ماهي أفضل قهوة لديك؟

[النو]

السلام عليكم ورحمة الله وبركاتة


الموضوع عن القهوه وانواعها
ماذا تفضل من انواع القهوه؟
وكيف تكو حمستها ودرجات اللون ؟
وماذا تضيف عليها ؟
وماهي طريقتك المفضلة لعمل القهوة؟
نود المــشاركة من الجميع لتعم الفائد
تقبلو تحيتي (الــنـو)

[حجيلان]

والله بالنسبة لي عندي قهوة باشنفر رقم واحد هي احسن شئ والبرية الي نابته من الامطار احسن منها اذا حصلته ماهي مغشوشة
الحمسة شقراء مايله الى الغماق شوي
الاضافة عندي الهيل والمسمار (العويدي)و الزعفران وبعض المرات زنجيبل
عمل القهوة افوح الماء بالملقمة ثم اضيف القهوة وازود النار عليها واقصر بطريقة متوالية حتى ماتطيش القهوة لمدة دقيقة او ازود شوي وبعدين اقصر النار وخليه تطبخ حوالي عشر دقايق
ثم تبعد الملقمة عن النار حتى تصفى حوالي دقيقتين ثم ازل القهوة بالدله والدله على النار ثم اضيف الهيل والزعفران والمسمار حتى تاخذ له قلبه او قلبتين وبس مادري ليه حسيت اني باختبار تعبير:o هههههههههه
مشكور اخوي على الموضوع:D

[المشترك]

بنسبه لي يا اخوي النو افضل الخولانيه وتكون الحمسه واحد ونص ولهيل يكون اريكي ولمسمار مطحون وفدله زنجبيل وزعفران ويا سلاااااااام سلم

[الرملي333]

انا بالنسبه لي نفس طريقة اخوي حجيلان لكن لاأرغب اضافة المسمار ..

[ممتر البران]

ما مثل المسمار والزنجبيل ولا بد بريه والحمسه شقرا تغامقها
والطريقه وحده مثل ما تفضل حجيلان الا ان البهار يكون بالدله قبل لا ازله
تحيتي لكم
ابو سعد

[ابو دنانه]

اذا مافيه حمسه قهوة وزعفران وهيل مابتسمى قهوه ياالله شوقتوني لها

[ابو دنانه]

اذا مافيه حمسه قهوة وزعفران وهيل مابتسمى قهوه ياالله شوقتوني لها

[ممتر البران]

ان كانك على ما قال فاضي احمسها وبردها ودقها وعين من الله خير
تحيتي لكم ابو سعد

[الشقب1]

القهوه اليمنيه .... بس ابشرط الحمسه رقم 2 .

[الوسيطى]

أفضل قهوة البرية اليمنية اوالخولانية والحمسة تكون متوسطة
وافضل معها الهيل والزغفران

[mutleb]

بالنسبة للنوع
افضل البرية اليمنية أو الخولانية

بالنسبة للحمسة
افضل انه تكون وسط وتميل للثقل شوي بس
بالنسبة للاضافات على القهوة
هيل ومسمار بس من دون زعفران وان حصل زنجبيل احياناً

الطريقة (( الزبدة ))
أول شي ياطويل العمر
اطلع شوي جميرات على جال الضو ثم اجيب المحماسة واحمس القهوة على مزاجي
ثو اجيب المبرد واحطه به واذا بردت حطيته بالنجر ودقيته
ثم احطه بالملقمة واصب عليه ماء حار واخلية تطبخ عشر دقايق تقريباً
ثم ادق الهيل والمسمار واحطه بالدلة البغدادية
وازل القهوة بالدلة (( بدون طبخ الهيل والمسمار ))
واخلية تصفي شوي
وبعدين تقهو هنيئاً مريئاً .......... وادعلي ;) ;) ;)

[الدبل الثقيل]

القهوة النبرية الهندية وارد المستنير والحمسة ثقيله وطحنها في وقتها طحن خشن .... الطريقه ألقم القهوة وأخليها تطبخ مابين 10دقايق الى ربع ساعه وفي نهاية الوقت احط عودين قرنفل مجروش واخليه يطبخ دقيقه وبعدين احط الهيل قلبه وحده واطفي النار واخليها تركد دقيقتين واصفيها في الدله .

[النو]

الدبل الثقيل سعد مساك
اول مرة اسمع عن القهوه الهندية وين القاها

[الرملي333]

مذاق القهوة على مدة الطبخ زود المدة شوي وشف الطعم

[يحيي بن حمد]

قهوتي هي ام حبال الهندية الحمسة تكون غامقة ( مع هيل

[راع الفيضة]

بما اني جديد في المنتدى وتعتبر هذه المشاركه هي الثانية احب ان اعطي من باب خبره في تصليح القهوه بعض الشي عن القهوة التي هي رمز الكرم العربي عامة واهل الجزيرة خاصة
اما عن احسن نوع للقهوةهي:القهوة البرية القطما حبه صغيره(سعرها28_30 للكيلو)
اما عن حمستها:تحمس على نار هادئة حتى اللون البني ماقبل الغامق
اماعن تصليحها:يغلى الماءفي ابريق خاص للقهوه مقاس 12 يضاف فنجال قهوه وعليك الحساب في باقي المقاسات
اما عن المده:تترك لمدة 17دقيقة ثم توضع من على النار لمدة دقيقتان ثم بهر الدله ومشروب العافية
هذا ولكم فائق احترامي وتقديري
(((راع الفيضة)))

[al_shamere]

السلام عليكم

احسن قهوه البريه واحسن مكان خذيتها منه سوق الحفر وحمستها شقرا والقهوه تضبط ان حبكتها مع الزعفران والمسمار والزنجبيل لاكن اتقلل الاضافات واطول طبختها 0

[الدبل الثقيل]

حياك الله يا النو .... المعذره على التأخير كنت مشغول ومسافر ...
القهوة الهنديه اوالنيباريه .... وكلائها في جده المستنير و باهادي و المارس واللهيبي بحايل ... لكن في جدة ماتاخذ الا جمله يعني 200 خيشه وانا من سكان جدة ...... فتحصلها تباع بالخيشه في الرياض الديرة عند الحصين ويمكن غيره وياليت احد من الرياض يوضح .... وتحصلها في بريدة بالجردة عند محلات تصليح الاسلحه في دكاكين تبيع بن وهيل تحصل بالكيلو وبالخيشه وفيه محامص ممتازه في وسط المواقف حقت السوق اللي فيه محلات القهوه واسمها محامص الجربوع فيها يمني شايب وطيب والمحل كأنه صومعه في وسط رصيف المواقف ....
وفي حايل وكيل لها اسمه اللهيبي في السوق اللي شمال الشرطه وجامع الملك وقريب من النقل الجماعي ...
وقيمة الخيشه 5كيلو عنده 70ريال هذا الكلام شوال الماضي . والمستنير 10كيلو 145ريال وباهادي 10كيلو 140ريال .
وحياكالله دايما .

[نجم وسماء]

السلام عليكم

أرجو أن يحذر الذين يكثرون من شرب المسمار ( العويدي )


تحذير من المستشفى التخصصي:
مادة في القرنفل تتسبب بإتلاف الأنسجة وتسمم الكبد
الرياض: منصور الحاتم
كشف عدد من التجارب المخبرية التي أجريت في مستشفى الملك فيصل التخصصي ومركز الأبحاث في الرياض عن وجود مادة في القرنفل أو ما يسمى في بعض المناطق السعودية بالمسمار أو "العويدي" تتسبب في "إتلاف الأنسجة وحدوث سمية في الكبد بينما يتم استخدامه مع بعض الأغذية الشعبية مثل الرز وإضافته إلى القهوة كبديل للهيل نظرا لانخفاض سعره والنكهة المتميزة التي يضفيها عليها , بالإضافة إلى بعض الاستخدامات الأخرى.
وأكد استشاري السموم وتحليل الأدوية والأعشاب مدير المختبر المرجعي للسموم والأدوية المعدلة وراثيا في مستشفى الملك فيصل التخصصي في الرياض الدكتور محمد الطفيل أن التحاليل التي أجراها المستشفى على مادة القرنفل أثبتت وجود مادة " يجنول " التي تتسبب في تهيج الأنسجة وتليفها وإتلافها إذا تم تعاطيه بكميات كبيرة وعلى فترات طويلة, ويتسبب في سمية الكبد للإنسان بفعل زيت " يجنول " الموجود بنسبة 70 % - 85 % في الحبة الواحدة من القرنفل, مشيرا إلى أن الأمر يزداد خطورة في حال تعاطيه من قبل شخص يعاني أصلا مشكلات في وظائف الكبد , في حين نفى وجود تأثيرات سلبية نتيجة تعاطيه بنسب قليلة وفي فترات متفرقة ضمن البهارات أو في القهوة.
وحذر الطفيل من استخدامه بكثرة , خاصة عندما يعمد كثير من الناس إلى وضعه على السن المتهيج على الرغم من قدرته على تخدير الألم إلا أنه قد يؤدي إلى تلف أنسجة اللثة إذا ترك لفترات طويلة دون أن يشعر بذلك من يستخدمه.

ولكن بحثت في أحد المواقع فوجدت التالي

تناول القرنفل

* قبل تناول مستحضرات القرنفل وزيوته (وليس مجرد إضافة كميات قليلة إلى الطعام أو القهوة) فإن هناك من عليه أن يستشير طبيبه في الأمر، فمن لديه اضطرابات في ضغط الدم ويتناول علاجات لذلك أو من لديه مرض السكري ويتناول أدوية لخفض نسبة السكر في الدم أو من لديه أحد أمراض القلب ويتناول الأسبرين أو غيره من الأدوية التي تتسبب في زيادة سيولة الدم، فهؤلاء عليهم الحذر. والسبب أن القرنفل لديه خصائص في خفض مقدار ضغط الدم وخفض نسبة السكر في الدم و كذلك في زيادة سيولة الدم، كل هذه الآثار الطبية تتطلب من المريض والطبيب التعاون في عدم المعاناة منها كالانخفاض الحاد في نسبة سكر الدم مثلاً نتيجة تناول كميات مركزة من القرنفل بالإضافة إلى الأدوية الخافضة للسكر، وهكذا بالنسبة لسيولة الدم وضغط الدم.


نسأل الله السلامة

[شامخ ألهيلا]

والله القهوه الي طال عمركم مستهلك وصارت مزاج وقمة الان
هي
باشنفر
والحمسه طال عمركم الين تذهب وتصير يميل لونها الى الذهبي الغامق
وبعدها
قرب طاحونة مولنكس << عطية الله
ولاتنسى الزعفران والهيل الامريكي ابو حبه كبيره وهو اغلى شي
وهاات بعده ثلاجة تايقر وزل القهوة فيها

وبالهناء والعافيه
ولاتنسى معها خلاص ولا صقعي يالباااااه

اقول بقوم اسوي قهووة

احيااكم الله

[الطبشي]

السلام خولانيه واحد ونص الحمس.... والهيل والزعفران ............................ والخلاص الذهب......

[جبل راف]

يقول الشاعر الكبير / عبدالله بن عون


مع هجعـة اللـي يختفـون أول الليـل

...........................الـغـايـبـه دايــــم يـغـيـبـون مـعــهــا




النـفـس تـاقــت للـسـمـر والتعـالـيـل

............................والعين أشـوف النـوم خالـف سنعهـا





وطاب الجلوس بجانب النار ياشعيل

.........................وحط الحطب في ترعة من ترعهـا





وإليـا استـوى للجمـر فيهـا تحامـيـل

..................................وأقـبــل تواهـجـهـا وقـفــى ولـعـهـا





درج على المحماس من غير تعجيل

...................................بــريـــة دوب الـيـمـانــي قـطـعـهــا





أول قـطـاف سـفـوح شــم الأكـاذيـل

..................................اللـي جذع هـم الوحـش مــن فرعـهـا





شـــم يسـاقـيـه الـسـحـاب بهمـالـيـل

....................................لـيـن يتـحـدر سيـلـهـا مـــع تـلعـهـا





وتــرى لحمستـهـا نـظــام ودوالـيــل

....................................وشريعـة يمشـى بأثـر مـن شرعـهـا




أول بـدايـتـهــا مــدافـــع مـخـالـيــل

........................................ومـسـرى جمامـيـل بغـالـي سلـعـهـا





وسوقن كما سوق الجمال المحاميـل

.........................................مـازال حمـوى الـنـار مـاقـد لذعـهـا





وإليـا تطلـق مــن شـذاهـا زعاجـيـل

....................................وبشت عرق واللون الأشقـر نشعهـا





فالحـال سهلهـا عــن الـنـار تسهـيـل

....................................حتـى لظـى المحمـاس مــا يدّرعـهـا





وغير لها يا شعيل مسرى الجماميـل

......................................بـطـراق زلـبـات(ن) تـزايـد فزعـهـا





تدريجـة الحيـران ومـطـارد الخـيـل

.........................................هـــذي طـريـقـة حمـسـهـا واتبـعـهـا





وعقبـه تميلهـا عـلـى النـجـر تميـيـل

......................................جـذاب روس الـقـوم مــن منتجعـهـا




....................... الخ القصيدة

[ماجد الشمال 1]

القهوة التركية:good2:

[faiz-111]

لي فتره طويله استخدم الخولاني اغير احيانا باانواع اخرى وارجع للخولاني من جديد احس طعمها غير واحلى الموجود لكن بالرياض قبل فتره مريت سوق الجمله للقهوه طبعا يبيعون بشوالات كبيره المهم الكيلو بخمسين الى 55 ريال النوع الطيب فيه خولاني صيني قيمته ب 15 ريال الى 20 واكيد طايحين فيه المحامص والبيع ب 30 يعني الضعف المهم انه صيني واستغرب وجود قهوه صيني المهم فريت كل محلات القهوه بالسوق وكل صاحب محل ادردش معه شوي ناخذ منهم شوي معلومات
فيه خولاني يستورده الحميضي ال 5 كيلو ب 175 كيلو شكل حبه نظيف وبجربه ان شاءالله هاليومين القهوه كيف واحيانا تعتبر ادمان لكن لكل شخص وطريقته ومااحب مع القهوه الا الزعفران فقط وفيه زعفران اسمه الاعماق بصراحه شريت الكثير من الانواع وكلها مانفعت معي غير هالنوعيه قبل كم سنه كانت ال 6 قرام ب 15 ريال الحين في حدود ال 90 ريال وقد شريته ب 115 ريال ارتفاع صاروخي بس الشكوى لله يعطي طعم غير شكل للقهوه
ان شاءالله هاليومين بروح لسوق القهوه وبعطيكم خبر عن الاسعار طبعا تجارنا يخافون الله ماراح يرفعون السعر قبل رمضان ولا لا

[aa_arfaj]

افضل قهوة قهوة خولان(نادرة) وبعدها قهوة يافع
محموسة حمسة شقرا
لاهي الخفيفة اللي ماتتذوقها زين ولاهي الحمسة الثيقلة اللي تثقل الطعم
تطبخ زين ثم تبهر بهيل بس
فنجال يعدل مزاج اكبر راس

[seyase]

بالنسبة لي امزج نوعين من القهوه البري والخولاني يعني لو اخذت نص كيلو ازود عليه نص من النوع الثانيبالنسبة لحمستها احبها شقراما احبها مطحونه بالمره افضلها تكون مجروشه طبعا اتركها تطبخ على النار حول عشرين دقيقة واحيان اكثر بس على نار هاديه بالنسبة للاضافات زعفران وقليل هيل وبشع وخولجان وجوزة الطيبواو على ريحت القهوة تشمها بالكتابه

[جوبتير]

http://t3.gstatic.com/images?q=tbn:nJI_-I9GzK3hgM:http://www.ameinfo.com/images/news/9/37229-maxwellhouse.jpg (http://www.google.com.sa/imgres?imgurl=http://www.ameinfo.com/images/news/9/37229-maxwellhouse.jpg&imgrefurl=http://www.ameinfo.com/ar-67544.html&usg=__rJip88beSChxmuNj-ZtT1zFSEnQ=&h=320&w=220&sz=23&hl=ar&start=3&um=1&itbs=1&tbnid=nJI_-I9GzK3hgM:&tbnh=118&tbnw=81&prev=/images%3Fq%3D%25D9%2585%25D8%25A7%25D9%2583%25D8%2 5B3%25D9%2588%25D9%258A%25D9%2584%2B%25D9%2587%25D 8%25A7%25D9%2588%25D8%25B3%26um%3D1%26hl%3Dar%26sa fe%3Dactive%26sa%3DN%26tbs%3Disch:1)



http://t1.gstatic.com/images?q=tbn:_1l5c6x7e8hQmM:http://farm4.static.flickr.com/3200/2339083807_dbc63eff50.jpg%3Fv%3D0 (http://www.google.com.sa/imgres?imgurl=http://farm4.static.flickr.com/3200/2339083807_dbc63eff50.jpg%3Fv%3D0&imgrefurl=http://www.nationalkuwait.com/vb/showthread.php%3Ft%3D37169&usg=__N5RP4mQxdhCTsmR85D7ceImmEps=&h=371&w=500&sz=119&hl=ar&start=8&itbs=1&tbnid=_1l5c6x7e8hQmM:&tbnh=96&tbnw=130&prev=/images%3Fq%3D%25D8%25A7%25D9%2581%25D8%25B6%25D9%2 584%2B%25D9%2582%25D9%2587%25D9%2588%25D8%25A9%2B% 25D8%25A7%25D9%2585%25D8%25B1%25D9%258A%25D9%2583% 25D9%258A%25D8%25A9%26hl%3Dar%26safe%3Dactive%26sa %3DG%26gbv%3D2%26tbs%3Disch:1)



هذي اجمل قهوة وانا شبه مدمن عليها

اما القهوة العربية
فلا استخدمها الا للضيوف أو بعض الاحيان حسب المزاجيه

وافضلها بالنسبة لي هي

http://www.mekshat.com/pix/upload02/images64/mk35261_shnfr.jpg


والسبب انها مضمونه المصدر والنوع

اما اغلب الموجود في السوق فهو مغشوش
وخصوصا الخولاني علما انه افضل انواع القهوة على الاطلاق ولكن من يقول انه متوفرر فهو لا يصدق
لأن انتاجه من المصدر وهو خولان قليل جدا ونادر وبشهادة اهل البلد

تحياتي لك

[رعد الصحراء]

أفضل قهوه مع العلم تم تجربة عدة أنواع


وماناسبني إلا هذي


وبعد إذن الأخ الغالي / جوبتير


تم سرقة الصوره ;)


http://www.mekshat.com/pix/upload02/images64/mk35261_shnfr.jpg


وهذا مالدي وبانتظار الإفاده من أهل التجربه


تقبل تحيتي

[واوك]

ولله احسن قهوه قهوة امي الله يطول عمرها

[اسير العزوبية]

الله يخليلك امك يارب ....

ومن ناحية القهوة انا كنت اجرب
http://www.mekshat.com/pix/upload02/images64/mk35261_shnfr.jpg



ثم غيرتها ورجعت لخلطه تسويها وحدها اسمها ام صالح لكن للاسف بالاخير تغير طعمها


ورجعت

http://www.mekshat.com/pix/upload02/images64/mk35261_shnfr.jpg

[المغيليث]

احلا قهوه معروفه هرري با شنفر والهيل امريكي جانبو درجه اولي

[فارس البير]

http://www.mekshat.com/pix/upload02/images64/mk35261_shnfr.jpg

هذي افضل قهوه واهم شي الحمسه والتلقيمه خلها على النار من ثلث لنصف ساعه
واخلط معها عند الطحن سبع حبات عويدي وشوي زعفران وشف الريحه في البيت كله

[فارس البير]

http://www.mekshat.com/pix/upload02/images64/mk35261_shnfr.jpg

هذي افضل قهوه واهم شي الحمسه تكون شقراوالتلقيمه خلها على النار من ثلث لنصف ساعه
واخلط معها عند الطحن سبع حبات عويدي وشوي زعفران وشف الريحه في البيت كله