مشكلة في مكينة الربع

[a6lak_wa7ed]

السلام عليكم ورحمه الله وبركاته

مساكم /صبحكم الله بالخير
أخواني أعضاء منتديات مكشات , حبيت اعرض عليكم مشكلة طلعت لي هاليومين في مكينة جيب ربع تويوتا بخاخ 2006 , الموتر أول ماأشغله
مايشتغل من أول مرة (يعني لازم دقتين ولا ثلاث:confused::mad:) وإذا اشتغل يدخن دخان أسود (:no2::no2:هالداشر:D:D) وغير كذا فيه كتمه يعني لو ادعس له كل الدعسه (الرجل واصله إلى العلامه حقت تويوتا;);)) من الصفر يكتم لين يوصل إلى 40 ثم يعطيك اللي ببطنه كله .
(الموتر عليه هدرز)
طبعاً أنا غيرت التالي (الله يخلف بس):
1- طرمبه بنزين مع تنظيف التانكي
2- صفاي بنزين
3- بواجي
4- فلتر هواء
5- غيرت الكنداسة لانها تسددت من الكربون

كل هذا ومافاد فيه , فاللي خابر لي شيخ يقرأ على المكاين ولا أحد يعرف وش علته فلا يبخل علينا.

هذا والله أعلم .

[غضنفر]

يمكن
كتاوت الطرمبة
او تدري الكلتش

لالا
امزح عليك
صعب ان الواحد يقعد يخمن لشي ما شافه
او على الاقل ما قد مر عليه مثل مشكلته

وانت ما شاء الله عليك
غيرت معظم الاشياء التي قد تكون سبب للمشكلة

بالنسبة لي اتوفع ان المشكلة عند بالبخاخ
قد يكون يحتاج الى تنظيف
بدليل الدخان الاسود
أفضل حل
طال عمرك
تعبي من حدى هالمحطات الموثوقة بنزين 95 وتظيف عليه منظف البخاخ الي يبيعونه
ثم تمس الموتر بخط
انفظ ابوه نفظ خله يجيب طبلونه واستمر على ممشاك اقل شي 25 كيلو
كود المكينة تصفى

واذا ما ضبط
هذا رقم ميكانيكي ممتاز جدا بالرياض
خبرة وأمانة
0505282401

[غضنفر]

ونسيت حاجة كمان
قد يكون الهدرز عندك فيه
تنسيم بمكان ما (اذا اختلف عليك صوت الهدرز فاكيد عندك تنسيم)
وخاصة راس الهدرز
بالمره شيك عليه

[a6lak_wa7ed]

أخوي غضنفر بيض الله وجهك ومشكور على الرد

بس منظف البخاخ ماله ضرر ؟

لاني سمعت انه ينظف لك الوسخ اللي بالتانكي والمواصير همن يجيك البنزين داعس للمكينة محمل بالاتربة والاوساخ

وبالنسبة للمكانيكي وش اسمه علشان اكبمه

والف شكر مره ثانية

[غضنفر]

ما ادري اذا له ضرر
الميكانيكي
زول اسمه

ابو عوض

[a6lak_wa7ed]

بما أن ماأحد عطانا وجه غير أخوي غضنفر فيه سؤال ودي أسأله:
هالحين عيادات مكافحة التدخين تستقبل موتري ؟

[ممتر البران]

ايه وياخذون عليه 2000
والشخص العادي 200
واي خدمه انا حاضر

[dugaish]

ياخوي غير البخاخات وادع لي وش لك ولتغيير الطرمبه الله يصلحك

[a6lak_wa7ed]

ممتر البران شكراً على مرورك
مشكور أخوي وماتقصر ويخدمونك عيالك

ــــــــــــــــــــــــــــــــــــــــــــــــــ ــــــــــــــ

dugaish أنا من الحين أبدعي لك قبل لا أغير أي شي بس وش لون حكمت أن البخاخات هن المشكلة ؟

[الزنون]

السلام عليكم ورحمة الله وبركاته
اخوي a6lak_wa7ed ما تلاحظ انك غيرت كل القطع ونسيت شي مهم اللي هو اسلاك البوجي لان الجيوب الربع دايم تخرب الاسلاك وانصحك ان كانك بتغيرها لا تشتري من الوكلة لان جميع قطع التويوتا الموجودة الان كلها تجاري ولكن يضحكون علينا ويقولون اصلية انا كل جيب اشريه لازم اغير الاسلاك وفيه نوعيه كانت موجودة وهي امريكية وانا الحين موتري يقطع ويكتم بس حتى الان وانا ادورلي الاسلاك اللي براسي واول ماحصلها راح اخبرك
وتحياتي لك

[zmzmz9]

ياشباب أنا عندي مشكلة في كلبريتر الباترول . الموتر يقطع ويطفي مرات وأنا ماشي ويطلع عند التشغيل الصباح كربون أسود شيء بسيط أشوفه على البلاط , شيء قليل جداً , وإذا وفقت فترة بحدود 3 إلى 5 دقائق يبدأ يرج شوي ثم يطفي .. وديته للصناعية قالو : إصلاح كلبريتر ويمكن البواجي ويمكن البليتين !!! ياشباب دلوني وين أحسن ورشة تعرف للباترول ؟؟ أخوي غضنفر الزول الذي ذكرت وين ورشته ؟؟ وش إسمها ؟؟

[a6lak_wa7ed]

أخوي الزنون ك شاكر لك مرورك وصدقني أن الاسلاك ناوي عليهن ضمن الخطة الخمسينية الجديدة
ــــــــــــــــــــــــــــــــــــــــــــــــــ ـــــــــ
أخوي zmzmz9 والله ماعندي علم والله وانا أخوك بس جرب الميكانيكي اللي يقول غضنفر الرجال يمدحه وأنا إن شاء الله ابمر عليه قريب

[دحوش]

يابو الشباب عندي زي كذا بالموتر وتدري وش غيرت اسلاك بواجي والبواجي واهم شي تمسك خط فيهاا قل شي 100 كيلو انا موتري سار زي الاوزه ولاعاد رجع ادعلي

[a6lak_wa7ed]

أخوي دحوش مشكور على مرورك وردك

اللهم وفق وارزق كل من رد على هذا الموضوع وابعد عنه الهم والحزن وارزقه الجنه واغفر له ولوالديه آمين