لخبراء الباترول

[قفشر]

اخواني خبراء الباترول ابي منكم النصيحة في الباترول
انا معي باترول 2001 صالون تومتيك
الموتر الله حق مريح وهادي بس بالخط مايمشي مايتعدا 150 الا بطلعة الروح وعزمه نايم وللمعلومية اني مركب له دعامه قدام وهوك ونش قدام وورا
وبالنسبة للمساعدات ابي مساعدت تثبت وجه الموتر وخلفيته بس ماتكون قاسيه وتهرقل بالموتر

[NSS]

افا وين اهل الخبرة؟؟؟

[راعي بيشة]

بيجيك من يعطيك العلم لا تستعجل أخي الحبيب

[قفشر]

فوق ال140 مشاهدة ولا واحد عطان العلم

[عاشق السيل]

خذ العلم يالغالي ،،

الباترول التماتيك من 98 إلى 2001 كلها ثقيلة وعزمها ميت بعض الشي وخاصة بالصيف ومع المكيف ،، أما القير العادي أنشط شوي لكنه يصرف بنزين أكثر ،، ولو جربت من موديل 2002 وفوق تبي تشوف النشاط صح !!

لكن الثقل يظهر غالبا في شوارع المدينة أما بالخطوط ماشاء الله على الموتر ممكن يمشي إلى 180 بالراحة وأتوقع موترك ثقيل بسبب كثرة التحميل عليه سواءً إضافات من عندك أو عفش داخل الموتر أو ركاب وهذا شي طبيعي إنه يكون ثقيل وخاصة إذا كان الهواء مقابلك بالخط لأن الجيب يرتفع وجهه مع التحميل !!

ومن ناحية المساعدات أنا ماشفت أفضل من مساعدات الوكالة وأنصحك تغير الأربع كلها وتركب أصلي وتبي تشوف الفرق بالراحة ،،

هذا اللي عندي وانتظر غيري بيفيدك أكثر وتقبل مروري يالغالي .....

[aljthab]

يالغالي هذا حدة .,.,.,.مكينة موترك على هالموديل 4500 وتماتيك
وصالون ما يجيب طبلونة خصوصا ان كان الهواء ملاقيك
وبخصوص المساعدات صراحة ماشوف احسن من بلدة بالذات بالخطوط وراعي المدينة

[المان العرب]

بسم الله الرحمن الرحيم

موترك يا طويل العمر مثل ما قال عاشق السيل 2001
ومن 98 الى 2001 عزمها مييييت والموتر هواوي مره يستنشط ومره يضعف عزمه لاكن حاول انك تنضف البخاخات وتغير البواجي وغير الفلتر حق الهوى وبيزين موترك بأذن الله على العموم ترى موترك ثقيل لانك مركب علي صدامات وغيرها بس جرب الي قلت لك

هذي الطريقه انا مجربها وانا معي 99 عادي وينزل على ال190

وبالنسبه للمساعدات رح للنويصر الي بالصناعيه القديمه بالرياض مخرج 17

هذا الي اقدر افيدك فيه يا اخوي وان شاء الله انك تستفييييد


تقبل تحياتي

[قفشر]

الله يعطيكم الف عافية ياشباب
واخوي المان العرب انا توي مطلعه من الوكالة مفحوص شامل وكلامك صح الموتر هواوي يوم يجيب معي 170 بس بطلعة الروح بس يكون الخط مافيه هوا اما إذا فيه هوا من 130 إلى 145
وابي رأيكم ناس نصحوني اركب تحاضير عشان يمشي
وبالنسبة للمساعدات يقولون قدام ركب حقات شاص وورا حقات فكسار