كسرت ظهري الهايلكس

[ابن عيفان]

السلام عليكم ورحمة الله



يالربع الموضوع باختصار عندي هايلكس 97 غمارتين وبهذلتني وكسرت ظهري والله اني صرت اراجع المستشفى ويقولون لي عندك انزلاق :confused: ووقفت عن سواقتها فترة والحمدلله تحسنت


والحين رجعت لها



وانا في مناقز ومطامر وقلت حيا





ساعدوني في الحل وخاصة اهل الهلي ( القصمان ) بصراحة انا سمعت ان عندهم اختراعات وشغلات عجيبة في الهايلكسات خاصة




اخوكم

[بواسامه]

هلا باخوي
يعني لازم اللي يجاوبك قصيمي ولا اكمل
ههههههههههههههههههههههههههههههههه
مابيننا فرق كلنا خواااااااااااااات بالمصري
المهم سحب من السست او طول اللعبات
وفيه شي ازين منهن كلهن
بع الهلي واشتر فورد واهم شي سلامة ظهرك يابعدي
واكتب على الفورد من وراء هيلكس ليميتيد
وفقت للخير وماتشوف شر

[ابو نايف التميمي]

الله يعينك ... الهايلوكس معروف انه يكسر الظهر

[عاشق السيل]

وعليكم السلام ورحمة الله وبركاته ،،

كل هالمشاكل ولازالت الهايلكس عندك ؟؟؟؟!!!!!

ياخي فيه ألف سيارة بديلة وبنفس المواصفات !!!!!

أنصحك أخوي تنتبه لظهرك ترى المسألة خطيرة ،، وتقبل مروري يالغالي ....

[ذيب طي]

شف يابعدي-اذا انت والله راعي بر ومكاشيت دورلك جيب نظيف ومريح
مثل الباث أو الباجيرو الربع او الراف فور ووو..
اما اذا كنت منت راعيها ذا الامور خذلك موتر شبابي وصغيرة (كورلا -كامري- التيما- النترا ...وانت ابخص بها وريح نفسك -ظهرك ألزم
تقبل مروري

[معترض الشعيب]

وعليكم السلام ورحمة الله وبركاته

.
.

نصيحتي لك بترهم فيها وتخسرك
.
.
1) مساعدات بوش ( مرسدس ) قدام
2) مراتب فصاله ( كرسيدا او 200l )
3) توانك فـ الحوض مع العزبه )
4) مساعدات (دوج) في الخلف
5) ركب جنوط ( فورد او مرسدس )
6) ركب كفرات عررررراض 215 \75 _ كفرات أرتفاع 15 .
7) ولا تنسى بعد انوار ألماني مع كتاوت ( بوش ) ... لوضوح الخط خخخخخخخخخخخخ
8) مروحة مرسدس ... علشان ترتاح دززززززززززززز
9) فلتر هووا رياضي
10) ركب لوحه فصاله في الصدام الخلفي ( علشان تهزز _ والرمث والعقوم ما يكسرها )
.
.
.
أي خدمات طال عمرك حنا حاضرين
.
.
تحياتي واشواقي من وادي الغضى ( عنيزه )

[abo tamem]

إذا ملزم على الهلي

انصحك سحب سست
و مساعدات vxr
ولا ترفعه من الامام
وكفرات اعرض من البلد

يعني دور متوتر اريح اصرف

[مخاوي الخير]

اختار بين ظهرك والهايلوكس وانت ابخص

[a6lak_wa7ed]

السلام عليكم

إذا كان الموتر عزيز عليك ولا أنت بايعه فعليك ياطويل العمر بالتالي:
1- اسحب سسته النحميل أو ركب سسته ددسن طويلة.
2- ركب توانك مويه وعزبه وخلهن دايم مليانات(أو أي شي ثقيل).
3- غير المراتب الامامية أو زد اسفنج ببطن المرتبه.
4- غير الكفرات وركب كفرات عريضه ولا يصيرن مليانات هوا .
5- مساعدات أماميه مرسيدس بلاستين (بتفتك من مناقز الوجه بس مطب الوجه بيصير قاسي شوي).

وإذا ماأعجبك هالكلام فعليك بالفورد فانها علاج الظهر.

[ذئب اليل]

سمعت ان أهل القصيم يشيلون سست الهاليكس ويركبون بدالها سست ددسن يقولون اريح في المامشئ والله أعالم لاكن لو تقير عن الهاليكس افظل

[ذيب عنيزه]

بع الهلي وتزوج اندنوسيه شف ظهرك يطيب ولالا

[فهد325]

السلام عليكم

انا من رايي انك ما تبيعه اذا بعته بتتحسف لأنه ما راح تلقى زيه الباقي (خمام)

الحل الأول هو أنك تغير السست وتحط سست مازدا القديمة
الحل الثاني هو انك تشيل سسته وحده وهي سستت التحميل ثالث أو ثاني وحدة من الأسفل تجيك عريضة شوي عن باقي السست.
واذا كنت صامل على الحل
فالحل يترتب عليه ضريبة وهي أنك اذا حملت عليها شي بيطيح على طول يعني بيصير مطيح من ورى الموتر بيكون متكي على الكعكات

أشرط عليك على حسب تجربتي أنه سوف يكون مثل أو أفضل من راحة الكابريس الصابونه

وإذا كنت تبيه ما يطامر من قدام اربط المسمارين حقت الوزنية اللي ترفع وتوزل السيارة من قدام أربطها إلى آخر شي بترتفع السيارة من قدام شوي بس تاكل مطب طمرة وحدة وخلاص ما راح يكون مثل أول بيجلس يطامر فوق تحت .

وركب مراتب مفصولة أريح للظهر تاخذ راحتك أحسن من مراتب شد البلد اللي على شكل زاوية 90 ما تقدر تحركها

عندي مراتب مكسيما منجدة ومرهمة خالصة تركب على موديل 98 إلى 2005 بدون تخريم إذا كان موترك تركب عليه راسلني على الخاص علشان تاخذها

وآسف على الإطالة

[الساهر2003]

اخوي لا تتعب نفسك
يوجد حل ممتاز جدا جدا وهو انك تركب مساعدات اقوى من مساعدات الوكالة وتشيل اغلب السست الا الامية الكبيرة والصغيرة 50 اتوقع وترهم ياي اي ياي يعجبك ويناسب تحميلك فركبه والشغلة بسيطه جدا جدا
وغير مكلفة

[الشقب1]

السلام عليكم الله يعينك .........

[.كبريت.]

اخوي فك السست الي وراء وتصير كابريس ..


دمت بود

[برق شقراء]

جربت مراتب الماكسيما ؟؟؟





وشف وانا أخوك ..

والله ما يسوى عليك كومة هالحديد اللي يبي يخليك تتعذب تالي عمرك !!

يا ابن الناس هذا ظهر ما ينلعب معه !!

أغنى البشر يدفعون ما وراهم ودونهم عشان تزين ظهورهم وانت الله يهديك متمسك باللي يضرك !!



مثل ما قال واحد من الشباب
اختر

ظهرك أو كومة الحديد اللي يسمونها (هايلكس) !!

[Abu Saad]

بع الهلي وتزوج اندنوسيه شف ظهرك يطيب ولالا

.......
:D:D:D

[.أبوعبدالرحمن]

اخوي


شل سستت التحميل

وركب مساعدات مرسيدس امامي وخلفي


وبتدعيلي


لكن التحميل لا تقول ليش الهلي ينزل من ورا؟؟؟

[kk999]

ياخي المشكله ان 90% من الي يراجعون عيادة العظام بسبب الهايلوكس او الجيب الربع كانك راكب فوق مؤشر الاسهم السعوديه (طالع نازل) يارجال خذلك موتر يريحك تروح وتجي في مشاوريك كانك جالس في بيتك والله اني مره ركبت مع واحد من الشاب جيب ربع جديد ماصدقت على الله انزل مع ان المشوار 20 كم بس
خذ لك امريكي يدلعك ويريح ظهرك

[alkongrs]

انا موتري موديل 96 المعياره الحبوبه :) المهم حط مساعدات مرسدس

[ثورة الشك]

بع الهلي وتزوج اندنوسيه شف ظهرك يطيب ولالا

هههههههههههههههه هذا هو الدواء :D

[راعي طويلات]

وش الله حادك على الهايكس لاوموديل 97
بعه واشتر راحتك وياكثر المواتر الي تسد بمكانه
الله يعينك

[MMمحمدMM]

الله يعينك
حط في الكفرات كلهن 18
جب خيشة رمل وحطها في الصندوق في الخلف

[التعـ King ـديل]

نصيحه بع الهلي وطق ددسن ونازل ددسن جديد اسمه نيفارا والله كنه موتر صغير مهوب ونيت جمال وخفه وعزم وراحه

[شبل الجزيرة]

الله يعينك ... الهايلوكس معروف انه يكسر الظهر

[فهد325]

عرضت عليك مراتب ولم ترد علي وجاني طلبات على الخاص بطلب شراءها وأن كان في بالي أني أبعطيك أياها وذلك بأن تقدر سعرها وتتصدق بها حسب فكرة أعجبتني لأحد الأخوة
لذلك سوف أعرضها في خيمة البيع والشراء السيارات ومستلزماتها بموضوع مراتب هايلكس مفصولة

[فهد325]

لم أجد الموضوع مدري يمكن حذف

[عاشق السيل]

بع الهلي وتزوج اندنوسيه شف ظهرك يطيب ولالا


عز الله إنك جبتها !!

بس لو يجرب التايلندية أفضل لأنها بدون سست خلقة :D !!!!!!!!

[صقر أمه 506]

الحل:

شل سستت التحميل
وغير المساعدات
وحط تانكي

[ابووولجين]

يعني لازم الهايلكس 97 عندك الهايلكس موديل 2006 ومافوق اريح هايلكس نزل من عرفت الدنيا بدون اي ترهيم ووجع راس وانا مجرب 2006 و2007 ديزل وبنزين من ابدع مايكون تمشي فيه 160 كأنك واقف ......... ممكن اكون مبالغ بس من واقع تجربه ،،،،،، بع هالحبيب اللي معك ويعينك الله على فراقة ودق لك يامال الغنيمة 2008 إذا لابد سيارة تكون حوض وبتدعيلي ان شاء الله مع عدم نسيان فكرة الفورد مثل ماقالوا الشباب ( كراون فكتوريا أو قراند ماركيز اللي هو الميركوري ) كلها واحد من حيث الراحة ........... اتمنى لنا ولك التوفيق .........عذراًعلى الاطالة .

[بوسحمان]

خذ لك شاص اربع شهور(بالصيف) وثم ارجع على الهايلكس تحمد ربك على النعمه الى انت فيها .....

وان كانك مستاذي منه اقلعه وخذلك ونيت امريكي جمس او فورد ابرك واريح ... ولاحد يقولك صيانه وتصليح ... ترى كل شي يخرب ويصلح :D .


والله يوفقك