طلعت للهافمون وورطني الدبل !! أفزعوا ياشباب !!

[abosami]

طلعنا أنا والشباب يوم الخميس للهاف مون على هكا الطعس اللي يحبه قلبك
والموتر يوكن 2003 دبل سعودي وأجي أشبك الدبل إلا يطلع لي مسج في الطبلون يجب إصلاح الدفع الرباعي وأحاول فيه ويشبك ولله الحمد ونطلع والمشكلة تجي وتروح تتوقعون المشكلة في الكهرباء أو في الدبل

وتكفووووون إذا تعرفون ورشة متخصصه بالمواضيع بالشرقية ( الدمام والخبر ) أكون شاكر وممنون
لاينكب عفشنا مررة ثانية ونتوهق :j
أنتظر ردودكم بفارغ الصبر

[أبوشروق]

بعه ودور تويوتا

[abosami]

شكرا أبو شروق على المرور والمشاركة

[الأبرق2008]

اخي الحبيب

حصل لي مثل ماحصل لك ولكن زاد علية ان بدون تشغيل الدبل

وسلمت نفسي والموتر للوكاله وتم التصليح 950 ريال ينطح ريال ويتضح لي ان المشلة بسيطة جدا

اذا كان الموتر جديد انصحك للوكاله على الاقل تحديد الخلل والله يستر عليك
( تصدق اني طعت ابوشروق بعت وشريت لاندكروزر 2002 gxr قبل اسبوع فقط

[ابوسعيّد]

السلام عليكم
اذا زادت حرارة الدفرنس راه يفصل الدبل
واذا برد رجع كل شي زين

[Magellan]

لا تبيعه وتاخذ لاندركروزر
اللاندكروزر الجديد دبله خرطي وكهرب بالإضافة لأسعار مبالغ فيها ..
أسمع وأنا أخوك الدبل الكهرب إذا إحتر مره يفصل لدواعي الأمان ولذلك تجيك المسج
الشيء الثاني في حساس للدبل وهو اللي إسمه الفرار تقدر تغيره ويرجع الموتر تمام

[أبو الكيف]

صارت لي نفس المشكلة

و الحل يوجد فيش كهرب منفصل او مختل راكب في قير الدبل اسفل السيارة شيك عليه و ثبته زين

[abosami]

ياشباب لاتضيعوني زوود ترا الصدر ضايق بسبب الموضوع دورو لي حل تكفون

[المحترف800]

هلابك أبوسامي ...
رأيي أنك تروح للوكاله وتشوف وش السبب يمكن يكون طبيعي بسبب الحراره وانا ماأدري ...
كيف الجو بالشرقيه تمام ...

[Magellan]

ياشباب لاتضيعوني زوود ترا الصدر ضايق بسبب الموضوع دورو لي حل تكفون

شكل قلبك رهيف :D
الله يستر بس ... لا تخاف إن عيّا الدبل يشتغل طف الموتر وشغله وإشبكه
المهم أعتقد فيه عيب تصنيعي بين موديل 2002 إلى 2006 وهو المتسمى حساس الدبل وهو اللي يطلع لك المسج ، وهو عمله مثل الفرار وهو يشبك العكوس الأمامية ليشتغل الدبل ،،
فيه عندك حلول منها تشيك مثل ماقال لك أبو الكيف أوتوديه الوكالة ليصلحونه على حساب الضمان أو تقدر تقلبه يدوي بدل ماهو كهربائي أو تصلحه علما بأن سعره حدود 350 ريال ،،،
عموما فيه كم مختص معنا بالمنتدى ومنه أخونا لن أمل من العطاء ، راجع هالموضوعين وتلقى الحل:
فرارات للونيت الجمس 000000 الخادم (http://www.mekshat.com/vb/showthread.php?t=133690)

http://www.mekshat.com/vb/showthread.php?t=129095&page=4

[abosami]

المحترف الله يحييك الجو روعة إنت تعال بس
-=============
ماجلان القلب رايح فيها مو رهيف وبس
عموما يعطيك العافية وأنتظر خبرات الشباب بالموضوع

[Magellan]

أتوقع يحتاج لك تغيير هالقطعه
http://www.pitstopautoparts.com/search/images/prodimage/images/dorman/RB600101.jpg

وتلقاها شابكة في السيارة عند الدفرنس الأمامي بهذا الشكل
http://chevy.off-road.com/chevy/data/articlestandard/chevy/132008/506338/Posi_04.jpg

وهذا الفرار بحيث إذا ضغطت على 4h يحول العزم للقطعه اللي باللون الأحمر ويشبك الدبل
طبعا فيه شركات بأمريكا تسوي لك إصلاح كامل ومضمون مثل 4x4 Posi-Lok اللي تحوله من أزرار إلى عصا ميكانيكية وتلغى المشاكل الكهربائية...

http://www.arb-up.com/files/arb-up-2008-1/M2e22350.jpg
شف الصورة بالأعلى قدر يحوله من كهرب إلى عصا
لكن وين تحصل أحد يرهمها هنا ...
وخصوصا بالشرقية التعيسة ، لكن أتوقع بالرياض والقصيم تحصل
والله أعلم

[abosami]

ياملا العافية يا ماجلان
ومع هذا انتظر تجارب الشباب لعل الأمور أهون من كذا

[Magellan]

طيب شيك على الفيوز يمكن إنها فيها مشكلة
الشيء الثاني دبل الكهرب حراري يفصل متى ماإرتفعت درجة الحرارة ، الأمريكان تغلبوا عليها وحطوا منتج 4x4 Posi-Lok ، بس الله يعينك يلزمك تركب عصا قير في الغمارة

[abosami]

ماجلان لن أنسى فضلك علي يالغالي

[مداوي الهلي]

شف وانا اخوك اولا الدبل ماعنه غناة ولا الومك اذا ضاق صدرك

ثانيا انا عندي يوكن 2004 وصار الدبل يشكل عندي يعني كل ما شغلت السيارة لازم

اشيك على الدبل مرة تلقاه على الخفيف ومرة على الثقيل ومرت اللمبة طافية والدبل ما يشتغل

رحت للوكالة الزخوني بـ 3000 ريال وما سويته

المهم رحت للخضرية في الدمام عند ورشة شالنجر التقوى اول ماتجيك محطة تسهيلات على خط الجبيل

تتعداها وتلف بعدها يمين تلقى الورشة على يدك اليسار اسأل عن المعلم ابو يوسف سوري

صلحوا الدبل وغيروا قطعة كهربائية فيه شغل اليد 400 والقطعة 200 والحين زي اللوز والحمدلله

[Magellan]

شف وانا اخوك اولا الدبل ماعنه غناة ولا الومك اذا ضاق صدرك



ثانيا انا عندي يوكن 2004 وصار الدبل يشكل عندي يعني كل ما شغلت السيارة لازم


اشيك على الدبل مرة تلقاه على الخفيف ومرة على الثقيل ومرت اللمبة طافية والدبل ما يشتغل


رحت للوكالة الزخوني بـ 3000 ريال وما سويته


المهم رحت للخضرية في الدمام عند ورشة شالنجر التقوى اول ماتجيك محطة تسهيلات على خط الجبيل


تتعداها وتلف بعدها يمين تلقى الورشة على يدك اليسار اسأل عن المعلم ابو يوسف سوري



صلحوا الدبل وغيروا قطعة كهربائية فيه شغل اليد 400 والقطعة 200 والحين زي اللوز والحمدلله



اللهم ياساتر 400 ريال عشان تغيير المحول الكهربائي أو الفرار أو الحساس
تراه ياخوي سهل تغييره ،والبعض يغيره بنفسه، فيه صامولتين تقدر تشيله وتغيره
لكن الحل اللي بينسيك المشكلة هو تحويله لعصا والمحول تقلبه إلى محول ميكانيكي لا يشتغل إلا بإستخدام اليد ويحتاج له يفتح فتحة في الوسط داخل الغمارة ويركب عصا للقير(مثل جيب الباترول)..
لكن السؤال هل فيه احد يقدر يغيره بالسعودية؟

[abosami]

يعطيك ربي الف عافية أخوي العزيز مداوي الهلي على المشاركة الرائعة ويعلم الله أنك أفدتني بشكل كبير وجزاك الله خير
===================
ماجلان ياخوي مابي أغير الدبل هي غصب (( أمزح )) الف شكر على تفعيل الموضوع يالغالي

[abadee]

نفس المشكلة واجهتني في الثمامه وغرز في الرمل وتطلع لي مسج اصلح الدفع الرباعي المهم طلعت ولفيت جميع الورش كلهم قالو غير قطعه قيمتها1500 ريال
وودينته للوكاله الجميح غيرو القطعه ب 600 ريال وضمان سنه ولعلمك فيه عيب مصنعي في القطعه من 2003 الى 2005 والقطعه الي يركبونها الجميح معدله ومضمونه ولاتخلي احد يلعب في موترك الأشياء الغير واضحه خلها للوكاله قطع اصليه وضمان وسعرهم معقول جداً وله سنتين معي زي الحلاوه

ولا تفكر تشتري تويوتا والله ازعل منك مافيه مقارنه في الراحه وستهلاك الوقود ورخص القطع والسعه

والله يوفقك وتقبل تحياتي ،،،،،،،

[abosami]

يعطيك الف عافية أخوي abadee على المرور والمشاركة

[سوبر VTC]

احب ان ادلي بدلوي كان معي جمس 2001 و كان ماشي 25000كيلو وولعت لمبة افحص الدبل و ادخلته الوكاله يعني على الضمان و غيروا الحساس لونه اسود اللي يعشق ترس الدبل مكانه يمين القير و هم بحجم علبة الماء لتر واحد المهم ضبط الموتر لكن احيانا للمعلومية تخرب ازرار الدبل اللي يسار الدركسون و تغيره من التشليح
و اذكر كنت في النفود امشي بالدبل الخفيف و جاء غراز شديد ثم شبكت الدبل الثقيل لما طلعت من النفود طفت لمبات الدبل:mad: :mad: اللي يسار الدركسون يعني ما اقدر افصل الدبل قمت فتحت غطاء الفيوزات اللي في الكبوت يسار المكينة و ابدا افصل و اشبك فيوز الدبل و الكتاوت حق الدبل و اشبك عدات مرات:confused: :confused: :confused: فاشتغلت اللمبات:D :D و فصلت الدبل و ستر الله
تحياتي لك:) :)

[abuziyad3]

موضوع مفيد

ألف شكر للجميع

[faris2006]

انا عند تاهو 2007م حصل لي ماحصل لك
طبعا داخل للطعوس بدون ما تفر فرار الدبل يعني حطه علىh2 احمد الله انه شبك
المرة الثانيه خله على الاوتو اقل شي
لانه كهرباء يشبك عند اي حركه لو كانة بسيط
والسيارات كل دبلاتها كهرب
كسعوديين او خليجين او عرب مانرج الكتيب الي جاء مع السيارة
عند ما تحصل اى شى ما نرجع للكتيب
انا اى شي يحصل في السيارة ارجع للكتيب واذا ما فهمة اتصل على الوكالة وهم يفهمونك

انا انصح الكل الرجوع الى كتيب المالك