ماهي أفضل ورشه للسفاري؟

[ALRMTHAH]

السلام عليكم ورحمة الله وبركاته ؟

شباب ممكن تدلوننا على افضل ورشه للسفاري بالرياض لان عندي مشكله ما لقيتلها حل اذ دعست بنزين يقطع الموتر بعدين يفز كان احد ماسكه وتاركه فجأه غيرت بواجي وصفاي بنزين ونضفت البخاخات وماراحت
والسؤال الثاني انا غيرت المساعدات حطيت مساعدات شاص وصار مطبه قوي هل ارجع لمسعدات الوكاله او فيه افضل منها وشكرا

[a6lak_wa7ed]

بالنسبة للورشة فيه ورشة التركي يمدحونها بس يقولون انها غالية بس انا والله ماجربته بس احتمال ان اللي عندك ياحساس البخاخ يالثلاجه وسخه ويبغاله تنظيف , اما المساعدات على حسب استعمالك لكن يمدحون المنرو

مع العلم اني ماجربتهن ولا معي باترول بس ان شاء الله يفيدونك الاخوان

هذا والله اعلم

[Magellan]

التقطيع عندك بوادر ضعف في طرمبة البنزين خصوصا تقول السيارة تقل ماسها جني:d
تكتم ثم إذا خذت شوي فزت
وبالتالي معناته الطرمبة مودعة

[NissaN 1990]

أخوي على كلامك إن موديل السياره من 1997 ونازل وإذا هذا الموديل فهذا طال عمرك في الكبوت ليات صغيره مره أصغر مثل ليات المكيف الصحراوي وهي تغذي الكربريتر بالهواء يمكن فيها واحد مفصول أو متسدد وهي إذا صار فيها واحد من اللي قلت يصير معك نفس المشكله اللي ذكرتها ،،،وإذا ما هو هذا الموديل ياليت تحدد وش الموديل عشان نقدر نفيدك بحكم الخبره المتواضعة مع السفاري ،،،،، وأما عن المساعدات خل عنك حق الشاص وغيره ركب جبريل البيض ما فيه مثلها عمليه وممتازه ورخيصه
وآسف على الإطاله بس أتمنى أني قدمت معلومه مفيده ،،،،

[باتروول2000]

السلام عليكم ورحمه الله وبركاته
الحاله هذا صارت معي حتى بالماريه اول ما تدعس بنزين وبعض الاحيان وانت ماشي عادي
اسمع يا اخوي تبي العلم اللي يجمد عللا الشارب افحص كمبيوتر علشان اذا كان البلا من غير الكهرب واذا قال الكمبوتر ما فيه شئ شف الديلكو فيه قطعه يسمونها الشاكوش هذا لابلا مهنا دايما وبعد شئ ثاني غير البنزين من 91 الى 95 ولو انه اغلى لكن ازين لان البنزين 91 فيه شئ زي الزيت زموترك بخاخ واذا تبغي تتاكد حط شوي منه في علبه ورجه تشوف زي الحبيبات الزيت فيه وترى على فكره غيرت انا البواجي واسلاك البواجي ونظفت البخاخات والطرنبه والصفاي بين قوسين اي شئ يمر معه البنزين غيرته بجديد خسرت تقريبااكثر من 2000 ريال المراد رح لم كهربائي سنع او تضمنه وخله يشيك على الكهرب وبذات الديلكو لا يخرب لانه غالي بالحيل واتمنى اني افدك

[ابن بدران]

التقطيع عندك بوادر ضعف في طرمبة البنزين خصوصا تقول السيارة تقل ماسها جني:d
تكتم ثم إذا خذت شوي فزت
وبالتالي معناته الطرمبة مودعة

مثل ما يثول أخوي Magellan
صارت معي بسفاري 95 بخاخ ولا خليت شي ما غيرته وصفيته
بالاخير صار البلا من طرمبة البنزين
أول ما تبدا أفحص الطرمبة أخوي وترى سعرها وكالة ب600
هالكلام له مدة والله أعلم عن الأسعار ألحين

[ALRMTHAH]

مشكورين على الردود وآسف على التاخير لظرف طارئ
موديل السياره 2003 وغيرت طرمبة البنزين مرتين ومانفع وهل تنصحون اشيك عليه بالوكاله او برى

ومره ثانيه مشكور على ردودكم

[دغيم1]

السلام عليكم ورحمة الله وبركاته
حياك الله أخوي
لاتكثر التطبب في السيارة
وافحصها عند مهندس جيد وكهربائي جيد
وبالنسبة للوكاله أكيد أفضل في كثير من الأحيان لكن المشكلة تكمن في القيمة
والورش الخارجية تحتاج إلى بحث .
لعلك تمر على ورشة ( سندباد الشمال ) في صناعية العاصمة - الدائري الغربي - مخرج المدينة المنورة - بجوار المسجد من الشرق - واجهتها جنوبية
تمنياتي لسيارتك بالصلاح
تقبل تحياتي

[ALRMTHAH]

هلا اخوي دغيم1 مشكور على ردك وشورك وهداية الله بكرا بمر على ورشه سندباد الشمال

[مقلع الرمث]

اخوي انا عندي نفس المشكله ياليت وحليتها شف منظم الهواء اللي بجمب الفلتر على طول شفلك احد معه باترول وفكه وجرب انا فكيته وبدليت مع باترول ثاني وزبط ولله الحمد لكن جرب انت وابرسلك رقمي على الخاص عشان اعلمك كانه فتك طبعا واسف على الاطاله

[غشااااام]

السلام عليكم اخوي
احتمال كبيييييييييييييير يكون من فلتر الهواء تراه سواها معي من قبل كذا وغيرته وسلك الحمدالله

[ALRMTHAH]

هلا اخوي مقلع الرمث يالنسبه للحساس الي قلت غيرته وماراحت المشكله وعلى العموم بدق عليك وتسلم ماقصرت

هلا اخوي غشام صراحه غيرت الفلتر وصفاي البنزين والحساس والبواجي وماراحت

لكن هل ممكن يكون من القزوز او الكنداسه لان بعظ المرات اذا احتمى الموتر ودعست فجاه يرمي شي تحت رجليني مدري وشو كني واطي علبة سنتوب:p ؟

ومشكور على ردودكم

[وطني]

غير حساس البخاخ الحراري

[ALRMTHAH]

هلا وغلا وطني

تصدق انك اول واحد يقولي عن حساس البخاخ بغيره واشوف بس اذا ماطلع منه الحساب عليك :d

يعطيك العافيه