تكفون ابغا حل السيارة ماعاد اصبرت عليها

[محمدالناصر]

السلام عليكم ورحمة اللة وبركاتة
تكفون يالربع ابغا فزعتكم عندى بترول جنوط كروم وجنني بالرجة من السرعة 90 الي 100 يرج رجة قوية ومن يوم اتعدى المية تروح الرجة والورش كلما جيتهم قالولي رصص وراحت فلوسك ياصابر في الترصيص وكلما رصصت عند بنشرى قال الي قبلي ماعرف يرصص واللة انى رصصت اكثر من خمس مرات ولا نفع كشفت علي الهوبات سليمة الرمان سليم عمود الدبل مفصول بفرارات
تكفون يالربع الى قد مرت علية هذى المشكلة يعلمنا اللة يجزاة بالخير

[ابا الأفلح]

حياك الله اخوي محمد لا تدور على ميزان العظيب القديم الي في الصناعيه القديمه يحلها باذن الله ....

[هويدي]

وعليكم السلام ورحمه الله وبركاته

كفراتك وشي بالون؟

الجنوط تجاريه او اصليه؟

رصص ارضي عند العظيب وبتدعيلي ان شاء الله

[مساير الليل]

إذا كانت جنوطك تجاريه لاتتعب حالك من الجنوط


أو من الكفرات يمكن قديمة

لو كانت جديدهـ قد تكون المشكلة منها إذا تعرف احد معه مثل سيارتك تبادل أنت وهو كفرات وشف تفرق معك ولا لا

[abu hlal]

غير المساعد ..حق الاذرعه وشيك على البيرنقات ..الكفرات الاماميه

[ذيب صعافيق]

ارى انك تسوي مبادله للكفرات الاربع مع الجنوط مع احد المعارف 0وكل واحد يجرب كفرات الاخر وستظهر النتيجه00

[فني الشروكيات]

إذا كانت الرجة بسيطة:

شيك على الجنوط لا يصير فيها شي جايه عفط ولا شي.، وشيك بعد على الكفرات لا يكون فيها تحبيل..
إذا كانت الرجة من 100:80، هذا ترصيص.



أما إذا كانت قوية:
شيك على جلب عمود الرجاج.
شيك على مساعد الدركسون، (ترى غالب الرجات القوية تكون بسببه)

[الشقب1]

السلام عليكم اخوي مايبيله ترصيص هذي جنبيل رودد ونصيحه لاتركم الجنبيل الاصفر ركب جنبيل الوكااله اضن انه با350 ريال

[shaheenshah]

اشياء كثيرة تسبب الرجة ويصعب تحديد السبب حتى ان الجنط لما يكون لاصق فيه طين يسبب رجه

[محمدالناصر]

اللة يبيض وجيهكم ماقصرتو
ابشركم رحت لي الصناعية ورصصت ترصيص ارضى علما انها اول مرة اسمعبة وابشركم انها زانت والحمدللة
والف شكر لكل من شارك بموضوعى وافادنى

[عبدالله ابو]

اللة يبيض وجيهكم ماقصرتو
ابشركم رحت لي الصناعية ورصصت ترصيص ارضى علما انها اول مرة اسمعبة وابشركم انها زانت والحمدللة
والف شكر لكل من شارك بموضوعى وافادنى




طيب ممكن تقول لنا وين رصصته حتى تعم الفائده للجميع

[عاشق المهره]

لكي تعم الفائده !!!

ميزان العضيب عندهم ترصيص ارضي (يعني يرصص والكفرات على الموتر)

ميزان العضيب منتشر في الرياض وعنده اكثر من 10 فروع

منها في الصناعيه القديمه وفي طريق الملك عبدالعزيز فرعين

والترصيص اربع كفرات ب80 ريال فقط