وش رايكم وش أحسن مساعدات للباث ؟؟؟

[AZOO9Z]

السلام عليكم

أخواني أنا ودي أغير مساعدات موتري لانها منتهية فوش تنصحوني به

و شرطي أنها تكووون لينة مرة لان الي أنا عليها بصراحة و الله العظيم كرهتني الموتر كله

ما ادري عشانها متفقعة خاصة الي ورا هي الي اذا رقيت عيون القطط بدون مبالغة ودي أوقف أصيح

يرقع رقعة ينفض الموتر اتوقع الكفرات و المساعدات لها دور مثل ما ذكرت لكم وش الزين

و عافاكم الله و الله لا يحرمنا منكم ولا من اَرائكم و مشورتكم السديدة .

[بواسامه]

هلا باخوي اولا نفضة الموتر فمعناته ان المساعدات الاماميه متفقعه ومنتهيه بمعنى الكلمه وهذا اللي الله يعينك على قيمتها الغير متوقعه 1500 ريال
ثانيا الخلفيه كذلك ضعيفه وخروج زيتها يعني انها متفقعه وقيمتها 550 ريال طبعا اسعار الاثنين

وبالنسبه لشرطك تبي لينه مره مهنا الين من شد بلدها ولا تتعب نفسك وهذا عيبها ان ماتتحمل وتنفقع بسرعه اذا انتي راعي مطامر وتحميل عفش واكل مطبات
ولكن عندي محاوله وسبق جربتهاوهي مساعدات سفاري ورهمت لهن في المخرطه جلب نفس مقاس الباث وركبتهن خلفي مع كعكات المونيوم 3سم وبعت الموتر وهي فيه معاد انفقع ابدا ولينه كعادة مساعدات النيسان
واما الامامي اللي قلت لك مالك الا خشمك لو هو عوج(( قصدي الوكاله حسب علمي))
وفقك الله

[معترض الشعيب]

مساعدات جبرين ( أمريكي ) غااز

غير الكفرات ( دانلوب _ برجيستون _ شاهين )

ضغط الكفرات لايكون عالي بين ( 30 الى 28 ) لاتسرع على الزفت عليها ولا تاخذ الملفات بسرعه

لان عمر الكفرات سنتين بالكثير وتمسحححححححححح تصير ( صابر عبد )

[مطاربروق]

فيه مساعدات اسمها مورنو امريكيه ممتازه ورخيصه وعليها ظمان سنه ولونها اسود نفس شد البلد بدون ترهيم ولا هم يحزنون وسعرها 90 ريال للواحد طبعا خلفيه انا مركبها على موتري افضل من شد البلد ومادري شد اليلد غاليه على ايش واشور عليك انك تاخذها والله يوفقك

[بن محفوظ]

1- بالنسبة للمساعدات الخلفية .. الي فهمته من كلام العضاء في المنتدى ان كل واحد على حسب روحاته وجياته .. لكن عني انا مساعدات الموتر الخلفية شد بلد لكن اضفت عليها يايات استراليه .. والحمد لله احمل عفش واروح للبر وما اشتكيت منها .. لانها لينه وممتازه ( وعلى حسب الي سمعته ان المساعدات الاخرى قاسيه وفيه بعض المواتر تعور الشاص منها ).

2- اما الكفرات فكثير من الاعضاء يمدحون دنلوب وانا ان شاء الله ناوي اركبها بعد شهر نفس ارتفاع الوكاله لكنها اعرض شوي ..

3- المساعدات الامامية ما خبرت احد شكى منها والكثير يركبون عليها كعكات المنيوم على حسب المقاس المفضل ..

(( في نهاية شارع التخصصي في الرياض بأتجاه الشمال فيه محطة يوجد بها ورشة الرمايه فيها فلبيني ممتاز تلقى عنده مساعدات و يايات اماميه ))

وبالتوفيق

[أبو بندر 2005]

انتبه إذا قالك احد ركب مساعدات لاند كروزر طبعاً ترهيم انا ركبتها و انكسر ضهري تقل راكب شاص ,,
فيه عندك جبريال(تجي بيضاء) اللي في الصناعيه القديمهة وكيلها السبت, ولا استرالي(اصفر) من شركة Arb عند الرماية بس غالية , وهذولي كلها امامي وخلفي .
وما اتوقع تلقى الين من الوكالة.
اتمنى اني افدتك.