وش افضل vx.r او gx.r او همر H2

[ابو داحم]

السلام عليكم
يا ناس انا محتار بين ثلاث سيارات اما vx.r او gx.r او همر H2




ولكم مني جزيل الشكر

[نجمة سهيل]

ابو داحم ،

اولا الاسم هذا يملكه شخص عزيز وغالي ، قبلك ـ

وله الحق في الاحتفاظ فيه ، فأرجوا ان تأتي بالحل في القريب العااجل .

اما بالنسبه لسؤالك ،

اذا كنت قادر على الهمر ، خذه وتوكل على ربك ، لكن لمعلوميتك

قطع غياره نار ، وان طفى عليك بالبر (( في الاحلام:D)) لانتب عارف تفك فيه ولاشي ،

اما التويوتا ـ الفكسار والجكسار ، لولا قدر الله وخرب عليك يمديك تشيك عليه يمين يسار ، بعكس الهمر

الي ماتعرف فيه ولا قطعه ؟


بعدين يكفيك فرق السعر . فكسار فل كامل قير عادي 186الف ريال ،

جكسار فل كامل قير عادي 140الف ريال ،

همر 270000الف ..

ولمعلوميتك ترى الهمر تعبيه فل ب120ريال ، وياله يمشيك 300كيلو ـ


لكن كانك تبي النصيحه ، خذ لك فكسار وتوكل على ربك ،

تحيااتي ..

[Bader-M]

هههههههههههه
صدقني الهايكلس احسن:D
ياخوي
وش جاب الهمر لتويوتا
همر سياره مخصصه للبر فقط ( ما يصلح تكون سياره خصوصيه )
اما الجيب التويوتا
ينفع في البر
وكذالك ينفع للعوائل
وايضا سيارة كشخه

[الفرعاوي]

وعليكم السلام ورحمة الله وبركاته

اخوي ابوداحم

نصيحة ياخوك لا تاخذ هامر ولا تقربة ..

اما بالنسبة للتيوتا .. فعزالله يازين VXR لكن على شرط الاستبنة ورا مهيب تحت ..

[Y&Y_4X4]

اولا
ليش تزعل نجمة سهيل عليك ولابد تنفذ ما ذكر ! :( وبالحال ؟؟

اما من طرف السيارات التي انت ذكرت

انا اقول اذا تقدر على سعر الهمر الله يقويك وخبرنا بعد تجربتك مع الهمر ؟؟؟

اما انا انصحك لاتعدى الاند كروزر

[الشقردي]

السلام عليكم

اشوف اغلب الشباب عندنا يميلون للتايوتا واذا جزمت على التايوتا ومعك فلوس فتوكل على الله وخذ VXR ويمكن يجيك واحد يقول خذ GXR لانه اوفر بنزين واوفر لك بالقروش , بس أحب ابين انه من واقع التجربة اتضح لي الاتي:
1- مكينة الـ VXR أقوى V8 وأهدى صوت

2- بالنسبة لصرفية البنزين تكاد تكون متساوي في كل الاحوال (خطوط, طرق برية, داخل المدينة) وان حصل فرق فهو لا يذكر أبدا مقارنة بالميزات. وأخر مقارنة تمت بالنسبة لي على الطبيعة بين VXR98 /GXR2002 يوم الخميس الماضي كاشتين سوى والمسار كان (الرياض-روضة نورة-الحقاقة-الشوكي-التنهات) مع ملاحظة ان الطريق السريع الوحيد هو من الرياض الى روضة نورة والباقي جبال ,شعبان ,طرق برية.

3- من ناحية قطع الغيار صحيح ان الـVXR أغلى ويمكن أعقد شوي في الصيانة لكن من واقع تجربتي لمدة خمس سنوات مع الـVXR ما غيرت أشياء كليفة اللهم الا القطع الاستهلاكية.

4- بالنسبة للاعطال فهي قليل جدا ولا أذكر انها وقفت به وسط البر او في المدينةولا حتى شفت مثلها متعطل على الطريق (نسبيا).

5- بعض الشباب يمكن يقول ان GXR فية مساحة أكبر في الكبوت وبامكانك تركب كمبرسر أو منفاخ هواء, أنا في نظري ان هذي ما تقارن بالمزايا المذكورة للVXR فضلا عن انه بامكانك تجد بديل للكمبرسر او المنفاخ.

6- يفضل اقتناء القير الاتوماتيك (وهذا أنا مجربة ونفس اللي معي) ولا تتخوف منه لان العادي بيتعبك اذا كنت بتستخدمه داخل المدينة وبيثقل عليك الموتر.

7- كما قالوا الشباب يفضل أنك تاخذ استبنه فوق (شنطة) , مع ان العالم طايحين في خلفية اللكزس لكن مشكلتها الاستبنة اللي تحت نازلة عن الصدام وتحك معك.
بالاضافة الى انه لا ينصح اخيتار الفل الكامل (هيدرو ليك,دركسيون كهرباء,ومساعدات متغيرة الاوضاع) لان الهيدوليك عمره محدود واذكر كم من مرة اشوفة في الوكالة متعطل.وزيادة الالكترونيات في السيارة ماهي من صالحك على المدى البعيد.

باقي أقول السعر التقريبي للـ VXR3 موديل2003(استبنه فوق (شنطة) ,تماتيك ,ونش ,فتحة ,كبوس ,زينون ,مثبت سرعة, قفل دفرنس(هزاز)) 158000عند البازعي في الرياض هذا اذا ما خلص.

آسف طولت أكثر من اللازم... بس هذي نصيحة مجرب
أرجو انك استفدت
سلام

[Y&Y_4X4]

كلام موزون وكله صحيح

بس يبدو لي انك ماجربت الـ GXR

مع العلم اني اوافقك في كل ما ذكرت واضيف بعد اذنك!

الـ GXR ارخص قطع غيار واسهل صيانة وأقل وقت وفلوس هذا مهم !

المكينة اهدى صوت نعم اما من ناحية القوه ماهناك الفرق الي يذكر وخصوصا في الرمل لأنه اكثر وزن.

والبانزين مثل ماتفضلت !

اما بالنسبة للسبير الي تحت غير ( استبدل ) الجنط وتنحل المشكلة نهائيا.

اذا اتفقنا انا وياك على الكلام هذا بقي شي مهم المساحه التي انت ذكرت للكمبرسور وغيرة من الاضافات فهي فعلا مهمه ؟ وخصوصا لراعين المكاشيت والقنص يجب ان لا تهمل !

بما انك لم تهتم بلاضافات الالكترونية واتفق معك.

الشي الثاني سهولة بعض اعمال الصيانة للـ GXR التي يستطيع المستخدم القيام بها بنفسة لسعت الكبوت ومحدودية التعقيد .

وبانسبة لطول العمر بأذن الله الخمس سنوات او اكثر فهي بالنوعين متوفرة نضرا لجودة الصنعة وخامتها الطيبة مع توفيق الله سبحانه .

اخيرا الصحيح اني استفدت مما ذكرت بارك الله فيك !!..

[ابو شكاع]

فرق كبير بالسعر على قولة الشباب

وانت عاد استخر الله

واذا تبي رايي فهو كالتالي

الموتر اللي تحس انك تميل له اكثر اشره ولا يهونون الزكرت اللي ردوا قبلي

والله يوفقك وانا اخوك

[الشقردي]

الاخ Y&Y_4X4 المحترم <-----(خطاب رسمي) :)

مشكور على هالمديح والاسلوب الرائع يا غالي.

وفي البداية نحتاج وجهة نظر أشخاص جربوا الـ GXR عشان نستفيد منهم ويذكرون لنا الميزات اللي وجدوها كي يتكامل الموضوع وتعم الفائدة.

الخص كلامي فيما يلي:

- ودي أقول لك صدق اني ما جربت GXR في الطرق البرية كثير ومثل ما تفضلت يمكن ما تحس بالفرق على الرمل لكن مكينته كانت أضعف(V6) بشكل ملحوظ في الزفلت وداخل المدينة سواء العادي أو الاتوماتيك.(كلهن مجربهن)

- بالنسبة للاستبنه تحت وتغيير الجنط الى جنط أقل عرض صحيح يقلل الحكات اللي في أسفل الموتر ولكن ما يخفيها نهائيا لسبب بسيط هو: ان مستوى الاستبنه ما زال نازل قليل تحت الصدام الخلفي.( مع ملاحظة انك لو حطيت تانكي ماء 90 لتر بدل الاستبنة اللي تحت ما راح يكون أنزل من مستوى الصدام الخلفي.يعني لوكنت واقف بسيارتك وراه منتب شايف شئ)
**أحب أنبه الى انه يوجد مشكلة غالبا ما تحدث في الصدام الخلفي (بالنسبة لي) أنه يحك بدون شئ في الطعوس والاماكن الوعرة وشلون لو مع استبنة هذا لا شك انه يؤثر على جودة الكفر ويمكن يعدمه.

وفي اعتقادي في الاخير ان صاحب الحجة هو اللي يحدد المواصفات اللي تهمه حسب استخدامه للموتر ان كان راعي بر أو داخل المدن فقط.

سلام...