لأهل الباث والخبراء بالدفرنس او التبخير

[عبدالرحمن السالم]

السلام عليكم .. وآسعد الله ايامكم بالخير والصحه والعافيه
سؤالي عندي الدفرنس الخلفي فيه طبقه من الزيت فوق ومتجمع صاير كأنه شحم سألت واحد من الزملاء من إلى لهم الخبره قال طبيعي هذا من السرعه ويسمي ( تبخير )
والله رحت وغسلته بستم ماء وصابون والحمد الله راح .. فا ما ادري هل هو طبيعي ووش سالفه التبخير هذاا وموتري باثفندر2005 قير عادي

تقبلوا خالص التحايا

[أبو بندر 2005]

أخوي دحيم عااااااااااااادي جدا وهذا من كثر المنوفر :redcar: :redcar: :redcar: و السرعة
و الله الله بالركادة ,بالتوفيق .

[فيصل الحافي]

دحيم تشم ريحة زيت عندك في الغماره اذا سافرت على الموتر ؟؟؟

[عبدالرحمن السالم]

هلا والله بأبوبندر

والله تخبر الواحد لاراح نفود نظيفه يتحمس ويفحط شوي هههههه

ابشر والله ولاهنت يابعدي على مرورك وردك ماقصرت وعساك دوم سالم

[عبدالرحمن السالم]

هلا والله ومسهلا اخوي فيصل

الله الله اشم ريحه بس عقب ماغسلته راح عاد طلعت يوم الخميس لنفود الطوقي وكأنه رجع بس نزلت تحت الموتر ومسحته

والله يحييك وشكرا على مرورك وعساك دوم سالم

[escape_man]

احد ينوفر على هالمخيس الباث

والله انه يجيب علة التسبد

خشته طامنه ويدق على ادنى طعس

المهم ياطويل العمر

انا موتري 2005 مخزن ..يعني توه مامشى شي

واشوف تهريب عقب 40 الف

رحت للوكالة وقعدت لهم ليـــــــــــــــــــــــــــــن فهمت السالفة

شفت اللي الي طالع من الدفرنس

في بدايته سده نحاسية

دورها .. اذا احتمى الدفرنس فوق العادة تعمل تنفيس لكن مو بالوضع الي صار لي وصار لك الان

تروح لهم يغيرون هالسدة ويرجع موترك تمام التمام

[الحمض]

يا اخوان لاتحرصون كثير وخلو عنكم الوسوسه مادام الموتر ماشي الحمد لله

[.أبوعبدالرحمن]

الجور على الموتر هو اللي يسبب المشكلة هذي



لكن الواحد يركد شوي ولا يجور على الموتر 24 ساعة



وان شاء الله حلها بسيط ومثل ماقال اخوي بن غييثات اللي يقول ان الباث وجهه قريب من الارض هههههههههه



الله يهديك يا بن غييثات ويوفقك من ما وديت وجهك قل امين

[عبدالرحمن السالم]

هلا والله ومسهلا اخوي بن غييثات
حرام عليك اذا مانوفرت بالباث اجل وش تنوفر به
وبعدين وجهه ماهو طايح الحمد الله ما اشتكيت منه ابد ولا قد لزق وجهه بالارض الحمد الله هههه

بعدي والله انت بمر الوكاله واغديهم يسدونه والا يشوفون لهم صرفه

عموماً موتري ماشي معي مثل الحلاوه الحمد الله والله لايضره بس حبيت استفسر من الوجيه الطيبه شرواك وشروا الموجودين

لاهنت يابعدي

[عبدالرحمن السالم]

هلا والله ومسهلا اخوي الحمض

فديت قلبك والله .. مهنا وسوسه بس حبينا نستفسر والله منك الرجال إلى مثلك وشرواك

ياعزوتي ماقصرت واشكرك على مرورك

[عبدالرحمن السالم]

هلا والله ابوعبدالرحمن

والله اني راكد بالديره بس لا طلعت للنفود وخاصه إلى مايطبه احد ونظيفه استلج ما اعرف اسوق بالركاده هههههههه

ابشر خلاص نبي نركد قضينا :)

ماقصرت على مرورك الكريم وجعلك دوم سالم

[الحمض]

اخوي دحيم اشكرك على هذا الرد الطيب وانا معي باث 2003 كل سنة تجيني مشكله فيه وخاصة المكيف ومع ذلك الموتر ولله الحمد لاباس به

[alamri111]

السلام عليكم
الي عندك مصنوع في اليبان واللا امريكي ترى من يوم انتقلت صناعة الباث فاندرفي امريكا إندمر بس شكل
وفخامه الباقي ما عندك أحد