدا)
الصراحه هذي صارت بالنسبه لي متاهه ياليت لو تفصل بهذي شوي
هل قبل او بعد الرمحيه او داخله
وهل الشارع الي بعد يمين ويسار يمتد فوق الكبري ولا تحته ومن التفاصيل هذي،
خبرك ما عمري رحت ولا ودي اتوهق اذا رحت تحملنا شوي
وعلى العموم يعطيك الف عافيه ورايك بيضاء وشاكرا لك من كل اعماق قلبي