ابركب مساعدات استراليه وونش لجيب شاص وين احسن محل برياض

[فيصل السبيعي]

السلام

كيفكم ان شاء الله طيبين

ابي اركب مساعدات اسراليه لبيب شاص 2008 بريمي بس تراي مدري وش فايدتهن ههههههه

هل تنصحوني فيهن


الشغله الثانيه ابي اركب ونش للجيب مثل الي يجي وكاله ووين القام وبكم اسارهن

وسلامتكم

[الشنه]

بالنسبه للمساعدات ما أنصحك بها
جربتها في جيب صالون
اذا جا اي ميلان او تموج في الخط على السفلت تلعب بالسياره لدرجة اني غيرتها
على الجيب الشاص مدري
بلنسبه للونوش رح لشارع الغرابي
اذا جتك الأشاره من شمال وعلى حجاجك اليسار مقر الوريات القديم
رح يمين
بيجيك محل على يدك اليسار اعتقد السليماني
والأسعار تختلف حسب القدره للونش
واذا تبي شور اخوك
تطيح في التشاليح
او اطلبه من الأخوان في منتدى البيع والشراء

[aziz2727]

المساعدات وانا اخوك عندك الرمايه لهم فرع على شارع التخصصي والورشه على نفس شارع التخصصي وانت متجه شمال بعد تقاطع الجامعة بتشوف ميد على يدك اليسار وعندهم الورشه
بنسبة للونوش عندك السليماني .

[المان العرب]

فيه محل النويصر في الصناعيه القديمه ممتاز جداااا
تقبل مروري

[فيصل السبيعي]

مشكورين وماقصرتو كلن بسمه بس كيف المساعدات

على الشاص تنصحوون بها

[ممتر البران]

مرحبا بفيصل
اسمعني وانا اخوك المساعدات على حسب استخدامك يعني وش اللي خلاك تقول ابا اغيرها هل انت راعي طرد بالبر وقمز جروف وتحميل ووووو
وبعدين ان كانك بتغير غير كل السسبنشن كت ولا خله كله اما تغير مساعدات وتترك الباقي
وبالنسبه للونوش اشكال وانواع واللي يجي شد وكاله ما انصحبه ابد اول شي قدرته 1 طن وبعدين ماله قطع غيار يعني يجي كامل وغير هذا سعره غالي ب 15000 ريال جديد وكلامي هذا عن وااقع تجربه ب 4 سيارات من تويوتا ونوشها وكاله بالعربي ما تصلح عليك بعطي الله الوارن وارد السليماني قطعا غيار ورخص يعني ال 3 طن ب 3000
ومجربه ب 3 سيارات ما مثله خذ ولد
والا صملت علمني عشان اوضح لك كل شي عنه ووين تركبه ووش تحرص عليه
تحيتي لكم
ابو سعد

[Abo Nader]

السلام عليكم...

أخوي فيدت المساعد أنه يمص الصدمات أو المطبات...يعني إذا تبي تغير المساعدات لشاص فهاذا هبال...مابعد مطب الشاص من مطب..

[فيصل السبيعي]

مرحبا بفيصل
اسمعني وانا اخوك المساعدات على حسب استخدامك يعني وش اللي خلاك تقول ابا اغيرها هل انت راعي طرد بالبر وقمز جروف وتحميل ووووو
وبعدين ان كانك بتغير غير كل السسبنشن كت ولا خله كله اما تغير مساعدات وتترك الباقي
وبالنسبه للونوش اشكال وانواع واللي يجي شد وكاله ما انصحبه ابد اول شي قدرته 1 طن وبعدين ماله قطع غيار يعني يجي كامل وغير هذا سعره غالي ب 15000 ريال جديد وكلامي هذا عن وااقع تجربه ب 4 سيارات من تويوتا ونوشها وكاله بالعربي ما تصلح عليك بعطي الله الوارن وارد السليماني قطعا غيار ورخص يعني ال 3 طن ب 3000
ومجربه ب 3 سيارات ما مثله خذ ولد
والا صملت علمني عشان اوضح لك كل شي عنه ووين تركبه ووش تحرص عليه
تحيتي لكم
ابو سعد


عز الله يابو سعد ماقصرت

ابي الله لايهينك كل شي عن المساعدات انا راعي مقانيص وطرد وتحميل والونش وين القاه وركبه

[ممتر البران]

وش تبي تركب بالظبط مساعدات بس او سسبنشن كامل وبالنسبه للونش مر السليماني واحرص على الوارن الثلاثه طن وخله مخفي لا تبرزه بس
احتري منك رد عن المساعدات
تحيتي لكم
ابو سعد

[مرابع الربيع]

اخي ممتر البران لو سمحت لي معلوماتك عن ونش الجيب الوكالة غير دقيقة ....قطع الغيار متوفرة ..الحبل الاصلي ..الكلتش....الصوفه ...علما انه مايطلب صيانه الا نادر ..ومعروف عن ونش التويوتا انه افضل من اي ونش لدي جيب 99 ماقد عمل له صيانة الا تركيب صوفة شريتها وكالة 25 ريال فقط ..واسحب عليه ودائما ..ومريت بمواقف انا متاكد لو غير ونشه ليسخن وحقيقة ومن تجربه انه قوي جدا ..واما طن واحد هذا غير صحيح ..فكم يكون وزن في اكس ار فل استبنتين وونش فقط ...راجع حساباتك ...وفقك الله

[شاق النفد]

الموضوع له خمس سنين
وتقوله راجع حساباتك انت تدري هو ميت ولا حي على طاعته

[مرابع الربيع]

الله يعطيك طولت العمر انت وهو على طاعة الله .....اذا هو حي يصحح معلومات يمكن فيه من مشا عليه خلال الخمس السنوات اللي تقول ...ولافيها شي يراجع الانسان نفسه لو بعد عشرين سنة ...عسا الله يبارك فيك

[بحر الاشواق]

هههههههه

المهم للفايده مره تعلقنا على دينالي موديل 2002 وجاء شاص اظن موديل 2010 وسحبنا بالونش ماشاء الله
على شان كذا مااظن قوة الونش حق التايوتا واحد طن فقط والا كان ماقدر يسحب الدينالي وهو متعلق يعني مايمديك تساعد معه

[مرابع الربيع]

نعم جزاك الله خير اخي وكل من شارك ويعلم الله ان ما اقصده هو الفائدة للجميع ...وكلنا معرضين للخطاء في اي شي وهدفي هذا هو ...انه من المستحيل تكون هذه المعلومة صحية لان اصلا السيارة المركب عليها 3 طن ..ومثل ما قلت اخي شاق النفذ عن تجاربكم ..وانا معي لاندكرزر ومجرب قدرة هذا الونش حقيقة .تحياتي للجميع

[مرابع الربيع]

اسف اخي بحرالاشواق ....

[ابو عنقا]

سؤال
هل المساعدات الأسترالية اللي عند الرماية تنفع للشاص التويوتا للتحميل وشكرا