يالربع ..أحد له على الشروكي كلام يعطينيه بسرررررعه!

[بن طلق]

بسم الله الرحمن الرحيم

أنعرض لي قراند شروكي ليمتد موديل 2000
والسياره نظيفة ماشاء الله تقول وكالة
لكن أغلب الناس والله المستعان على السمعه
كل ما قلت لواحد وش رايك بالشروكي قال ابعد عنه
يقولون ويقولون ..,
منهم ذولي الي يقولون والله مدري :)

المهم
انتو وش تقولون
الي مجرب السياره
او مخاوي احد مجربها فلا يبخل علي
انا مواعد الرجال بكرة العشاء ارد عليه

وبيني وبينه
الاستخاره وردودكم
والا انا عاجبني الموتر حيل
وان شريته باذن الله نزلت لكم صوره

[ولد وايل]

اسئل مجرب ولا تسأل طبيب قطع غياره غالي مررررررررررره

[أبو يزن الخديدي]

والله أنا الصدق عرض عليه أكثر من مرة وجربته ماشاالله مايحتاج لكن الصدق يبغى لك ميزانية صاحب لكزس لأن قطع غياره غاااااااااالية هذا اذا توفر الأصلي0

[رامي القميري]

أخوي أتمنى أني أفيدك بحكم التجربه


مع الشيروكي


أول شي فيه (قراند شيروكي) وفيه (شيروكي كلاسيك)
وبصراحه أنا أشوف أن بينها أختلاف كبير من كل النواحي


وانت طلبت النصيحه أجل أبشر بعزك


قراند شيروكي مشاكله مستمره في الدائره الكهربائيه


والرفارف والزوائد الموجوده في الشكل الخارجي لاتخدم رواد البر بشكل صحيح


اما من ناحية المكينه والقير قوه ليس لها منافس


وهي جيده من الناحيه العمليه


(الشيروكي كلاسيك)


رمز في القوه وجيد من الناحيه العمليه


ومشاكله أقل بكثير من القراند شيروكي وهو جيد للأستخدام


ولكن الحفاظ على السياره هوا لب الموضوع في جميع السيارات


مهما كان نوعها


بصراحه سبب هذه السمعه السيئه



1- هوا طمع الوكيل في التحكم في أسعار قطع الغيار والمبالغه فيها
2- جهل بعض المراكز والورش المكانيكيه في أصلاح مثل هذه السيارات
يعني أهم شي الدراهم والزبون لايروح




هذا والله أعلم



تقبل مروري

[ابوسعيّد]

السلام عليكم
السر في الاستخدام
اخوي شرى واحد وكاله موديل 96 طلعاته للبر مو بكثيره
لكن مشى معه فوق 400 الف كيلو عمره ماشتكى منه بالعكس يثني عليه كثيييييييييييييييييييييير

[يزيد_1977]

اخوي الكريم خل المنظر الخارجي للبدي بالدرجه الثانيه بعد التأكد من نظافة السياره

اهم شي شيك على الدفرنس لان عادة القير والمكينه تصبر ماشاء الله واذا كان 6 سندر يكون افضل من 8 سلندر

وبالنسبه لقطع الغيار هي عاليه نسبيا من عند الوكيل لكن في محل يجيب قطع اصليه عن طريق الامارات تلقاه بالصناعيه القديمه جاري عنده قراند شيروكي 99 وماشاء الله عليه حنا 2008 والموتر الى الحين معه مايشتكي منه لكن الدور الكبير على الاستخدام

على فكره انا موتري دوج نفس الشركه ومعي وكاله وماشاء الله عليه اهم شي الصيانه الدوريه لاتهملها والله يوفقك.

[AMAZ]

بسم الله الرحمن الرحيم
اول شي السياره من المعرف عنها ان قطع عيارها غالي جدا . وخراباتها كثيره . والورش الي تصلحها محدوده . وكلها حساسات على شكل شرائح تجي(قطع الالكترونية) داخل الكابوت وتحت المقاعد وتحت الطبلون .
خذ بالحسبان ان السياره الى انت تبي تاخذها مديل مره عليه ثمان سنوات كامله يعني اعرف انه كل فتره رايح يخرب عليك قطعه . حتى هو لو قال انه غير كذا قطعه لازم تخرب القطع اخرى وهذا شي معروف في جميع انواع السيارات مهما كانت وانواعها . من واقع تجربة احد الزملاء اشترى مديل 2000 وبديه نظيف جدا لكن كل شويه تخرب عليه قطع وذلك بسبب انتهاء عمرها الافتراضي وهذا شي طبيعي ولكن تعرف القطع بعضها غالي جدا .(( ومن ضمن الخرابات التي حصلت معه ذهب بها الى احد مغاسل السيارات وغسل المكينه وبعد ما طلعها من المغسله خرب عليه قطع (الكترونية داخل الكبوت) وهذه القطع هي التي تتحكم في المكيف والانوار وذهب الى عدة محلات وتشاليح ولم يجدها وعند الوكاله حصلها بسرع خيالي ومتوفره بالرياض فقط . واشار عليه احد الزملاء من الذي لديهم خبره بالشروكي بالذهاب الى الكويت وكان له معرفه هناك وعطاه رقم القطعه وشتراها له وكلفت عليه بعد الشحن (600)ريال بعد ان جلست السياره حوالي اسبوعين متوقفه . وهو بدون سياره . وفي النهاية انصحك بعدم شراء سياره من هذا النوع مهما قالوا عنها . اذا انت قادر على شرائها من الوكالة جديده هذا شي ثاني .تتمتع فيها اقل شي 5 سنوات بدون اعطال . واذا انت هاوي دفع رباعي ولا تستطيع على شراء الجديد اشتر نيسان من المديلات القديمه احسن منه واقل شي قطع غياره متوفره ورخيصه واي واحد يركبها لك .

[غالي]

انا مجرب 94 باب واحد بايونير (سياحي مررره)

وربي هذا حطه على يمناك

وشريت بعده 97 وكاله طبعا كانتري (فل كامل )

لولا الخوف من الله لحلف لك اني دفعت عليه نص قيمة الجديد من الخرابات

حراره ، كهرباء ، فرامل ، قير اوتوماتيك هبل فيني من المنظم
حاسني حوس وكرهت شي اسمه شروكي بسبته
واقسم بالله في عام 2003 بعته ب20 الف وانا مطلعه وكاله ب109 :)
اما القراند شيروكي بكل امانه ماجربته

لكن مااتوقع يبعد عن خرابات الكانتري
لان تقنيته شبيهته واسمع عن خرباته بنفس المشاكل الي كنت اعاني منه

فا نصيحه ابعد بعد الارض عن السماء

وبدراهمه اطق لي لو دتسن دفرنسين ابرك منه

هذي نصيحه من اخوك والله يدلك على الي فيه خير

بس بتوقعي شركة جيب ليس لها مكان قريبا

بتقفل والله اعلم لانها خسرانه

وماكسبها الا عروضهم على سياراتهم برخص التراب على الشركات والدوائر الحكوميه

والله اعلم

[بن طلق]

أقول
شوركم وهداية الله
مانيب أخبر منكم

لا هنتو والله

[مساير الليل]

أخوي بن مطلق إذا كنت تبي الشووور أبعد عنه أبعد عنه

ألي مدعي عليه يشتري قراند شروكي

أخوي كان معه 98 باعه قبل فتره بـ 7 ألاف فقط بعدما خرب وقيمة تصليح خرابه مايقارب 8 ألاف ريال


وقيمة تصليح ألي أنفق عليه

حط فيه مايقارب 20 ألف على خراباته

كل شهر يخرب عليه

والله يكتب لك ألي فيه الخير

[ابوشجاع911]

الله يجزاكم خير استفدنا من هذا الموضوع استفادة ممتازة

فعلا ما خاب من استشار واسال الله التوفيق للجميع واقول لخوي بن طلق اتركه وبيعوضك الله ابرك منه