تانكي للبرادو ؟؟؟

[الوديّ]

السلام عليكم ...اخواني مشرفين واعضاء مكشات صبحكم الله بالخير..عندي برادوvx تماتيك وابغى افصل له تانكي وابيه خارجي ما ادري اركبه عند الاستبنه مع ان المحل ضيق او اركبه على جنب تحت البيبان ...ارجو الافادة الله لا يهينكم ..

[منتعش]

حي الله أخوي الغالي والمحب
أنصحك أخوي بالتوانكي الجاهزة اللي تحط في الشنطة ؟ الموجود عند محلات الرحلات سواءً الواقف أو المنسدح .
لعدة أسباب منها :
أولاً : سهل الفك والتركيب .
ثانياً : تستفيد منه في سيارة أخرى .
ثالثاً : ما يثقل على السيارة ولا تخاف من خرابه مثل اذا كان في الأسفل .
رابعاً : سعر الجاهز أرخص .
خامساً : يساعد على أن الماء يكون نظيف ولا يوجد رائحة عكس الذي دائماً بالسيارة ربما يكون هناك ماء باقي .
ولعل الشباب يفيدونك أكثر
والله يحفظك ويرعاك .

[الوديّ]

بيض الله وجهك أخوي ...كفيت وفيت الله يبارك فيك ..شورك وهداية الله

[أبوتركي الخالدي]

أنا وأعوذ بالله من كلمة أنا

عندي برادو بس المشكلة أنيي شريت التانكي من الرماية - مهوب عملي

وانصحك بخزان الوادي 90 لتر

عشان ما يثقل ولايطلع له صوت لو ما مليته

وان بغيت أكثر من 90 لتر خذ جركل 25 لتر

وبكذا ترتاح

وان بغيت اي فائدة من ناحية البرادو أوغيره أرسل لي رسالة

وانا مستعد بالإجابة

[الوديّ]

تسلم يا بو تركي ...امس مريت محلين لتفصيل التوانك في الزلفي ..ولكن بدون فايدة ما لك الا تشيل الاستبنة ويفصل محلها... وكذا ما غزينا .. راعي الورشة شار علي بخزان عند السنيدي فيبر ويقول انه عملي يركب خلف المراتب وله عدة مقاسات يمكن اللي تقصدة انت ويثبت بواسطة مشدات في قاعدة المراتب الخلفية الجانبية . ونأسف للاطالة

[منتعش]

حي الله أخوي الغالي / الودي
أنصحك بتركيب الالمونيوم الجاهز أو الاستيل ويكون مقسم من الداخل
حتى لا يزعجك بالموية وأنتبه لازم يكون الغطأ من النوع البلاستيك ليسهل الفك والربط
وأبعد عن الفيبر لأنه يطلع رائحة
وما يحتاج تثبيت شله وحطه ولا يلزم مشدات ويوجد نوعين واقف ومنسدح
والله يرعاك .

[كادر]

السلام عليكم
توقيعي فيه عن تركيب التانكي داخلي
وتم تحديث الصور في الردود الاخيرة